1 Ug adunay motungha nga saha gikan sa kaliwat ni Jesse, ug sanga gikan sa iyang mga gamot.

2 Ug ang Espiritu sa Ginoo mokunsad diha kaniya, ang espiritu sa kaalam ug salabotan, ang espiritu sa pagtambag ug gahom, ang espiritu sa kahibalo ug ang kahadlok sa Ginoo;

3 Ug mohimo kaniya nga abtik og salabotan mahitungod sa kahadlok sa Ginoo; ug dili siya mohukom sigon sa nakita sa iyang mga mata, ni mobadlong subay sa madungog sa iyang mga dunggan.

4 Apan pinaagi sa pagkamatarong hukman niya ang mga kabos, ug mobadlong pinasubay sa kaangayan alang sa mga maaghop sa yuta; ug bunalan niya ang yuta pinaagi sa pulong sa iyang ba-ba, ug pinaagi sa gininhawa sa iyang mga ngabil siya mopatay sa mga daotan.

5 Ug ang pagkamatarong mao ang bakos sa iyang mga bat-ang, ug pagkamatinud-anon ang bakos sa iyang mga dapidapi.

6 Ang lobo usab makig-uban sa nati nga karnero, ug ang leopardo modulog sa nati nga kanding, ug ang nati nga baka ug ang nati nga leon ug ang mga binuhi nga hayop mag-ipon; ug ang gamay nga bata moguyod kanila.

7 Ug ang baka ug ang uso manibsib; ang ilang mga nati magdulog sa pagpanghigda; ug ang leon manibsib og kumpay sama sa toro.

8 Ug ang masuso nga bata magdula sa lungag sa malala nga bitin, ug ang bata nga linutas mokuot sa iyang kamot ngadto sa halwa sa mabangis nga bitin.

9 Sila dili mopasakit ni molaglag sa tanan nga akong balaan nga bukid, kay ang yuta mapuno sa kahibalo bahin sa Ginoo, sama sa katubigan nga mopuno sa dagat.

10 Ug niana nga adlaw adunay usa ka gamot ni Jesse, nga mobarog nga usa ka bandila sa katawhan; diha niini ang mga Hentil magpangita; ug ang iyang pagpahulay mahimayaon.

11 Ug mahitabo nga niana nga adlaw ang Ginoo moandam na usab sa iyang kamot sa ikaduhang higayon aron sa pagbawi sa salin sa iyang katawhan nga mahabilin, gikan sa Asiria, ug gikan sa Ehipto, ug gikan sa Parthia, ug gikan sa Cush, ug gikan sa Elam, ug gikan sa Shinar, ug gikan sa Hamath, ug gikan sa mga pulo sa dagat.

12 Ug mopahimutang siya og usa ka bandila alang sa mga nasod, ug pundokon ang mga sinalikway sa Israel, ug pundokon ang mga nagkatibulaag sa Juda gikan sa upat ka suok sa yuta.

13 Ang kasina sa Ephraim usab matapos, ang mga kaaway sa Juda ipahimulag; ang Ephraim dili masina sa Juda, ug ang Juda dili mohasol sa Ephraim.

14 Apan mosulong sila nga magpatong sa mga abaga sa mga Filestihanon paingon sa kasadpan; ug sila pangkawatan nila og dungan sa silangan; gamiton nila ang ilang kamot sa pag-ilog sa gahom sa Edom ug sa Moab; ug ang mga anak ni Ammon motuman kanila.

15 Ug ang Ginoo hingpit nga mopauga sa dila sa dagat sa Ehipto; ug pinaagi sa iyang kusog nga hangin kutawon niya pinaagi sa iyang kamot ang suba, ug ibunal kini didto sa pito ka sapa, ug mopatabok sa mga tawo nga dili mahumod ang ilang mga tiil.

16 Ug adunay lapad nga dalan alang sa salin sa iyang katawhan nga mahibilin, gikan sa Asiria, sama sa nahitabo sa Israel sa adlaw nga siya mibiya sa yuta sa Ehipto.