Adan ug Eva, ni Douglas Fryer

Pebrero 3–9

2 Nephi 1–5

“Kami Mipuyo subay sa Matang sa Pagkamalipayon”

Si Lehi mitudlo sa iyang mga anak sumala sa ilang indibidwal nga mga panginahanglan ug mga kahimtang. Sunda ang iyang ehemplo samtang mangandam ka sa pagtudlo sa mga bata sa imong klase.

Irekord ang Imong mga Impresyon

Dapita ang Pagpaambit

Human mopasabut nga si Lehi mitudlo sa iyang pamilya mahitungod sa kagawasan sa paghimo sa atong kaugalingong mga pagpili, dapita ang mga bata sa pagpaambit sa ilang mga kasinatian sa pagpili sa matarung. Unsa ang ilang gibati human sila mihimo niana nga pagpili? Unsaon nila nga makahinumdom sa pagpili sa matarung sa umaabut?

Itudlo ang Doktrina: Mas Gagmay nga mga Bata

2 Nephi 1:20

Mapanalanginan ko kon mosunod ko.

Ang baruganan nga gitudlo niini nga bersikulo—ang pagkamasulundon makahatag og mga panalangin—kanunay nga gihulagway diha sa tibuok Basahon ni Mormon. Ikonsiderar kon sa unsang paagi nimo matabangan ang mga bata nga makaamgo niini diha sa ilang kaugalingong kinabuhi.

Posible nga mga Kalihokan

• Hangyoa ang mga bata sa pagtabang kanimo sa pagtino sa kahulugan sa mga pulong nga mga sugo ug paghimo og lista sa mga sugo. Basaha ang 2 Nephi 1:20, ug ipasabut og maayo nga kita “molambo”, o mapanalanginan, kon motuman kita sa mga sugo. Unsa ang atong bation kon motuman kita niini nga mga sugo?

• Pakit-a ang mga bata og mga butang nga makahatag og proteksyon, sama sa mga sapatos, mga kalo, ug mga guwantis. Pasulaya sila sa pagsul-ob niini. Sa unsang paagi manalipod kining mga butanga kanato? Sultihi sila nga ang mga sugo sa Langitnong Amahan makapanalipod kanato gikan sa espirituhanong kakuyaw. Pagpaambit og kasinatian sa dihang napanalipdan ka tungod sa pagsunod sa mga sugo.

2 Nephi 2:11, 16, 27

Gihatagan ako sa Dios sa kagawasan sa pagpili.

Tungod sa ilang mga pagpili, si Adan ug Eva kinahanglang mobiya sa Tanaman sa Eden. Unsaon nimo pagtudlo ang mga bata nga ang pagpili ni Adan ug ni Eva nagtugot kanato sa paggamit sa atong kabubut-on nga mopili sa Langitnong Amahan karon?

Posible nga mga Kalihokan

• Pagdrowing og hulagway sa usa ka gawasnon nga tawo ug hulagway sa usa ka bihag nga tawo (tingali usa ka tawo nga napriso), ug dapita ang mga bata sa pagtudlo sa tukma nga hulagway kon mobasa ka sa mga pulong nga gawasnon ug pagkabihag diha sa 2 Nephi 2:27. Hatagig gibug-aton ang mga pulong nga “gawasnon sa pagpili,” ug dapita ang matag bata sa pagsulti niini.

• Ribyuha sa mga bata ang istorya ni Adan ug Eva (tan-awa sa 2 Nephi 2:17–19; tan-awa usab sa “Kapitulo 3: Adan ug si Eva,” Mga Istorya sa Daang Tugon, 15–18) ug ang pagpili nga ilang gihimo sa Tanaman sa Eden. Tabangi ang mga bata sa paglista og mga pagpili nga ilang gihimo kada adlaw. Ipamatuod nga ang atong Langitnong Amahan mihatag kanato og kagawasan sa pagpili tali sa maayo ug dautan, ug dapita ang mga bata sa paglukso-lukso o sa pagpakpak sa ilang mga kamot aron sa pagsaulog sa pagkagawasnon sa pagpili.

