“Marso 23–29. Enos–Mga Pulong ni Mormon: Siya Nagtabang Kanako sa Pagbuhat sa Iyang Kabubut-on,” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Marso 23–29. Enos–Mga Pulong ni Mormon,” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020
Jacob ug Enos, ni Scott Snow
Marso 23–29
Enos–Mga Pulong ni Mormon
Siya Nagtabang Kanako sa Pagbuhat sa Iyang Kabubut-on
Samtang magbasa ka sa Enos hangtud sa Mga Pulong ni Mormon, pangitaa ang mga mensahe nga bililhon kanimo o sa imong pamilya.
Irekord ang Imong mga Impresyon
Si Enos miadto sa lasang aron mangayam og mga hayop, apan nagpabilin hinoon siya didto aron mag-ampo sa “tibuok adlaw … ug sa dihang midangat ang kagabhion” (Enos 1:3–4). Tungod kay ang kalag tinud-anay nga gigutom aron makadawat og kapasayloan sa iyang mga sala, si Enos andam nga mag-ampo kon gikinahanglan ug gani sa “pagpakigbisog” sa atubangan sa Dios (Enos 1:2). Mao kana ang kinasingkasing nga pag-ampo: dili kaayo mangayo og bisan unsa nga atong gusto apan usa ka sinsero nga paningkamot sa pagpakigsulti sa Dios ug pagpahiuyon sa atong kabubut-on ngadto sa Iya. Kon ikaw mag-ampo niining paagiha, kon ang imong tingog “moabut sa kalangitan,” madiskobrehan nimo sama ni Enos nga ang Dios nakadungog kanimo, ug Siya sa tinud-anay nagpakabana mahitungod kanimo, sa imong mga minahal, ug gani sa imong mga kaaway (tan-awa sa Enos 1:4–17). Nianang mga gutloa, ang Dios makahimo sa pagpahibalo sa Iyang kabubut-on nganha kanimo, ug ikaw mas andam ug makahimo sa pagbuhat sa Iyang kabubut-on tungod kay ikaw nahiuyon uban Kaniya. Sama ni Mormon, ikaw “wala masayud sa tanan nga mga butang; apan ang Ginoo nasayud sa tanan nga mga butang … [ug] siya naglihok diha [kanimo] sa pagbuhat sumala sa iyang kabubut-on” (Mga Pulong ni Mormon 1:7).
Mga Ideya alang sa Personal nga Pagtuon sa Kasulatan
Ang mga pulong sa ginikanan adunay malungtarung impluwensya.
Unsa nga mga mensahe ang anaa niini nga mga bersikulo alang sa mga ginikanan ug alang sa mga anak?
Ang akong kinasingkasing nga mga pag-ampo pagatubagon.
Ang kasinatian ni Enos sa pag-ampo mao ang usa sa labing halandumon diha sa kasulatan. Ang imong mga kasinatian dili tingali kaayo madrama, apan kini dili ingon nga walay kahulugan. Ang mga kasinatian ni Enos mahimong mopadayag sa pagpalambo sa imong mga pag-ampo. Ania ang pipila ka pangutana nga pamalandungan:
-
Unsa nga mga pulong ang naghulagway sa mga paningkamot ni Enos samtang siya nag-ampo?
-
Unsa ang unang giampo ni Enos? (tan-awa sa Enos 1:4). Unsay imong makat-unan gikan sa tubag ni Enos human siya makadawat og tubag? (tan-awa sa Enos 1:5–7).
-
Unsa ang gibuhat ni Enos sa mga tubag nga iyang nadawat?
-
Unsay imong makat-unan gikan ni Enos mahitungod unsaon sa pagbaton og “pagka dili matarug” nga hugot nga pagtuo diha sa Ginoo? (Enos 1:11).
Ang Ginoo mopanalangin kanako kon ako motuman sa mga sugo.
Usa sa labing gibalik-balik nga mga saad sa Dios diha sa Basahon ni Mormon mao nga kon ang mga Nephite motuman sa mga sugo, sila mouswag (tan-awa sa 2 Nephi 1:20; Jarom 1:9–12; Omni 1:6). Ang mga basahon ni Jarom ug Omni nagpakita og pipila ka mga paagi diin kini nga saad natuman. Unsay imong nakat-unan gikan niini nga mga istorya nga makatabang nimo nga “mouswag diha sa yuta”?
Kinsa ang mga katawhan ni Zarahemla?
Human ang mga Nephite milayas sa yuta sa Nephi, ilang nadiskobrehan ang daghan kaayong mga tawo nga nagpuyo sa usa ka dapit nga gitawag og Zarahemla. Ang katawhan sa Zarahemla mga kaliwat sa usa ka grupo sa mga Israelite kinsa, sama sa pamilya ni Lehi, mibiya sa Jerusalem ug gigiyahan sa Dios ngadto sa gisaad nga yuta. Uban niana nga grupo mao si Mulek, usa sa mga anak ni Sedechias, ang hari sa Juda kinsa gidakop sa mga taga-Babelonia niadtong mga 587 BC (tan-awa sa Jeremias 52:1–11; Mosiah 25:2; Helaman 8:21).
