1 Kay tan-awa, ang Ginoo, ang Ginoo sa mga Panon, mobawi gikan sa Jerusalem, ug gikan sa Juda, sa tanang matang sa panginahanglan ug suporta, sa kinatibuk-ang suporta sa panginahanglan ug sa tinapay, ug sa kinatibuk-ang suporta sa tubig—

2 Ang tawo nga maisog, ug ang tawo nga manggugubat, ang maghuhukom, ug ang propeta, ug ang manggialamon, ug ang tigulang;

3 Ang kapitan sa kalim-an, ug ang talahoron nga tawo, ug ang magtatambag, ug ang malipoton nga salamangkero, ug ang batid nga mamumulong.

4 Ug ako mohatag og mga bata ngadto kanila nga mahimo nilang mga prinsipe, ug ang mga masuso magamando kanila.

5 Ug ang katawhan pagadaog-daogon, ang matag usa pinaagi sa lain, ug ang matag usa pinaagi sa iyang silingan; ang bata magmapahitas-on sa iyang kaugalingon batok sa tigulang, ug ang walay batasan batok sa talahoron.

6 Kon ang usa ka tawo mogunit sa iyang igsuong lalaki sa balay sa iyang amahan, ug moingon: Ikaw adunay sapot, himoon ka namong magmamando, ug ayaw itugot nga kining pagkagun-ob mahitabo ubos sa imong kamot—

7 Nianang adlawa manumpa siya nga mag-ingon: Dili ako mahimo nga usa ka mananambal; kay sa akong balay walay pan ug mga sapot; ayaw ako himoa nga tigmando sa katawhan.

8 Kay ang Jerusalem nagun-ob, ug ang Juda napukan, tungod kay ang ilang mga dila ug ang ilang mga binuhatan nahisupak sa Ginoo, aron sa paghagit sa mga mata sa iyang himaya.

9 Ang makita diha sa ilang panagway nagsaksi batok kanila, ug nagpahayag nga ang ilang kasal-anan susama sa Sodom, ug dili sila makatago niini. Alaot ang ilang mga kalag, kay sila miganti og kadaotan sa ilang mga kaugalingon!

10 Sultihi ang mga matarong nga maayo kini alang kanila; kay makakaon sila sa bunga sa ilang mga binuhatan.

11 Alaot kadtong mga daotan, kay mangalaglag sila; kay ang ganti sa ilang mga kamot maanaa kanila!

12 Ug sa akong katawhan, mga bata ang molupig kanila, ug mga babaye ang magmando kanila. O akong katawhan, sila nga nangulo kaninyo mao ang midala kaninyo sa pagkasayop ug miguba sa dalan nga inyong agian.

13 Ang Ginoo nagabarog aron molaban, ug nagabarog aron mohukom sa katawhan.

14 Ang Ginoo mohimo sa paghukom uban sa karaan niyang katawhan ug sa mga prinsipe niini; kay kamo mihurot og kaon sa ubasan ug sa kinawat gikan sa mga kabos sulod sa inyong mga balay.

15 Unsay buot ninyong ipasabot? Gidagmalan ninyo ang akong katawhan, ug mibagnos sa nawong sa mga kabos, miingon ang Ginoong Dios sa mga Panon.

16 Gawas pa niini, ang Ginoo miingon: Tungod kay ang mga anak nga babaye sa Zion mga mapahitas-on, ug naglakaw nga pinataas ang mga liog ug hilas nga mga mata, nga nagpakiay-kiay samtang naglakaw, ug nagpatagingting sa dayan-dayan sa ilang mga tiil—

17 Busa ang Ginoo mopatubo og mga hubag-hubag sa bagolbagol sa ulo sa mga anak nga babaye sa Zion, ug ang Ginoo moyagyag sa ilang tinago nga mga bahin.

18 Niana nga adlaw tangtangon sa Ginoo ang kaanindot sa nagtaginting nilang mga dayan-dayan, ug sa mga dayan-dayan sa ulo, ug sa mga pugong nga sama og porma sa bulan;

19 Sa mga kwentas ug sa mga pulseras, ug sa mga bandana;

20 Sa mga kalo, ug sa mga dayan-dayan sa mga bitiis, ug sa mga bandana, ug sa gipahumotan nga mga kahon, ug sa mga ariyos;

21 Sa mga singsing, ug sa mga pahiyas sa ilong;

22 Sa nagkalain-laing terno nga sapot, ug sa mga kupo, ug sa mga purong sa ulo, ug sa mga puntil;

23 Sa mga salamin, ug sa mahalong mga panapton, ug sa mga turban, ug sa mga belo.

24 Ug mahitabo, nga imbis sa kahumot mopuli, ang kabaho; ug imbis usa ka higot sa hawak, usa ka gisi; ug imbis hapsay kaayo nga buhok, pagkaupaw; ug imbis kupo sa dughan, usa ka binalikos nga sako; marka sa pagkaulipon, imbis katahom.

25 Ang inyong kalalakin-an mangapukan pinaagi sa espada ug ang inyong mga maisog mangamatay sa gubat.

26 Ug ang iyang mga ganghaan magsubo ug magbangotan; ug mawad-an siya sa bili, ug magapungko sa yuta.