Mas Tam-is Kay Sa Tanang Katam-is, ni Miguel Anghel González Romero

Enero 20–26

1 Nephi 11–15

“Gisangkapan sa Katarung ug sa Gahum sa Dios”

Basaha ang 1 Nephi 11–15 nga maghunahuna sa mga bata nga imong gitudloan, ug irekord ang bisan unsang impresyon nga imong madawat.

Irekord ang Imong mga Impresyon

Dapita ang Pagpaambit

Pagpakita og hulagway sa panan-awon ni Lehi sa kahoy sa kinabuhi, ug dapita ang mga bata sa pagpaambit sa unsay ilang mahinumduman nga nakat-unan mahitungod niini nga panan-awon sa miaging semana. Pangutan-a sila kon aduna ba silay bag-ong nakat-unan kabahin niini sukad kaniadto.

Itudlo ang Doktrina: Mas Gagmay nga mga Bata

1 Nephi 11:16–33

Ang Langitnong Amahan mipadala ni Jesukristo sa yuta tungod kay Siya nahigugma kanako.

Nakita ni Nephi ang kinabuhi ug pagpangalagad ni Jesukristo diha sa usa ka panan-awon. Pamalandungi kon unsa ang makat-unan sa mga bata sa imong klase mahitungod sa Manluluwas gikan sa 1 Nephi 11.

Posible nga mga Kalihokan

• Hatagi ang matag bata og hulagway nga nagpakita sa usa sa mga panghitabo sa kinabuhi sa Manluluwas nga gipanagna diha sa 1 Nephi 11:20, 24, 27, 31, ug 33 (tan-awa ang Libro sa mga Hulagway sa Ebanghelyo, nu. 30, 35, 39, 42, 57). Samtang imong basahon kini nga mga bersikulo, hangyoa ang mga bata sa pagpataas sa ilang hulagway kon madungog nila ang bersikulo nga motakdo niini.

• Sultihi ang mga bata mahitungod sa pipila ka mga butang nga nakat-unan ni Nephi nga buhaton ni Jesukristo atol sa panahon sa Iyang kinabuhi (tan-awa sa 1 Nephi 11:16–33), ug pakit-a sila og mga hulagway sa pipila niini nga mga panghitabo (tan-awa, sama pananglit, ang Libro sa mga Hulagway sa Ebanghelyo, nu. 41, 46, 47, 49, 56, 57, 58, 59). Ipaambit kon unsay nabuhat sa Manluluwas alang kanimo. Pagpakita og mga litrato aron sa pagtabang sa mga bata nga makahunahuna og mga paagi nga mapaambit nato ang gugma sa Dios (tan-awa sa Libro sa mga Hulagway sa Ebanghelyo, nu. 109, 110, 115).

1 Nephi 13:26–29, 35–36, 40

Ang Basahon ni Mormon nagtudlo og bililhon nga mga kamatuoran.

Nganong mapasalamaton ka sa Basahon ni Mormon? Ikonsiderar kon unsaon nimo sa pagpaambit sa imong pagpamatuod mahitungod sa Basahon ni Mormon ngadto sa mga bata.

Posible nga mga Kalihokan

• Pagdrowing og hulagway diha sa pisara, ug dapita ang mga bata sa pag-usab o pagtangtang og mga parte sa hulagway aron malahi kining tan-awon. Tabangi sila nga makasabut nga, sama niini nga hulagway, ang pipila ka mga butang diha sa Biblia giusab ug gikuha paglabay sa panahon. Basaha ang mga parte sa 1 Nephi 13:40 nga nagtudlo kon sa unsang paagi ang Basahon ni Mormon (nga gitawag ni Nephi og “kini nga katapusan nga mga talaan”) makatabang kanato sa pagsabut sa “yano ug bililhon nga mga butang” nga nawala sa Biblia.

