Si Haring Benjamin nagtudlo sa iyang katawhan

Anaa sa Pag-alagad sa Inyong Dios, ni Walter Rane

Abril 20–26

Mosiah 4–6

“Dako nga Kausaban”

Samtang ikaw mobasa ug mamalandong sa Mosiah 4–6, bantayi ang mga pag-aghat sa Espiritu Santo. Unsa ang maayong mga butang nga nadasig ka nga imong buhaton? (tan-awa sa Mosiah 5:2).

Irekord ang Imong mga Impresyon

Nakadungog ka na ba nga adunay usa ka tawo nga nagsulti ug mibati nga nadasig sa pag-usab sa imong kinabuhi? Tingali ikaw nakahukom, tungod sa unsay imong nadungog, sa pagpuyo nga medyo may kalahian—o bisan dako og kalahian. Ang wali ni Haring Benjamin mao kana nga matang sa wali, ug ang mga kamatuoran nga iyang gitudlo aduna nianang matang sa epekto sa mga tawo kinsa nakadungog kanila. Si Haring Benjamin mipakigbahin sa iyang mga katawhan unsa ang gitudlo sa anghel kaniya—kanang talagsaong mga panalangin posible pinaagi “sa maulaong dugo ni Kristo” (Mosiah 4:2). Ang iyang mensahe nakausab sa ilang tibuok panan-aw sa ilang mga kaugalingon (tan-awa sa Mosiah 4:2), miusab sa ilang mga tinguha (tan-awa sa Mosiah 5:2), ug midasig kanila nga makigsaad uban sa Dios nga sila mobuhat kanunay sa Iyang kabubut-on (tan-awa sa Mosiah 5:5). Sa ingon niini nga paagi nga ang mga pulong ni Haring Benjamin nakaapekto sa iyang katawhan. Sa unsa nga paagi kini makaapekto kanimo?

icon sa personal nga pagtuon

Mga Ideya alang sa Personal nga Pagtuon sa Kasulatan

Mosiah 4

Pinaagi ni Jesukristo, ako makadawat ug magpabilin ang kapasayloan sa akong mga sala.

Ang pagbuntog sa kinaiyanhon nga tawo dili sayon. Nagkinahanglan kini og dakong paningkamot nga mahimong “usa ka santos pinaagi sa pag-ula ni Kristo ang Ginoo” (Mosiah 3:19). Usahay, bisan og gibati na nimo nga gipasaylo sa imong mga sala, tingali nakigbisog ka nga magpabilin niana nga pagbati ug magpabilin sa dalan sa pagkamatarung. Si Haring Benjamin mitudlo sa iyang katawhan unsaon sa pagdawat ug pagpabilin sa kapasayloan sa mga sala ug magpuyo kanunay isip usa ka santos. Samtang ikaw magtuon sa kapitulo 4 sa Mosiah, mahimong imong pangutan-on ang imong kaugalingon sa mga pangutana nga sama niini:

Mga bersikulo 1–12:Unsa nga mga panalangin ang gidala sa kapasayloan sa mga sala ngadto sa mga katawhan ni Haring Benjamin? Unsa ang gitudlo ni Haring Benjamin aron matabangan sila nga magpabilin ang kapasayloan sa ilang mga sala? Unsa ang iyang gitudlo mahitungod kon unsaon nato nga makadawat og kaluwasan? Timan-i unsa ang gisulti ni Haring Benjamin nga kinahanglan natong “ipabilin kanunay ang paghinumdom” (bersikulo 11). Unsa ang nakadasig ninyo nga buhaton aron sa paghinumdom niining mga butanga?

Mga bersikulo 12–16:Sumala niini nga mga bersikulo, unsay mahitabo sa atong mga kinabuhi kon kita mohimo sa mga butang nga gihulagway sa bersikulo 11? Nasinati ba nimo kini nga mga kausaban sa imong kinabuhi? Sa unsa nga paagi kini may kalabutan sa mga kausaban nga gihulagway sa Mosiah 3:19?

Mga bersikulo 16–30:Sa unsa nga paagi nga ang pagpakigbahin uban sa kabus makatabang nato nga magpabilin ang kapasayloan sa atong mga sala? Unsaon nimo sa paggamit ang bersikulo 27 sa imong mga paningkamot nga mahimong sama ni Kristo?

Tan-awa usab sa David A. Bednar, “Kanunay nga Magbaton og Kapasayloan sa Inyong mga Sala,” Liahona, Mayo 2016, 59–62; Dale G. Renlund, “Pagpatunhay sa Dako og Kausaban nga Kasingkasing,” Liahona, Nob. 2009, 97–99.

Mosiah 5:1–7

Ang Espiritu sa Ginoo makahimo og dako nga kausaban sa akong kasingkasing.

Komon ra sa mga tawo nga mosulti, “Dili ko makausab. Ingon ana na man gyud ko.” Sa pagtandi, ang kasinatian sa katawhan ni Haring Benjamin nagpakita nato sa unsa nga paagi ang Espiritu sa Ginoo sa tinud-anay makausab sa atong mga kasingkasing. Si Presidente Russell M. Nelson mitudlo: “Makausab kita sa atong kinaiya. Ang atong mga tinguha mausab. … Ang tinuod nga kausaban—permanente nga kausaban—moabut lamang pinaagi sa makaayo, makalimpyo, ug makatubos nga gahum sa Pag-ula ni Jesukristo. … Ang ebanghelyo ni Jesukristo mao ang ebanghelyo sa kausaban!” (“Mga Desisyon alang sa Kahangturan,” Liahona, Nob. 2013, 108).

