Let Us Adore Him [Dayawon Naton Sia], ni Dana Mario Wood

Enero 9–15

Mateo 2; Lucas 2

Nagkari Kami sa Pagsimba sa Iya

Samtang imo ginabasa ang Mateo 2 kag Lucas 2, hatagi sing atensyon ang bisan ano nga espirituhanon nga mga pagpabatyag nga imo mabaton. Ang mga ideya sa pagtuon sa sining outline makabulig sa imo nga mahibal-an ang importante kag nagakabagay nga mga prinsipyo sa sining mga kapitulo.

Isulat Ang Imo Mga Panghunahuna

Sugod sang adlaw sang Iya pagkatawo, nangin klaro nga si Jesus indi isa ka ordinaryo nga bata. Indi lamang ang bag-o nga bituon sa kalangitan ukon ang masadya nga proklamasyon sang mga anghel ang naghimo sang pagkabata ni Jesus nga dalayawon. Kundi ang isa man ka kamatuoran nga ang nagkalainlain nga matinuohon nga mga tawo—halin sa nagkalainlain nga mga pungsod, propesyon, kag ginhalinan—ang gilayon nga nakabatyag nga magpalapit sa Iya. Bisan antes pa Niya ginsambit ang Iya imbitasyon nga “kari, magsunod sa akon,” nag-inabot sila (Lucas 18:22). Siyempre indi tanan ang nagkadto sa Iya. May madamo nga wala nagsapak sa Iya, kag isa ka maimon nga tagpamuno ang nagtinguha nga patyon Sia. Pero ang mga mapainubuson, tunay, debotado nga nagapangita sang kamatuoran nakakita sa Iya sa kon ano gid Sia—ang Mesias nga ginpangako sa ila. Ang ila debosyon nagainspirar sang aton kaugalingon nga debosyon, kay ang “maayong balita sang dakong kalipay” nga ginpalab-ot sa mga manugpahalab ginpatungod “sa bug-os nga katawhan,” kag ang “Manluluwas, nga si Cristo nga Ginuo” nabun-ag sina nga adlaw para sa aton tanan (tan-awa sa Lucas 2:10–11).

Mga Ideya para sa Personal nga Pagtuon sang Balaan nga mga Kasulatan

Lucas 2:1–7

Si Jesucristo natawo sa kubos nga kahimtangan.

Bisan pa nga si Jesucristo may himaya upod sa Dios nga Amay “sa wala pa ang kalibutan” (Juan 17:5), sugot Sia nga matawo sa kubos nga kahimtangan kag magpangabuhi kaupod naton sa duta. Samtang imo ginabasa ang Lucas 2:1–7, binagbinaga kon ano ang ginatudlo sining panaysayon parte sa Iya pagkabun-ag parte sa Iya. Tinguha-i nga hibaluon ang mga detalye ukon paghangop sa sining istorya nga wala mo matalupangdi sadto. Paano nakaapekto ang pagtalupangod sining mga butang sa imo mga balatyagon para sa Iya?

 

Mateo 2:1–12; Lucas 2:8–38

May madamo nga mga saksi sa pagkatawo ni Cristo.

Ang pagkabun-ag kag pagkalapsag ni Cristo gintandaan sang mga saksi kag mga sumilimba halin sa lainlain nga estado sang pangabuhi. Samtang imo ginatun-an ang ila mga istorya, ano ang imo matun-an sa mga paagi sa pagsimba kag pagsaksi kay Cristo?

Saksi ni Cristo	Ano ang akon matun-an parte sa pagsimba kag pagsaksi kay Cristo?
Saksi ni Cristo Mga manugpahalab (Lucas 2:8–20)	Ano ang akon matun-an parte sa pagsimba kag pagsaksi kay Cristo?
Saksi ni Cristo Simeon (Lucas 2:25–35)	Ano ang akon matun-an parte sa pagsimba kag pagsaksi kay Cristo?
Saksi ni Cristo Ana (Lucas 2:36–38)	Ano ang akon matun-an parte sa pagsimba kag pagsaksi kay Cristo?
Saksi ni Cristo Mga Mago (Mateo 2:1–12)	Ano ang akon matun-an parte sa pagsimba kag pagsaksi kay Cristo?

Tan-awa man sa 1 Nefi 11:13–23; 3 Nefi 1:5–21.

Mateo 2:13–23

Ang mga ginikanan mahimo nga magbaton sang rebelasyon para proteksyunan ang ila mga pamilya.

