Diha sa Pag-alagad sa Inyong Dios, ni Walter Rane

Abril 20–26

Mosiah 4–6

“Dako nga Kausaban”

Hain sa mga pagtulun-an ni Haring Benjamin sa Mosiah 4–6 ang labing makatabang sa mga bata nga imong gitudloan nga magsugod sa pagsinati og “dako nga kausaban” (Mosiah 5:2) sa ilang mga kasingkasing? Irekord ang imong mga impresyon samtang mainampoon ka nga magtinguha og giya.

Irekord ang Imong mga Impresyon

Dapita ang Pagpaambit

Isulat ang pangalan sa matag bata sa imong klase sa gamay nga piraso sa papel, ug isulod ang mga papel sa usa ka sudlanan. Samtang mokuha ka sa matag ngalan gikan sa sudlanan, dapita kana nga bata sa pagpaambit og usa ka butang nga iyang nahinumduman gikan sa leksyon sa miaging semana o usa ka butang nga iyang nakat-unan gikan sa Mosiah 4–6 niining semanaha sa ilang panimalay.

Itudlo ang Doktrina: Mas Gagmay nga mga Bata

Mosiah 4:1–3, 10

Ang paghinulsol makahatag og kalipay.

Tabangi ang mga bata nga makakat-on mahitungod sa talagsaong gasa sa paghinulsol nga anaa tungod sa Pag-ula ni Jesukristo.

Posible nga mga Kalihokan

• Gamita ang Mosiah 4:1–3 ug 10 aron sa pagtudlo sa mga bata unsa ang gipasabut sa paghinulsol. Sama pananglit, tabangi sila nga makadiskubre nga ang katawhan ni Haring Benjamin mibati og kaguol mahitungod sa ilang mga sala ug nangayo og pasaylo (mga bersikulo 1–2), ug gisultihan sila ni Haring Benjamin sa pagsalikway (o mohunong sa pagbuhat) sa ilang mga sala (bersikulo 10). Basaha ang bersikulo 3 ngadto kanila, ug pangutan-a kon unsa ang gibati sa katawhan sa dihang naghinulsol sila.

• Pangutan-a ang mga bata kon unsa ang ilang bation kon mahugaw ang atong sinina. Unsa ang atong bation kon mahimo na usab kitang limpyo? Ipasabut nga sama sa paglaba sa hugaw nga mga sinina, mahimo kitang maghinulsol kon makahimo kita og sayop. Pagpakita og hulagway ni Jesukristo, ug pagpamatuod nga Siya adunay gahum sa pagtangtang sa atong mga sala ug sa paghimo kanato nga malimpyo pag-usab kon maghinulsol kita. Kantaha og dungan ang ikaduhang bersikulo sa “Tabangi Ko, Mahal nga Amahan” (Songbook sa mga Bata, 52). Pangutan-a ang mga bata kon unsa ang gitudlo sa kanta mahitungod sa paghinulsol.

Mosiah 4:13–26

Kinahanglang motratar ako sa ubang tawo uban sa gugma ug kamabination.

Unsaon nimo paggamit ang Mosiah 4:13–26 sa pagtudlo sa mga bata “sa paghigugma sa usag usa, ug sa pag-alagad sa usag usa”? (bersikulo 15).

Posible nga mga Kalihokan

• Pagdrowing og gamay nga kasingkasing diha sa pisara. Hangyoa ang mga bata sa pagpaambit og mga paagi nga mahimo silang magmabination sa uban. Matag higayon nga mopaambit sila, papasa ang kasingkasing ug pagdrowing og mas dako. Ipamatuod nga ang atong gugma alang sa uban motubo kon magmabination kita kanila. Hatagi ang mga bata og mga kasingkasing nga papel, ug dapita sila sa pagdrowing diha sa mga kasingkasing og mga paagi nga makapakita sila og gugma ug mahimong mabination.

• Tabangi ang mga bata sa paghunahuna og mga aksyon nga buhaton samtang manganta sila og usa ka kanta mahitungod sa paghigugma sa uban, sama sa “Si Jesus Miingon Higugmaa ang Tanan” o “Maghigugmaay” (Songbook sa mga Bata, 39, 74).

