Stap Yusum Kam Folem Mi—Blong Wanwan Man, Woman mo Famli

?Buk Ia Hem I blong Huia?

Buk ia i blong wanwan man, woman mo famli insaed long Jos. Oli raetem blong helpem yu lanem gospel i gud moa—yuwan, o wetem famli blong yu. Sapos yu no bin stap stadi long gospel oltaem long bifo, buk ia i save helpem yu blong statem. Sapos yu gat finis wan gudfala evri dei fasin blong stadi long gospel, buk ia i save helpem yu blong gat ol eksperiens we oli gat moa mining.

?Olsem Wanem Mi Save Yusum Buk Ia?

Yusum buk ia long eni wei we i save helpem yu. Maet bae yu faenem i isi olsem wan gaed o wan help blong mekem skripja stadi blong yuwan mo wetem famli. Yu save yusum hemia tu long haos naet. Ol aotlaen oli haelaetem ol impoten prinsipol we oli stap long OlTesteman, oli givim sam stadi aedia mo ol aktiviti blong wanwan man, woman mo famli, mo i givim wan ples we yu save raetemdaon ol filing mo tingting blong yu long hem.

Kam Folem Mi—Blong Wanwan Man, Woman mo Famli, oli no minim blong riplesem o kompit wetem ol gudfala samting we yu stap mekem. Folem spirit blong i gaedem yu blong luksave olsem wanem yu save mekem stadi blong yuwan long toktok blong God.

?Olsem Wanem Nao Buk Ia I Go Wetem Wanem I Stap Hapen long Jos?

Ol aotlaen blong buk ia, oli oganaesem folem wan riding taemtebol blong wik. Risos ia, Kam Folem Mi blong Praemeri, blong Sandei Skul, mo blong Ol Kworom blong Aronik Prishud mo Ol Yang Woman Klas oli folem semfala taemtebol. Blong sapotem ol hadwok blong yu blong lanem mo laef folem gospel ia insaed long hom blong yu, ol tija blong yu, long Jos, bae oli givim janis long yu blong save serem ol eksperiens, ol tingting, mo ol kwestin blong yu abaot ol skripja we yu bin stap stadi long hem long hom.

From se oli stap tijim Sandei Skul tu (2) taem nomo long wan manis, bae ol tija blong Sandei Skul oli save jusum blong skipim wan lesen, o blong joenem tu (2) aotlaen blong save folem gud taemtebol blong wik, we i stap. Maet bae i nid blong mekem hemia (blong tugeta, Sandei Skul mo Praemeri) long ol wik we i no gat ol nomol miting blong Jos, from se i gat stek konfrens, o ol nara risen. Long ol wik ia we i gat ol nara samting, mifala i stap invaetem yufala blong gohed blong stadi long OlTesteman long hom.

?Mi Mi Nidim blong Folem Taemtebol Ia?

Taemtebol ia bambae i helpem yu blong ridim samfala pat blong OlTesteman mo Perel we I Gat Bigfala Praes, bifo en blong yia. Antap long hemia, taem yu stap folem sem taemtebol olsem ol narawan, bae i save lidim yu blong gat ol eksperiens we oli gat mining long hom, long jos, mo long ol nara ples. Yu no mas filim se taemtebol ia i fosem yu blong ridim evri ves ia; taemtebol ia hem i wan gaed blong helpem yu blong kipim spid blong yu. Impoten samting i we yu stap lanem gospel yuwan mo wetem famli.

Teknot long Riding Taemtebol blong OlTesteman

Riding taemtebol ia, blong 2022, blong Kam Folem Mi we oli givim olsem wan tingting, i no tekem evri japta insaed long OlTesteman. From se OlTesteman i moa longwan bitim ol nara buk blong ol skripja, oli minim blong no putum samfala japta mo buk, hemia blong mekem se i moa isi blong save folem riding taemtebol ia; hemia blong yu mo blong famli blong yu.

Ol japta mo ol buk ia, oli jusum blong mekem se i gat yus, mo i blong haelaetem ol skripja we oli stap testifae abaot Jisas Kraes, we oli rij wetem doktrin, mo speseli, oli go stret wetem taem blong yumi tedei. Eksampol, riding taemtebol ia i no tekem Fasmo Seken Kronikel from se plante long ol samting we oli stap insaed long ol buk ia, oli semmak long wanem we i stap insaed long Fasmo Seken King. Taemtebol ia tu, i no tekem Sing blong Solomon, from se Profet Josef Smit i bin tijim se hem i no wan skripja we i kam tru long insperesen (luk long Gaed long Ol Skripja, “Sing blong Solomon,” olskripja.ChurchofJesusChrist.org). Be, tingbaot se hemia i wan tingting nomo blong wan taemtebol blong folem. Skripja stadi blong yuwan mo blong famli, revelesen we i kam long yuwan nao bae i lidim.