ang nabanhaw nga Kristo uban sa Iyang mga Apostoles

Si Kristo ug ang mga Apostoles, ni Del Parson

Marso 30–Abril 12

Pasko sa Pagkabanhaw

“Siya Mobangon … uban ang Pagpang-ayo diha sa Iyang mga Pako”

Sa mga adlaw nga padulong sa Dominggo sa Pasko sa Pagkabanhaw, ikonsiderar ang pagtutok sa imong personal ug pamilya nga pagtuon sa kasulatan sa gamhanang pagpamatuod sa Basahon ni Mormon sa kinabuhi, kamatayon, Pagkabanhaw, ug sa maulaong gahum ni Jesukristo.

Irekord ang Imong mga Impresyon

Ang karaang mga Apostoles maisugon sa ilang mga pagpamatuod ni Jesukristo ug sa Iyang Pagkabanhaw. Minilyon ang mituo ni Jesukristo ug naningkamot sa pagsunod Kaniya tungod sa ilang mga pulong nga narekord diha sa Biblia. Apan ang uban matingala, kon si Jesukristo ba mao ang Manluluwas sa tibuok kalibutan, nan ngano nga ang Iyang mga saksi limitado sa pipila lang ka tawo nga nagpundok sa gamay nga rehiyon?

Ang Basahon ni Mormon nagbarug isip dugang, makakombinser nga saksi nga si Jesukristo mao ang Manluluwas, “nagpakita sa iyang kaugalingon ngadto sa tanan nga kanasuran” (ulohan nga pahina sa Basahon ni Mormon) ug nagtanyag og kaluwasan ngadto sa tanan nga moduol ngadto Kaniya. Agig dugang, kining ikaduha nga saksi nagklaro usab unsay kahulugan sa kaluwasan. Mao nga sila si Nephi, Jacob, Mormon, ug ang tanang mga propeta nga naghago pag-ayo sa “makugihon sa pagkulit niini nga mga pulong diha sa mga palid”—sa pagpahayag sa umaabut nga mga henerasyon nga sila usab “nasayud ni Kristo, ug … adunay paglaum sa iyang himaya” (Jacob 4:3–4). Kining panahon sa Pasko sa Pagkabanhaw, palandunga ang mga pagpamatuod sa Basahon ni Mormon nga ang gahum sa Pag-ula ni Kristo alang sa tanan ug sa personal—nagtubos sa tibuok kalibutan ug nagtubos kanimo.

icon sa personal nga pagtuon

Mga Ideya alang sa Personal nga Pagtuon sa Kasulatan

2 Nephi 9:6–15, 22; Alma 11:41–45; 40:21–23; 3 Nephi 26:4–5

Tungod sa Pakabanhaw ni Jesukristo, ang tanang mga tawo pagabanhawon.

Naandan sa panahon sa Pasko sa Pagkabanhaw sa pagpamalandong sa Pagkabanhaw ni Jesukristo, apan unsa man gayud ang gipasabut nga mabanhaw? Unsa nga mga panabut ang ikatanyag sa Basahon ni Mormon mahitungod sa pagkabanhaw? Tingali isip kabahin sa imong pagsaulog sa Pasko sa Pagkabanhaw mahimo nimong ilista ang mga kamatuoran mahitungod sa pagkabanhaw nga imong makita sa 2 Nephi 9:6–15, 22; Alma 11:41–45; 40:21–23; ug 3 Nephi 26:4–5. Mahimo usab nimo nga irekord ngano kaha nga importante nga makahibalo sa matag usa niini nga mga kamatuoran.

Tingali ikaw makamatikod nga ang mga kamatuoran mahitungod sa Pagkabanhaw sa kasagaran gitudlo agi og sumpay sa mga kamatuoran mahitungod sa Katapusan nga Paghukom. Palandunga unsa ang gitudlo kanimo mahitungod sa kaimportante sa Pagkabanhaw diha sa plano sa kaluwasan.

Tan-awa usab sa Lucas 24:36–43; Mga Buhat 24:15; 1 Mga Taga-Corinto 15:12–23.

Mosiah 3:7; 15:5–9; Alma 7:11–13

Gidala ni Jesukristo sa Iyang Kaugalingon ang akong mga sala, mga kasakit, ug mga kakulangan.

Ang Biblia klaro nga nagtudlo nga si Jesukristo miula alang sa atong mga sala. Ang Basahon ni Mormon, hinoon, mipalapad sa atong mga panabut sa sakripisyo ug pag-antus ni Kristo sa importante nga mga paagi. Makita nimo ang pipila niini nga mga pagtulun-an sa Mosiah 3:7; 15:5–9; ug Alma 7:11–13. Human nimo mabasa kini nga mga tudling, ikonsiderar ang pagrekord unsay imong nadiskobrehan diha sa usa ka tsart nga sama niini:

Unsa ang giantus sa Manluluwas?	Nganong nag-antus man Siya?	Unsa man ang kahulugan niini ngari kanako?
Unsa ang giantus sa Manluluwas?	Nganong nag-antus man Siya?	Unsa man ang kahulugan niini ngari kanako?

Tan-awa usab sa Isaias 53; Mga Hebreohanon 4:14–16.

Si Jesus nag-ampo didto sa Tanaman sa Getsemani

Getsemani, pinaagi ni Michael T. Malm

Mosiah 5:1–2; 27:8–28; Alma 15:3–12; 24:7–19

Ang Pag-ula ni Jesukristo naglimpyo kanako ug nakatabang nga mahingpit ko.

