“Marso 16–22. Jacob 5–7: ‘Ang Ginoo Maghago uban Kanato,’” Dali, Sunod Kanako—Alang sa Primary: Basahon ni Mormon 2020 (2020)
“Marso 16–22. Jacob 5–7,” Dali, Sunod Kanako—Alang sa Primary: 2020
Ang Sambingay sa Kahoy nga Oliba, ni Brad Teare
Marso 16–22
Jacob 5–7
Ang Ginoo Maghago uban Kanato
Pagtuon, pagpamalandong, ug pag-ampo aron masayud kon sa unsang paagi nga labing maayo nimong matudloan ang mga bata sa mga kamatuoran nga makita diha sa Jacob 5–7. Irekord ang bisan unsang impresyon nga imong madawat.
Irekord ang Imong mga Impresyon
Dapita ang Pagpaambit
Aron mosugod og diskusyon mahitungod sa mga mensahe nga makita diha sa Jacob 5–7, dapita ang mga bata sa paghisgut kabahin sa mga butang sa ilang kinabuhi nga nakatabang kanila nga mobati sa gugma sa Langitnong Amahan ug ni Jesukristo. Unsaon nato sa pagpakita sa atong gugma alang sa uban?
Itudlo ang Doktrina: Mas Gagmay nga mga Bata
Ang mga misyonaryo nagserbisyo sa mga anak sa Langitnong Amahan.
Pamalandungi kon unsaon nimo pagpaambit sa sambingay sa mga kahoy nga oliba sa paagi nga masabtan sa mga bata.
Posible nga mga Kalihokan
-
Pagpakita og hulagway sa usa ka kahoy, o panglakaw mo sa gawas aron motan-aw og kahoy, ug ribyuha sa daklit ang labing mahinungdanong mga parte sa sambingay sa mga kahoy nga oliba diha sa Jacob 5. Sama pananglit: ang Ginoo sa ubasan (nga mahimong morepresentar ni Jesus) naghago og maayo sa pag-amuma sa iyang mga kahoy nga oliba (nga mahimong morepresentar sa katawhan sa yuta) tungod kay hilabihan ang Iyang pagpakabana kanila. Mitawag siya og mga mamumuo (nga mahimong morepresentar sa mga misyonaryo) aron motabang sa pag-atiman sa mga kahoy. Pagpili og usa o duha ka mga bersikulo gikan sa Jacob 5 aron basahon ngadto sa mga bata (sama sa mga bersikulo 71–72).
-
Pangutan-a ang mga bata kon duna ba silay kaila nga nakaserbisyo og misyon, o paghisgot og tawo nga imong nailhan. Tabangi ang mga bata nga matultulan diha sa mapa ang mga dapit kon asa nagserbisyo kadto nga mga misyonaryo. Ipasabut nga gitandi ni Jacob ang kalibutan ngadto sa grupo sa mga kahoy nga oliba. Ang mga kahoy susama sa mga tawo dinhi sa yuta, ug ang pag-atiman niadto nga mga kahoy susama sa unsay gibuhat sa mga misyonaryo alang sa mga anak sa Dios. Unsa ang gibuhat sa mga misyonaryo aron sa pagpanalangin sa mga anak sa Langitnong Amahan? Pangitaa ninyo og dungan ang pipila ka mga tubag niini nga pangutana diha sa usa ka kanta nga sama sa “Gitawag sa Pagserbisyo” (Songbook sa mga Bata, 94–95). Unsaon nato nga mahimong sama sa mga misyonaryo?
Ang misyonaryo nga buhat maoy usa ka paagi nga makatabang kita sa mga anak sa Dios nga makabalik ngadto Kaniya.
Ang Langitnong Amahan nahigugma kanako.
Unsaon nimo sa pagtudlo sa imong klase nga ang Dios nahigugma sa tanan Niyang mga anak ug nagtuyhad sa Iyang “bukton sa kalooy” ngadto kanila?
