Paggamit sang Dali, Magsunod sa Akon—Para sa Mga Indibidwal kag Mga Pamilya

Para Kay Sin-o Ang Ining Materyal?

Ang ining materyal para sa tagsa ka indibidwal kag pamilya sa Simbahan. Gindisenyo ini agud buligan ka nga magtuon sang ebanghelyo—nga ikaw lang ukon kaupod ang imo pamilya. Kon wala mo pa natun-an ang ebanghelyo sing regular sang una, ang ining materyal makabulig sa imo nga magsugod. Kon may ara ka na sang maayo nga kagawian sang pagtuon sang ebanghelyo, ang ining materyal makabulig sa imo nga makaangkon sang mas makahulugan nga mga eksperiyensya.

Paano Ko Gamiton Ining Materyal?

Gamita ang materyal nga ini sa ano man nga paagi nga makabulig sa imo. Mahimo nga makabulig ini sa imo bilang giya ukon bulig para sa personal kag pang-pamilya nga pagtuon sang balaan nga mga kasulatan. Mahimo mo man ini gamiton sa home evening. Ang mga outline nagatutok sa importante nga mga prinsipyo nga makita sa Daan nga Katipan, nagapanugyan sang mga ideya kag mga kahiwatan para sa mga indibidwal kag mga pamilya, kag nagatigana sang mga lugar para sulatan sang imo mga panghunahuna.

Ang Dali, Magsunod sa Akon—Para sa Mga Indibidwal kag Mga Pamilya wala nagatuyo nga buslan ukon kompetensyahan ang maayo nga mga butang nga imo ginahimo. Sunda ang giya sang Espiritu agud mahibal-an kon paano hikuton ang imo kaugalingon nga pagtuon sang pulong sang Dios.

mag-asawa nga nagatuon sang balaan nga mga kasulatan sa balay

Paano Maangot Ining Materyal sa Kon Ano nga Nagakalatabo sa Simbahan?

Ang mga outline sa sining materyal gin-organisar suno sa semanal nga iskedyul sang pagbasa. Ang Dali, Magsunod sa Akon nga mga materyal sa Primary, sa Sunday School, kag sa mga klase sang mga korum sang Aaronic Priesthood kag Young Women nagasunod sang pareho man nga iskedyul. Para suportahan ang imo pagpaninguha nga tun-an kag ipangabuhi ang ebanghelyo sa balay, ang imo mga titser sa simbahan magahatag sa imo sang mga oportunidad sa pagpaambit sang imo mga eksperiyensya, mga panghunahuna, kag mga pamangkot parte sa mga dinalan sa balaan nga kasulatan nga imo ginatun-an sa balay.

Tungod ang Sunday School ginatudlo sing duha lang ka beses kada bulan, ang mga titser sa Sunday School mahimo magpili nga laktawan ukon tingbon ang mga outline para malagas ang semanal nga iskedyul. Mahimo nga kinahanglan man ini (sa pareho nga Sunday School kag Primary) sa mga semana nga wala ginahiwat ang regular nga mga miting sang Simbahan tungod sang komperensya sa stake ukon iban pa nga mga rason. Sa sining mga semana ginaagda ka nga padayon nga tun-an ang Daan nga Katipan sa balay.

Kinahanglan Ko Bala nga Sundon ang Iskedyul?

Ang iskedyul makabulig sa imo nga matapos basa ang Daan nga Katipan kag ang Perlas nga Bilidhon sa katapusan sang tuig. Dugang pa, ang pagsunod sang amo man nga iskedyul sa iban nagadala sang makahulugan nga mga eksperiyensya sa balay, sa simbahan, kag sa bisan diin. Pero indi ka magbatyag nga nahigot sa iskedyul ukon napilitan sa pagbasa sang tagsa ka bersikulo; ang iskedyul isa lamang ka giya para buligan ka nga mangin tayuyon. Ang importante amo nga nagatuon ka sang ebanghelyo bilang indibidwal kag bilang isa ka pamilya.

Tanda parte sa Iskedyul sa Pagbasa sang Daan nga Katipan

Ang ginapanugyan nga iskedyul sa pagbasa sang Dali, Magsunod sa Akon sa 2022 wala nagalakip sang tanan nga kapitulo sa Daan nga Katipan. Tungod kay mas malaba ang Daan nga Katipan sangsa iban pa nga libro sang balaan nga mga kasulatan, ang pila sa mga kapitulo kag libro wala na gindala para mas mangin mahapos ang iskedyul sa pagbasa para sa imo kag sa imo pamilya.

Ang mga kapitulo kag libro ginpili agud malikawan ang pagsulit-sulit kag para tutokan ang mga dinalan nga nagapamatuod kay Jesucristo, puno sang doktrina, kag mapuslanon gid sa aton panahon sa karon. Halimbawa, ang ginapanugyan nga iskedyul sa pagbasa wala nagalakip sang 1 kag 2 Mga Cronica tungod kalabanan sang kaundan sining mga libro nagasulit lang sang balasahon nga makit-an sa 1 kag 2 Mga Hari. Ang iskedyul wala man nagalakip sang Ang Ambahanon ni Salomon, tungod gintudlo sang Propeta nga si Joseph Smith nga indi ini inspirado nga balaan nga kasulatan. Ugaling, tandai nga isa lamang ini ka ginapanugyan nga iskedyul sang pagtuon. Ang imo personal kag pang-pamilya nga pagtuon sang balaan nga kasulatan dapat ginagiyahan sang personal nga rebelasyon.