“Marso 9–15. “Jacob 1–4: ‘Pakig-uli ngadto sa Dios pinaagi sa Pag-ula ni Kristo,’” Dali, Sunod Kanako—Alang sa Primary: Basahon ni Mormon 2020 (2020)
“Marso 9–15. Jacob 1–4,” Dali, Sunod Kanako—Alang sa Primary: 2020
Gipasaylo, ni Greg K. Olsen
Marso 9–15
Jacob 1–4
Pakig-uli ngadto sa Dios pinaagi sa Pag-ula ni Kristo
Samtang imong basahon ang Jacob 1–4, pamalandungi kon unsa nga mga baruganan gikan niini nga mga kapitulo ang labing importante nga makat-unan sa mga bata. Pagtinguha og espiritwal nga giya aron masayud unsaon sa pagtudlo niining mga baruganan sa labing maayong paagi, ug irekord ang imong mga impresyon.
Irekord ang Imong mga Impresyon
Dapita ang Pagpaambit
Dapita ang mga bata sa pagpaambit og butang nga gibuhat nila o sa ilang mga pamilya karong semanaha aron makat-on gikan sa Jacob 1–4. Mahimo ka usab nga mohangyo kanila sa pagpaambit og usa ka butang nga ilang mahinumduman gikan sa leksyon sa miaging semana. Unsa ang mahimo nimong ipangutana aron sa pagtabang kanila nga makahinumdom?
Itudlo ang Doktrina: Mas Gagmay nga mga Bata
Ang Dios nagtawag og mga lider sa Simbahan aron sa pagtabang kanako sa pagsunod ni Jesukristo.
Tabangi ang mga bata nga makasabut nga mapanalanginan sila sa pagsunod sa tambag sa mga lider sa Simbahan.
Posible nga mga Kalihokan
-
Paghimo og yano nga mga puppet aron morepresentar ni Jacob ug Joseph, ang mga manghud ni Nephi, kinsa mga lider sa Simbahan. Pagpaambit og pipila ka mga bersikulo gikan sa Jacob 1 ug 2 aron mapasabut kon unsa ang mga buluhaton sa mga lider sa Simbahan. Sama pananglit, ang mga lider nag-agni kanato nga “motuo kang Kristo” (Jacob 1:8), nagdapit kanato sa paghinulsol (tan-awa sa Jacob 2:5–6, 9–10), ug “[mo]padayag [sa] pulong [sa Dios]” (Jacob 2:2, 11). Pagamita ang mga bata sa mga puppet nga magpakaaron-ingnon nga nagbuhat sa pipila niini nga mga butang.
-
Dapita ang mga bata sa paghingalan og pipila ka mga lider sa Simbahan nga ilang nailhan, sama sa mga lider sa Primary, mga sakop sa bishopric, ug mga propeta ug mga apostoles. Tabangi ang mga bata sa paghunahuna sa mga paagi nga makapanalangin kanato kini nga mga lider.
Ang atong mga lider sa Simbahan nagtabang kanato sa pagsunod ni Jesukristo.
Makatabang ko sa uban nga nanginahanglan kon magpaambit ako kanila.
Nakasabut ba ang mga bata nga imong gitudloan sa mga panalangin nga moabut kon mopaambit sila niadtong nanginahanglan? Unsaon nimo sa pagtabang nila nga mahibalo nga ang Langitnong Amahan ug si Jesus gusto nga motabang sila sa uban?
Posible nga mga Kalihokan
-
Ipasabut nga ang pipila sa mga tawo sa panahon ni Jacob mga adunahan kaayo, apan dili sila gusto nga mopaambit sa unsay anaa kanila ngadto sa mga tawo nga kabus. Basaha ang Jacob 2:17–19 aron matabangan ang mga bata nga makasabut sa mga pagtulun-an ni Jacob ngadto niini nga mga tawo. Samtang imo kining buhaton, hatagi ang mga bata og mga hulagway o mga butang nga ilang magunitan nga mobagay sa mga pulong o hugpong sa mga pulong niini nga mga bersikulo.
