Ļōmņak ko n̄an Kōkm̧anm̧anļo̧k an Baam̧le eo Am̧ Ekkatak Jeje ko Rekwojarjar

Iien katak jeje ko rekwojarjar an baam̧le ej juon wāween ekajoor n̄an jipan̄ baam̧le eo am̧ ekkatak gospel eo. Ewi jon̄an im ewi aitokan am̧ riit āinwōt juon baam̧le ejjab lukkuun aorōk jān am̧ niknik ilo kijejeto ko am̧. Ilo am̧ kōm̧m̧an bwe ekkatak jeje ko rekwojarjar en juon m̧ōttan eaorōk ilo an baam̧le eo am̧, kwonaaj jipan̄ ro uwaan baam̧le eo am̧ epaakeļo̧k Jemedwōj Ilan̄ im Jisōs Kraist im kalōk naan in kam̧ool ko aer ioon pedped in naan eo an Anij.

Ļōmņak kōn kajjitōk kein:

• Ekōjkan am̧ kōketak ro uwaan baam̧le eo am̧ n̄an ekkatak jeje ko rekwojarjar ippāer make?

• Ta eo kwomaron̄ kōm̧m̧ane n̄an kōketak ro uwaan baam̧le eo am̧ n̄an kwaļo̧k ta eo rej ekkatak?

• Ekōjkan am̧ maron̄ kōmejajaik pedped in katak ko kwoj ekkatak ilo Kallim̧ur M̧okta ilo iien katakin ko aolep raan?

Keememej bwe m̧weo ej jikin eo em̧m̧an n̄an ekkatak gospel eo. Kwomaron̄ ekkatak im katakin gospel eo ilo m̧weo ilo wāween ko me rejjab maron̄ kōm̧m̧an ilo juon kūlaaj. Kwon mejādik n̄e kwoj ļōmņak kōn wāween ko n̄an jipan̄ baam̧le eo am̧ ekkatak jān jeje ko rekwojarjar. Ļōmņak kōn jet iaan ļōmņak kein n̄an kōkm̧anm̧anļo̧k ekkatak jeje ko rekwojarjar an baam̧le eo am̧.

Kōjerbal Al

Al al ko me rej kōkajoorļo̧k pedped in katak ko kar katakin ilo jeje ko rekwojarjar. Juon al eo kwoj ļōmņake ak al eo an ajri me ej elaajrak ilo kajjojo wiik. Kwomaron̄ kajjitōk ippān ro uwaan baam̧le eo kōn naan ko an eoon ko ilo al eo. N̄an kakobaba n̄an al, ajri ro nejūm̧ remaron̄ kōm̧m̧ani kōl ko me rejejjet ippān al ko ak ron̄jake al ko ilo an jo al eo im rej kōm̧m̧ani m̧akūtkūt ko jet. N̄an ļōmņak ko reļļapļo̧k, lale “Including Sacred Music in Your Gospel Learning” ilo bok in.

Kwaļo̧k Jeje Ko Rekwojarjar Reļļap Meļeļeier

Leļo̧k n̄an ro uwaan baam̧le eo iien n̄an kwaļo̧k eoon koilo jeje ko rekwojarjar me raar loi eļap meļeļeier ilo iien aer ekkatak jeje ko rekwojarjar.

Kōjerbal Naan ko Am̧ Make

Kūr ro uwaan baam̧le eo n̄an ba ilo tukadu in ilo naan ko aer make ta eo rej ekkatak jān jeje ko rekwojarjar rej ekkatak.

Kōjerbale Jeje ko Rekwojarjar n̄an Mour eo Am̧

Ālkin riiti juon eoon ilo jeje ko rekwojarjar, kajjitōk ippān ro uwaan baam̧le eo n̄an kwaļo̧k wāween ko eoon eo jerbal ilo mour ko aer.

Kajjitōk juon Kajjitōk

Kūr ro uwaan baam̧le eo n̄an kajjitōk juon kajjtōk kōn gospel eo, innām joļo̧k jet iien n̄an kappukōt eoon ko me remaron̄ jipan̄ uwaake kajjitōk eo.

Kwaļo̧k juon Jeje Ko Rekwojarjar

Kālet juon eoon kwoj lo eļap meļeļein, im likūt ijo ro uwaan baam̧le eo naaj emakijkij aer loe. Kūr ro jet uwaan baam̧le eo n̄an kajjojo kāālet juon eoon n̄an kwaļo̧ke.

Kōm̧m̧ane juon Laajrak in Jeje Ko Rekwojarjar

Āinwōt juon baam̧le, kāālet jet eoon ko me kwoj kōņaan ekōnono kaki ilo wiik eo ej itok.

Kakilōklōk Eoon Ko

Kāālet juon eoon ilo jeje ko rekwojarjar me eļap meļeļein n̄an baam̧le eo am̧, im kūr ro uwaan baam̧le eo n̄an kakilōklōk e ilo am̧ āliji raan otemjej ak kōm̧m̧ane juon ikkure n̄an kakilōklōk.

Kwaļo̧k Mweiuk ak Men ko Jet jej Kōjerbal ilo Iien Katakin Ko

Pukot men ko me rej iookļo̧k pedped in katak ko an gospel ilo eoon ko ilo jeje ko rekwojarjar me kwoj riiti āinwōt juon baam̧le. Kūr ro uwaan baam̧le eo n̄an kōnono kōn ekōjkan an kajjojo m̧weiuk ak men ko jet iookļo̧k katakin ko ilo eoon ko.

Kāālet juon Unin Kōnono

Kōm̧m̧an bwe ro uwaan baam̧le eo ren kajjojo kāālet juon unin kōnono me baam̧le eo enaaj katak ippān doon kake. Kōjerbal Topical Guide, Bible Dictionary eo, ak Unin Tōl eo n̄an Jeje Ko Rekwojarjar (scriptures.ChurchofJesusChrist.org) n̄an pukot eoon ko jān jeje ko rekwojarjar kōn unin kōnono eo.

Jin̄aik juon Pija

Riiti jet eoon ko āinwōt juon baam̧le, innām leļo̧k iien n̄an ro uwaan baam̧le eo n̄an jin̄aik juon men me ej iookļo̧k ta eo kwoj riiti. Joļo̧k iien n̄an ekōnono kōn jin̄n̄a ko an doon.

Kōm̧m̧an Arin Kōn Bwebwenato eo

Ālkin riiti juon bwebwenato, kūr ro uwaan baam̧le eo n̄an kōm̧m̧an arin. Ālkin wōt, kōnono kōn ekōjkan an bwebwenato eo iookļo̧k men ko me kwoj en̄jaki ippam̧ make im āinwōt juon baam̧le.

Būreejtōn RussellM. Nelson ekar ba: “Ij kallim̧ur bwe ilo ami tiljek jerbal n̄an bar kōkāāl m̧weo im̧ōmi n̄an juon jikin ekkatak gospel eo, ilo m̧ool raan in Jabōt ko ami renaaj ilo m̧ool erom̧ juon men lan̄lōn̄. Ajri ro nejimi renaaj m̧ōņōņō in ekkatak im mour kōn katak ko an Rilo̧mo̧o̧r eo, im kareel ko an rikapo eo ilo mour eo ami im ilo m̧weo imōmi enaaj dikļo̧k. Oktak ko ilo baam̧le eo ami renaaj em̧m̧an im kajoorļo̧k” (“Erom̧ Riwaanjon̄ak ro rej Armej ro Rekwojarjar ilo Raan Ko Āliktata,” Ensign ak Liaona, Nob. 2018,113).