“Marso 23–29. Enos–Mga Pulong ni Mormon: Naglihok Siya diri Kanako aron sa Pagbuhat sa Iyang Kabubut-on,” Dali, Sunod Kanako—Alang sa Primary: Basahon ni Mormon 2020 (2020)
“Marso 23–29. Enos–Mga Pulong ni Mormon,” Dali, Sunod Kanako—Alang sa Primary: 2020
Si Jacob ug si Enos, ni Scott Snow
Marso 23–29
Enos–Mga Pulong ni Mormon
Naglihok Siya diri Kanako aron sa Pagbuhat sa Iyang Kabubut-on
Ang Enos, Jarom, Omni, ug ang Mga Pulong ni Mormon mao ang mugbo nga mga basahon nga adunay daghang bililhon nga mga leksyon alang sa mga bata nga imong gitudloan. Pangitaa kini nga mga leksyon, ug pamalandong og mga paagi nga makatabang ka sa mga bata nga makakat-on niini. Ang mga ideya niini nga outline mahimong makatabang.
Irekord ang Imong mga Impresyon
Dapita ang Pagpaambit
Tabangi ang mga bata nga mahinumdom sa unsay ilang nakat-unan gikan sa leksyon sa miaging semana. Gipaambit ba nila ang ilang nakat-unan ngadto sa ilang pamilya o sa uban?
Itudlo ang Doktrina: Mas Gagmay nga mga Bata
Mahimo akong makigsulti sa Langitnong Amahan pinaagi sa pag-ampo.
Ang kasinatian ni Enos nagtudlo og pipila ka mga kamatuoran mahitungod sa pag-ampo. Unsaon nimo pagdasig ang mga bata nga mosunod sa ehemplo ni Enos samtang mag-ampo sila?
Posible nga mga Kalihokan
-
Pagpakita og hulagway ni Enos; sama pananglit, tan-awa ang outline niini nga semana sa Dali, Sunod Kanako—Alang sa mga Indibidwal ug mga Pamilya, o gamita ang hulagway nga Si Enos Nag-ampo (Libro sa mga Hulagway sa Ebanghelyo, nu. 72). Hangyoa ang mga bata sa paghisgot mahitungod sa unsay nahitabo diha sa hulagway, ug dayon ipaambit ang kasinatian ni Enos kanila. Mahimo usab nimong gamiton ang “Kapitulo 11: Si Enos” (Mga Sugilanon sa Basahon ni Mormon, 30–31).
-
Hangyoa ang mga bata sa pagpaambit sa mga butang nga ganahan sila nga makigsulti sa ilang mga ginikanan. Ipasabut nga ang pag-ampo ngadto sa Langitnong Amahan mao ang paagi nga mahimo silang makigsulti Kaniya. Samtang imong basahon ang Enos 1:1–4 ngadto sa mga bata, dapita sila nga magpakaaron-ingnon nga si Enos pinaagi sa pag-aksyon sa pagpangayam, pagluhod aron mag-ampo, ug uban pa. Ipasabut nga ang Langitnong Amahan nakadungog sa pag-ampo ni Enos ug mipasaylo sa iyang mga sala.
-
Kantaha uban sa mga bata ang usa ka kanta mahitungod sa pag-ampo, sama sa “Ampo sa Usa ka Bata” (Songbook sa mga Bata, 6–7). Dapita ang mga bata sa pagpataas sa ilang mga kamot sa matag higayon nga madungog nila ang pulong nga “pag-ampo” o ang laing gibalik-balik nga pulong. Ipamatuod ang gahum sa pag-ampo diha sa imong kinabuhi.
Isip mga anak sa Dios, makahimo kita sa pag-ampo ngadto sa atong Langitnong Amahan.
Makapanalangin ko sa uban kon maminaw ko sa Espiritu Santo.
Sa dihang gihugpong niya ang Basahon ni Mormon, naaghat si Mormon sa paglakip sa gagmay nga mga palid ni Nephi. Wala siya masayud nganong gikinahanglan ang gagmay nga mga palid, apan karon napanalanginan kita tungod kay gisunod niya kini nga pag-aghat. Kini nga ehemplo makapadasig sa mga bata sa pagsunod sa Espiritu.
