“Marso 30–Abril 12. Pasko sa Pagkabanhaw: ‘Siya Mobangon … uban ang Pagpang-ayo diha sa Iyang mga Pako,’” Dali, Sunod Kanako—Alang sa Primary: Basahon ni Mormon 2020 (2020)
“Marso 30–Abril 12. Pasko sa Pagkabanhaw,” Dali, Sunod Kanako—Alang sa Primary: 2020
Si Kristo ug ang mga Apostoles, ni Del Parson
Marso 30–Abril 12
Pasko sa Pagkabanhaw
“Siya Mobangon … uban ang Pagpang-ayo diha sa Iyang mga Pako”
Samtang imong basahon ang mga kasulatan nga gisugyot dinhi ug diha sa Dali, Sunod Kanako—Alang sa mga Indibidwal ug mga Pamilya, ang Espiritu motabang kanimo nga masayud kon unsa ang tutukan aron sa pagtabang sa mga bata nga mobati sa gugma sa Manluluwas sa Dominggo sa Pasko sa Pagkabanhaw.
Irekord ang Imong mga Impresyon
Dapita ang Pagpaambit
Pakigsulti sa mga bata mahitungod sa mga butang nga imong buhaton aron makahinumdom sa Manluluwas panahon sa Pasko sa Pagkabanhaw. Dapita sila sa pagpaambit kon unsa ang ilang buhaton.
Itudlo ang Doktrina: Mas Gagmay nga mga Bata
1 Nephi 11:27; Mosiah 3:5; 15:7; Helaman 14:16–17
Ang mga propeta sa Basahon ni Mormon nasayud nga moabut si Jesukristo.
Ang pagkat-on sa unsay gitudlo sa mga propeta sa Basahon ni Mormon mahitungod sa misyon ug yutan-ong pagpangalagad ni Jesukristo makatabang sa paglig-on sa pagtuo sa mga bata Kaniya.
Posible nga mga Kalihokan
-
Pagpakita og mga hulagway sa Manluluwas nga gibunyagan, nag-ayo sa uban, gilansang sa krus, ug isip usa ka nabanhaw nga binuhat (tan-awa sa pahina sa kalihokan niining semanaha o Libro sa mga Hulagway sa Ebanghelyo, nu. 35, 41, 57, 59). Hangyoa ang mga bata sa pagsulti kanimo unsa ang nahitabo sa matag hulagway. Ipasabut nga daghang mga tuig sa wala pa si Jesus mianhi sa yuta, ang Dios mipadayag ngadto sa mga propeta sa Basahon ni Mormon nga mobuhat Siya niining mga butanga. Basaha ang 1 Nephi 11:27; Mosiah 3:5; 15:7; ug Helaman 14:16–17, ug tabangi ang mga bata sa pagpares niini nga mga kasulatan ngadto sa tukma nga mga hulagway.
-
Samtang motrabaho ang mga bata sa pahina sa kalihokan niining semanaha, hisguti ang mga propeta nga gihulagway ug unsa ang ilang gitudlo mahitungod ni Jesukristo. Ipaambit sa mga bata ang pipila sa talagsaong mga butang nga gibuhat ni Jesus alang kanato.
Si Jesukristo nabanhaw.
Tudloi ang mga bata nga agig dugang sa mga tawo nga nakakita sa nabanhaw nga Manluluwas sa Jerusalem, liboan ang nakakita Kaniya sa dihang mipakita Siya sa Amerika.
Posible nga mga Kalihokan
-
Pagpakita og mga hulagway sa kamatayon ug Pagkabanhaw sa Manluluwas. Pangutan-a ang mga bata kon unsa ang ilang nahibaloan mahitungod niini nga mga panghitabo. Kon gikinahanglan, gamita ang “Kapitulo 53: Jesus Gilansang sa Krus” ug ”Kapitulo 54: Jesus Nabanhaw” (Mga Istorya sa Bag-ong Tugon, 136–38, 139–44, ) aron sa pagsugilon niini nga mga istorya ngadto sa mga bata.
