Si Ammon nagtudlo ni Haring Limhi

Minerva K. Teichert (1888–1976), Si Ammon sa atubangan ni Haring Limhi, 1949‑1951, lana nga anaa sa masonite, 35 15/16 x 48 ka pulgada. Brigham Young University Museum sa Art, 1969.

Abril 27–Mayo 3

Mosiah 7–10

“Diha sa Gahum sa Ginoo”

Samtang magbasa ka, ang Espiritu modala sa imong pagtagad sa pihong mga pulong o mga tudling. Isulat unsay imong pagbati nga kana nga mga tudling magamit diha nimo.

Irekord ang Imong mga Impresyon

Samtang ang katawhan ni Haring Mosiah nakatagamtam og “kanunay nga kalinaw” sa Zarahemla (Mosiah 7:1), naghunahuna sila sa laing grupo sa mga Nephite, kinsa sa milabay nga katuigan mibiya aron mopuyo sa yuta sa Lehi-Nephi. Mga henerasyon ang milabay, ug ang katawhan ni Mosiah wala na makadungog gikan kanila. Mao nga si Mosiah mihangyo ni Ammon nga mangulo og usa ka pundok aron mangita sa mibiya nga mga Nephite. Nahibaloan sa pundok sa mga tigpangita nga ang mga Nephite, “tungod sa kadautan” (Mosiah 7:24), nabihag sila sa mga Lamanite. Apan sa pag-abut ni Ammon ug sa iyang kaigsoonan, sa kalit dihay paglaum alang sa kaluwasan.

Usahay sama kita niining nabihag nga mga Nephite, nag-antus tungod sa atong mga sala, naghunahuna unsaon kaha nga makakita na usab kita og kalinaw. Usahay sama kita ni Ammon, mibati nga naaghat nga motabang sa uban ug sa katapusan makahibalo nga ang atong mga paningkamot nakadasig kanila sa “paghangad sa [ilang] mga ulo, ug maglipay, ug ibutang ang [ilang] pagsalig diha sa Dios” (Mosiah 7:19). Bisan unsa pa ang atong mga sirkumstansya, kitang tanan kinahanglan nga maghinulsol ug “mobalik ngadto sa Ginoo uban ang hingpit nga katuyoan sa kasingkasing,” uban sa hugot nga pagtuo nga “siya … moluwas [kanato]” (Mosiah 7:33).

icon sa personal nga pagtuon

Mga Ideya alang sa Personal nga Pagtuon sa Kasulatan

Mosiah 7:14–33

Kon moduol ako sa Ginoo, mosalig Kaniya, ug moalagad Kaniya, Siya moluwas kanako.

Ang pagkahimamat kang Ammon, nga usa ka Nephite gikan sa Zarahemla, nakahatag ni Haring Limhi og paglaum, ug gusto siyang mohatag niana nga paglaum ngadto sa iyang katawhan. Samtang magbasa ka sa Mosiah 7:14–33, bantayi unsay gisulti ni Limhi sa iyang katawhan aron sa pag-awhag kanila, paglig-on sa ilang pagtuo, ug paghatag kanila og paglaum nga ang Dios motabang kanila. Bisan og ikaw dili sad-an sa susamang mga sala sa katawhan ni Limhi, sa unsang paagi nga ang iyang mga pulong makatabang nimo nga mobalik ngadto sa Ginoo? Mamatikdan nimo, pananglitan, nga si Limhi mipahinumdom sa iyang katawhan mahitungod sa nangaging mga sugilanon mahitungod sa kaluwasan sa Dios (tan-awa sa mga bersikulo 18–20). Sa unsang paagi kini nga mga sugilanon, ingon man usab ang ubang mga sugilanon sa kasulatan o personal nga mga kasinatian, nakatabang kanimo sa pagsalig sa Dios?

Mosiah 8:5–12

Unsa man kadtong 24 ka mga palid nga nakita sa katawhan ni Limhi?

Samtang ang gamay nga grupo sa katawhan ni Limhi wala molampos sa pagpangita sa yuta sa Zarahemla, nakakita sila og 24 ka bulawang mga palid nga adunay mga kinulit sa dili sinati nga pinulongan. Kini nga mga palid, nga sa katapusan nahubad ni Haring Mosiah, naghisgot sa usa ka katawhan nga nailhan nga mga Jaredite, kinsa miabut ngadto sa gisaad nga yuta gikan sa Tore sa Babel ug sa katapusan nalaglag (tan-awa sa Mosiah 28:11–19). Dayon si Moroni mihimo og minubo niini nga mga palid (tan-awa sa Ether 1:1–2), nga nahimo nga ang basahon ni Ether. Tan-awa sa Mosiah 28:18 ang epekto niini nga rekord sa katawhan ni Mosiah.

Mosiah 8:12–19

Ang Ginoo mihatag og mga propeta, mga manalagna, ug mga tigpadayag alang sa kaayohan sa katawhan.

Sa dihang nadungog ni Limhi ang pagpamatuod ni Ammon nga ang Ginoo adunay usa ka manalagna, si Limhi “nalipay sa hilabihan, ug mihatag og pagpasalamat sa Dios” (Mosiah 8:19). Ngano nga mibati man siya og ingon niana? Unsay imong nakat-unan mahitungod sa mga manalagna gikan sa mga pulong ni Ammon sa Mosiah 8:13–19? Sa atong panahon, “ang Unang Kapangulohan ug ang Konseho sa Napulog Duha [gipaluyohan isip] mga propeta, mga manalagna, ug mga tigpadayag” (Giya ngadto sa mga Kasulatan, “Manalagna”). Kanus-a ang katapusang higayon nga ikaw namalandong sa panalangin sa pagkabaton og mga propeta, mga manalagna, ug mga tigpadayag dinhi sa yuta? Tingali imong marekord kon sa unsang paagi nga ang mga propeta, mga manalagna, ug mga tigpadayag nahimong “mahinungdanon nga kaayohan” nganha kanimo (Mosiah 8:18).