Posible nga mga Kalihokan
-
Dapita ang mga bata sa pagpaambit og mga istorya nga ilang nakat-unan gikan sa Basahon ni Mormon hangtud niining puntoha sa tuig (ang mga hulagway gikan sa Dali, Sunod Kanako—Alang sa mga Indibidwal ug mga Pamilya o ang Libro sa mga Hulagway sa Ebanghelyo tingali makatabang kanila nga mahinumdom). Ipasabut nga aduna kita niini nga mga istorya sa Basahon ni Mormon tungod kay naminaw si Mormon sa dihang gisultihan siya sa Espiritu Santo sa paglakip niini. Nganong gusto man sa Langitnong Amahan nga aduna kita niini nga mga istorya?
-
Pagpaambit og istorya gikan sa mga magasin sa Simbahan o gikan sa usa ka mensahe sa kinatibuk-ang komperensya mahitungod sa usa ka tawo nga misunod sa mga pag-aghat sa Espiritu Santo. O pagpaambit og usa sa imong kaugalingon nga mga kasinatian. Dapita ang mga bata sa pagdrowing og mga hulagway sa istorya. Sa unsang paagi napanalanginan ang mga tawo niini nga mga istorya tungod kay misunod sila sa Espiritu Santo?
-
Hangyoa ang usa ka miyembro sa ward sa pagbisita sa klase ug sa pagpaambit og kasinatian sa dihang gisunod niya ang pag-aghat sa Espiritu Santo. Sa unsang paagi ang iyang mga gibuhat nakapanalangin sa uban? Ipasabut nga gusto sa Langitnong Amahan nga motabang ug mopanalangin kita sa uban, busa Iyang gipadala ang Espiritu Santo aron sa paggiya kanato.
-
Kantaha og dungan ang usa ka kanta mahitungod sa Espiritu Santo, sama sa “Ang Malinawon nga Gamay nga Tingog” (Songbook sa mga Bata, 141). Kantaha kini sulod sa pipila ka higayon sa lain-laing mga paagi, sama sa paspas, hinay, o pinahunghong. Kon ihunghong ninyo ang kanta, paklia ang Mga Pulong ni Mormon 1:7, ug hisguti nga gihulagway ni Mormon ang Espiritu Santo isip usa ka hunghong.
Itudlo ang Doktrina: Mas Dagko nga mga Bata
Ang Langitnong Amahan maminaw ug motubag sa akong kinasingkasing nga mga pag-ampo.
Dali ra kaayo nga mahimong pabalik-balik o kaswal ang atong mga pag-ampo. Ang kasinatian ni Enos usa ka pahinumdom nga ang pagdawat og mga tubag sa atong mga pag-ampo usahay magkinahanglan og “pagpakigbisog” ug “daghan ug taas nga mga pakigbisog” (Enos 1:2, 11).
Posible nga mga Kalihokan
-
Dapita ang mga bata sa pagpiyong ug paghunahuna nga nakigsulti sila sa Langitnong Amahan nga nag-atubangay. Unsa ang gusto nilang pakigsultihan uban Kaniya? Dapita ang mga bata sa paghunahuna nga nag-atubang sila nga nakigsulti sa Langitnong Amahan matag higayon nga mag-ampo sila.
-
Dapita ang mga bata nga magpares-pares sa pagtrabaho ug mobasa sa Enos 1:1–5. Hangyoa sila sa pagsiksik niini nga mga bersikulo alang sa usa ka pulong o hugpong sa mga pulong nga naghulagway sa mga pag-ampo ni Enos ug dayon sa pagpaambit sa unsay ilang nakit-an ngadto sa klase. Unsa ang gisugyot niini nga mga pulong mahitungod ni Enos ug sa iyang kasinatian? Tuguti ang mga bata nga mopaambit og dugang pa nga nakapadayeg kanila mahitungod sa mga pag-ampo ni Enos. Pagpaambit og usa ka kasinatian sa diha nga ang imong kalag “gigutom” ug ikaw “nangamuyo ngadto” sa Ginoo (Enos 1:4). Papamalandunga ang mga bata og usa ka butang nga ilang mabuhat aron mahimong mas makahuluganon ang ilang mga pag-ampo.