-
Gamit ang mga hulagway gikan sa Libro sa mga Hulagway sa Ebanghelyo o Dali, Sunod Kanako—Alang sa mga Indibidwal ug mga Pamilya, sultihi ang mga bata mahitungod sa pagbisita sa nabanhaw nga Manluluwas ngadto sa Amerika, sama sa gihulagway diha sa 3 Nephi 11:1–17. Balika ang istorya sa makadaghan, nga modapit sa mga bata sa pagtabang kanimo. Hatagig gibug-aton ang mga detalye nga gibati nimong makahuluganon ngadto sa mga bata. Sa pihong paagi, ipasabut og maayo nga bisan tuod si Jesus namatay sa krus, ang mga tawo makakita nga nabanhaw na Siya karon. Papuli-puliha ang mga bata sa pagsaysay og usab sa istorya gamit ang kaugalingon nilang mga pulong.
-
Manganta og dungan sa katapusang bersikulo sa “Mga Istorya sa Ang Basahon ni Mormon” (Songbook sa mga Bata, 62–63). Dapita ang mga bata sa pagdrowing og mga hulagway sa usa ka butang nga gihulagway sa kanta. Dayon hangyoa ang mga bata sa pagpaambit sa ilang mga drowing ug unsay ilang hunahuna kon unsa kaha ang bation nga maanaa didto sa dihang mibisita si Jesus sa mga Nephite.
Si Jesukristo nasayud unsaon sa paghupay kanako.
Tungod kay si Jesukristo nag-antus “sa mga sakit ug mga balatian sa iyang mga katawhan” (Alma 7:11), nasayud Siya kon unsa ang atong bation, bisan kon walay laing nasayud.
Posible nga mga Kalihokan
-
Basaha ngadto sa mga bata ang unang pipila ka mga linya sa Mosiah 3:7, ug dapita sila nga magpakaaron-ingnon nga gibati nila ang “sakit … , kagutom, kauhaw, ug kakapoy.” Hangyoa sila sa pagpaambit sa mga panahon nga gibati nila kining mga butanga. Dayon sultihi ang mga bata nga kini nga bersikulo naghulagway sa pipila ka mga butang nga gibati ni Jesukristo sa dihang nag-antus Siya didto sa Tanaman sa Getsemani. Tungod niini, nasayud Siya unsaon sa pagtabang kanato kon mobati kita niining mga butanga.
-
Basaha og kusog ang Alma 7:11 ug pangutan-a ang mga bata kon aduna ba silay kaila nga nasakit o mibati og kasakit. Ipamatuod nga si Jesukristo mibati sa tanan natong “mga kasakit ug mga balatian” aron makasabut Siya unsaon sa paghupay kanato (Alma 7:12).
Itudlo ang Doktrina: Mas Dagko nga mga Bata
2 Nephi 9:10–15; Alma 11:41–45; 40:21–23
Tungod kay nabanhaw si Jesukristo, ako mabanhaw usab.
Ang Basahon ni Mormon tataw nga naghulagway kon unsa ang gipasabut sa pagkabanhaw ug kinsa ang mabanhaw. Unsaon nimo sa pagtabang ang mga bata nga makadiskubre niini nga mga kamatuoran?
Posible nga mga Kalihokan
-
Hangyoa ang mga bata sa pagsulti kanimo unsay ilang nahibaloan mahitungod sa kamatayon ug Pagkabanhaw ni Jesukristo. Isulat diha sa pisara ang mga pangutana nga sama sa Unsay ipasabut nga mabanhaw? ug Kinsa ang mabanhaw? Tabangi ang mga bata nga makakita og mga tubag diha sa 2 Nephi 9:10–15; Alma 11:41–45; ug Alma 40:21–23 ug ipaambit sa klase kon unsay ilang nakit-an.
-
Sultihi ang mga bata mahitungod sa usa ka tawo nga imong kaila kinsa namatay. Hangyoa sila nga magpakaaron-ingnon nga wala ka masayud mahitungod sa Pagkabanhaw. Unsaon nila sa pagtabang kanimo nga makasabut kon unsa kini? Awhaga sila sa paggamit sa 2 Nephi 9:10–15; Alma 11:41–45; o Alma 40:21–23 aron sa pagtudlo kanimo mahitungod sa pagkabanhaw. Dapita usab sila nga mohatag og pagpamatuod sa Pagkabanhaw sa Manluluwas isip kabahin sa ilang tubag.