Pag-abut sa katawhan ni Zarahemla sa gisaad nga yuta, ilang nahimamat si Coriantumr (tan-awa sa Omni 1:21), ang katapusan nga nailhan nga nabuhi sa mga Jaredites, kansang istorya gihisgutan sa basahon ni Ether.
Unsa ang Mga Pulong ni Mormon?
Ang Mga Pulong ni Mormon nagsilbi nga taytayan tali sa duha ka hut-ong sa mga palid nga maoy naglangkob sa Basahon ni Mormon. Dinhi si Mormon mihatag og pagpasabut niining duha ka mga rekord, ug ang iyang mga pulong nagtudlo og importante nga mensahe mahitungod sa pagsalig sa Ginoo, bisan kon kita wala makasabut sa hingpit sa Iyang direksyon.
Samtang si Nephi nagsulat sa rekord sa iyang katawhan, ang Dios migiya kaniya sa paghimo og duha ka hut-ong sa mga palid, nga gitawag nga gagmay nga mga palid ug dagko nga mga palid ni Nephi. Wala masayud si Nephi ngano nga gisugo siya sa paghimo og duha ka hut-ong sa mga palid, apan misalig siya nga ang Ginoo adunay “usa ka maalamon nga katuyoan … , diin nga katuyoan ako wala masayud” (1 Nephi 9:5; tan-awa usab sa “Mubo nga Pagpasabut mahitungod sa Basahon ni Mormon”).
Paglabay sa mga katuigan, samtang si Mormon nagmubo sa dagkong mga palid ni Nephi, nadiskubrihan niya ang gagmay nga mga palid. Ang gagmay nga mga palid naglakip sa daghan sa samang mga panghitabo nga gihulagway sa dagko nga mga palid nga gipamubo na ni Mormon, apan ang gagmay nga mga palid mas nagtutok sa espirituhanong mga butang ug sa pangalagad ug mga pagtulun-an sa mga propeta. Ang Dios midasig ni Mormon sa paglakip sa gagmay nga mga palid ni Nephi sa iyang rekord agig dugang ngadto sa dagko nga mga palid. Sama ni Nephi, si Mormon wala makasabut sa katuyoan sa Dios sa paghimo og duha ka hut-ong sa mga palid, apan misalig siya nga kini “alang sa usa ka maalamon nga katuyoan” (Mga Pulong ni Mormon 1:7).
Karon nasayud kita unsa ang katuyoan sa Dios. Niadtong 1828, human mahubad ni Joseph Smith ang kabahin sa minubo ni Mormon sa dagko nga mga palid ni Nephi (ang 116 ka pahina nga manuskrito), nawala ni Martin Harris kadto nga mga pahina. Ang Dios misugo ni Joseph nga dili hubaron pag-usab kini nga porsyon tungod kay ang dautan nga mga tawo mousab sa mga pulong ug maningkamot nga dauton si Joseph (tan-awa sa D&P 10, ulohan sa seksyon; D&P 10:14–19, 30–45). Salamat, ang Dios nakakita na niini ug miandam sa gagmay nga mga palid, nga naglakip sa sama nga kasaysayan sa nawala uban sa 116 ka pahina. Ang gagmay nga mga palid naglangkob sa mga basahon nga nag-una sa Mga Pulong ni Mormon, ug ang minubo ni Mormon sa dagko nga mga palid nga nagsugod sa Mga Pulong ni Mormon.
Si Mormon Naghapnig sa mga Palid, ni Jorge Cocco
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka ideya.
Enos 1:1–17
Ang imong pamilya mahimong motan-aw sa litrato ni Enos nga nag-ampo ug pagsiksik sa Enos 1:1–17 alang sa mga pulong nga mahimong magamit isip ulohan sa litrato. Mahimo usab nga mohangyo ka sa mga sakop sa pamilya sa pagdrowing og mga litrato sa kasinatian ni Enos. Unsay atong nakat-unan gikan ni Enos mahitungod sa pagpangayo og pasaylo?
Jarom 1:2
Sa unsa nga paagi nga ang atong pagtuon sa Basahon ni Mormon “mopadayag sa plano sa kaluwasan” ngari kanato?
Omni 1:12–22
Unsa ang gitudlo niini nga mga bersikulo mahitungod sa kaimportante sa pagbaton sa pulong sa Dios sa atong kinabuhi?
Mga Pulong ni Mormon 1:3–9
Sa unsa nga paagi kita mapanalanginan pinaagi sa pagtipig og personal ug pamilya nga mga rekord? Sa unsa nga paagi nga kita makahimo sa atong mga rekord nga mas nagtutok kang Kristo?
Alang sa dugang nga mga ideya sa pagtudlo sa mga bata, tan-awa kini nga latid [outline] karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Pagpundok kamo kanunay. Si Presidente Henry B. Eyring mitudlo: “Dili gayud mopalabay og usa ka kahigayonan sa pagpundok sa mga anak aron pagkat-on sa doktrina ni Jesukristo. Kini nga mga higayon panagsa lamang itandi sa mga paningkamot sa kaaway” (The Power of Teaching Doctrine,” Ensign, Mayo 1999, 74).
Nag-ampo si Enos, ni Robert T. Barrett