Si Lehi Nagbiyahe Duol sa Pulang Dagat, ni Gary Smith

Enero 6–12

1 Nephi 1–7

“Ako Moadto ug Mobuhat”

Samtang imong basahon ang 1 Nephi 1–7, paghunahuna og mga bersikulo, mga kasinatian, mga pangutana, ug ubang mga kapanguhaan nga madasigon kang mogamit aron sa pagtudlo sa mga bata. Ang mga kalihokan niini nga outline mahimong mapahiangay alang sa mas dagko o mas gagmay nga mga bata.

Irekord ang Imong mga Impresyon

Dapita ang Pagpaambit

Ang ubang mga bata sa imong klase malagmit nga nakadungog na o nakabasa na mahitungod sa mga kasinatian sa pamilya ni Nephi diha sa 1 Nephi 1–7. Dapita sila sa pagpaambit sa unsay ilang nahibaloan. Kon ang mga bata wala kaayoy nahibaloan mahitungod sa mga kasinatian ni Nephi, hatagi sila og oportunidad sa katapusan sa leksyon sa pagpaambit sa unsay ilang nakat-unan.

Itudlo ang Doktrina: Mas Gagmay nga mga Bata

1 Nephi 2:16

Nagkinahanglan ko og akong kaugalingong pagpamatuod.

Miabot nga mituo si Nephi sa mga pulong sa iyang amahan tungod kay duna siyay tinguha nga mahibalo sa iyang kaugalingon mismo ug nag-ampo siya sa Ginoo. Tabangi ang mga bata nga makat-on gikan sa iyang ehemplo.

Posible nga mga Kalihokan

• Pagdala og sirado nga kahon nga adunay hulagway sa Manluluwas sa sulod, ug hatagi ang matag bata og turno nga masayran sa iyang kaugalingon kon unsay sulod sa kahon. Sultihi ang mga bata nga gusto ni Nephi nga makabaton og iyang kaugalingong pagpamatuod nga ang Ginoo misugo sa iyang pamilya sa pagbiya sa Jerusalem. Hangyoa ang mga bata sa pagpaminaw kon unsa ang gibuhat ni Nephi aron makaangkon og iyang kaugalingong pagpamatuod samtang imong basahon ang 1 Nephi 2:16. Ipamatuod nga sama nga ang matag usa kanato kinahanglang moabli sa kahon aron masayud unsay anaa sa sulod, kitang tanan kinahanglang mangutana sa Dios aron makaangkon sa atong kaugalingong pagpamatuod.

• Pagdala og mga hulagway o mga butang nga nagrepresentar sa mga butang nga tingali gitinguha sa mga bata nga makaangkon og pagpamatuod, sama sa hulagway ni Jesukristo, sa Basahon ni Mormon, o hulagway sa buhi nga propeta. Dapita ang mga bata sa pagpili og hulagway o butang ug sa pagpaambit sa ilang mga pagpamatuod niana nga butang ngadto sa klase.

1 Nephi 2:2–4; 3–4

Ang Dios motabang kanako sa pagsunod sa Iyang mga sugo.

Unsaon nimo paggamit niini nga mga istorya aron sa pagtabang sa mga bata nga makasabut nga ang Dios motabang kanato sa pagsunod sa Iyang mga sugo, bisan kon daw lisud kining sundon?

Posible nga mga Kalihokan

• Basaha ang 1 Nephi 2:2–4 ngadto sa mga bata, ug pagpakita og pipila ka mga litrato sa mga butang nga tingali gidala sa pamilya ni Lehi ngadto sa kamingawan, sama sa tolda, mga habol, mga gapasan [bows] ug mga panâ. Hangyoa sila sa paghunahuna kon unsa kaha ang ilang bation kon kinahanglan nilang mobiya sa ilang mga panimalay ug moadto sa kamingawan. Unsay gihangyo sa Ginoo nga atong buhaton aron sa pagsunod Kaniya karon?

