Dili ang Akong Pagbuot maoy Matuman Kon Dili ang Imo, ni Harry Anderson

Pebrero 10–16

2 Nephi 6–10

“O Unsa Kamahinungdanon ang Laraw sa Atong Dios!”

Sa imong pagbasa sa 2 Nephi 6–10, pangitaa ang giya gikan sa Espiritu mahitungod sa unsay itudlo. Kini nga outline ug ang Dali, Sunod Kanako—Alang sa mga Indibidwal ug mga Pamilya mahimong makadasig og dugang nga mga ideya.

Irekord ang Imong mga Impresyon

Dapita ang Pagpaambit

Awhaga ang mga bata nga magpuli-puli sa pagpaambit og unsay ilang nakat-unan mahitungod ni Jesukristo ug sa Iyang Pag-ula samtang nagtuon sa 2 Nephi 6–10 sa ilang indibidwal na pagtuon o uban sa ilang mga pamilya.

Itudlo ang Doktrina: Mas Gagmay nga mga Bata

2 Nephi 9:7–13, 20–23

Si Jesukristo miluwas kanako gikan sa sala ug kamatayon.

Unsaon nimo paggamit ang 2 Nephi 9:7–13 ug 20–23 sa pagtabang sa mga bata nga makasabut nga giluwas ni Jesukristo ang tanang tawo gikan sa kamatayon ug gihimong posible nga makahinulsol kita gikan sa sala?

Posible nga mga Kalihokan

• Sultihi ang mga bata og istorya sa usa ka tawo nga nahulog sa lungag nga lawom kaayo nga dili siya makahimo sa pagkatkat pagawas. Dunay tawo nga miabut ug mihaw-as niini nga tawo gikan sa lungag. Mahimo ka nga modrowing og hulagway niini nga istorya diha sa pisara o i-aksyon kini uban sa mga bata. Ipasabut nga kini nga lungag sama sa kamatayon ug ang mitabang sa tawo sama ni Jesukristo, kinsa miluwas sa tanang katawhan gikan sa kamatayon pinaagi sa paghatag kanato sa gasa sa pagkabanhaw. Sultihi ang mga bata nga kini gihapon nga tawo nahulog ngadto sa lain nga lungag. Niining higayona ang tigluwas mihatag sa tawo og hagdanan nga magamit sa pagsaka pagawas sa lungag. Ipasabut nga kini nga lungag sama sa sala ug ang hagdanan mao ang Pag-ula ni Jesukristo, nga nagtugot kanato sa paghinulsol ug aron kita mapasaylo sa atong mga sala. Basaha ang 2 Nephi 9:22–23, ug pagpamatuod mahitungod ni Jesukristo ug sa Iyang Pag-ula.

• Mangangta og dungan sa usa ka kanta mahitungod sa gugma ni Jesukristo, sama sa “Gibati Ko ang Gugma sa Akong Manluluwas” (Songbook sa mga Bata, 42–43). Dapita ang mga bata sa pagdrowing og mga hulagway sa mga butang nga nagtabang kanila nga masayud nga ang Manluluwas nahigugma kanila.

2 Nephi 9:49

“Ang akong kasingkasing nahinangop diha sa pagkamatarung.”

Unsaon nimo pag-awhag ang mga bata nga imong gitudloan nga “[mahinangop] diha sa pagkamatarung,” o malipayong mosunod sa Ginoo? (2 Nephi 9:49).

Posible nga mga Kalihokan

• Basaha ang 2 Nephi 9:49 ngadto sa mga bata, ug tabangi sila sa pagpangita ug pagsabot sa unsay gisulti ni Jacob nga iyang gihigugma ug gikasilagan. Pagpaambit og mga sitwasyon diin ang usa ka bata mihimo og maayo nga pagpili o sayop nga pagpili, ug dapita ang mga bata sa pagbarug kon ang pagpili makahatag og kalipay ug sa paglingkod kon ang pagpili makahatag og kagul-anan. Nganong ang pagpili sa matarung makahatag kanato og kalipay? Kanus-a ka mibati og kalipay tungod kay mihimo ka og matarung nga pagpili?

