Faaaogaina o le Sau, Mulimuli Mai ia te A’u—Mo Tagata Taitoatasi ma Aiga

E Mo Ai Lenei Punaoa?

O lenei punaoa e mo tagata taitoatasi uma ma aiga i le Ekalesia. Ua mamanuina e fesoasoani ia te oe e aoao le talalelei—pe na o oe pe o e i ai faatasi ma lou aiga. Afai e te lei suesueina le talalelei e le aunoa i le taimi ua fano, ua mafai ona fesoasoani lenei punaoa ia te oe e amata. Afai ua i ai sau masani lelei o le suesueina o le talalelei, e mafai ona fesoasoani lenei punaoa ia e maua nisi mau aafiaga anoa.

E Faapefea Ona Ou Faaaogaina Lenei Punaoa?

Faaaoga lenei punaoa i soo se auala e fesoasoani ai ia te oe. E ono fesoasoani ia te oe o se taiala po o se fesoasoani mo suesuega faaletagata lava ia ma faaleaiga o tusitusiga paia. E mafai foi ona e faaaogaina mo afiafi faaleaiga. O otootoga ua faamamafa atu ai mataupu faavae taua o loo maua ile Feagaiga Tuai, fautua atu ai manatu mo suesuega ma gaoioiga mo tagata taitoatasi ma aiga, ma maua ai foi avanoa e tusifaamaumau ai ou lagona uunai.

Sau, Mulimuli Mai ia te A’u—Mo Tagata Taitoatasi ma Aiga e le faapea o le a suia ai pe faatautava foi ma mea lelei o loo e faia. Mulimuli i le taitaiga a le Agaga e iloa ai le auala e fai ai au lava suesuega o le afioga a le Atua.

O le a Le Faia o Lenei Punaoa i Mea e Tutupu i le Ekalesia?

O le aotelega o le punaoa lenei ua faatulaga e tusa ai ma le faasologa faalevaiaso o lau faitaugatusi. O punaoa o le Sau, Mulimuli Mai ia te A’u mo vasega a le Peraimeri, mo le Aoga Sa, ma mo Korama a le Perisitua Arona ma Tamaitai Talavou e mulimuli lava i le faasologa e tasi. Ina ia lagolago i au taumafaiga e aoao ma ola i le talalelei i le fale, o le a tuu atu e ou faiaoga i le lotu ia avanoa e faasoa atu ai ou aafiaga, mafaufauga, ma fesili e uiga i fuaitau o mau sa e suesue ai i le fale.

Talu ai e na’o le faalua ona aoaoina le Aoga Sa i le masina, e mafai e faiaoga o le Aoga Sa ona filifili e faapasi pe tuufaatasi aotelega ia ogatasi ai ma le faasologa o le vaiaso. Atonu e alagatatau foi lenei mea i vaiaso (mo le Aoga Sa ma le Peraimeri) i vaiaso e le faia ai sauniga masani a le Ekalesia ona o le konafesi a le siteki poo o isi mafuaaga. I nei la vaiaso e valaaulia oe e faaauau pea ona suesue i le Feagaiga Tuai i le fale.

Pe Tatau Ona Ou Mulimuli i le Faasologa?

O le faasologa o le a fesoasoani e te faitau ai i filifiliga mai le Feagaiga Tuai ma le Penina Tautele ia oo atu i le faaiuga o le tausaga. Ma le isi, o le mulimuli ai i lea lava faasologa e pei foi o isi e mafai ona taitai atu ai i ni aafiaga anoa i le fale, i le lotu, ma soo se mea lava. Ae aua le manatu ua taotaomia ai i le faasologa pe e tatau lava ona faitau fuaiupu uma; o le faasologa ua na’o se taiala faigofie e fesoasoani ia te oe i le faasoasoaina o lau alu. O le mea taua o le, o loo e aoaoina le talalelei e oe lava ma aoaoina foi o se aiga.

Faamatalaga e uiga i le Faasologa o le Faitauga o le Feagaiga Tuai

O le faasologa fautuaina o le faitauga o le O Mai, ia te A’u mo le 2022 e le aofia ai mataupu uma i le Feagaiga Tuai. Ona e umi atu le Feagaiga Tuai nai lo isi voluma o tusitusiga paia, ua aveese ai isi mataupu ma tusi ina ia faigofie ai ona taulima le faasologa o le faitauga mo oe ma lou aiga.

O mataupu ma tusi sa filifilia ina ia aloese ai mai le faia faafia ma faamamafa ai fuaitau o molimau mai ia Iesu Keriso, e tamaoaiga i aoaoga faavae, ma e faapitoa le talafeagai i o tatou aso. Mo se faataitaiga, o le faasologa fautuaina o le faitauga e le o aofia ai le 1ma le 2 Nofoaiga a Tupu ona o le tele o anotusi o na tusi ua ta’i faalua anomea o loo maua i le 1ma le 2 Tupu. O le faatulagaga foi e le o aofia ai le Pese a Solomona, ona na aoao mai le Perofeta o Iosefa Samita e faapea, e le o se tusitusiga musuia moni (see Guide to the Scriptures, “Song of Solomon,” scriptures.ChurchofJesusChrist.org). E ui i lea, ia manatua o lenei mea ua na o se faatulagaga fautuaina e suesue ai. O le tou suesuega patino ma faaleaiga o tusitusiga paia e tatau ona taialaina e ala i faaaliga patino.