Minerva K. Teichert (1888–1976), Ang Katapusan nga Pakigpulong ni Haring Benjamin, 1935, lana diha sa masonite, 36 x 48 ka pulgada. Brigham Young University of Art

Abril 13–19

Mosiah 1–3

“Mapuno uban sa Gugma ngadto sa Dios ug sa Tanan nga mga Tawo”

Samtang imong basahon ang Mosiah 1–3, pag-ampo aron masayud unsaon nimo sa pagtabang sa mga bata nga imong gitudloan nga makasabut sa importante nga mga kamatuoran nga gitudlo ni Haring Benjamin. Isulat ang mga ideya nga moabut kanimo gikan sa Espiritu Santo.

Irekord ang Imong mga Impresyon

Dapita ang Pagpaambit

Ipakita ang hulagway ni Haring Benjamin nga nagtudlo, makita diha sa outline niini nga semana sa Dali, Sunod Kanako—Alang sa mga Indibidwal ug mga Pamilya. Hangyoa ang mga bata sa pagpaambit sa unsay ilang nahibaloan mahitungod niini nga hulagway.

Itudlo ang Doktrina: Mas Gagmay nga mga Bata

Mosiah 2–3

Kon moserbisyo ko sa uban, nagserbisyo usab ko sa Dios.

Unsay imong buhaton aron sa pagtabang sa mga bata nga makasabut nga ang pagserbisyo sa uban usa usab ka paagi sa pagserbisyo sa Dios?

Posible nga mga Kalihokan

• Papuli-puliha ang mga bata sa pagsul-ob og korona (ang pahina sa kalihokan niining semanaha adunay ehemplo) ug sa pagbarug ibabaw sa lingkuranan o bangkito aron magpakaaron-ingnon nga si Haring Benjamin. Makahimo sila niini samtang imong ipaambit ang pipila sa mga butang nga gitudlo ni Haring Benjamin sa iyang katawhan, nga makita diha sa Mosiah 2–3. Tan-awa usab ang “Kapitulo 12: Si Haring Benjamin” (Mga Sugilanon sa Ang Basahon ni Mormon, 32–35, .)

• Dapita ang mga bata sa pagsulti sa mosunod nga kapahayag [sentence] sa pipila ka pulong matag higayon samtang mopakpak sila sa matag silaba [syllable] uban kanimo: “Kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17). Balik-balika kini hangtud nga makat-unan sa mga bata ang pipila o tanan nga mga pulong. Ipamatuod nga kon kita motabang sa uban, nagtabang usab kita sa Langitnong Amahan ug ni Jesus ug nakapalipay Kanila. Hangyoa ang mga bata sa pagpaambit og mga paagi nga makatabang sila sa uban.

• Tabangi ang mga bata nga subayon og badlis [trace] ang ilang mga kamot diha sa usa ka piraso nga papel ug modrowing og usa ka butang nga ilang mahimo aron sa pagserbisyo sa ilang mga pamilya. Manganta og dungan sa usa ka kanta mahitungod sa pagserbisyo, sama sa “Kon Kita Motabang” (Songbook sa mga Bata, 108).

Si Haring Benjamin mitudlo nga makaserbisyo kita sa Dios pinaagi sa pagserbisyo sa uban.

Mosiah 2:19–25

Gikan sa Langitnong Amahan ang tanan nakong mga panalangin.

Samtang ang mga bata moila sa Dios isip tinubdan sa tanan nila nga mga panalangin, mahimo silang mapainubsanon ug mapasalamaton.

Posible nga mga Kalihokan

• Ipasabut nga si Haring Benjamin mitudlo nga tanan natong mga panalangin nagagikan sa Langitnong Amahan. Dapita ang mga bata sa pagpaminaw og usa ka panalangin nga gihatag sa Langitnong Amahan kanato samtang imong basahon ang Mosiah 2:21. Unsa pay laing mga panalangin ang gihatag sa Langitnong Amahan kanato? Unsaon nato pagpakita nga mapasalamaton kita niining mga butanga? (tan-awa sa Mosiah 2:22).

