Si Jesus mitabang sa usa ka babaye

Siya Moagak Kanimo pinaagi sa Kamot, ni Sandra Rast

Pebrero 24–Marso 1

2 Nephi 26–30

“Usa ka Kahibulongan nga Buhat ug usa ka Katingalahan”

Ang Ginoo miingon, “Ako nagsugo sa tanan … nga sila mosulat sa mga pulong diin Ako mamulong ngadto kanila” (2 Nephi 29:11). Pinaagi sa Espiritu, ang Ginoo mamulong nganha kanimo samtang ikaw magtuon sa Iyang pulong. Irekord unsay imong nadawat.

Irekord ang Imong mga Impresyon

“Ako managna nganha kaninyo mahitungod sa katapusan nga mga adlaw,” misulat si Nephi (2 Nephi 26:14). Sa laing pagkasulti, siya nagsulat mahitungod sa atong panahon. Ug adunay rason nga mabalaka mahitungod unsay iyang nakita: ang mga tawo nga milimud sa gahum ug mga milagro sa Dios, grabe nga kasina ug panagbangi, ang yawa migapos sa mga tawo gamit ang lig-on nga mga gapos. Apan agig dugang niining ulahing adlaw nga “mga buhat sa kangitngit” (2 Nephi 26:10, 22) nga gipangulohan sa kaaway, si Nephi namulong usab sa “usa ka kahibulongan nga buhat ug usa ka katingalahan” nga gigiyahan sa Ginoo Mismo (2 Nephi 27:26). Ug sa sentro niana nga buhat mao ang usa ka basahon—usa ka basahon nga mamulong gikan sa abug, nga mopadayag sa mga bakak ni Satanas, ug nga mopundok sa mga matarung sama sa usa ka sumbanan. Ang Basahon ni Mormon, ang kahibulongan nga buhat mao ang buhat sa Simbahan sa Ginoo sa ulahing mga adlaw, ug ang katingalahan mao nga siya nagdapit natong tanan, bisan pa sa atong mga kahuyang, sa pag-apil.

icon sa personal nga pagtuon

Mga Ideya alang sa Personal nga Pagtuon sa Kasulatan

2 Nephi 26:20–33

Si Jesukristo nagdapit sa tanang katawhan sa pagduol ngadto Kaniya.

Si Propeta Joseph Smith mitudlo nga ang Langitnong Amahan “walay kinutuban sa iyang mga kalooy ug mga panalangin, kay sa atong pagkaandam sa pagtuo o pagdawat” (The Joseph Smith Papers, “History, 1838–1856, volume D-1,” p. 4 [addenda], josephsmithpapers.org). Basaha unsay nakita ni Nephi sa 2 Nephi 26:20–22 ug unsay iyang gitudlo mahitungod sa Manluluwas sa mga bersikulo 23–33, ug itandi kini ngadto sa pamahayag ni Joseph Smith. Unsay inyong nakat-unan mahitungod sa walay kinutuban nga kalooy sa Ginoo? Unsay imong mahimo isip usa ka sakop sa Simbahan ni Jesukristo aron mahimong mas Kristohanon sa paagi sa imong pagtagad sa mga anak sa Dios?

Tan-awa usab sa 3 Nephi 18:30–32.

2 Nephi 26–27

Unsa nga basahon ang gihisgutan niini nga mga kapitulo?

Ang panagna ni Nephi sa 2 Nephi 26–27, nga nadasig pag-ayo gikan sa mas unang panagna ni Isaias (tan-awa sa Isaias 29), nanagna sa pagtungha sa Basahon ni Mormon. Kini nga panagna naghulagway sa mosunod:

• Ang mga pulong sa binhi ni Lehi (sa iyang kaliwatan) namulong gikan sa “hagawhaw gikan sa abug” uban sa “mahisama sa espiritista” ug “pagasilyohan diha sa usa ka basahon” (2 Nephi 26:14–17; tan-awa usab sa Isaiah 29:4).

• Usa ka bahin sa basahon gihatag ngadto sa usa ka maalamon nga tawo kinsa moingon, “Dili ako makabasa niana” (2 Nephi 27:15–20; Joseph Smith—Kasaysayan 1:64–65; tan-awa usab sa Isaias 29:11).

Agig dugang sa Isaias, ang ubang mga propeta sa biblia naghisgot sa Basahon ni Mormon, bisan wala nila hisguti ang ngalan niini. Pananglitan, ang Ezequiel 37:15–20 naghisgot sa “sungkod ni Jose,” nga magpasabut sa rekord sa mga Nephite, kinsa mga kaliwat ni Jose. Kini nga rekord mahimong usa uban sa “sungkod ni Juda,” gipasabut ang Biblia.

Ubang mga ehemplo makita sa Giya ngadto sa mga Kasulatan, “Basahon ni Mormon” (scriptures.ChurchofJesusChrist.org).

2 Nephi 28

Si Satanas nagtinguha sa pag-ilad.

Daghan sa mga bakak ug mga taktika ni Satanas gipadayag sa mga paghulagway ni Nephi sa katapusang mga adlaw sa 2 Nephi 28. Tan-awa kon makit-an ba nimo kini (pananglitan, tan-awa ang mga bersikulo 6, 8, 21–23, 29). Ngano nga kinahanglan nga makahibalo ka mahitungod sa mga bakak ni Satanas? Unsay buhaton nimo kon ang kaaway maningkamot sa pag-ilad kanimo?

