Sinulat ni Isaias diha sa linukot nga mga papel

Pebrero 17–23

2 Nephi 11–25

“Kami Nalipay diha kang Kristo”

Si Nephi mitudlo nga ang mga pulong ni Isaias “yano ngadto sa tanan nga napuno sa espiritu sa panagna” (2 Nephi 25:4). Samtang magbasa ka, tinguhaa ang espiritu sa panagna pinaagi sa pag-andam sa imong kaugalingon sa espirituhanong paagi, maminaw sa Espiritu, ug morekord sa imong mga impresyon.

Irekord ang Imong mga Impresyon

Ang pagkulit diha sa metal nga mga palid dili sayon, ug ang luna sa gagmay nga mga palid ni Nephi limitado. Mao ngano nga si Nephi mohimo sa budlay nga trabaho sa pagkopya sa dako nga bahin sa mga sinulat ni Isaias ngadto sa iyang rekord? Gibuhat niya kini “nga si kinsa … ang nakakita niini nga mga pulong unta mobayaw sa ilang mga kasingkasing ug magmaya” (2 Nephi 11:8). Sa pagsabut niini, ang pagdapit sa pagbasa sa mga sinulat ni Nephi usa ka pagdapit sa pagmaya. Ikaw mahimong mahimuot, sama ni Nephi, sa mga panagna ni Isaias mahitungod sa pagpundok sa Israel, sa pag-anhi sa Mesiyas, ug sa kalinaw sa milenyum nga gisaad ngadto sa mga matarung. Malipay ka nga bisan sa adlaw sa “kasamok, ug kangitngit,” ikaw “nakakita og dako nga kahayag” (2 Nephi 18:22; 19:2). Busa, magmaya ka nga ikaw “motimba og tubig gikan sa mga tabay sa kaluwasan.” (2 Nephi 22:3). Sa laing pagkasulti, ikaw mahimong “malipay diha kang Kristo” (2 Nephi 25:26).

icon sa personal nga pagtuon

Mga Ideya alang sa Personal nga Pagtuon sa Kasulatan

2 Nephi 11–25

Unsaon nako nga mas makasabut sa mga pagtulun-an ni Isaias?

Si Nephi miangkon nga alang sa uban, “ang mga pulong ni Isaias dili yano” (2 Nephi 25:4). Kini tinuod gayud alang niadtong kinsa dili pamilyar sa karaang kultura sa Judeo ug hiyograpiya sama ni Nephi (tan-awa sa 2 Nephi 25:6). Apan si Nephi mihatag usab og tambag aron matabangan kita sa pagpangita sa kahulugan sa mga sinulat ni Isaias:

“Mopasunod sa iyang mga pulong ngadto” sa imong kaugalingon (2 Nephi 11:2).Daghan sa mga sinulat sa mga pagtulun-an ni Isaias adunay daghang kahulugan ug mga kagamitan. Pananglitan, ang iyang mga sinulat mahitungod sa pagkatibulaag ug pagpundok sa Israel mahimong moaghat nimo sa paghunahuna mahitungod sa imong panginahanglan nga “mapundok” balik ngadto sa Manluluwas.

Paningkamot nga “mapuno sa espiritu sa panagna” (2 Nephi 25:4).Ang labing maayong paagi aron masabtan ang mga panagna ni Isaias mao ang pagtinguha og inspirasyon gikan sa Espiritu. Mag-ampo alang sa espirituhanong giya. Mahimong dili nimo masabtan ang tanang mga butang sa sugod, apan ang Espiritu makatabang nimo nga makat-on unsa imong gikinahanglan aron makahibalo sa imong kinabuhi karon.

Tingali makita usab nimo nga makatabang ang paggamit sa mga tabang sa pagtuon diha sa mga kasulatan, lakip sa mga footnote, mga ulohan sa kapitulo, Giya ngadto sa mga Kasulatan, ug uban pa.

2 Nephi 11:2–8; 25:19–29

“Ang sakto nga paagi mao ang pagtuo kang Kristo.”

Si Nephi mipaila ug mitapos sa iyang kinutlo ni Isaias pinaagi sa pagpadayag sa iyang pagpamatuod ni Jesukristo (tan-awa sa 2 Nephi 11:2–8; 25:19–29). Unsa ang nakapadani kanimo niini nga pagpamatuod? Samtang magtuon ka niining semanaha, hunahunaa ang mahitungod sa mga tinguha ni Nephi sa “pagdasig sa [iyang] mga anak … sa pagtuo kang Kristo, ug aron makig-uli sa Dios” (2 Nephi 25:23), ug timan-i ang mga tudling nga nagdasig kanimo sa pagtuo ug pagsunod ni Jesukristo.

Tingali makatabang ang paghinumdom nga daghan sa mga pagtulun-an ni Isaias mahitungod sa Manluluwas gipasabut pinaagi sa mga simbolo. Pananglitan, mahimong makita nimo ang Manluluwas pinaagi sa mga simbolo sama sa ginoo sa ubasan (tan-awa sa 2 Nephi 15:1–7), usa ka bato (tan-awa sa 2 Nephi 18:14), ug usa ka kahayag (tan-awa sa 2 Nephi 19:2). Unsa ang ubang mga simbolo ni Jesukristo ang imong nakita niini nga mga kapitulo? Unsa ang gitudlo niini nga mga simbolo mahitungod Kaniya?