• Pagtago libut sa kwarto og mga hulagway nga nagrepresentar sa mga kamatuoran sa ebanghelyo nga giklaro diha sa Basahon ni Mormon, sama sa bunyag, sa sakrament, ug pagkabanhaw. Dapita ang mga bata sa pagpangita niini nga mga hulagway. Ipasabut nga ang Basahon ni Mormon mipagawas og balik sa mga kamatuoran sa ebanghelyo nga nawala.

1 Nephi 15:23–25

Ang pulong sa Dios naghatag kanako og gahum.

Unsaon nimo paggamit sa imahe sa gunitanan nga puthaw aron sa pagtudlo sa mga bata mahitungod sa kalig-on, kasiguroan, ug gahum sa pulong sa Dios?

Posible nga mga Kalihokan

• Pagpakita og hulagway sa damgo ni Lehi, sama sa anaa diha sa outline niini nga semana sa Dali, Sunod Kanako—Alang sa mga Indibidwal ug mga Pamilya. Dapita ang mga bata sa pagpangita sa gunitanan nga puthaw diha sa hulagway, ug tabangi sila nga makasabut kon sa unsang paagi ang paghupot sa pulong sa Dios makapanalipod kanato (tan-awa sa 1 Nephi 15:23–24). Hatagi ang mga bata og butang nga magunitan nga susama sa gunitanan nga puthaw, sama sa usa ka tubo o baston, samtang imong basahon ang bersikulo 24. Asa nato makita ang pulong sa Dios? Unsa ang atong mabuhat aron ang pulong sa Dios mahimong parte sa atong kinabuhi matag adlaw?

• Tabangi ang mga bata sa pagkolor ug pagkompleto sa pahina sa kalihokan niini nga semana. Unsaon nato nga “hugot nga mogunit” sa pulong sa Dios? (1 Nephi 15:24).

Itudlo ang Doktrina: Mas Dagko nga mga Bata

1 Nephi 11:16–33

Ang Langitnong Amahan mipadala ni Jesukristo sa yuta tungod kay Siya nahigugma kanako.

Si Nephi adunay panan-awon diin iyang nakita ang plano sa Langitnong Amahan alang kanato, ug si Jesukristo usa ka mahinungdanong bahin niana nga panan-awon.

Posible nga mga Kalihokan

• Dapita ang mga bata sa pagtakdo sa mga bersikulo sa 1 Nephi 11:16–33 ngadto sa mga hulagway nga nagpakita sa unsay gihulagway sa mga bersikulo (sama sa 1 Nephi 11:20, 24, 27, 29, 31, 33; tan-awa ang Libro sa mga Hulagway sa Ebanghelyo, nu. 30, 35, 38, 39, 42, 57). Unsa ang makat-unan sa mga bata mahitungod ni Kristo gikan sa mga bersikulo ug mga hulagway?

• Pangutan-a ang mga bata nganong importante si Jesukristo kanila. Pagkanta og usa ka awit mahitungod sa Manluluwas, sama sa “Mipadala sa Bugtong Anak” (Songbook sa mga Bata, 20–21), ug pangutan-a ang mga bata kon unsa ang gitudlo niini nga awit mahitungod ni Jesus. Dapita ang mga bata sa paggahin og panahon niini nga semana sa paghunahuna mahitungod ni Jesukristo ug sa pagpaambit sa ilang mga kasinatian diha sa klase sa sunod semana.

Ang Basahon ni Mormon naglakip sa ebanghelyo ni Jesukristo.

1 Nephi 13:26–29, 35–36, 40

Ang Basahon ni Mormon nagtudlo og bililhon nga mga kamatuoran.

Unsay nahibaloan sa mga bata mahitungod sa Apostasiya? Unsaon nimo pagtabang nila nga makasabut sa kaimportante sa Basahon ni Mormon diha sa pagpahiuli sa mga kamatuoran sa ebanghelyo nga nawala panahon sa Apostasiya?