-
Dapita ang mga bata sa pag-aksyon sa mga paagi nga mahimo silang mopaambit sa unsay anaa kanila ngadto sa tawo nga nanginahanglan. Ipamatuod nga mapanalanginan kita samtang mopaambit kita ngadto sa uban.
-
Pagdala og usa ka butang ngadto sa klase nga mahimo nimong mapaambit sa mga bata. Hatagi ang matag bata niini, ug ipasabut nga nagpaambit ka. Pangutan-a sila kon unsay ilang gibati sa dihang mipaambit ka kanila. Unsa ang ilang bation kon mopaambit sila sa uban? Tabangi sila sa paghunahuna og usa ka butang nga mahimo nilang mapaambit aron sa pagtabang sa usa ka tawo nga malipay.
Akong mapalig-on ang akong pagtuo kang Jesukristo.
Samtang nagpuyo si Jacob sa matarung nga paagi bisan pa sa pagkadautan nga naglibut kaniya, ang iyang pagtuo nahimong lig-on kaayo nga dili kini matarug. Pamalandungi kon unsaon nimo sa pagtabang ang mga bata nga makasabut kon unsay ipasabut sa pagbaton og pagtuo nga dili matarug.
Posible nga mga Kalihokan
-
Tabangi ang mga bata sa paghunahuna og mga butang nga ilang gibuhat aron mahimong mas lig-on ang ilang mga lawas. Unsa ang atong mabuhat aron mahimong mas lig-on ang atong pagtuo? Paklia ang mga kasulatan ngadto sa Jacob 4:6, ug tabangi ang mga bata sa pagdiskubre kon unsay gibuhat ni Jacob ug sa iyang katawhan aron ang ilang pagtuo nahimong “dili matarug.”
-
Kantaha ang “Ang Tawong Maalam ug ang Tawong Walay Kaalam” (Songbook sa mga Bata, 132 ) uban sa mga bata. Sa usa ka bahin sa pisara, pagdrowing og balay nga gitukod ibabaw sa balas. Sa pikas nga bahin sa pisara, pagdrowing og balay nga gitukod ibabaw sa bato. Kon mahimo, pagdala og balas ug bato sa klase. Hain man ang mas sayon uyugon o lihukon? Hain niini, ang balas o ang bato, ang gusto nato nga mahisama ang atong pagtuo?
Itudlo ang Doktrina: Mas Dagko nga mga Bata
Ang Dios nagtawag og mga lider sa Simbahan aron sa pagtabang kanako sa pagsunod ni Jesukristo.
Ang mga bata nga imong gitudloan mapanalanginan samtang mosalig ug mosunod sila sa tambag sa mga lider sa Simbahan.
Posible nga mga Kalihokan
-
Basaha uban sa mga bata ang Jacob 1:6–8 ug 2:1–6, 11, nga tabangan sila sa pagpangita sa mga pulong nga naghulagway kon unsaon sa mga sulugoon sa Dios sa pagpangulo ang Simbahan. Hangyoa sila sa pagsulat niini nga mga hugpong sa mga pulong diha sa mga piraso sa papel ug dayon i-display ang mga papel diha sa pisara. Nganong mitawag man ang Dios og mga lider sa Simbahan sa paggiya kanato? Hangyoa ang mga bata sa pagpaambit og mga kasinatian sa pagkat-on o pagdawat og giya gikan sa usa ka lider sa Simbahan o magtutudlo ug ang mga panalangin nga ilang nadawat.
-
Hangyoa ang mga bata sa pagdrowing og hulagway sa usa ka lider sa Simbahan nga ilang nailhan, ug ipatag-an sa tibuok klase kon kinsa ang ilang gidrowing. Unsa ang gibuhat niini nga mga lider aron sa pagtabang kanako sa pagsunod ni Jesukristo? Dapita ang mga bata sa paghimo og mugbo nga mga sulat ngadto sa mga lider sa Simbahan, nga magpasalamat kanila sa ilang pagserbisyo.
-
Dapita ang usa ka lokal nga lider sa Simbahan sa pagsulti sa mga bata kon unsa ang iyang gibuhat sa pagtuman sa iyang calling. Hangyoa ang mga bata sa paghingalan og pipila ka mga butang nga ilang mabuhat aron makasuporta sa ilang mga lider.
