“Pebrero 10–16. 2 Nephi 6–10: ‘O Unsa Kamahinungdanon sa Laraw sa Atong Dios!’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)

“Pebrero 10–16. 2 Nephi 6–10,” Dali, Sunod Kanako—Alang sa mga Indibidwal ug mga Pamilya: 2020

Imahe

Si Jesus nag-ampo sa Getsemani

Dili ang Akong Pagbuot Maoy Matuman Kondili ang Imo, ni Harry Anderson

Pebrero 10–16

2 Nephi 6–10

“O Unsa Kamahinungdanon sa Laraw sa Atong Dios!”

Samtang magbasa ka sa 2 Nephi 6–10, palandunga unsay gusto nga itudlo sa Ginoo kanimo. Samtang imong pangitaon kini nga mga kamatuoran, irekord kini ug mainampoong mokonsiderar unsaon nimo sa paglihok sa unsay imong nakat-unan.

Irekord ang Imong mga Impresyon

Mga 40 na ka tuig sukad mibiya ang pamilya ni Lehi sa Jerusalem. Didto sila sa laing bag-ong yuta, katunga sa kalibutan ang gilay-on gikan sa Jerusalem ug sa nahibilin nga katawhan sa pakigsaad sa Dios. Si Lehi namatay, ug ang iyang kaliwat nakasugod na sa unsay mahimong gatusan ka tuig nga panagbingkil tali sa mga Nephite—“kinsa mituo sa mga pasidaan ug mga pagpadayag sa Dios”—ug sa mga Lamanite, nga wala motuo (2 Nephi 5:6). Niini nga mga sirkumstanya, si Jacob, kinsa manghud nga lalaki ni Nephi ug karon naordinahan nga usa ka magtutudlo alang sa mga Nephite, gusto nga makahibalo ang katawhan sa pakigsaad nga ang Dios dili gayud makalimot kanila, mao nga kinahanglan dili gayud sila makalimot Kaniya. Mao kini ang mensahe nga gikinahanglan gayud nato sa atong kaugalingong kalibutan, diin ang mga pakigsaad gitamay ug ang pagpadayag gisalikway. “Ato siya nga hinumduman, … kay kita dili mga sinalikway. … Daghan ang mga saad sa Ginoo,” namahayag siya (2 Nephi 10:20–21). Apil niadto nga mga saad, walay mas labaw pa kay sa usa ka “walay kinutuban nga pag-ula” sa pagbuntog sa kamatayon ug impyerno (2 Nephi 9:7). “Busa,” miingon si Jacob, “lipaya ang inyong mga kasingkasing”! (2 Nephi 10:23).

Imahe

icon sa personal nga pagtuon

Mga Ideya alang sa Personal nga Pagtuon sa Kasulatan

2 Nephi 6–8

Ang Ginoo maloloy-on sa Iyang katawhan ug motuman sa Iyang mga saad.

Aron matabangan ang iyang katawhan nga makasabut nga sila kabahin sa balay ni Israel ug makasalig sa Dios ug sa Iyang mga saad, gikutlo ni Jacob ang mga panagna ni Isaias, nga narekord sa 2 Nephi 6–8. Gihulagway ni Isaias ang pagkatibulaag ug ang saad sa Manluluwas sa pagpundok ug pagtubos sa Iyang katawhan. Samtang ikaw magbasa, palandunga ang mga pangutana sama sa mosunod:

Unsay akong nakat-unan mahitungod sa matubsanong gugma sa Manluluwas alang kanako?
Unsa nga kahupayan ang itanyag sa Manluluwas niadtong kinsa nagtinguha Kaniya?
Unsay akong mahimo aron mas magmatinud-anong “maghulat” sa Manluluwas ug sa Iyang gisaad nga mga panalangin?

2 Nephi 9:1–26

Pinaagi sa Iyang Pag-ula, si Jesukristo miluwas sa tanang katawhan gikan sa pisikal ug espirituhanong kamatayon.

Unsa nga mga pulong o mga imahe ang imong gamiton sa pagpakigsulti sa usa ka tawo sa atong desperado nga panginahanglan alang sa usa ka Manunubos sa pagluwas nato gikan sa kamatayon ug sala? Migamit si Jacob sa mga pulong “makalilisang” ug “mangtas.” Unsa ang gitudlo ni Jacob mahitungod “niana nga mangtas, kamatayon ug impyerno” ug sa “paglingkawas” nga giandam sa Dios alang kanato? (2 Nephi 9:10). Samtang magbasa ka sa 2 Nephi 9:1–26, ikonsiderar ang pagmarka sa usa ka kolor kon unsay mahitabo kanato kon wala pa ang Pag-ula ni Jesukristo. Dayon, sa laing kolor, mahimo nimong markahan unsay atong madawat pinaagi sa Pag-ula sa Manluluwas. Unsa nga mga kamatuoran ang imong makita mahitungod sa Pag-ula ni Jesukristo nga maoy nakapadayeg nimo sa “kaalam sa Dios, sa iyang kalooy ug grasya”? (2 Nephi 9:8).

Tan-awa usab sa “Atonement of Jesus Christ,” Gospel Topics, topics.ChurchofJesusChrist.org.

2 Nephi 9:27–54

Makaduol ko ngadto ni Kristo ug madawat ang mahimayaong mga panalangin sa Iyang Pag-ula.