-
Hangyoa ang mga bata sa paglista og pipila ka butang nga kasagaran nilang i-ampo, diha sa pisara man o sa pahina sa kalihokan karong semanaha. Dayon dapita sila sa pagsiksik sa Enos 1:2, 9, 13–14, ug 16 alang sa mga butang nga giampo ni Enos, ug idugang kadto nga mga butang sa lista. Hisguti kon sa unsang paagi ang mga bata makasunod sa ehemplo ni Enos diha sa ilang mga pag-ampo; sama pananglit, mahimo nimong hisgutan nganong andam si Enos nga mag-ampo alang sa mga Lamanite—kinsa iyang mga kaaway—ug dapita ang mga bata sa pag-ampo karong semanaha alang sa usa ka tawo nga dili maayo kanila.
Makapanalangin ko sa uban kon maminaw ko sa Espiritu Santo.
Nasayud ang Ginoo nga ang unang 116 nga hinubad nga mga pahina sa Basahon ni Mormon mawala (tan-awa sa D&P 10; Mga Santos, volume 1, kapitulo 5). Aron mailisan kini nga pagkawala, gidasig Niya si Mormon pinaagi sa Espiritu sa paglakip sa gagmay nga mga palid ni Nephi diha sa Basahon ni Mormon. Unsaon nimo pagdasig ang mga bata nga mosunod sa ehemplo ni Mormon ug maminaw sa Espiritu?
Posible nga mga Kalihokan
-
Hangyoa ang mga bata nga magpuli-puli sa pagbasa sa mga bersikulo gikan sa Mga Pulong ni Mormon 1:3–8 usa ka bersikulo matag higayon, ug dayon tabangan sila sa pag-summarize kon unsay ilang nakat-unan gikan sa matag bersikulo. Ipasabut nga gisunod ni Mormon ang Espiritu pinaagi sa paglakip sa gagmay nga mga palid ni Nephi (nga anaa kanato karon isip ang 1 Nephi hangtud sa Omni) diha sa Basahon ni Mormon. Sa unsang paagi kita napanalanginan tungod kay naminaw si Mormon sa Espiritu? Sa unsang paagi kaha nga nahimong lahi ang Basahon ni Mormon kon wala pa siya maminaw? Pagpaambit og kasinatian sa dihang giaghat ka sa Espiritu Santo sa pagbuhat og usa ka butang nga nakapanalangin sa usa ka tawo. Dapita ang mga bata sa pagpaambit og bisan unsang susama nga mga kasinatian nga ilang nasinati.
-
Dapita ang usa ka estudyante sa pagbasa sa Mga Pulong ni Mormon 1:7 ug ang lain sa pagbasa sa Doktrina ug mga Pakigsaad 8:2–3. Unsa ang gitudlo niini nga mga bersikulo kon sa unsang paagi mamulong ang Espiritu Santo kanato? Tabangi ang mga bata sa pag-ila og mga higayon sa dihang mibati sila og mga pag-aghat sa Espiritu Santo. Gamita ang Moroni 7:12 sa pagpasabut nga kon ang usa ka hunahuna maayo ug nagdasig kanato sa pagbuhat og maayo nga mga butang, kini nagagikan sa Langitnong Amahan. Dapita ang mga bata nga maminaw sa mga pag-aghat nga mobuhat og maayo ug sundon kini.
Awhaga ang Pagkat-on diha sa Panimalay
Awhaga ang mga bata sa paghangyo sa mga sakop sa ilang pamilya sa pagpaambit sa ilang mga kasinatian mahitungod sa pag-ampo o sa Espiritu Santo.
Pagpalambo sa Atong Pagtudlo
Paggamit og musika. Ang mga kanta sa primary ug mga himno makatabang sa mga bata sa tanang edad nga makasabut ug mahinumdom sa mga kamatuoran sa ebanghelyo. Ang pagkanta makahimo usab sa mga bata nga aktibong moapil sa usa ka kasinatian sa pagkat-on. (Tan-awa sa Pagtudlo sumala sa Pamaagi sa Manluluwas, 22.)