Makatabang ko sa uban nga mobati og kalipay pinaagi sa pagpaambit kanila.
Ang tinuod nga mga sumusunod ni Jesukristo andam nga mopaambit sa unsay anaa kanila ngadto sa uban. Awhaga ang mga bata sa paghatag og kalipay niadtong nanginahanglan pinaagi sa pagpaambit ngadto kanila.
Posible nga mga Kalihokan
-
Sultihi ang mga bata nga daghang mga tawo sa panahon ni Jacob nahimong mapagarbuhon ug dili mabination tungod kay nahigugma sila sa mga bahandi (tan-awa sa Jacob 2:12–14, 17–21). Dapita ang pipila ka mga bata sa pagbasa og kusog sa Jacob 2:17–19, ug tabangi sila nga makasabut sa bisan unsang lisud nga mga pulong. Unsay angay natong tinguhaon sa dili pa kita magtinguha og mga bahandi? Unsay tinguhaon natong buhaton sa bisan unsang bahandi nga atong madawat?
-
Basaha ang Jacob 2:17 ngadto sa mga bata. Unsa nga mga panalangin ang gipaambit sa Langitnong Amahan kanato? Nganong gusto man Niya nga mopaambit kita sa usag usa? Dapita ang mga bata sa pagpaambit og mga panahon sa dihang aduna silay gipaambit ngadto sa laing tawo, lakip ang ilang gibati ug unsay gibati sa laing tawo.
Akong mapalig-on ang akong pagtuo kang Jesukristo.
Ang pagtuo ni Jacob nahimong dili matarug samtang nagsiksik siya sa mga pulong sa mga propeta ug nakadawat sa iyang kaugalingong saksi (tan-awa sa Jacob 4:6). Unsaon nimo pagtabang ang mga bata nga magtinguha sa pag-ugmad og pagtuo nga dili matarug?
Posible nga mga Kalihokan
-
Dapita ang mga bata sa paghunahuna og mga butang nga mahimong lig-on ug dili matarug paglabay sa panahon, sama sa usa ka dakong kahoy. Sa unsang paagi ang pagtuo sama sa mga butang nga ilang nahunahunaan? Unsa nga mga pulong diha sa Jacob 4:6, 10–11 ang naghulagway sa unsay atong mabuhat aron mahimong dili matarug ang atong pagtuo? Hangyoa ang mga bata sa paghimo og lista diha sa pisara sa mga paagi nga makahimo sila sa paglig-on sa ilang pagtuo kang Jesukristo.
-
Ipaambit ang pasumbingay ni Elder Neil L. Andersen sa kahoy nga mitubo sa hanginon nga palibut, nga makita diha sa iyang mensahe nga “Espirituhanong mga Alimpulos” ( Liahona, Mayo 2014, 18–21). Nganong importante man nga ang atong pagtuo dili matarug ug magmalig-on sama sa punoan sa kahoy? Unsa ang girepresentaran sa mga alimpulos? Unsa ang atong mabuhat aron makaugmad og dili matarug nga pagtuo? Tabangi ang mga bata sa paghunahuna og uban pa nga mga pasumbingay nga nagtudlo sa pagbaton og pagtuo nga dili matarug.
Awhaga ang Pagkat-on diha sa Panimalay
Dapita ang mga bata sa paghunahuna og usa ka butang nga ilang mapaambit sa ilang mga pamilya—lakip ang pagpaambit og usa ka butang nga ilang nakat-unan sa klase karon. Hatagi sila og mga oportunidad sa umaabut nga leksyon nga hisgutan kon unsay ilang gipaambit.
Pagpalambo sa Atong Pagtudlo
I-awhag ang balaang pagtahud. Tabangi ang mga bata nga makasabut nga ang usa ka importante nga aspeto sa balaan nga pagtahud mao ang paghunahuna mahitungod sa Langitnong Amahan ug ni Jesukristo. Mahimo nimo silang pahinumduman nga magbaton og balaang pagtahud pinaagi sa hinay nga pagkanta o paglaylay og usa ka awit o sa pag-display og hulagway ni Jesus.