Mosiah 5:5–15

Kon mohimo ako og pakigsaad ngadto sa Dios, akong gidala ngari kanako ang ngalan ni Kristo.

Pamalandungi kon unsaon nimo sa pagtabang ang mga bata nga imong gitudloan nga mangandam sa paghimo og mga pakigsaad sa bunyag ngadto sa Dios ug “pagatawgon nga mga anak ni Kristo” (Mosiah 5:7).

Posible nga mga Kalihokan

• Tabangi ang mga bata sa paghimo og mga tsapa [badge] nga nagpakita sa ngalan nga “Jesukristo” ug itaud kini sa ilang mga sinina tungod sa ilang kasingkasing (tan-awa ang pahina sa kalihokan niini nga semana). Ipasabut nga si Haring Benjamin mitudlo sa iyang katawhan nga kon mohimo kita og mga pakigsaad, o mga saad, ngadto sa Dios, susama kini nga ang ngalan ni Kristo “nahisulat kanunay sa [atong] mga kasingkasing” (Mosiah 5:12). Unsa ang atong gisaad nga buhaton sa dihang gibunyagan kita ug moambit sa sakrament? (tan-awa sa Mosiah 5:8; D&P 20:37, 77, 79).

• Pangutan-a ang mga bata kon unsa ang ilang buhaton aron mahimong higala sa usa ka tawo (sama pananglit, makigsulti kanila, mobuhat og mga butang uban kanila, ug mogahin og panahon uban kanila). Basaha ang Mosiah 5:13 ngadto sa mga bata. Unsay atong mabuhat aron mas makaila og maayo ni Jesukristo aron dili Siya usa ka estranghero kanato?

Itudlo ang Doktrina: Mas Dagko nga mga Bata

Mosiah 4:1–11

Mahimo akong maghinulsol.

Unsaon nimo pagtabang ang mga bata nga makasabut kon unsa ang gipasabut nga maghinulsol? Unsa nga mga bersikulo sa Mosiah 4:1–11 ang gibati nimo nga makatabang kanila?

Posible nga mga Kalihokan

• Isulat ang pulong nga kapasayloan diha sa pisara. Basaha og dungan ang Mosiah 4:1–3, ug hangyoa ang mga bata sa pagpangita og mga pulong sa bersikulo 3 nga naghulagway sa mga panalangin nga moabut kon maghinulsol kita ug modawat og kapasayloan.

• Hangyoa ang mga bata sa pagngalan og mga butang nga kinahanglan natong buhaton aron hingpit ug tinud-anay nga maghinulsol. Tabangi sila nga makakita sa pipila niini nga mga butang diha sa Mosiah 4:10, ug hisguti ang kahulugan sa mga pulong ug hugpong sa mga pulong nga makita niana nga bersikulo. Pagpaambit og istorya nga naghulagway sa paghinulsol, tingali gikan sa imong kaugalingong kinabuhi o gikan sa bag-o nga magasin sa Simbahan.

• Tabangi ang mga bata nga makakita og mga pulong diha sa Mosiah 4:6, 9, ug 11 nga naghulagway sa Langitnong Amahan. Nganong importante man nga makasabut kon sama sa unsa ang Langitnong Amahan kon kinahanglan natong maghinulsol? Ipaambit ang imong pagpamatuod kon sa unsang paagi nimo nabati ang gugma sa Dios samtang naghinulsol ka.

Mosiah 4:12–26

Ang ebanghelyo nagdasig kanako sa pagtratar sa ubang tawo uban sa gugma ug pagkamabination.

Si Haring Benjamin mitudlo nga kon kita moduol kang Kristo ug makadawat og kapasayloan sa atong mga sala, kita “mapuno uban sa gugma sa Dios” (Mosiah 4:12), nga naggiya kanato nga mahimong mahigugmaon ug mabination sa uban.