• Pagdula kamo diin mosulti ka og usa ka pulong (sama sa kahayag) ug ang mga bata mosulti sa katugbang niini (kangitngit). Balik-balika kini nga kalihokan sa pipila ka higayon. Aron matabangan ang mga bata nga makasabut kon sa unsang paagi ang pagkaanaay katugbang makatabang kanato sa paghimo og mga pagpili, basaha ang unang katunga sa 2 Nephi 2:11 ug 2 Nephi 2:16. Suginli ang mga bata og mga istorya mahitungod sa usa ka bata nga gitintal sa paghimo og sayop nga pagpili. Tabangi ang mga bata sa paghunahuna kon unsa ang katugbang niana nga pagpili, ug dapita sila sa pag-aksyon niini. Ipamatuod nga ang Langitnong Amahan mopanalangin kanato kon mopili kita sa matarung.

• Kantaha og dungan ang usa ka kanta mahitungod sa paghimo og mga pagpili, sama sa “Maninguha kong Mahimong Mahisama kang Jesus” o “Pilia ang Matarung nga Paagi” (Songbook sa mga Bata, 40–41, 82–83), ug pangutan-a ang mga bata unsay ilang nakat-unan gikan sa kanta mahitungod sa paghimo og mga pagpili.

Itudlo ang Doktrina: Mas Dagko nga mga Bata

2 Nephi 1:20

Mapanalanginan ko kon mosunod ko.

Kon ang mga bata adunay pagtuo nga ang Dios mopanalangin kanila tungod sa pagsunod sa mga sugo—bisan kon kadto nga mga panalangin dili dayon moabut—mas sayon alang kanila ang paghimo og matarung nga mga pagpili.

Posible nga mga Kalihokan

• Tabangi ang mga bata sa pagribyu sa pipila sa mga pagpili nga gihimo ni Nephi ug sa iyang mga igsoon. Alang sa pipila ka mga ehemplo, tan-awa sa 1 Nephi 2:11–16; 3:5–7; ug 18:9–11. Dapita sila sa pagbasa og dungan sa 2 Nephi 1:20 ug sa pagpaambit ngano kaha nga gihatag ni Lehi kini nga mensahe ngadto sa iyang mga anak.

• Pagsulat og hugpong sa mga pulong gikan sa 2 Nephi 1:20 diha sa ginunting nga papel, ug hisguti unsay gipasabut sa mga hugpong sa mga pulong. Dapita ang mga bata sa pagbutang sa mga ginunting nga mga papel sa husto nga pagkahan-ay gamit ang bersikulo. Aron mapakita ang kalainan tali sa pag-uswag ug pagkahimulag, pakit-a ang mga bata og himsog nga tanom ug usa ka dahon o sanga nga giputol gikan sa tanom. Unsa ang kalainan tali sa usa ka dahon nga anaa sa tanom ug sa dahon nga giputol? Sa unsang paagi nga kita sama sa dahon diha sa tanom kon mosunod kita sa mga sugo sa Dios? Dapita ang mga bata sa pagrekord sa usa ka journal sa mga paagi nga ang Dios mopanalangin kanila kon sila mopili sa matarung.

2 Nephi 2:22–28

Gihatagan ako sa Dios og kagawasan sa pagpili.

Si Jesukristo miluwas kanato gikan sa pisikal nga kamatayon ug espiritwal nga kamatayon (pagkahimulag gikan sa Dios tungod sa sala) pinaagi sa Iyang Pag-ula ug Pagkabanhaw. Aron makapuyo pag-usab uban sa Langitnong Amahan, kinahanglang gamiton nato ang atong kabubut-on nga kanunay nga maghinulsol ug maningkamot sa pagpuyo nga matarung.