• Mangangta og dungan sa usa ka kanta mahitungod sa kalipay nga nagagikan sa pagkamasulundon, sama sa “Kon Kita Motabang” (Songbook sa mga Bata, 108B), ug hangyoa ang mga bata sa pagpaminaw kon unsa ang makapalipay kanato. Papuli-puliha ang mga bata sa pagpakaaron-ingnon nga usa ka ginikanan nga naghangyo sa laing bata sa pagbuhat og usa ka butang. Papraktisa ang ubang mga bata sa pagsunod nga malipayon.

Itudlo ang Doktrina: Mas Dagko nga mga Bata

2 Nephi 6; 7:1–2

Ang Ginoo kanunay nga motuman sa Iyang mga saad.

Ang pagsabut nga ang Ginoo kanunay nga motuman sa Iyang mga saad makatabang sa mga bata nga matukod ang ilang pagtuo diha Kaniya ug ang ilang pagsalig sa pagsunod sa Iyang mga sugo.

Posible nga mga Kalihokan

• Hangyoa ang mga bata sa paghisgot kabahin sa pipila sa mga saad nga ilang gihimo, sama sa usa ka saad nga ilang gihimo ngadto sa usa ka higala o sa mga pakigsaad nga ilang gihimo sa bunyag. Nganong lisud man usahay ang pagtuman sa atong mga saad? Nganong importante man ang pagtuman sa atong mga saad? Basaha ang mosunod nga hugpong sa mga pulong: “Ang Ginoong Dios motuman sa iyang mga pakigsaad diin siya mihimo ngadto sa iyang mga anak” (2 Nephi 6:12). Pagpaambit og usa ka ehemplo kon sa unsang paagi ang Dios mituman sa Iyang mga saad, bisan kon ang mga panalangin wala moabut diha-diha dayon.

• Pagpakita og hulagway ni Jesus tapad sa hulagway sa usa ka bata. Basaha ang 2 Nephi 7:1, ug ipasabut nga kon ang katawhan sa Dios mohunong sa pagsunod sa Iyang ebanghelyo, susama kini nga sila “nakigbulag” Kaniya. Ipalayo ang hulagway sa bata sa hulagway ni Jesus aron mapakita nga kon dili kita motuman sa atong mga pakigsaad, sama sa pakigsaad sa bunyag, atong gipahimulag ang atong kaugalingon gikan sa Langitnong Amahan ug sa Manluluwas. (Aron maribyu ang mga pakigsaad sa bunyag, tan-awa ang D&P 20:37.) Sa unsang paagi ang Pag-ula sa Manluluwas nagtugot kanato sa pagpaduol og balik Kaniya? Samtang imo kining hisgutan, dapita ang mga bata sa pagpaduol og usab sa mga hulagway.

2 Nephi 9:10–23

Si Jesukristo miluwas kanako gikan sa sala ug kamatayon.

Unsaon nimo paggamit ang 2 Nephi 9:10–23 sa pagtabang sa mga bata nga makakat-on nga si Jesukristo mao ang ilang Manluluwas?

Posible nga mga Kalihokan

• Hangyoa ang mga bata sa pagtabang nimo sa pagdrowing og agianan diha sa pisara, ug dapita sila sa pagdugang og pipila ka mga babag o mga ali diha sa agianan. Basaha og dungan ang 2 Nephi 9:10, ug dapita ang mga bata sa pagsulat og ngalan sa mga babag diha sa agianan gamit ang mga pulong gikan niini nga bersikulo nga naghulagway sa mga babag nga makapugong kanato sa pagbalik ngadto sa Dios. Dayon hisguti kon sa unsang paagi si Jesukristo mibuntog niini nga mga babag alang kanato (tan-awa sa 2 Nephi 9:21–23), ug sa pagbuhat nimo niini, dapita ang mga bata sa pagpapas sa mga babag.