Posible nga mga Kalihokan

• Basaha og dungan ang 1 Nephi 13:26–29, ug dapita ang mga bata sa pagpangita kon unsay mahitabo kon ang mga tawo walay “yano ug bililhon” nga mga kamatuoran sa ebanghelyo. Giunsa sa Ginoo pagpahiuli ang mga kamatuoran nga nawala? (tan-awa sa mga bersikulo 35–36, 40). Dapita ang mga bata sa pagpaambit sa ilang mga pagpamatuod sa mga kamatuoran nga ilang nakat-unan gikan sa Basahon ni Mormon, o ipaambit ang imong kaugalingong pagpamatuod.

• Nganong makatabang man nga adunay sobra pa sa usa ka saksi? Pagdrowing og usa ka tuldok diha sa pisara, ug sulati kini sa ngalan nga Biblia, ug dapita ang matag bata sa pagdrowing og managlahi nga tul-id nga linya nga moagi sa tuldok aron sa paghulagway nga ang mga pagtulun-an sa Biblia mahimong hubaron sa daghang mga paagi kon nag-inusara lang ang Biblia. Papasa ang mga linya, ug pagdrowing og ikaduha nga tuldok nga sulatan sa ngalan nga Basahon ni Mormon. Dapita ang usa ka bata sa pagdrowing og tul-id nga linya nga moagi sa duha ka tuldok aron mapakita nga adunay usa lamang ka paagi sa paghubad sa ebanghelyo kon ang Biblia ug Basahon ni Mormon dungan nga gamiton.

• Tabangi ang mga bata nga makasag-ulo sa ikawalo nga artikulo sa hugot nga pagtuo.

1 Nephi 15:23–25

Ang pulong sa Dios naghatag kanako og gahum sa pagbatok sa tintasyon.

Unsaon nimo pagtabang ang mga bata nga imong gitudloan nga mapalig-on ang ilang mga pagpamatuod sa mga kasulatan? Pamalandungi kini nga pangutana samtang magbasa sa 1 Nephi 15:23–25, ug gamita ang mga kalihokan sa ubos aron sa pagdugang sa imong kaugalingong mga ideya.

Posible nga mga Kalihokan

• Hangyoa ang mga bata sa pag-summarize sa panan-awon sa kahoy sa kinabuhi (tan-awa sa 1 Nephi 8; 11). Unsay nakapugong sa mga tawo sa pag-abut ngadto sa kahoy? Unsay nakatabang nila sa pag-abut niini? Dapita ang mga bata sa pagbasa sa 1 Nephi 15:23–25. Sa unsang paagi ang gunitanan nga puthaw nakatabang sa mga tawo sa paglakaw agi sa gabon sa kangitngit? Sa unsang paagi ang pagbasa sa pulong sa Dios makatabang kanato sa pagbatok sa tintasyon ug kangitngit karon?

• Kompletuha ang pahina sa kalihokan uban sa mga bata. Samtang naghimo sila niini, hangyoa sila sa paghisgut mahitungod sa pipila sa mga tintasyon nga giatubang sa mga bata. Unsaon nila sa paghinumdom nga manggunit sa gunitanan nga puthaw matag adlaw? Kantaha ang “Gunitanan nga Puthaw [The Iron Rod]” (Hymns, nu. 274) isip kabahin niini nga kalihokan.

Awhaga ang Pagkat-on diha sa Panimalay

Awhaga ang mga bata sa pagpakita sa ilang mga pamilya sa “mga gunitanan nga puthaw” nga ilang nahimo gikan sa pahina sa kalihokan ug sa pagpaambit kon sa unsang paagi sila manggunit sa gunitanan nga puthaw pinaagi sa pagbasa sa mga kasulatan.

Pagpalambo sa Atong Pagtudlo

Paggamit og art aron mainteresado ang mga tigkat-on. Kon tudloan nimo ang mga bata og istorya sa kasulatan, pangita og mga paagi sa pagtabang kanila nga mahanduraw kini. Mahimong mogamit ka og mga hulagway, mga video, mga puppet, mga sinina, ug uban pa.