• Tabangi ang mga bata sa pagkolor ug paggunting sa mga tawo nga papel sa pahina sa kalihokan [activity page] niining semanaha; dayon hangyoa sila sa paggamit sa mga tawong papel sa pag-minubo [summarize] sa istorya ni Nephi ug sa iyang mga igsoon nga mikuha sa mga palid nga tumbaga (tan-awa sa 1 Nephi 3–4). Ang kanta nga “Ang Kaisug ni Nephi” (Songbook sa mga Bata, 64–65) ug ang “Kapitulo 4: Ang Tumbaga nga mga Palid” (Mga Sugilanon sa Ang Basahon ni Mormon, 8–12.

• Gamita ang mga hulagway 103–15 diha sa Libro sa mga Hulagway sa Ebanghelyo aron sa pagtabang sa mga bata sa paghunahuna sa mga butang nga gisugo sa Ginoo nga atong buhaton. Sa unsang paagi kita mapanalanginan kon mosunod kita Kaniya? Tabangi sila sa pag-dekorasyon og mga tsapa [badge] nga ikataud nga nag-ingon Ako moadto ug mobuhat sa mga butang nga ang Ginoo nagsugo (1 Nephi 3:7). Balikbalika ninyo sa pagsulti ang maong hugpong sa mga pulong sa makadaghang higayon.

1 Nephi 3:19–21; 5:19–22

Ang mga kasulatan dako nga bahandi.

Unsaon nimo pagtabang nga madasig ang mga bata nga ipakabahandi ang mga kasulatan, o ang pulong sa Dios?

Posible nga mga Kalihokan

• Pakit-a ang mga bata og usa ka butang (o hulagway sa usa ka butang) nga bililhon kaayo kanimo. Hisguti kon giunsa nimo kini pagtratar ug pag-atiman. Ipasabut nga alang sa pamilya ni Lehi, ang mga kasulatan bililhon kaayo, sama sa usa ka bahandi.

• Dapita ang mga bata sa pagtabang kanimo sa pagsulti o pag-aksyon sa gibuhat ni Nephi ug sa iyang mga igsoon aron makuha ang mga palid nga tumbaga: mibiyahe sila og layo kaayo, mitugyan sa ilang mga bulawan ug pilak, ug mitago sa usa ka langub aron maluwas ang ilang kinabuhi. Basaha ang 1 Nephi 5:21. Nganong bililhon man kaayo ang mga kasulatan ngadto sa pamilya ni Lehi? Unsaon nato pagtratar ang mga kasulatan nga sama sa usa ka bahandi?

Si Lehi Midawat sa mga Palid nga Tumbaga, ni Clark Kelley Price

Itudlo ang Doktrina: Mas Dagko nga mga Bata

1 Nephi 2:16, 19–20

Makaangkon ko og akong kaugalingong pagpamatuod.

Unsa ang imong makat-unan gikan sa ehemplo ni Nephi mahitungod sa pag-angkon og kaugalingon nimong pagpamatuod? Unsaon nimo pagtabang ang mga bata nga makat-on gikan sa iyang ehemplo?

Posible nga mga Kalihokan

• Hangyoa ang mga bata sa pagsiksik sa 1 Nephi 2:16, 19 aron makadiskubre kon giunsa ni Nephi sa pag-angkon og pagpamatuod sa mga pulong sa iyang amahan. Dapita sila sa pagsulat sa mga buhat ni Nephi diha sa mga bloke o ubang mga butang ug dayon paghimo og bisan unsa gamit kadto nga mga butang aron sa pagrepresentar kon sa unsang paagi kadto nga mga butang makatabang kanato sa pag-ugmad og pagpamatuod.

• Sultihi ang mga bata kon giunsa nimo sa pag-angkon sa imong pagpamatuod mahitungod sa ebanghelyo. Dapita sila sa pagpaambit og susama nila nga mga kasinatian, ug awhaga sila sa pagsunod sa ehemplo ni Nephi sa padayon nga paglig-on sa ilang mga pagpamatuod. Sa unsang paagi ang pagbaton og atong kaugalingong pagpamatuod makatabang kanato?

1 Nephi 3:1–8

Makasanong ako nga adunay hugot nga pagtuo sa mga sugo sa Ginoo.

