“Abril 13–19. Mosiah 1–3: ‘Mapuno uban sa Gugma ngadto sa Dios ug sa Tanan nga mga Tawo,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Abril 13–19. Mosiah 1–3,” Dali, Sunod Kanako—Alang sa mga Indibidwal ug mga Pamilya: 2020
Minerva K. Teichert (1888–1976), King Benjamin’s Farewell Address, 1935, lana nga diha sa masonite, 36 x 48 ka pulgada. Brigham Young University sa Art
Abril 13–19
Mosiah 1–3
“Mapuno uban sa Gugma ngadto sa Dios ug sa Tanan nga mga Tawo”
Si Haring Benjamin mihatag og usa ka rason nga irekord ang atong espirituhanong mga impresyon: “Kay kini dili unta mahimo nga ang among amahan, si Lehi, makahinumdom niining tanan nga mga butang, nga nakatudlo niini ngadto sa iyang mga anak, gawas sa tabang niini nga mga palid” (Mosiah 1:4).
Irekord ang Imong mga Impresyon
Kon madungog nimo ang pulong nga hari, tingali maghunahuna ka sa mga korona, mga palasyo, mga sulugoon, ug mga trono. Sa Mosiah 1–3, mabasahan nimo ang mahitungod sa usa ka lahi nga matang sa hari. Kay sa magpakabuhi gikan sa paghago sa iyang katawhan, si Haring Benjamin “naghago [pinaagi sa iyang] kaugalingon nga mga kamot” (Mosiah 2:14). Imbis paalagaron ang uban kaniya, gialagaran niya ang iyang katawhan “uban sa tanan nga gahum, hunahuna ug kusog diin gihatag sa Ginoo ngadto [kaniya]” (Mosiah 2:11). Kini nga hari dili gusto nga ang iyang katawhan mosimba kaniya, hinoon, gitudloan niya sila sa pagsimba sa usa ka Hari nga mas labaw pa kay kaniya mismo, kay siya nakasabut nga kini mao “ang Ginoong Makagagahum kinsa naghari” (Mosiah 3:5). Sama sa tanang bantugang mga lider sa gingharian sa Dios, ang mga pulong ug ehemplo ni Haring Benjamin nagtudlo kanato ngadto sa Langitnong Hari, kinsa mao ang Manluluwas, nga si Jesukristo. Si Haring Benjamin nagpamatuod nga si Jesus “nanaog gikan sa langit” ug “magbuhat og kahibulongan nga mga milagro. … Ug sud-onga, siya mianhi nganhi sa iyang kaugalingon nga mga katawhan, nga ang kaluwasan unta modangat ngadto sa mga katawhan gani pinaagi sa hugot nga pagtuo sa iyang ngalan ” (Mosiah 3:5, 9).
Mga Ideya alang sa Personal nga Pagtuon sa Kasulatan
Ang pagdawat sa pulong sa Dios nagkinahanglan og pagpangandam.
Sa dihang si Haring Benjamin mipahibalo nga gusto siyang makig-istorya sa iyang katawhan, daghan kaayo ang nangabut “nga sila wala moihap kanila” (Mosiah 2:2). Nangadto sila, sa usa ka hinungdan, tungod sa ilang pasalamat ug gugma sa ilang lider. Apan ang mas importante, nangadto sila aron matudloan sa pulong sa Dios.
Samtang magbasa ka sa Mosiah 2:1–9, pangitaa kon unsay gibuhat sa katawhan aron sa pagpakita nga ilang gihatagan og bili ang pulong sa Dios. Unsay gihangyo ni Haring Benjamin nga ilang buhaton aron makapangandam sa pagpaminaw sa pulong sa Dios? (tan-awa sa bersikulo 9). Sa unsang paagi ikaw mas makaandam sa imong kaugalingon sa pagdawat sa pulong sa Dios sa imong personal ug pamilya nga pagtuon ug panahon sa mga miting sa Simbahan?
Tan-awa usab sa Mateo 13:18–23; Alma 16:16–17.
Kon moalagad ako sa uban, gialagaran usab nako ang Dios.
Naglisud ka ba sa pagpangita og panahon sa pagserbisyo o naghandum nga ang imong pagserbisyo makahatag nimo og dugang nga kalipay? Unsa kaha ang isulti ni Haring Benjamin kon pangutan-on nimo siya nganong mialagad siya gamit ang tanan niyang “gahum, hunahuna, ug kusog”? (Mosiah 2:11). Samtang magbasa ka sa Mosiah 2:10–26, pangitaa ang mga kamatuoran nga gitudlo ni Haring Benjamin mahitungod sa pag-alagad ug pamalandungi unsaon nimo kini sa paggamit sa imong kinabuhi. Sama pananglit, unsay gipasabut niini kanimo sa pagkahibalo nga kon moalagad ka sa ubang mga tawo, gialagaran usab nimo ang Dios? (tan-awa sa Mosiah 2:17). Paghunahuna og paagi nga makaalagad ka og usa ka tawo karong semanaha!
Tan-awa usab sa Mateo 25:40.
Kon moalagad ako sa uban, gialagaran usab nako ang Dios.
Akong mabuntog ang kinaiyanhon nga tawo ug mahimong usa ka santos pinaagi sa Pag-ula ni Jesukristo.