• Pagpakita og hulagway ni Adan ug Eva Leaving the Garden of Eden (ChurchofJesusChrist.org). Ipasabut nga sa dihang si Adan ug si Eva mikaon sa bunga nga gisulti sa Dios kanila nga dili kaonon diha sa Tanaman sa Eden, ilang gidala ang sala ug kamatayon ngadto sa kalibutan. Pagpakita og hulagway ni Jesukristo. Aron matabangan ang mga bata nga makasabut kon giunsa ni Jesus sa pagbuntog sa sala ug kamatayon, isaysay ang istorya sa tawo nga nahulog sa lungag, nga makita sa unang ideya sa pagtudlo ubos sa “Mas Gagmay nga mga Bata” niini nga outline. Dayon hangyoa ang mga bata sa pagdrowing og mga hulagway niini nga istorya o i-aksyon kini. Basaha ang 2 Nephi 9:21–23, ug pagpamatuod mahitungod ni Jesukristo ug sa Iyang Pag-ula.

• Tabangi ang matag bata sa pagpangita og kanta mahitungod sa Pag-ula sa Manluluwas diha man sa hymnbook o sa Songbook sa mga Bata (ang mga indeks niini nga mga basahon makatabang). Dapita ang mga bata sa pagpangita ug pagpaambit sa mga pulong gikan sa kanta nga naghulagway sa unsay gibuhat ni Jesus alang kanato. Hangyoa ang mga bata sa pagpaambit sa ilang mga hunahuna ug mga pagbati mahitungod sa Pag-ula sa Manluluwas, o ipaambit ang imong pagpamatuod.

2 Nephi 9:20, 28–29, 42–43

Mapanalanginan ko samtang mosunod ko sa tambag sa Dios.

Tabangi ang mga bata sa pagtukod og lig-on nga pundasyon sa pagsalig diha sa Dios aron nga kon ang ilang kahibalo ug abilidad molambo, magpadayon sila sa pagsalig diha Kaniya ug pagsunod sa Iyang mga tambag.

Posible nga mga Kalihokan

• Dapita ang mga bata sa pagsulti kanimo mahitungod sa usa ka butang nga daghan sila og nahibaloan, sama sa paborito nga basahon o kalingawan. Hangyoa ang usa ka bata sa pagbasa sa 2 Nephi 9:20, ug pagpamatuod nga ang Dios “[nasayud] sa tanan nga mga butang.” Nganong importante man alang kanato nga masabtan nga ang Dios nahibalo sa tanan?

• Hangyoa ang mga bata sa paghunahuna nga nakadungog sila og usa ka higala nga miingon nga ang mga sugo o mga pagtulun-an sa Simbahan binuang. Unsay ilang isulti sa ilang higala? Nganong importante man nga mosalig sa tambag sa Dios bisan og wala kita makasabut niini sa hingpit? Awhaga ang mga bata sa pagtan-aw diha sa 2 Nephi 9:20, 28–29, ug 42–43 alang sa tabang sa pagpamalandong ug paghisgot niini nga mga pangutana.

Awhaga ang Pagkat-on diha sa Panimalay

Tabangi ang mga bata sa paghunahuna og paagi nga matudlo nila sa ilang mga pamilya ang ilang nakat-unan mahitungod ni Jesukristo ug sa Iyang Pag-ula. Sama pananglit, mahimo nilang gamiton ang pahina sa kalihokan niini nga semana aron sa pagpasabut kon sa unsang paagi ang Manluluwas makatabang kanato sa pagbuntog sa sala ug kamatayon.

Pagpalambo sa Atong Pagtudlo

Gamita ang mga pahina sa kalihokan. Samtang ang mga bata motrabaho sa mga pahina sa kalihokan, gamita ang panahon sa pagtabang nila nga makakita kon sa unsang paagi ang kalihokan adunay kalabutan sa mga baruganan gikan sa leksyon ug sa unsang paagi ang mga baruganan magamit sa ilang mga kinabuhi.