“Marso 9–15. Jacob 1–4: ‘Mahiuli ngadto sa Dios pinaagi sa Pag-ula ni Kristo,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Marso 9–15. Jacob 1–4,” Dali, Sunod Kanako—Alang sa mga Indibidwal ug mga Pamilya: 2020
Gipasaylo, ni Greg K. Olsen
Marso 9–15
Jacob 1–4
Mahiuli ngadto sa Dios pinaagi sa Pag-ula ni Kristo
Kon imong irekord ang espirituhanong mga impresyon, ikaw nagpakita nga ikaw gusto nga ang Espiritu Santo motudlo kanimo. Samtang magbasa ka sa Jacob 1–4, ikonsiderar ang pagsulat sa imong mga nasabtan.
Irekord ang Imong mga Impresyon
Ang mga Nephite miisip ni Nephi nga ilang “gamhanan nga tigpanalipod” (Jacob 1:10). Gipanalipdan niya sila batok sa mga pang-ataki gikan sa ilang mga kaaway, ug siya mipasidaan kanila mahitungod sa espirituhanong mga kakuyaw. Karon nga wala na siya, ang buluhaton sa paggiya sa mga Nephite sa espirituhanon anaa ni Jacob, nga gipahinungod ni Nephi nga mahimong usa ka pari ug magtutudlo sa katawhan (tan-awa sa Jacob 1:18). Pinaagi sa inspirasyon, si Jacob nakasabut nga ang iyang katawhan kinahanglan nga tudloan uban sa “tuman nga kaisug,” kay sila “nagsugod sa pagbuhat diha sa pagpakasala” (Jacob 2:7, 5). Kini nga mga sala pareha kaayo sa unsay gipakigbisugan sa mga tawo karon: gugma sa katigayunan ug sekswal nga imoralidad. Ug gani samtang gibati ni Jacob nga siya kinahanglan nga manghimaraut niini nga pagkadautan, ang iyang kasingkasing nasakitan usab sa mga biktima niini, kansang mga kasingkasing “natusok sa lawom nga mga samad” (Jacob 2:35). Mipamatuod si Jacob nga ang pagkaayo sa duha ka pundok—ang makasasala ug ang espirituhanon nga nasamdan—magagikan sa Manluluwas nga si Jesukristo. Ang mensahe ni Jacob, sama sa mensahe ni Nephi nga nag-una kaniya, mao ang pagtawag “nga pakig-uli ngadto sa [Dios] pinaagi sa pag-ula ni Kristo” (Jacob 4:11).
Mga Ideya alang sa Personal nga Pagtuon sa Kasulatan
Ang Ginoo gusto nga akong palamboon ang akong balaan nga tawag.
Ngadto ni Jacob, ang pagtudlo sa pulong sa Dios mas labaw pa kay sa buluhaton gikan sa iyang igsoon nga lalaki—usa kini ka “sugo gikan sa Ginoo,” mao nga naningkamot siya nga “mipalambo sa [iyang] buluhaton” (Jacob 1:17, 19). Si Presidente Gordon B. Hinckley mitudlo nga atong mapalambo ang atong mga calling “kon kita moserbisyo uban sa kakugi, samtang motudlo kita uban sa pagtuo ug pagpamatuod, samtang atong bayawon ug lig-unon ug tukuron ang mga kombiksyon sa pagkamatarung niadtong kansang mga kinabuhi nga atong matandog” (“Magnify Your Calling,” Ensign, Mayo 1989, 47). Hunahunaa ang imong kaugalingon “[mga sugo] gikan sa Ginoo” samtang magbasa ka sa Jacob 1:6–8, 15–19 ug 2:1–11. Ngano nga si Jacob matinud-anon kaayong mialagad? Unsay nakapadasig nimo sa iyang ehemplo nga imong buhaton sa pagpalambo sa imong balaang mga tawag sa Simbahan ug sa imong mga responsibilidad sa panimalay?
(ChurchofJesusChrist.org).
Ang Ginoo nahimuot sa kaputli.
Ang sala adunay mga sangputanan alang sa mga indibidwal ug alang sa mga kapunongan. Sa paghisgot mahitungod sa sekswal nga sala, si Jacob mipasidaan sa duha ka matang sa mga sangputanan. Kon basahon nimo ang Jacob 2:31–35 ug 3:10, pangitaa ang mga paagi nga ang imoralidad nakaapekto sa mga Nephite isip katawhan ug isip mga indibidwal. Sa unsa nga paagi nga kini nga mga paagi susama sa mga sangputanan sa imoralidad nga imong nakita sa kalibutan karon? Unsay imong makita sa mga pulong ni Jacob nga makatabang nimo sa pagtudlo sa usa ka minahal mahitungod sa kaimportante sa kaputli? Sa unsa nga paagi ikaw napanalanginan sa imong mga paningkamot nga mahimong putli?
Timan-i nga si Jacob naghisgot usab sa binuhatan nga adunay labaw sa usa ka asawa. Unsay imong makita sa Jacob 2:23–30 nga makatabang nimo nga makasabut ngano nga ang Ginoo, sa limitado nga mga sitwasyon, misugo sa Iyang katawhan sa pagbuhat sa dinaghan nga kaminyoon? Unsa ang Iyang gibati mahitungod niadtong kinsa wala Niya tuguti?