Si Haring Benjamin, sama sa tanang mga propeta, mipamatuod kang Jesukristo aron nga ang iyang katawhan “makadawat sa kapasayloan sa ilang mga sala, ug magmaya sa tuman nga kalipay” (Mosiah 3:13). Mitudlo usab siya nga ang Manluluwas, pinaagi sa Iyang Pag-ula, dili lamang mohimo nato nga limpyo apan usab naghatag nato og gahum sa pagsalikway sa “kinaiyanhon nga tawo” ug mahimong “usa ka santos” (Mosiah 3:19; tan-awa usab sa Giya ngadto sa mga Kasulatan, “Kinaiyanhon nga Tawo,” scriptures.ChurchofJesusChrist.org).
Si Elder David A. Bednar mipasabut: “Ang Pag-ula ni Jesukristo maoy naghatag og makalimpyo ug makatubos nga gahum nga makatabang kanato sa pagbuntog sa sala ug makaputli ug makapalig-ong gahum nga motabang kanato nga mahimong mas maayo kaysa atong mahimo nga magsalig lamang sa atong kaugalingon nga kusog. Ang walay kinutuban nga Pag-ula pareho nga alang sa makasasala ug sa pagkasantos sa matag usa kanato” (““Limpyo nga mga Kamot ug Putli nga Kasingkasing,” Liahona, Nob. 2007, 82).
Ania ang pipila ka mga pangutana nga pamalandungan samtang magbasa ka sa pagpamatuod ni Haring Benjamin mahitungod sa Manluluwas diha sa Mosiah 3:1–20:
-
Unsay akong nakat-unan gikan niini nga mga bersikulo mahitungod sa Manluluwas ug sa Iyang misyon?
-
Sa unsang paagi si Jesukristo mitabang nako sa pagbuntog sa sala? Sa unsang paagi nga Siya mitabang nako nga mausab ang akong kinaiya ug mahisama sa usa ka santos?
-
Unsay akong nakat-unan mahitungod sa pagkahimong usa ka santos gikan sa Mosiah 3:19?
Nganong miingon man si Haring Benjamin nga si Jesus “ang Amahan sa langit ug sa yuta”?
Si Presidente Joseph F. Smith mipasabut: “Si Jesukristo, kinsa ato usab nga nasayran isip Jehova, mao ang sinaligan sa Amahan, nga si Elohim, diha sa trabaho sa paglalang. … Si Jesukristo, nga mao ang Tiglalang, mao ang kanunay nga gitawag og Amahan sa langit ug yuta … ; ug tungod kay ang Iyang mga nilalang mga mahangturon nga kalidad angayan kaayo Siya nga pagatawgon og Mahangturong Amahan sa langit ug yuta” (Mga Pagtulun-an sa mga Presidente sa Simbahan: Joseph F. Smith [1998], 433).
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang ipasabut og maayo ug hisgutan aron matubag ang mga panginahanglan sa imong pamilya. Ania ang pipila ka mga ideya.
Mosiah 1:1–7
Sa unsang paagi nga ang mga palid nga tumbaga ug ang mga palid ni Nephi nakapanalangin sa katawhan ni Haring Benjamin? Sa unsang paagi nga ang mga kasulatan makapanalangin sa atong pamilya?
Mosiah 2–3
Tingali makalingaw alang sa imong pamilya ang paghimo og kalihokan alang sa pakigpulong ni Haring Benjamin. Pwede kang magbuhat og gamay nga tore ug papulipuliha ang mga sakop sa pamilya sa pagbasa sa mga pulong ni Haring Benjamin samtang nagtindog diha niini. Ang ubang sakop sa pamilya maminaw diha sa sulod nga hinimo-himo nga tolda.
Mosiah 2:9–19
Unsay atong makat-unan mahitungod sa pag-alagad gikan sa mga pagtulun-an ug ehemplo ni Haring Benjamin? Unsa ang atong gibati nga nadasig nga buhaton?
Mosiah 2:15–25
Makabenepisyo ba sa imong pamilya ang paghisgot mahitungod sa pagkamapainubsanon? Ngano nga si Haring Benjamin wala manghambog mahitungod sa tanan nga iyang nabuhat? Unsay atong makat-unan gikan sa iyang mga pagtulun-an mahitungod sa atong relasyon uban sa Dios?
Mosiah 2:36–41
Unsay gitudlo ni Haring Benjamin mahitungod sa mga sangputanan sa pagkahibalo sa kamatuoran apan wala magsunod niini? Unsay iyang gitudlo mahitungod kon unsaon sa pag-angkon og tinuod nga kalipay?
Mosiah 3:19
Unsa ang kinahanglan natong buhaton aron mahimong mga santos? Unsa nga kinaiya gikan niini nga bersikulo ang pwede natong matutukan aron mapalambo isip usa ka pamilya?
Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.
Pagpalambo sa Personal nga Pagtuon
Paghimo og makab-ot nga mga tumong. Ang paggahin og pipila ka minutos sa usa ka adlaw sa pagtuon sa mga kasulatan makapanalangin sa imong kinabuhi. Ipasalig ang pagtuon matag adlaw, ug pangita’g paagi nga mapahinumduman ang imong kaugalingon sa imong pasalig.
Pakigpulong ni Haring Benjamin, ni Jeremy Winborg