kōrā in ej ekkatak jeje ko rekwojarjar ilo m̧weo im̧ōn

Oktak ej Kōttōbar eo Ad

Jibadbad in unin aolep ekkatak im katakin ko an gospel eo ej n̄an kam̧ūlaļļo̧k oktak eo ad n̄an Jemedwōj Ilan̄ im jipan̄ kōj erom̧ āinwōt Jisōs Kraist. Kōn un in, n̄e jej ekkatak gospel eo, jejjab kappukot wōt meļeļe ko rekāāl, jej kōņaan erom̧ juon “men in kōm̧anm̧an ekāāl” (2Korint 5:17). Meļeļein menin ej pedped ioon Jemedwōj Ilan̄ im Jisōs Kraist n̄an jipan̄ kōj ukōt būruwōd, ad kalimjōkļo̧k, jerbal ko ad, im lukkuun in piktok ko ad.

Bōtaab kain ekkatak gospel eo me ej kōkajoorļo̧k tōmak eo ad im tōlļo̧k n̄an menin bwilōn̄ ko kōn oktak tok rejjab bōk jikier ilo juon wōt iien. Eļapļo̧k jān juon kūlaaj ruum̧ ilo būruwōn kajjojo armej im m̧ōko. Ej aikuj jejjet, kijejeto ko aolep raan n̄an meļeļe im mour kōn gospel eo. Ekkatak kōn gospel eo ej tōl n̄an m̧ool in oktak im emenin aikuj im̧we eo an Jetōb Kwojarjar.

Jetōb Kwojarjar eo ej tōl kōj n̄an m̧ool eo im ej kwaļo̧k kam̧ool kōn m̧ool jab in (lale Jon 16:13). Ej kōmeramļo̧k kōļmenļo̧kjeņ ko ad, kōļapļo̧k meļeļe ko ad, im un̄ūr būruwōd kōn revelesōn jān Anij, ej unin aolep m̧ool. Jetōb Kwojarjar eo ej karreoik būruwōd. Ej im̧we kōj juon ikdeleel n̄an mour kōn m̧ool eo, im Ej unoojdikdik n̄an kōj wāween ko n̄an kōm̧m̧ane menin. Ilo m̧ool, “Jetōb Kwōjarjar eo … enaaj katakin [kōj] men otemjej” (Jon 14:26).

Kōn un kein, ilo kijejeto ko ad n̄an mour, ekkatak, im katakin gospel eo, jej aikuj m̧oktata kappukot jemjerā eo an Jetōb. Kōttōbar in ej aikuj tōl kālet ko ad im tōl ļōmņak ko im jerbal ko ad. Jej aikuj kappukot jabdewōt men ej boktok im̧we eo an Jetōb im joļo̧k jabdewōt men ej kadiwōjļo̧k im̧we jab in—bwe jejeļā bwe eļan̄n̄e jemaron̄ in erreo n̄an pād im̧aan mejān Jetōb Kwojarjar eo, jemaron̄ barāinwōt erreo n̄an mour im̧aan mejān Jemedwōj Ilan̄ im eo Nejin, Jisōs Kraist.