Si Jesukristo mianhi “sa kalibutan aron siya moluwas sa tanan nga mga tawo kon sila mopatalinghug sa iyang tingog” (2 Nephi 9:21). Sa lain nga pagkasulti, kinahanglan gayud nga kita andam nga modawat sa makaluwas nga mga panalangin nga Iyang gitanyag. Human naghulagway sa mahinungdanon nga plano sa katubsanan, si Jacob mihatag og importante nga mga pasidaan ug mga pagdapit, nga makita sa 2 Nephi 9:27–54, aron matabangan kita nga makadawat sa mga panalangin sa Pag-ula. Ikonsiderar ang pagrekord niini sa tsart nga sama niini:

Mga pasidaan	Mga Pagdapit
Mga pasidaan	Mga Pagdapit
Mga pasidaan	Mga Pagdapit

Unsay giaghat sa Espiritu nga imong buhaton agig tubag niini nga mga pasidaan ug mga pagdapit?

2 Nephi 10:20, 23–25

Tungod sa sakripisyo ni Jesukristo, ako “magmaya” sa akong kasingkasing.

Ang mensahe ni Jacob makapalipay. “Ako mamulong nganha kaninyo niini nga mga butang,” miingon siya, “nga kamo magmaya, ug ihangad ang inyong mga ulo sa kahangturan” (2 Nephi 9:3). Samtang magbasa ka sa 2 Nephi 10:20, 23–25, unsay imong nakita nga nakahatag nimo og paglaum? Unsa pay imong nakit-an sa 2 Nephi 9–10 nga nakahatag nimo og paglaum? Unsay imong buhaton aron mahinumduman kining mga butanga kon ikaw mobati nga nawad-an og paglaum?

Tan-awa usab sa Juan 16:33.

Imahe

icon sa pagtuon sa pamilya

Mga Ideya alang sa Pamilya nga Pagtuon sa Kasulatan ug Family Home Evening

Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka ideya.

2 Nephi 8:3–7

Kon basahon nimo ang 2 Nephi 8:3, mahimo kang mopakita og mga litrato sa desyerto ug usa ka tanaman. Unsaon sa Ginoo sa pag-usab sa mga desyerto sa atong mga kinabuhi ngadto sa mga tanaman? Sa mga bersikulo 4–7, unsa ang gitambag sa Ginoo kanato aron makadawat og hingpit nga kalipay nga gihulagway sa bersikulo 3?

2 Nephi 8:24–25

Sa unsa nga paagi nga ang makapaawhag nga mga pulong ni Isaias ngadto sa mga katawhan sa Zion nakapalig-on nato sa atong mga paningkamot nga mahimong mas matinud-anon nga disipulo ni Jesukristo? Sa unsa nga paagi nga ang pagbangon ug pagsinina susama sa unsay gusto sa Dios nga atong buhaton sa espirituhanong paagi?

2 Nephi 9:1–26

Unsa ang mabuhat sa imong pamilya aron mas makasabut sa kamahinungdanon sa “walay katapusan nga pag-ula” ni Jesukristo? (bersikulo 7). Tingali makatan-aw sila o makahunahuna mahitungod sa mga butang nga ingon og walay katapusan sa gidaghanon—mga sagbut sa kaumahan, mga lugas sa balas sa baybayon, o sa mga bitoon sa kawanangan. Sa unsa nga paagi nga ang Pag-ula sa Manluluwas walay katapusan? Unsa nga mga pulong sa 2 Nephi 9 ang nakadako sa atong pasalamat sa unsay nahimo sa Manluluwas kanato?

2 Nephi 9:27–44

Tingali usa ka adlaw niining semanaha ang imong pamilya makasiksik sa 2 Nephi 9:27–38, nga mangita sa mga pasidaan nga (giunhan og “alaut”). Hain niini ang ingon og importante kaayo nga hisgutan sa imong pamilya? Sa laing adlaw, makasiksik ka sa 2 Nephi 9:39–44, nga mangita kon unsay gidapit ni Jacob nga hinumduman sa mga tawo.

2 Nephi 9:28–29, 50–51

Unsa ang pipila ka ehemplo “sa pagkakawang, ug sa pagkahuyang, ug sa kabuang sa mga tawo”? (bersikulo 28). Unsay atong mahimo aron sa paghatag og dugang nga bili sa mga butang sa Dios ug dili sa mga butang sa kalibutan?

2 Nephi 9:45

Tingali ang imong pamilya malingaw nga maghimo og papel nga kadena ug dayon magpuli-puli sa pagsumpay niini ug pagyabyab niini. Sa unsa nga paagi nga ang mga sala sama sa mga kadena? Sa unsa nga paagi nga ang Manluluwas makatabang nato sa pagyabyab niini?

Alang sa dugang nga mga ideya sa pagtudlo sa mga bata, tan-awa kini nga latid [outline] karong semanaha diha sa Dali, Sunod Kanako—Alang sa Primary.

Pagpalambo sa Atong Pagtudlo

Pagmahimong anaa ug dali nga maduol. “Ang pipila sa labing maayo nga mga higayon sa pagtudlo magsugod sa usa ka pangutana o kabalaka diha sa kasingkasing sa usa ka sakop sa [pamilya]. … Pahibaloa sila pinaagi sa imong mga pulong ug mga aksyon nga ikaw ganahan nga maminaw kanila” (Pagtudlo sumala sa Pamaagi sa Manluluwas, 16).