• Pagdula kamo diin ang mga bata mopasa-pasa og usa ka butang samtang kantahon nila ang usa ka kanta mahitungod sa pagpasalamat o maminaw niini nga kanta (tan-awa ang “Pagpasalamat” diha sa indeks sa mga hilisgutan sa Songbook sa mga Bata). Hunong sa pagkanta o hunonga ang musika matag karon ug unya, ug dapita si bisan kinsa nga naghupot sa butang sa pagpaambit og usa ka panalangin nga mapasalamaton siya.

Mosiah 3:1–20

Nagtuo ako ni Jesukristo.

Usa ka anghel misulti ni Haring Benjamin og importante nga mga kamatuoran mahitungod sa kinabuhi ug pangalagad ni Jesukristo. Pangita niini nga mga bersikulo og mga kamatuoran mahitungod ni Jesus nga gibati nimo nga importante nga makat-unan sa mga bata.

Posible nga mga Kalihokan

• Pagpakita og mga hulagway sa pipila ka mga panghitabo nga gihisgutan diha sa Mosiah 3:5–10 (tan-awa, sama pananglit, ang Libro sa mga Hulagway sa Ebanghelyo, nu. 30, 41, 42, 57, 59). Pangutan-a ang mga bata kon unsay nahitabo diha sa mga hulagway, ug tabangi sila kon gikinahanglan. Basaha og hinay ang Mosiah 3:5–10, ug dapita ang mga bata sa pagpataas sa ilang mga kamot kon duna kay mabasa mahitungod sa usa sa mga hulagway. Dapita ang mga bata sa pagpaambit og uban pang mga butang nga nasayud sila nga gibuhat ni Jesus niadtong Siya dinhi pa sa yuta.

• Pagdrowing og adlaw sa ibabaw nga bahin sa pisara aron morepresentar sa langit. Pagdrowing og pipila ka dalan nga mopadulong ngadto sa lain-laing mga dapit sa pisara apan usa lamang ka dalan ang mopadulong ngadto sa langit. Hangyoa ang mga bata sa pagpangita niana nga dalan ug sa pagbutang og hulagway ni Jesus diha niini. Basaha ang Mosiah 3:17, ug pagpamatuod nga ang pagsunod kang Jesukristo mao lamang ang paagi nga makabalik ngadto sa Langitnong Amahan.

Itudlo ang Doktrina: Mas Dagko nga mga Bata

Mosiah 2:11–18

Kon moserbisyo ko sa uban, nagserbisyo usab ko sa Dios.

Unsaon nimo pagtabang ang mga bata nga makat-on gikan sa ehemplo sa pagserbisyo ni Haring Benjamin?

Posible nga mga Kalihokan

• Pakit-a ang mga bata og hulagway ni Haring Benjamin nga nagtudlo sa iyang katawhan (tan-awa ang outline niini nga semana sa Dali, Sunod Kanako—Alang sa mga Indibidwal ug mga Pamilya o ang Libro sa mga Hulagway sa Ebanghelyo, nu. 74). Tabangi ang mga bata sa pagsiksik sa Mosiah 2:11–18 aron sa pagsuta kon unsay gibuhat ni Haring Benjamin sa pagserbisyo. Nganong miserbisyo man siya sa iyang katawhan? Nganong kinahanglan man nga moserbisyo kita sa usag usa?

• Pagsulat diha sa pisara og hugpong sa mga pulong gikan sa Mosiah 2:16–17 nga ang pipila ka mga pulong giwala. Dapita ang mga bata sa pagpangita diha sa mga kasulatan sa nawala nga mga pulong. Hangyoa sila sa pagpasabut kon unsa ang kahulugan niini nga mga bersikulo ngadto kanila. Dapita sila sa pagpaambit og mga kasinatian sa dihang ang uban miserbisyo kanila o sila miserbisyo sa uban. Unsa ang gibati nila tungod niini nga mga kasinatian?

• Hatagi ang mga bata og gagmay nga mga piraso sa papel aron sulatan og mga paagi nga makaserbisyo sila sa mga sakop sa ilang pamilya, ug hatagi ang matag bata og bag nga kabutangan sa mga papel. Awhaga ang mga bata sa pagkuha og usa ka piraso sa papel gikan sa bag matag adlaw ug sa pagbuhat niana nga serbisyo para sa usa ka tawo.