Posible nga mga Kalihokan
-
Dapita ang mga bata nga mogakos sa matag usa. Unsa ang atong bation kon ang usa ka tawo nga atong gihigugma mogakos kanato? Basaha ang Jacob 6:5 ngadto sa mga bata, ug ipasabut nga ang mga pulong nga “[ang Dios] nagmatinud-anon nganha kaninyo” ug “ang iyang bukton sa kalooy gipatuy-od paingon nganha kaninyo” nagtudlo nga ang Langitnong Amahan nahigugma kanato ug gusto nga mobalik kita Kaniya sa umaabut.
-
Kantaha og dungan ang usa ka kanta mahitungod sa gugma, sama sa “Gibati Ko ang Gugma sa Akong Manluluwas” (Songbook sa mga Bata, 42–43). Dapita ang mga bata sa pagngalan og mga butang nga nakatabang nila nga mobati sa gugma sa Manluluwas.
Mahimo nakong panalipdan ang unsay nahibaloan nako nga tinuod.
Si Jacob usa ka maayo nga ehemplo sa usa ka tawo kansang lig-on nga pagpamatuod nakatabang kaniya sa pagpanalipod sa kamatuoran samtang nag-atubang siya og oposisyon.
Posible nga mga Kalihokan
-
Isaysay ang istorya ni Jacob ug Sherem (Jacob 7:1–23) sa paagi nga masabtan sa mga bata. Mahimo usab nimong gamiton ang “Kapitulo 10: Si Jacob ug si Sherem” (Mga Sugilanon sa Basahon ni Mormon, 27–29). Dayon isaysay pag-usab ang istorya, apan niining higayuna tuguti ang mga bata nga motabang sa pagdugang sa mga detalye. Pangutan-a sila kon unsa ang ilang nakat-unan gikan sa Jacob. Unsaon nato sa pagsunod ang iyang ehemplo?
-
Dapita ang mga bata sa pagkanta og usa ka kanta mahitungod sa pagpili sa matarung, sama sa “Buhata Gayud ang Matarung” o “Barugan ang Kamatuoran” (Songbook sa mga Bata, 80, 81). Hangyoa sila sa pagpabarug kon mokanta sila sa mga pulong sama sa matarung o tinuod.
Itudlo ang Doktrina: Mas Dagko nga mga Bata
Ang Ginoo nagpangga sa Iyang katawhan.
Mipaambit si Jacob sa sambingay sa mga kahoy nga oliba aron motabang sa pagdapit sa Iyang katawhan sa pagduol kang Kristo. Makahimo usab kini niining sama nga katuyoan sa mga bata nga imong gitudloan.
Posible nga mga Kalihokan
-
Basaha ug ipasabut sa mga bata ang importanting mga bersikulo nga nag-summarize sa sambingay sa mga kahoy nga oliba, sama sa Jacob 5:3–4, 28–29, 47, ug 70–72, ug dapita ang mga bata sa pagdrowing og mga hulagway kon unsay gihulagway niini nga mga bersikulo. Unsa ang atong makat-unan gikan niini nga mga bersikulo kon unsa ang gibati sa Ginoo kalabut sa Iyang katawhan? Hangyoa ang mga bata nga magpakaaron-ingnon nga nag-atiman og usa ka kahoy nga oliba samtang imong i-summarize sa daklit ang mga bersikulo 61–71 (mahimo silang mo-aksyon nga nagkalot, namisbis, ug uban pa). Dapita ang pipila ka mga bata sa pagbasa sa Jacob 5:11, 41, 47, ug 72, nga mangita sa mga butang nga nagpakita kon unsa ka pinangga sa Ginoo sa ubasan (si Jesukristo) ang mga kahoy. Unsa ang gibuhat sa Manluluwas aron mapakita nga nagpangga Siya kanato?