Posible nga mga Kalihokan

• Pagpakita og hulagway ni Adan ug Eva (tan-awa sa Libro sa mga Hulagway sa Ebanghelyo, nu. 4), ug dapita ang mga bata sa pagpaambit kon unsay ilang nahibaloan mahitungod sa nahitabo kang Adan ug Eva sa Tanaman sa Eden. Tabangi ang mga bata sa pagkaplag og mga tubag diha sa 2 Nephi 2:22–27. Ipasabut nga tungod sa pagpili ni Adan ug ni Eva, napanalanginan kita nga makaanhi sa yuta ug mogamit sa atong kabubut-on sa paghimo og maayong mga pagpili ug maghinulsol pinaagi sa Pag-ula ni Kristo kon mohimo kita og sayop nga mga pagpili.

• Isulat ang mga pulong sa 2 Nephi 2:27 diha sa pisara. Tabangi ang mga bata sa pagsag-ulo sa bersikulo pinaagi sa pagbalik-balik og sulti niini ug sa pagpuli-puli sa pagpapas sa mga pulong sa matag higayon nga masulti nila kini og balik. Tabangi ang mga bata sa paghanduraw kon sama sa unsa kaha ang kinabuhi nga walay mga pagpili. Nganong mapasalamaton man sila sa kabubut-on?

• Dapita ang mga bata sa pagpaambit og kasinatian sa dihang mihimo sila og maayo nga pagpili. Unsa ang ilang gibati human sila mihimo niana nga pagpili? Unsay atong mabuhat sa pagtabang sa atong kaugalingon sa pagpili sa matarung kon tintalon kita sa paghimo og sayop? Ikonsiderar ang pagkanta og usa ka awit mahitungod sa paghimo og mga pagpili, sama sa “Choose the Right [Pilia ang Matarung]” (Hymns, nu. 239), ug dapita ang mga bata sa pagpaambit sa unsay ilang nakat-unan gikan sa awit.

2 Nephi 3:6–24

Si Joseph Smith usa ka “pinili nga manalagna.”

Sa 2 Nephi 3 si Lehi mihisgot sa usa ka panagna mahitungod ni Propeta Joseph Smith. Mahimo nimong gamiton kini isip oportunidad sa pagtudlo sa mga bata mahitungod sa iyang misyon sa ulahing mga adlaw.

Posible nga mga Kalihokan

• Dapita ang mga bata sa pagsiksik sa 2 Nephi 3:6–24 alang sa mga timailhan kon si kinsa nga propeta ang gihisgutan. Ilista ang mga timailhan diha sa pisara. Nganong gitawag man si Joseph Smith nga “pinili nga manalagna”? Unsa man ang gibuhat ni Joseph Smith nga “labing bililhon ngadto [sa iyang mga kaigsoonan]”? (bersikulo 7).

• Pagkanta og himno mahitungod ni Joseph Smith, sama sa “Pagdayeg sa Tawo” (Mga Himno ug mga Awit sa mga Bata, nu. 50), o pagtan-aw og video nga nagpakita sa lain-laing mga aspeto sa iyang misyon. Pangutan-a ang mga bata nganong mapasalamaton sila ni Propeta Joseph Smith.

Awhaga ang Pagkat-on diha sa Panimalay

Awhaga ang mga bata sa pagbantay sa mga oportunidad nga kinahanglan silang mohimo og mga pagpili niini nga semana. Dapita sila nga mangandam sa pagpaambit sa sunod semana kon unsa nga mga pagpili ang ilang gihimo ug ang mga resulta sa ilang mga pagpili.

Pagpalambo sa Atong Pagtudlo

Ang mga bata makaila sa impluwensya sa Espiritu. Tudloi sila nga ang mga pagbati sa kalinaw, gugma, ug kainit nga anaa kanila kon maghisgot o mokanta sila mahitungod ni Jesukristo ug sa Iyang ebanghelyo nagagikan sa Espiritu Santo. Kini nga mga pagbati makalig-on sa ilang mga pagpamatuod.