Mosiah 2:15–25

Kinahanglang dili ko manghambog sa akong serbisyo ug maayong mga buhat.

Hunahunaa kon unsaon nimo sa pagtabang ang mga bata nga imong gitudloan nga makasabut nga ang atong pagserbisyo kinahanglang nadasig sa atong gugma alang sa uban ug alang sa Dios.

Posible nga mga Kalihokan

• Dapita ang mga bata sa pagpaambit kon unsaon nila sa pagpasabut sa pulong nga panghambog, o tabangi sila sa pagpangita sa kahulugan diha sa diksyonaryo. Tabangi sila sa pagsiksik sa Mosiah 2:15–24, mangita sa mga rason nganong wala manghambog si Haring Benjamin sa iyang pagserbisyo sa uban. Nganong moserbisyo man kita sa uban? Human makapaambit ang mga bata sa ilang mga ideya, tabangi sila nga makasabut nga kinahanglang magtinguha kita sa pagserbisyo sa uban tungod kay nahigugma kita kanila ug sa Dios, dili aron nga maayo kitang tan-awon sa uban.

• Hangyoa ang mga bata sa pagpaambit og mga sitwasyon diin ang usa ka tawo tingali manghambog mahitungod sa usa ka butang. Nganong sayop man nga manghambog niadto nga mga sitwasyon? Dapita sila sa paggamit sa tambag gikan sa pakigpulong ni Haring Benjamin diha sa Mosiah 2:15–24 aron matabangan sila sa ilang mga tubag.

Mosiah 3:19

Si Jesukristo naglimpyo kanako gikan sa sala ug nagtabang kanako nga mahimong usa ka santos.

Aron mahimong sama sa atong Langitnong Amahan, nagkinahanglan kita og sobra pa kay sa pagkalimpyo gikan sa atong mga sala—kinahanglang mausab ang atong mga kasingkasing. Sama sa gitudlo ni Haring Benjamin, kinahanglang mabuntog nato ang atong makasasala nga mga tinguha ug mamahimong santos pinaagi sa Pag-ula sa Manluluwas.

Posible nga mga Kalihokan

• Pagdrowing og duha ka tawo diha sa pisara—ang usa nagrepresentar sa “kinaiyanhon nga tawo” ug ang lain nagrepresentar og “usa ka santos.” (Tingali kinahanglan nimong ipasabut kini nga mga pulong.) Dungan nga magbasa sa Mosiah 3:19, ug dapita ang mga bata sa pagpangita og mga kausaban nga kinahanglang buhaton sa kinaiyanhon nga tawo aron mahimong usa ka santos. Unsa pa nga mga pulong ug hugpong sa mga pulong nga tingali ang mga bata nagkinahanglan og tabang aron makasabut?

• Nakasulay ba ang mga bata nga imong gitudloan nga mitabang sa ilang mga ginikanan sa pag-andam og pagkaon gamit ang usa ka resipe? Kon mao, mahimo nimo silang dapiton sa paggamit sa Mosiah 3:19 aron makahimo og usa ka “resipe” kon unsaon nato aron mahimong sama ni Jesukristo. Nganong ang Pag-ula ni Jesukristo mao man ang labing mahinungdanon nga “sangkap”?

Awhaga ang Pagkat-on diha sa Panimalay

Dapita ang mga bata sa paggamit sa pahina sa kalihokan niining semanaha aron mapaambit sa ilang mga pamilya o mga higala kon unsaon nila sa pagsunod sa ehemplo ni Haring Benjamin ug sa pagserbisyo sa uban.

Pagpalambo sa Atong Pagtudlo

Ang mga bata makabenepisyo sa pagbalik-balik. Ayaw kahadlok nga ibalik-balik ang mga kalihokan sa makadaghang higayon, ilabi na sa gagmayng mga bata. Ang pagbalik-balik makatabang sa mga bata nga mahinumdom sa unsay ilang nakat-unan.