Posible nga mga Kalihokan

• Tabangi ang mga bata sa pagsiksik sa Mosiah 4:13–16, 26 ug sa pag-ila sa mga hugpong sa mga pulong nga naghulagway kon sa unsang paagi kita makaserbisyo sa uban. Dapita sila sa pag-aksyon niini nga mga butang o pagdrowing og mga hulagway niini, ug ipatag-an sa mga bata ang hugpong sa mga pulong. Unsaon nato sa pagpakita og gugma ug kamabination diha sa panimalay, sa eskwelahan, o sa simbahan?

• Dapita ang mga bata sa pagpaambit og kasinatian diin gihigugma o giserbisyuhan nila ang usa ka tawo ug unsa ang gibati nila tungod niana nga kasinatian. Unsa ang pipila ka rason nganong ang mga tawo dili ganahan moserbisyo sa uban? Pangutan-a ang mga bata kon unsay ilang isulti sa laing tawo aron sa pag-agni kanila sa pagtabang sa mga tawo nga nanginahanglan. Makakita sila og mga ideya diha sa Mosiah 4:16–26.

Si Jesukristo mitudlo kanato nga magmabination sa uban.

Mosiah 5:5–15

Kon bunyagan ko ug moambit sa sakrament, akong gidala ngari kanako ang ngalan ni Kristo.

Daghan sa mga bata nga imong gitudloan tingali nabunyagan na ug nagbag-o sa ilang mga pakigsaad pinaagi sa sakrament. Pahinumdumi sila nga usa ka importante nga bahin sa ilang pakigsaad sa bunyag mao ang pagdala nganha kanila sa ngalan ni Jesukristo.

Posible nga mga Kalihokan

• Pagdrowing og lingin diha sa pisara, ug pagbutang og hulagway ni Jesukristo sa tunga sa lingin. Dapita ang mga bata sa pagdrowing og mga hulagway sa ilang kaugalingon samtang basahon nimo ang Mosiah 5:8. Unsa ang gisulti niini nga bersikulo nga atong dad-on ngari sa atong kaugalingon? Unsa ang atong gisudlan? Dapita ang mga bata sa pagsulat sa ngalan ni Kristo diha sa mga hulagway sa ilang kaugalingon ug ibutang ang mga hulagway diha sa lingin uban sa Manluluwas. Unsa nga mga pakigsaad ang atong himoon kon kita bunyagan ug moambit sa sakrament? (tan-awa sa Mosiah 18:8–9; D&C 20:77, 79).

• Pakigsulti sa mga bata kon nganong ibutang sa mga tawo ang ilang mga ngalan diha sa mga butang, sama sa mga buluhaton sa eskwelahan [school assignments], mga sinina nga pangdula [sports jerseys], ug uban pa (tan-awa sa Mosiah 5:14–15). Unsaon nato sa pagpakita nga ang ngalan ni Kristo “nahisulat kanunay sa [atong] mga kasingkasing”? (Mosiah 5:12).

• Pagdapit og usa ka batan-ong lalaki o babaye sa ward sa pagbisita sa imong klase ug sa pagpasabut sa mga pakigsaad nga atong gibag-o pinaagi sa pag-ambit sa sakrament. Basaha ang mga pag-ampo sa sakrament sa Doktrina ug mga Pakigsaad 20: 77 ug 79 uban sa mga bata, nga dapiton sila sa pagpangita sa mga hugpong sa mga pulong nga naghulagway sa unsay atong gipakigsaad nga buhaton ug unsa ang gisaad sa Dios kanato agig balos.

Awhaga ang Pagkat-on diha sa Panimalay

Dapita ang mga bata sa pagdrowing og usa ka butang nga ilang nakat-unan karon ug sa paggamit sa ilang drowing sa pagtudlo sa ilang mga pamilya.

Pagpalambo sa Atong Pagtudlo

Tudloi ang mga bata sa pagrekord sa mga impresyon. Bisan ang mga bata makakat-on sa gawi sa pagrekord og espiritwal nga mga impresyon—sama pananglit, pinaagi sa pagmarka sa mga kasulatan, pagdrowing og mga hulagway, o paghimo og yano nga mga pagsulat diha sa journal.