2 Nephi 12–13

Ang mapagarbuhon ug kalibutanon mapaubos.

Nakita ni Nephi nga ang garbo maoy hinungdan sa pagkapukan sa iyang katawhan (tan-awa sa 1 Nephi 12:19). Mao nga dili ikatingala nga si Nephi mopakigbahin sa iyang katawhan sa gibalik-balik nga mga pasidaan ni Isaias batok sa garbo. Sa mga kapitulo 12 ug 13, pangitaa ang mga pulong nga gigamit ni Isaias sa paghulagway sa pagkamapagarbuhon, sama sa mapahitas-on ug pagkahambog. Dayon mahimo nimong sulayan sa pag-usab kini nga mga pasidaan sa imong kaugalingong mga pulong, ingon og ikaw nagsulat og mensahe sa imong kaugalingon sa pagpasidaan mahitungod sa garbo.

Tan-awa usab sa “Kapitulo 18: Maglikay sa Garbo” (Mga Pagtulun-an sa mga Presidente sa Simbahan: Ezra Taft Benson [2014], 277–89).

2 Nephi 12:2–5; 21:9–12; 22; 24:1–3

Sa Milenyum, ang katawhan sa Dios makatagamtam og kalinaw.

Tingali makatabang kanimo ang paghanduraw sa imong kaugalingon diha sa dapit ni Nephi ug sa iyang katawhan. Hunahunaa nga ikaw milayas gikan sa Jerusalem sa wala pa kini malaglag (tan-awa sa 2 Nephi 25:10), ug karon ikaw kabahin sa pagkatibulaag sa Israel. Unsa kahay imong gibati nga nakabasa sa mga pagtulun-an ni Isaias mahitungod sa pagpundok sa Israel ug sa malinawon nga Milenyum? Isip mga Santos sa Ulahing mga Adlaw, gitawag kita sa pagtabang sa pagpundok sa katawhan sa Dios sa ulahing mga adlaw sa pagpangandam sa paghari ni Kristo sa Milenyum. Samtang magbasa ka niini nga mga bersikulo, palandunga sa unsa nga paagi ikaw nagtabang nga matuman ang mga panagna nga ilang gihulagway. Unsay gibati nimo nga nadasig nga buhaton aron sa pagtabang sa pagpundok sa katawhan sa Dios?

icon sa pagtuon sa pamilya

Mga Ideya alang sa Pamilya nga Pagtuon sa Kasulatan ug Family Home Evening

Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka ideya.

2 Nephi 12:1–3

Kon ikaw nakaadto na sa templo—“ang bukid sa balay sa Ginoo”—mahimo nimong ipakigbahin sa imong pamilya kon sa unsa nga paagi nga ang mga pakigsaad sa templo nakatabang nimo sa “pagsubay sa dalan [sa Ginoo].” Kon ikaw wala pa makaadto sa templo, ang pagbasa niini nga mga bersikulo makapadasig og panaghisgot kon unsaon nimo sa pag-andam alang sa mga panalangin sa templo.

2 Nephi 15:18–23

Makahunahuna ba ang imong pamilya og moderno nga mga ehemplo sa dili matarung nga mga ideya nga gihulagway niini nga mga bersikulo? Unsaon nato nga makalikay nga mailad sa sayop nga mga ideya mahitungod sa maayo ug dautan?

2 Nephi 21

Kon ang imong pamilya nagkinahanglan og tabang aron makasabut niini nga kapitulo (nga natukma sa Isaias 11), tingali makakita ka og panabut diha sa Doktrina ug mga Pakigsaad 113:1–6, diin si Propeta Joseph Smith mitubag sa pipila ka pangutana mahitungod sa Isaias 11. Unsay atong makat-unan mahitungod ni Jesukristo gikan niini nga mga bersikulo?

2 Nephi 21:9

Unsa ang pipila ka piho nga mga butang nga atong mahimo sa pagtabang nga mapuno ang yuta “sa kahibalo sa Ginoo”?

2 Nephi 25:23–26

Unsaon nimo sa pagtabang ang mga sakop sa imong pamilya nga “maglipay diha ni Kristo”? Tingali madapit nimo sila sa pagsulat sa piraso sa papel sa mga butang mahitungod sa Manluluwas nga makahatag nila og hingpit nga kalipay. Dayon, atol sa umaabut nga mga family home evening o pagtuon sa kasulatan sa pamilya, dunay mobasa sa piraso sa papel. Ang mga sakop sa pamilya mahimong modugang og piraso sa papel sa tibuok tuig.

Alang sa dugang nga mga ideya sa pagtudlo sa mga bata, tan-awa kini nga latid [outline] karong semanaha diha sa Dali, Sunod Kanako—Alang sa Primary.

Pagpalambo sa Personal nga Pagtuon

Pangita og mga sundanan. Diha sa mga kasulatan makita nato ang mga sundanan nga nagpakita nato kon sa unsa nga paagi naglihok ang Ginoo. Pananglitan, sa 2 Nephi 11–25, tingali makakita ka og mga sundanan nga nagpakita sa unsa nga paagi ang Ginoo mopasidaan ug mopasaylo.

Templo sa Panama City Panama

Templo sa Panama City Panama. “Ang balay sa Ginoo pagatukuron sa tumoy sa mga bukid, ug ipataas ibabaw sa mga kabungturan, … ug ang tanan nga mga kanasuran mag-ambahan paingon ngadto niini” (2 Nephi 12:2).