Mahimo akong makig-uli ngadto sa Dios pinaagi sa Pag-ula ni Jesukristo.
Nangamuyo si Jacob sa iyang katawhan nga “makig-uli ngadto sa [Dios] pinaagi sa pag-ula ni Kristo” (Jacob 4:11). Unsa kaha ang gipaabut niana? Makatabang ba ang pagtan-aw sa pakig-uli sa usa ka diksyonaryo? Tingali makita nimo ang mga pulong niini nga kapitulo nga nagsugyot kanimo unsaon nga ikaw makaduol ngadto ni Kristo aron nga ikaw mahimong makig-uli ngadto sa Dios. Pananglitan, gitudlo ni Jacob nga ang balaod ni Moises gihatag sa paggiya sa mga tawo ngadto ni Jesukristo (tan-awa sa Jacob 4:5). Unsa ang gihatag sa Dios sa paggiya nimo ngadto ni Kristo? Giunsa nimo paggamit kining mga butanga aron mas mahiduol ngadto sa Dios?
Tan-awa usab sa 2 Nephi 10:24.
Makalikay ko sa espirituhanon nga pagkabuta pinaagi sa pagtutok sa Maluluwas.
Samtang naningkamot si Jacob nga kompleto niyang madala ang iyang katawhan ngadto sa Ginoo, iyang gipasidan-an sila nga dili magpakabuta sa espirituhanon ug dili mobiay-biay sa “kayano sa mga pulong” (tan-awa sa Jacob 4:13–14). Si Elder Quentin L. Cook mipasidaan sa susama nga mga problema sa atong panahon: “Adunay kalagmitan sa pipila kanato sa ‘pagtan-aw lapas sa timailhan’ kay sa pagpadayon sa usa ka pagpamatuod sa mga sukaranan sa ebanghelyo. Gibuhat nato kini kon atong ipuli ang mga pilosopiya sa mga tawo alang sa mga kamatuoran sa ebanghelyo, moapil sa papalabaw sa ebanghelyo, … o ipatigbabaw ang mga lagda labaw sa ebanghelyo. Ang paglikay niini nga mga kinaiya makatabang nato sa paglikay sa teyolokanhong pagkabuta ug babag nga gihulagway ni Jacob” (“Looking beyond the Mark,” Liahona, Mar. 2003, 42).
Sumala sa Jacob 4:8–18, unsay atong mahimo nga motutok sa Manluluwas ug maglikay sa espirituhanon nga pagkabuta?
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka ideya.
Jacob 1:6–8, 15–19; 2:1–11; 4:18
Unsa nga mga pulong niini nga bersikulo ang nagpasabut sa gugma nga gibati ni Jacob alang niadtong iyang gigiyahan? Unsay gibuhat sa atong mga lider sa Simbahan aron matabangan kita nga mobati sa ilang “tinguha ug kabalaka alang sa kaayohan sa [atong] mga kalag”? (Jacob 2:3). Tingali ang mga sakop sa pamilya makapaambit og mga paagi nga kita makapaluyo sa atong mga lider sa Simbahan. Mahimo kamo nga magplano nga mohimo og butang isip pamilya alang sa lokal nga mga lider sa Simbahan, sama sa pagsulat sa pagpasalamat nila sa ilang pagserbisyo o paghinumdom nila ug sa ilang mga pamilya sa inyong mga pag-ampo.
Jacob 2:8
Sa unsa nga paagi nga ang pulong sa Dios makaayo “sa samaran nga kalag”?
Jacob 2:12–21
Unsa ang gitudlo niini nga mga bersikulo kon unsaon nato sa pagtan-aw ang atong materyal nga bahandi? Unsay atong gibuhat sa pagtabang sa uban kinsa nagkinahanglan sa atong tabang?
Jacob 3:1–2
Unsay gipasabut sa “putli sa kasingkasing” ug “tan-aw ngadto sa Dios uban ang kalig-on sa hunahuna”?
Jacob 4:4–11
Usa ka paagi aron matabangan ang imong pamilya nga makasabut unsay gipasabut sa “dili matarug” ang ilang pagtuo mao ang pagpangita og dako nga kahoy sa duol ug mosugo sa mga sakop sa pamilya sa pag-uyog sa tagsa-tagsa ka mga sanga. Dayon pasulayi nila ang pag-uyog sa punoan. Ngano nga mas lisud ang pag-uyog sa punoan? Unsay atong makat-unan gikan sa mga pagtulun-an ni Jacob mahitungod kon unsaon sa pagpalambo sa pagtuo nga “dili matarug”?
Sama sa punoan sa kahoy, ang atong pagtuo ni Kristo mahimong “dili matarug.”
Alang sa dugang nga mga ideya sa pagtudlo sa mga bata, tan-awa kini nga latid [outline] karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Paminaw sa Espiritu. Samtang ikaw magtuon, bantayi ang imong mga hunahuna ug mga pagbati (tan-awa sa D&P 8:2–3), bisan og kini walay kalabutan sa imong gibasa. Kadto nga mga impresyon tingali mao ang butang nga gusto sa Dios nga imong mahibaloan ug buhaton.
Akong Ipadala ang Ilang mga Pulong (Jacob ang Magtutudlo), ni Elspeth Caitlin Young