2 Nephi 28:27–31; 29

Ang Dios nagpadayon sa paghatag og pagpadayag sa paggiya sa Iyang mga anak.

Isip mga Santos sa Ulahing mga Adlaw kita napanalanginan sa kaabunda sa pulong sa Dios, mao ang pasidaan ni Nephi magamit alang kanato: kinahanglan nga dili kita mobati nga “kita adunay igo!” Samtang magbasa ka sa mga pasidaan sa 2 Nephi 28 ug 29, palandunga ang mga pangutana nga sama niini:

• Sa unsa nga paagi nga ang Ginoo gusto nga ako mobati mahitungod ug motubag sa Iyang pulong?

• Ngano nga ang mga tawo usahay “masuko” mahitungod sa pagdawat og dugang nga kamatuoran gikan sa Dios? (2 Nephi 28:28). Mibati ba ako niini? Kon mao, unsaon nako nga mas modawat sa kamatuoran?

• Unsay buot ipasabut sa pagdawat sa pulong sa Dios? Unsaon nako sa pagpakita Kaniya nga ako gusto nga modawat pa sa Iyang pulong?

Tan-awa usab sa Alma 12:10–11; 3 Nephi 26:6–10.

2 Nephi 29–30

Ang Dios miandam sa Basahon ni Mormon alang sa atong panahon.

Si Nephi nakahibalo pinaagi sa pagpadayag, bisan sa wala pa makompleto pagsulat ang Basahon ni Mormon, nga kini sa umaabut nga adlaw “mahimo nga mahinungdanon og bili ngadto sa mga katawhan” (2 Nephi 28:2). Ngano nga ang Basahon ni Mormon bililhon kaayo nimo? Hunahunaa kini nga pangutana samtang magbasa sa 2 Nephi 29–30. Unsa ang pipila sa “kahibulongan” nga mga buhat nga gihimo sa Dios sa kalibutan ug sa imong kinabuhi pinaagi sa Basahon ni Mormon?

icon sa pagtuon sa pamilya

Mga Ideya alang sa Pamilya nga Pagtuon sa Kasulatan ug Family Home Evening

Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka ideya.

2 Nephi 26:12–13

Gitudlo ni Nephi nga si Jesukristo nagpakita sa Iyang kaugalingon pinaagi sa Espiritu Santo. Unsa nga mga kasinatian ang ipakigbahin sa mga sakop sa pamilya sa usag usa kon ang ilang mga pagpamatuod sa Manluluwas nalig-on pinaagi sa Espiritu Santo?

2 Nephi 26:22; 28:19–22

Tingali ang imong pamilya malingaw sa praktikal nga paghulagway sa unsay gitudlo sa 2 Nephi 26:22 mahitungod sa yawa. Samtang magbasa ka sa mga taktika ni Satanas sa 2 Nephi 28:19–22, mahimong imong bugkusan ang pulso sa usa ka tawo og hilo nga magrepresentar og “linino nga pisi.” Sa unsa nga paagi nga ang linino nga pisi sama sa mga tintasyon ni Satanas? Sa unsa nga paagi mahimo kining lig-on nga pisi? Unsaon nato sa pag-ila sa mga bakak ni Satanas?

gibugkos nga piraso sa hilo

Gitandi ni Nephi ang mga tintasyon sa yawa ngadto sa “linino nga pisi.”

2 Nephi 27:20–21

Unsa kaha ang gipasabut sa Ginoo sa dihang Siya miingon, “Ako makahimo sa pagbuhat sa akong kaugalingon nga buhaton.”? Sa unsa nga paagi nga kini nga kamatuoran makaimpluwensya sa paagi sa atong pagserbisyo sa Iyang Simbahan?

2 Nephi 28:30–31

Makahunahuna ba ang imong pamilya og butang nga, sama sa pagpadayag gikan sa Dios, nga labing maayong madawat sa ginagmay matag higayon? Ngano nga ang Dios mopadayag sa kamatuoran ngari kanato “pagtulun-an human sa usa ka pagtulun-an, lagda human sa usa ka lagda, diyutay dinhi ug diyutay didto” imbis nga kausahon ra?

2 Nephi 29:7–9

Unsa ang tuyo sa Ginoo nga pamatud-an o ipakita uban sa Basahon ni Mormon?

Alang sa dugang nga mga ideya sa pagtudlo sa mga bata, tan-awa kini nga latid [outline] karong semanaha diha sa Dali, Sunod Kanako—Alang sa Primary.

Pagpalambo sa Personal nga Pagtuon

Pakigbahin og mga panabut. Ang paghisgot ngadto sa uban unsay imong nakat-unan makapalig-on sa imong kaugalingong pagsabut. Human magbasa sa 2 Nephi 29:6–14, tingali mobati ka nga nadasig sa pagpasabut ngadto sa usa ka higala ngano nga kita nagkinahanglan sa Basahon ni Mormon.

Si Nephi nagsulat diha sa bulawan nga mga palid

Ang mga sinulat ni Nephi nanagna sa “usa ka kahibulongan nga buhat ug usa ka katingalahan” nga mahitabo sa katapusang mga adlaw (2 Nephi 27:26).