Mahimong ikasulti nga ang Basahon ni Mormon sa kasagaran mao ang istorya sa katawhan nga nag-usab tungod sa Pag-ula ni Jesukristo. Gani, ang pipila niini nga mga tawo nakahimo og grabe nga mga sala ug gani mga kaaway sila sa katawhan sa Dios sa wala pa moepekto ang gahum sa Manluluwas nga mao ang dakong kausaban diha kanila sumala sa ilang hugot nga pagtuo diha Kaniya. Mabasa nimo ang pipila niini nga kasinatian sa Mosiah 5:1–2; 27:8–28; ug Alma 15:3–12; 24:7–19; mahimong maghunahuna ka og ubang mga ehemplo nga tun-an usab. Unsay imong namatikdan nga komon sa matag usa niini nga mga kasinatian? Unsa man ang mga kalainan nga imong namatikdan? Unsa ang gitudlo niini nga mga istorya mahitungod kon sa unsa nga paagi nga ang Pag-ula sa Manluluwas makausab kaninyo?

Tan-awa usab sa Alma 5:6–14; 13:11–12; 18; 19:1–16; 22:1–26; 36:16–21; Ether 12:27; Moroni 10:32–33.

icon sa pagtuon sa pamilya

Mga Ideya alang sa Pamilya nga Pagtuon sa Kasulatan ug Family Home Evening

Sa imong pagsaulog sa Pasko sa Pagkabanhaw uban sa imong pamilya, pangita og mga paagi nga makat-on kamo mahitungod sa Manluluwas ug sa Iyang Pag-ula, lakip sa Pagkabanhaw. Ania ang pipila ka ideya.

3 Nephi 11; 17

Ang pipila ka pamilya nakakaplag nga ang pagtuon sa istorya sa pagbisita sa nabanhaw nga Manluluwas ngadto sa Amerika mas makahuluganon atol sa Pasko sa Pagkabanhaw. Awhaga ang mga sakop sa pamilya sa paghunahuna kon unsa kaha nga makahikap sa Iyang mga samad (tan-awa sa 3 Nephi 11:14–15) o mahimong usa sa mga anak nga Iyang gipanalanginan (tan-awa sa 3 Nephi 17:21). Sa unsa nga paagi nga kini nga istorya makapalawom sa imong pasalamat alang sa Pagkabanhaw sa Manluluwas? Usa ka painting nga naghulagway niini nga istorya anaa niini nga outline, ang uban makita sa ChurchofJesusChrist.org. Ang mga sakop sa imong pamilya tingali malingaw usab nga magdrowing sa ilang kaugalingong mga litrato sa unsay ilang nabasa.

Mga mensahe gikan sa kinatibuk-ang komperensya

Sa daghang mga bahin sa kalibutan, ang kinatibuk-ang komperensya sa Abril niining tuiga mahitabo sa katapusan sa semana sa dili pa ang Pasko sa Pagkabanhaw. Tingali ang pagpaminaw sa mga mensahe sa komperensya makatabang sa imong pamilya nga makatutok sa Manluluwas niining Pasko sa Pagkabanhaw. Pananglitan, mahimo nimong dapiton ang mga sakop sa pamilya sa pagpaminaw sa mga mensahe sa komperensya nga nagpamatuod ni Jesukristo ug sa Iyang Pagkabanhaw—ilabi na gikan sa mga Apostoles, kinsa mao ang linain nga mga saksi ni Jesukristo. Dayon imong maribyu kini nga mga mensahe pagdungan ug moila sa mga pagtulun-an nga makapalig-on sa inyong pagpamatuod sa Manluluwas.

“Ang Buhi nga Kristo: Ang Pagpamatuod sa mga Apostoles”

Isip usa ka pamilya, basaha ang “Ang Buhi nga Kristo: Ang Pagpamatuod sa mga Apostoles” (Liahona, Mayo 2017, sa sulod sa atubangan nga hapin; tan-awa usab sa ChurchofJesusChrist.org) ug dapita ang matag sakop sa pamilya sa pagkuha og usa ka mensahe sa Pasko sa Pagkabanhaw gikan niini nga pagpamatuod aron ipakigbahin sa uban. Pananglitan, mahimo kang maghimo og mga poster nga ipakita sa social media, sa imong atubangan nga pultahan, o sa imong bintana.

Mga video: Linain nga mga Saksi ni Kristo

ChurchofJesusChrist.org ug ang Gospel Library app adunay video series nga gitawag nga Special Witnesses of Christ. Kini naglakip og mga video sa matag sakop sa Unang Kapangulohan ug sa Korum sa Napulog Duha ka mga Apostoles nga nagpamatuod ni Jesukristo. Ang imong pamilya makatan-aw sa usa o daghan niini nga mga video ug makahisgot unsay ilang itudlo kanato mahitungod unsay nahimo sa Manluluwas alang kanato.

Alang sa dugang nga mga ideya sa pagtudlo sa mga bata, tan-awa kini nga latid [outline] karong semanaha diha sa Dali, Sunod Kanako—Alang sa Primary.

Pagpalambo sa Atong Pagtudlo

Sunda ang ebanghelyo ni Jesukristo. Ang labing importanting butang nga imong mabuhat isip usa ka ginikanan mao ang pagsunod sa ehemplo sa tibuok nimong kasingkasing. Kini ang labing maayong paagi aron makaangkon sa pagpakig-uban sa Espiritu Santo. Dili kinahanglan nga ikaw hingpit, magkugi lang sa pagpaningkamot kutob sa imong mahimo ug mangayo og pasaylo pinaagi sa Pag-ula sa Manluluwas. (Tan-awa sa Pagtudlo sumala sa Pamaagi sa Manluluwas, 13–14.)

Si Kristo mitimbaya sa mga Nephite

Paghulagway ni Kristo uban sa mga Nephite ni Ben Sowards