Indi gid mahimo ni Jose ang ginapangayo sa iya—ang proteksyunan si Jesus sa Iya pagkabata—nga wala ang bulig sang langit. Pareho sang Mga Mago, nakabaton sia sang isa ka rebelasyon nga nagapaandam sa iya sang peligro. Samtang imo ginabasa ang parte sa eksperiyensya ni Jose sa Mateo 2:13–23, pamensara ang pisikal kag espirituhanon nga mga peligro nga ginaatubang naton sa karon. Binagbinaga ang mga eksperiyensya sang imo nabatyagan ang giya sang Dios sa pagprotekta sa imo kag sa imo mga mahal sa kabuhi. Pamensara nga ipaambit ining mga eksperiyensya sa iban. Ano ang pwede mo himuon para mabaton ang amo sina nga giya sa palaabuton?

  

Lucas 2:40–52

Bisan sang bata pa Sia, si Jesus nakatutok sa paghimo sang pagbuot sang Iya Amay.

Sang isa Sia ka pamatan-on, ang Manluluwas nagtudlo sang ebanghelyo nga tuman kabaskog nga bisan ang mga manunudlo sa templo naurungan sa Iya “paghangop kag mga sabat” (Lucas 2:47). Ano ang imo natun-an gikan sining mga bersikulo parte sa Manluluwas bilang isa ka pamatan-on? Paano ang mga lamharon nga kilala mo nagatinguha nga “himuon ang buluhaton sang [ila] Amay”? (Lucas 2:49). Paano ang mga lamharon kag kabataan nakabulig sa imo nga makaangkon sang mas madalom nga pag-intiendi sang ebanghelyo? Ano pa gid ang matun-an mo halin sa ehemplo sang pagkabata ni Jesus sa Lucas 2:40–52?

“Wala bala kamo makahibalo nga kinahanglan ko himuon ang buluhaton sang akon Amay?” (Lucas 2:49).

Ano ang Paglubad ni Joseph Smith?

Tungod “madamo nga maathag kag malahalon” nga mga kamatuoran ang nadula gikan sa Biblia sa pagligad sang mga dinag-on (1 Nefi 13:28; tan-awa man sa Moises 1:41), ang Ginuo nagsugo kay Joseph Smith nga maghimo sang inspirado nga rebisyon sang Biblia, nga nakilal-an nga amo ang Paglubad ni Joseph Smith. Madamo sa mga rebisyon nga ginhimo sang Propeta ang nalakip sa appendix sang Santos sa Ulihing mga Adlaw nga edisyon sang balaan nga mga kasulatan. Ang paglubad ni Joseph Smith sang Mateo 24 nga nakilala bilang Joseph Smith—Mateo, sarang makita sa Perlas nga Bilidhon.  

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Lucas 2.Imbitara ang mga miyembro sang pamilya nga magpili sang tawo nga ginlaragway sa Lucas 2, basaha ang pila ka mga dinalan parte sa mga inter-aksyon sinang tawo sa Manluluwas, kag isugid kon ano ang ila natun-an nga nagapadako sang ila pagtuo kay Jesucristo.    

Pamensara kon paano ayhan mapanami sang art ang inyo paghinambalanay parte sa pagkabun-ag ni Cristo. (Para sa mga halimbawa, tan-awa sa Libro sang mga Larawan nga Pang-Ebanghelyo ukon history.ChurchofJesusChrist.org/exhibit/birth-of-Christ.)

Mateo 2:1–12.Ano ang aton matun-an parte sa paghandum kag pagpangita sa Manluluwas sa ehemplo sang Mga Mago?

Lucas 2:41–49.Ano ang “buluhaton sang Amay”? (Lucas 2:49; tan-awa sa Moises 1:39). Ano ang aton matun-an parte sa sinang buluhaton sa istorya sa Lucas 2:41–49? Pamensara nga isulat ang pila sa mga paagi nga ang imo pamilya pwede magpasakop sa buluhaton sang Amay kag ibutang ang mga ini sa isa ka garapon. Sa maabot nga semana, samtang nagapangita ang inyo pamilya sang mga paagi nga makabulig sa buluhaton sang Amay nga Langitnon, pwede sila magpili sang mga ideya sa sulod sang garapon. Magplano sang tiyempo kon san-o ninyo ipaambit ang inyo mga eksperiyensya.

Lucas 2:52.Ano ang aton matun-an sa Lucas 2:52 parte sa kon paano si Jesus nag-uswag sa Iya kabuhi? Ano nga personal ukon pang-pamilya nga mga tinutuyo ang mapahamtang naton para magadugang “sa kaalam kag sa kataason, kag nahamut-an sang Dios kag sang mga tawo”?

Para sa dugang nga mga ideya sa pagtudlo sang kabataan, tan-awa sa outline sining semana sa Come, Follow Me—For Primary.

 

Pagpauswag sang Personal nga Pagtuon

Maggamit sang mga bulig sa pagtuon sang balaan nga mga kasulatan.  

Ang Manluluwas sang Kalibutan nagkari sa duta sa kubos nga sirkumstansya.