Ang pagpalambo og kinaiya nga sama sa kang Nephi makatabang sa mga bata kon ang Ginoo adunay ipabuhat kanila nga usa ka butang nga daw lisud.

Posible nga mga Kalihokan

• Bahina ang klase ngadto sa duha ka grupo. Dapita ang usa ka grupo sa pagbasa sa tubag ni Laman ug Lemuel ngadto kang Lehi (tan-awa sa 1 Nephi 3:2–5) ug ang laing grupo sa pagbasa sa tubag ni Nephi (tan-awa sa 1 Nephi 3:2–4, 7). Dapita ang usa ka bata nga magpakaaron-ingnon nga siya si Lehi ug mohangyo sa ubang mga bata nga magpakaaron-ingnon nga mobalik sa Jerusalem aron kuhaon ang mga palid nga tumbaga. Dapita ang matag grupo sa pagtubag gamit ang kaugalingon nilang mga pulong sama nga sila mismo ang mga tawo nga ilang gibasa. Unsa ang pipila ka butang nga gipabuhat sa Dios kanato? Sa unsang paagi kita mahimong sama kang Nephi?

• Manganta og dungan ang awit mahitungod sa pagkamasulundon, sama sa “Ang Kaisug ni Nephi” o “Sunda ang Kasugoan” (Songbook sa mga Bata, 64–65, 68–69), ug hangyoa ang mga bata sa pagpaminaw sa mga pulong nga nagtudlo kon sa unsang paagi kita mosanong sa Ginoo.

1 Nephi 3–4

Ang Espiritu Santo mogiya kanako samtang magtinguha ko sa pagbuhat sa kabubut-on sa Ginoo.

Si Nephi misunod sa Espiritu, “wala masayud sa sinugdanan sa mga butang nga [siya] mobuhat” (1 Nephi 4:6). Unsaon nimo pagtabang ang mga bata nga imong gitudloan nga mangita sa giya sa Espiritu Santo?

Posible nga mga Kalihokan

• Dapita ang mga bata nga i-aksyon ang istorya ni Nephi ug sa iyang mga igsoong lalaki nga naningkamot sa pagkuha sa mga palid nga tumbaga (tan-awa sa 1 Nephi 3–4). Dapita ang usa ka bata sa pagbasa sa 1 Nephi 4:6, ug hangyoa ang klase sa pagpaminaw kon unsay gibuhat ni Nephi nga nakahimo nila nga nagmalampuson.

• Ipaambit sa mga bata ang pipila ka mga ehemplo sa mga butang nga gustong ipabuhat sa Dios kanila, sama sa pagpakighigala sa usa ka tawo sa eskwelahan nga daw nag-inusara, pagpasaylo sa usa ka igsoon, o pagsulti sa tinuod human makahimo og sayop. Hangyoa ang mga bata sa pagpaambit kon sa unsang paagi ang Espiritu Santo makatabang kanila niadto nga mga sitwasyon. Unsaon nato pagdapit ang Espiritu Santo sa pagtabang kanato sa pagsunod sa Dios?

Awhaga ang Pagkat-on diha sa Panimalay

Dapita ang mga bata sa pagpaambit og mga kasinatian ngadto sa ilang mga pamilya sa dihang napanalanginan sila tungod sa pagsunod sa mga sugo. Awhaga sila sa paghangyo sa mga sakop sa ilang pamilya sa pagpaambit og susama nga mga kasinatian.

Pagpalambo sa Atong Pagtudlo

Tabangi ang gagmay nga mga bata nga makat-on gikan sa mga kasulatan. Aron matabangan ang gagmay nga mga bata nga makat-on gikan sa mga kasulatan, tutuki ang usa ka bersikulo sa kasulatan o bisan usa lang ka importanting hugpong sa mga pulong. Mahimo nimong dapiton ang mga bata sa pagbarug o sa pag-isa sa ilang mga kamot kon madungog nila kana nga pulong o hugpong sa mga pulong. (Tan-awa usab sa Pagtudlo sumala sa Pamaagi sa Manluluwas, 21.)