Getsemani, ni Michael T. Malm
Enos 1:2–8; Mosiah 27:8–24; Alma 13:11–12; 24:7–19
Ang Pag-ula ni Jesukristo molimpyo kanako ug mousab kanako.
Ang Basahon ni Mormon naghatag og daghang mga ehemplo sa mga tawo nga nausab tungod sa Pag-ula sa Manluluwas. Ikonsiderar kon sa unsang paagi kini nga mga kasinatian makadasig sa mga bata nga maghinulsol ug modangup sa Manluluwas.
Posible nga mga Kalihokan
-
Pakit-a ang mga bata og limpyo nga puti nga polo ug dili kaayo puti nga polo. Basaha og dungan ang Alma 13:11–12. Sa unsang paagi ang mga tawo nahimong limpyo gikan sa ilang mga sala? Unsa ang gibati nila mahitungod sa sala tungod niini? Hisguti kon unsay imong bation kon maghinulsol ka ug makadawat og kapasayloan, ug ihatag ang imong pagpamatuod sa gahum sa Manluluwas sa paglimpyo kanato gikan sa sala.
-
Dapita ang mga bata sa pagpili og usa sa mosunod nga mga tawo aron maoy kat-unan: si Enos (tan-awa sa Enos 1:2–8), si Alma nga Batan-on (tan-awa sa Mosiah 27:8–24), o ang mga Anti-Nephi-Lehi (tan-awa sa Alma 24:7–19). Samtang dungan mo nga magbasa sa istorya, dapita ang mga bata sa pagtimaan kon sa unsang paagi kini nga tawo o grupo nausab tungod sa Pag-ula ni Jesukristo. Unsaon nato pagsunod ang mga ehemplo niining mga tawhana?
Gidala ni Jesukristo diha sa Iyang kaugalingon ang akong mga sala, mga kasakit, ug mga balatian.
Agig dugang sa pag-antus sa atong mga sala, ang Manluluwas usab nag-antus sa atong mga kasakit, mga balatian, ug uban nga mga kahuyang aron mahibalo Siya unsaon sa paghupay kanato.
Posible nga mga Kalihokan
-
I-assign ang matag bata sa pagpangita og usa sa mosunod nga mga bersikulo aron makita unsay giantus ni Jesukristo: Mosiah 3:7; Mosiah 15:5; o Alma 7:11. Dapita sila sa paglista diha sa pisara sa unsay ilang nakit-an ug sa paghunahuna sa mga panahon dihang gibati nila ang pipila niini nga mga butang. Sumala sa Alma 7:12, nganong giantus man ni Jesus kining tanan? Nganong importante man nga mahibalo nga giantus Niya kining mga butanga alang kanato?
-
Manganta og dungan sa usa ka himno mahitungod sa Manluluwas, sama sa “Ako Nasayud Nga ang Akong Manunubos Buhi” (Mga Himno, nu. 80). Dapita ang mga bata sa pagsiksik sa himno alang sa hugpong sa mga pulong nga naghulagway kon sa unsang paagi ang Manluluwas mohupay kanato, ug hisguti kon nganong kini nga mga pulong makahuluganon ngadto kanila. Ipaambit ang imong mga pagbati kabahin ni Jesukristo, ug dapita ang mga bata sa pagpaambit sa ilaha.
Awhaga ang Pagkat-on diha sa Panimalay
Dapita ang mga bata sa pagpangita og usa ka tawo niining semanaha kinsa nagkinahanglan og kahupayan. Awhaga sila sa pagpaambit niining tawhana sa unsay ilang nakat-unan mahitungod sa Manluluwas nga midala diha Kaniya sa atong kasakit aron Siya makahupay kanato.
Pagpalambo sa Atong Pagtudlo
I-awhag ang pagpaambit. Pangutan-a ang mga bata mahitungod sa ilang mga hunahuna, mga pagbati, ug mga kasinatian. Imong makita nga sa kasagaran sila adunay yano apan tulukibon nga mga ideya.