Fasin blong Jenisim Laef Hem I Gol blong Yumi

Stamba blong lanem mo tijim gospel i blong jenisim laef moa i go long Papa long Heven mo Jisas Kraes, mo blong helpem yumi kam olsem Tufala. From risen ia, taem yumi stap stadi long gospel, yumi no jes stap lukaotem sam niu infomesen; yumi wantem blong kam wan “niu man o woman” (2 Korin 5:17). Hemia i minim blong stap dipen long Papa long Heven mo Jisas Kraes blong helpem yumi blong jenisim hat blong yumi, jenisim lukluk blong yumi, aksen blong yumi mo ol fasin blong yumi wantaem.

Be kaen wei ia blong lanem gospel, we i stap mekem fet blong yumi i kam strong moa, mo i stap lidim yumi long merikel ia blong jenisim yumi, i no hapen evriwan long wan taem ia nomo. Kaen wei ia blong lanem gospel, i go i bitim klasrum mo i go kasem hat mo hom blong wanwan. I nidim blong traehad oltaem, evri dei, blong andastanem mo laef moa gud folem gospel. Fasin blong lanem gospel we i lidim yumi blong i gat tru jenis long laef blong yumi, i nidim paoa blong Tabu Spirit blong lidim tingting blong yumi.

Tabu Spirit i stap gaedem yumi i go long trutok mo i talem witnes blong Hem abaot trutok ia (luk long Jon 16:13). Hem i givim laet long maen blong yumi, i mekem yumi andastanem moa samting, mo i tajem hat blong yumi wetem revelesen we i kam long God, we i stamba blong evri trutok. Tabu Spirit i mekem hat blong yumi i klin evriwan. Hem i givim insperesen mo givim insaed long yumi, wan filing blong wantem laef folem trutok, mo Hem i talem kwaet long yumi, ol wei blong mekem samting ia. I tru, “ Spirit blong Givhan … bambae i save tijim [yumi] long olgeta samting” (Jon 14:26).

From ol risen ia, long ol traehad blong yumi blong stap laef, stap lanem mo stap tijim gospel, be faswan long evri samting, yumi mas lukaotem kampani blong Spirit. Gol ia, i mas rulum ol joes blong yumi, mo i mas lidim ol tingting blong yumi mo ol aksen blong yumi. Yumi mas lukaotem wanem we i stap invaetem paoa blong Spirit blong lidim yumi, mo yumi mas sakemaot wanem i stap ronemaot paoa ia—from yumi save se sapos yumi save kam klin inaf blong gat kampani blong Tabu Spirit, nao yumi save stap klin inaf blong laef long ples we Papa long Heven mo Pikinini blong Hem, Jisas Kraes, Tufala i stap long hem.