bata kag iloy nga nagatuon sang balaan nga mga kasulatan sa balay

Mga Ideya sa Pagpauswag sang Inyo Pang-pamilya nga Pagtuon sang Balaan nga mga Kasulatan

Ang regular nga pang-pamilya nga pagtuon sang balaan nga mga kasulatan isa ka mabaskog nga paagi agud buligan ang imo pamilya nga matun-an ang ebanghelyo. Kon ano kadamo kag kon ano kalawig ang inyo basahon bilang pamilya indi pareho kaimportante sa inyo katayuyon sa inyo mga pagpaninguha. Samtang ginahimo ninyo ang pagtuon sang balaan nga mga kasulatan nga importante nga bahin sang inyo pangabuhi sa pamilya, mabuligan mo ang mga miyembro sang imo pamilya nga mangin mas malapit kay Jesucristo kag matukod ang ila mga testimonya sa pundasyon sang pulong sang Dios.

Binagbinaga ang masunod nga mga pamangkot:

• Paano mo paisugon ang mga miyembro sang pamilya nga magtuon sang balaan nga mga kasulatan nga sila lang?

• Ano ang pwede mo himuon agud paisugon ang mga miyembro sang pamilya nga ipaambit ang ila natun-an?

• Paano mo ipatalupangod ang mga prinsipyo nga inyo ginatun-an sa Daan nga Katipan sa adlaw-adlaw nga mga tsansa sa pagtudlo?

Tandai nga ang balay amo ang pinakamaayo nga lugar para sa pagtuon sang ebanghelyo. Mahimo mo tun-an kag itudlo ang ebanghelyo sa balay sa mga paagi nga indi posible sa klase sa Simbahan. Magmangin matugahon (creative) samtang imo ginahunahuna ang mga paagi nga mabuligan ang imo pamilya nga magtuon gikan sa balaan nga mga kasulatan. Binagbinaga ang pila sa masunod nga mga ideya agud panamion ang inyo pang-pamilya nga pagtuon sang balaan nga mga kasulatan.

Maggamit sang Musika

Magkanta sang mga kalantahon nga nagapabakod sang mga prinsipyo nga ginatudlo sa balaan nga mga kasulatan. Isa ka ginapanugyan nga himno ukon kanta sang kabataan ang nalista sa tagsa ka semanal nga outline. Pwede mo pamangkuton ang mga miyembro sang pamilya parte sa mga tinaga ukon mga dinalan sa kanta. Dugang pa sa pagkanta, ang imo pamilya pwede mag-aksyon sing nagakabagay sa mga kanta ukon mamati sa mga kanta nga ginapatukar samtang nagaobra sila sang iban nga mga buluhaton. Para sa dugang nga mga ideya, tan-awa sa “Paglakip sang Sagrado nga Musika sa Inyo Pagtuon sang Ebanghelyo” sa sini nga manwal.

Magpaambit sang Makahulugan nga Balaan nga mga Kasulatan

Hatagi ang mga miyembro sang pamilya sang oras agud ipaambit ang mga dinalan sa balaan nga mga kasulatan nga nangin makahulugan para sa ila sa tion sang ila personal nga pagtuon.

Gamita ang Imo Kaugalingon nga mga Pulong

Agdaha ang mga miyembro sang pamilya nga palip-uton sa ila kaugalingon nga pulong ang ila natun-an halin sa balaan nga mga kasulatan nga inyo ginatun-an.

mga lamharon nga nagabulig sa gamay nga bata sa pagbasa sang balaan nga mga kasulatan

Gamita ang Balaan nga mga Kasulatan sa Imo Kabuhi

Pagkatapos basahon ang isa ka dinalan sa balaan nga mga kasulatan, pangabaya ang mga miyembro sang pamilya nga magpaambit sang mga paagi nga ang dinalan mahimo magamit sa ila mga kabuhi.

Magpamangkot

Agdaha ang mga miyembro sang pamilya nga magpamangkot parte sa ebanghelyo, kag dayon hatagi sang oras nga pangitaon ang mga bersikulo nga mahimo makasabat sa pamangkot.

Mag-display sang Isa ka Balaan nga Kasulatan

Magpili sang isa ka bersikulo nga makahulugan sa imo, kag i-display ini sa lugar nga makita pirme sang mga miyembro sang pamilya. Agdaha ang iban nga mga miyembro sang pamilya nga magbulos-bulos pili sang balaan nga kasulatan nga i-display.

Maghimo sang Listahan sang Balaan nga Kasulatan

Bilang pamilya, magpili sang pila ka mga bersikulo nga gusto ninyo nga hambalan sa maabot nga semana.

Magsaulo sang Balaan nga mga Kasulatan

Magpili sang dinalan sa balaan nga kasulatan nga makahulugan sa inyo pamilya, kag agdaha ang mga miyembro sang pamilya nga sauluhon ini paagi sa pagsulit sini adlaw-adlaw ukon magpakontes sa pagsaulo.

mga tawo nga ululupod sa pagkinanta sa balay

Magpaambit sang mga Leksyon Gamit ang Isa ka Bagay

Magpangita sang mga bagay nga may koneksyon sa mga prinsipyo sang ebanghelyo nga makita sa mga dinalan sang balaan nga kasulatan nga inyo ginabasa bilang pamilya. Agdaha ang mga miyembro sang pamilya nga hambalan kon paano ang tagsa ka bagay maangot sa mga pinanudlo sa balaan nga mga kasulatan.

Magpili sang Topiko

Pabulos-bulosa ang mga miyembro sang pamilya sa pagpili sang topiko nga tun-an sang pamilya sing ululupod.   

Magdrowing sang Litrato

Basaha ang pila ka mga bersikulo bilang pamilya, kag dayon hatagi sang tion ang mga miyembro sang pamilya nga magdrowing sang isa ka butang nga may kaangtanan sa inyo ginbasa. Hatagi sang tion nga hambalan ang drowing sang kada isa.

Idrama-drama ang Isa ka Istorya

Pagkatapos basahon ang isa ka istorya, agdaha ang mga miyembro sang pamilya nga idrama-drama ini. Pagkatapos, hambali kon paano ang istorya maangot sa mga butang nga inyo ginaeksperiyensya sing indibidwal kag bilang pamilya.

Si Pangulong Russell M. Nelson nagsiling: “Ginapromisa ko nga samtang matutom ninyo nga ginakaayo ang inyo puluy-an agud mangin sentro sang pagtuon sang ebanghelyo, sa kadugayan ang inyo mga Adlaw nga Inugpahuway matuod nga mangin makalilipay. Ang inyo kabataan malangkag sa pagtuon kag sa pagpangabuhi sang mga pinanudlo sang Manluluwas, kag ang impluwensya sang kaaway sa inyo kabuhi kag sa inyo puluy-an magabuhin. Ang mga pagbag-o sa inyo pamilya mangin dako kag nagadugay” (“Becoming Exemplary Latter-day Saints,” Ensign ukon Liahona, Nob. 2018, 113).