Samtang ikaw magbasa sa kausaban nga nasinati sa mga katawhan ni Haring Benjamin, hunahunaa kon sa unsa nga paagi nga ang “dako nga kausaban” padulong sa tinuod nga pagkakabig nahitabo—o mahitabo—sa imong kinabuhi. Aduna bay pipila ka “dakong” mga hitabo nga misangpot sa kausaban sa imong kasingkasing, o ang imo bang pagkakabig nahitabo sa hinay-hinay?

Tan-awa usab sa Ezequiel 36:26–27; Alma 5:14; David A. Bednar, “Nakabig ngadto sa Ginoo,” Liahona, Nob. 2012, 106–9.

Si Kristo nag-ayo sa masakiton nga babaye

Ang Manluluwas makausab sa atong mga kasingkasing ug sa atong mga kinabuhi. Mga Kamot nga Nag-ayo, ni Adam Abram

Mosiah 5:5–15

Akong dad-on sa akong kaugalingon ang ngalan ni Kristo kon ako maghimo og mga pakigsaad.

Usa sa rason nga gusto ni Haring Benjamin nga makigpulong sa iyang mga katawhan mao ang “paghatag niini nga mga katawhan og ngalan.” Ang pipila mga Nephite ug ang uban mga kaliwat ni Mulek, apan dili kini mao ang ngalan nga anaa sa iyang hunahuna. Iyang gidapit ang mga katawhan sa pagdala diha sa ilang mga kaugalingon “sa ngalan ni Kristo” isip kabahin sa ilang pakigsaad sa pagkamasulundon sa Dios (Mosiah 1:11; 5:10). Unsay imong nakat-unan gikan sa Mosiah 5:7–9 mahitungod kon unsay gipasabut sa pagdala sa imong kaugalingon sa ngalan ni Kristo?

Si Elder D. Todd Christofferson mitudlo, “Ang tinubdan [nga moral ug espirituhanong gahum] mao ang Dios. Atong maangkon kana nga gahum pinaagi sa atong mga pakigsaad ngadto Kaniya” (“Ang Gahum sa mga Pakigsaad,” Liahona, Mayo 2009, 20). Samtang magbasa ka sa Mosiah 5:5–15, paghimo og lista sa mga panalangin nga moabut sa imong kinabuhi samtang nagtuman ka sa mga pakigsaad nga imong gihimo uban sa Dios. Sa unsa nga paagi nga ang pagtuman sa imong mga pakigsaad makatabang nimo nga magpabilin ang “dakong kausaban” nga nahitabo kanimo pinaagi ni Jesukristo ug sa Iyang Pag-ula?

icon sa pagtuon sa pamilya

Mga Ideya alang sa Pamilya nga Pagtuon sa Kasulatan ug Family Home Evening

Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka ideya.

Mosiah 4:9–12

Sa unsa nga paagi nga ang imong pamilya mas hingpit nga “motuo sa Dios” (Mosiah 4:9) ug sa “kanunay magpabilin sa panumduman, ang kahalangdon sa Dios”? (Mosiah 4:11). Tingali ang mga sakop sa pamilya makabasa sa Mosiah 4:9–12 ug mangita sa mga hugpong sa mga pulong nga makatabang sa pagpalig-on sa ilang hugot nga pagtuo sa Dios. Dayon ilang masulat kini nga mga hugpong sa mga pulong ug ibutang kini palibut sa panimalay isip mga pahinumdom. Sa unsa nga paagi nga ang paghinumdom niining mga butanga makatabang nato nga sa “kanunay magmalipayon” ug “magbaton sa kapasayloan sa [atong] mga sala”? (Mosiah 4:12).

Mosiah 4:14–15

Unsa ang atong makat-unan mahitungod sa panag-away ug panagbingkil gikan niini nga mga bersikulo?

Mosiah 4:16–26

Sa unsang paagi kitang tanan mga makalilimos? Sumala niini nga mga bersikulo, unsaon nato sa pagtagad ang tanang mga anak sa Dios? (Mosiah 4:26). Kinsa ang nagkinahanglan sa atong tabang?

Mosiah 4:27

Ang imo bang pamilya nagdagan labaw pa kay sa inyong kusog? Tingali ikaw makadapit sa mga sakop sa pamilya sa pagtimbang-timbang sa ilang mga kalihokan aron sa pagsiguro nga sila makugihon apan maalamon usab.

Mosiah 5:5–15

Unsa ang gisugyot sa pagdala sa ngalan ni Kristo ngari kanato mahitungod sa atong relasyon Kaniya? Tingali makatabang ang paghisgot mahitungod kon ngano nga ang mga tawo usahay mosulat sa ilang mga ngalan diha sa ilang mga kabtangan. Unsaon nato sa pagpakita nga kita “iya” sa Manluluwas?

Alang sa dugang nga mga ideya sa pagtudlo sa mga bata, tan-awa kini nga latid [outline] karong semanaha diha sa Dali, Sunod Kanako—Alang sa Primary.

Pagpalambo sa Atong Pagtudlo

Pag-amuma og usa ka mahigugmaong palibut. Ang paagi sa mga sakop sa pamilya nga motagad sa usag usa dako og impluwensya sa espiritu sa imong panimalay. Tabangi ang mga sakop sa pamilya sa paghimo sa ilang bahin sa pag-establisar og mahigugmaon, matinahuron nga panimalay aron nga ang tanan mobati nga luwas nga mopakigbahin og mga kasinatian, mga pangutana, ug mga pagpamatuod. (Tan-awa sa Pagtudlo sumala sa Pamaagi sa Manluluwas, 15.)

Si Kristo nagpakaon sa mga langgam diha sa nataran

Sa Iyang Makanunayon nga Pag-alima, ni Greg K. Olsen