-
Ilista ang pipila sa mga simbolo sa Jacob 5 diha sa pisara, sama sa ubasan, ang ginoo sa ubasan, ang sulugoon, ug ang mga kahoy nga oliba. Dayon paghimo og laing lista, sa dili sunod nga paagi, sa mga butang nga girepresentaran niini nga mga simbolo, sama sa kalibutan, ang Manluluwas, mga lider o mga misyonaryo sa Simbahan, ug ang katawhan sa Dios. Basaha og dungan ang mga bersikulo gikan sa Jacob 5 nga naghisgot niini nga mga simbolo, ug tabangi ang mga bata sa pagdrowing og mga linya diha sa pisara nga nagkonektar sa mga simbolo ngadto sa posible nga mga kahulugan niini (tan-awa, sama pananglit, sa mga bersikulo 3–4, 28–29, 47, 70–72).
Ang Langitnong Amahan nagmahal kanako ug mopasaylo kanako kon maghinulsol ko.
Importante nga matabangan ang mga bata nga imong gitudloan nga makasabut nga ang Dios nahigugma kanila ug kanunayng mopasaylo kanila kon kinasingkasing silang maghinulsol.
Posible nga mga Kalihokan
-
Paghimo og tsart diha sa pisara nga adunay duha ka kolum nga gipangalanan og Langitnong Amahan ug Kita. Basaha og dungan ang Jacob 6:4–5, ug hangyoa ang katunga sa klase sa pagpangita og mga pulong nga magamit ngadto sa Dios ug ang laing katunga sa pagpangita og mga pulong nga magamit kanato. Irekord ang ilang madiskubrihan diha sa tukma nga kolum. Tabangi sila sa paghatag og kahulugan sa mga pulong nga wala nila masabti.
-
Ipaambit ang istorya ni Elder Allen D. Haynie mahitungod sa pagkahimong hugaw diha sa lungag sa lapok sa iyang mensahe nga “Paghinumdom kang Kinsa Kita Mosalig” (Liahona, Nob. 2015, 121–22). Unsay gitudlo niini nga istorya kanato kon unsay kinahanglan natong buhaton aron maluwas diha sa gingharian sa Dios? Unsa pa ang atong makat-unan gikan sa Jacob 6:4–5?
Mahimo nakong panalipdan ang unsay nahibaloan nako nga tinuod.
Unsaon nimo sa pagdasig ang mga bata nga manalipod sa kamatuoran sama sa gibuhat ni Jacob?
Posible nga mga Kalihokan
-
Dapita ang mga bata nga i-aksyon ang inter-aksyon tali ni Jacob ug ni Sherem, gamit ang Jacob 7:1–23 isip giya. Hangyoa ang mga bata sa paghisgut kabahin sa ilang paborito nga mga parte sa istorya. Sa unsang paagi gipanalipdan ni Jacob ang unsay iyang nahibaloan nga matarung? Hangyoa ang mga bata sa pagpaambit og mga kasinatian sa dihang gipanalipdan nila ang matarung, o pagpaambit og imong kaugalingong kasinatian.
-
Dapita ang mga bata sa pagkanta og usa ka kanta mahitungod sa pagpili sa matarung, sama sa “Buhata Gayud ang Matarung” o “Barugan ang Kamatuoran” (Songbook sa mga Bata, 80, 81). Igrupo-grupo sila, ug dapita sila sa paghimo og makapadasig nga bandera o poster nga nagrepresentar og usa ka butang nga ilang gibarugan o gituohan.
Awhaga ang Pagkat-on diha sa Panimalay
Dapita ang mga bata sa paghunahuna og usa ka paagi nga makatabang sila sa ilang mga pamilya nga mobati sa gugma sa Manluluwas—sama pananglit, pinaagi sa pagpasabut sa unsay ilang nakat-unan kon sa unsang paagi giatiman sa Ginoo sa ubasan ang iyang mga kahoy nga oliba.
Pagpalambo sa Atong Pagtudlo
Ang mga bata ganahan nga mopaambit sa unsay ilang nakat-unan. Bisan og gagmay pa sila, ang mga bata makapalig-on sa mga sakop sa ilang pamilya. Awhaga sila sa pagpaambit ngadto sa ilang mga pamilya sa mga butang nga ilang nakat-unan sa Primary. (Tan-awa sa Pagtudlo sumala sa Pamaagi sa Manluluwas, 30.)