Si Propeta Joseph Smith mao ang talagsaong manalagna nga nagbarug nga pangulo sa atong dispensasyon (tan-awa sa D&P 21:1; 124:125; Joseph Smith—Kasaysayan 1:62). Sa unsang paagi iyang gipakita ang paghulagway ni Ammon sa usa ka manalagna panahon sa iyang pangalagad?

Mosiah 9–10

Makaatubang ko sa akong mga hagit pinaagi “sa gahum sa Ginoo.”

Gidawat ni Zeniff nga siya nakahimo og mga sayop. Nasobrahan ra ang iyang kadasig nianang higayuna, ug iyang nabutang ang iyang katawhan—ang mga katigulangan sa katawhan ni Limhi—sa malisud nga sitwasyon pinaagi sa paghimo og dili maalamong kasabutan uban ni Haring Laman. Apan sa kaulahian, sa dihang miadto siya sa gubat batok sa mga Lamanite, iyang gitabangan ang iyang katawhan sa pag-atubang sa ilang mga hagit uban sa hugot nga pagtuo. Samtang magbasa ka sa Mosiah 9–10, pangitaa unsay gibuhat sa katawhan ni Zeniff sa pagpakita sa ilang hugot nga pagtuo. Sa unsang paagi sila gilig-on sa Dios? Unsay buot ipasabut niini nganha kanimo sa pagpadayon “pinaagi sa gahum sa Ginoo”? (Mosiah 9:17; 10:10–11).

Mosiah 10:11–17

Ang akong mga pagpili makaimpluwensya sa mga henerasyon.

Sumala sa Mosiah 10:11–17, sa unsang paagi ang mga binuhatan ug mga kinaiya sa katigulangan sa mga Lamanite nakapugong sa mga Lamanite gikan sa pagkahibalo sa kamatuoran? Sa unsang paagi nga ang mga pagpili sa katigulangan sa mga Lamanite nakaapekto sa umaabut nga mga henerasyon? Hunahunaa ang mga tawo nga posibling naimpluwensyahan sa imong mga gituohan ug mga pagpili; unsay imong gibuhat aron matabangan sila nga mas mahingpit ang ilang pagbaton og pagtuo kang Kristo?

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang ipasabut og maayo ug hisgutan aron matubag ang mga panginahanglan sa imong pamilya. Ania ang pipila ka mga ideya.

Mosiah 7:19–20

Timan-i ang mga ehemplo nga gitudlo ni Limhi aron sa pag-awhag sa iyang katawhan sa pagbaton og hugot nga pagtuo. Unsa nga mga ehemplo gikan sa mga kasulatan ang nakadasig nato sa “pagsalig diha sa Dios”? Unsay ipasabut sa pagbutang sa atong pagsalig diha sa Dios? (tan-awa usab sa Mosiah 9:17; 10:19). Unsa nga mga istorya gikan sa atong kinabuhi o sa kinabuhi sa atong katigulangan ang atong mapaambit nga makadasig aron mas modako ang pagsalig diha sa Dios?

Mosiah 7:26–27

Unsay atong nakat-unan mahitungod sa Manluluwas gikan niini nga mga bersikulo? (tan-awa usab sa D&P 130:22). Nganong mapasalamaton man kita nga mahibalo niining mga butanga?

Mosiah 8:13–18

Aron matabangan ang mga sakop sa pamilya nga makasabut unsa ang usa ka manalagna, tingali imong mapakita kanila ang mga litrato sa mga himan [tools] nga makatabang nato sa pagkakita sa mga butang nga kon wala kini dili unta nato makita, sama sa mga lente, teleskopyo, o mikroskopyo [microscope]. Sa unsang paagi kini nga mga himan sama sa usa ka manalagna? (tan-awa sa Moises 6:35–36). Unsay makita sa mga manalagna nga dili nato makita? Unsa nga ebidensya ang ania kanato nga si Joseph Smith usa ka manalagna?

Pwede kang magpakita og mga litrato sa atong buhi nga mga propeta, mga manalagna, ug mga tigpadayag ug pangutan-a ang imong pamilya unsay ilang nahibaloan mahitungod kanila. Giunsa nato sila sa pagsunod?

Mosiah 9:14–18; 10:1–10

Sa dihang misulong ang mga Lamanite, ang katawhan ni Zeniff andam sa pisikal ug espirituhanong paagi. Unsay atong makat-unan gikan ni Zeniff ug sa iyang katawhan mahitungod sa pagpangandam alang sa mga hagit?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.

Pagpalambo sa Personal nga Pagtuon

Tinguhaa ang imong kaugalingong espirituhanong mga panabut. Kini nga latid [outline] nagsugyot og mga tudling ug mga baruganan nga matutukan, apan ayaw tuguti nga kining mga sugyot molimitar sa imong pagtuon. Tingali madasig ka sa mga bersikulo o makadiskobre og mga baruganan nga wala mahisguti dinhi. Tuguti nga mogiya kanimo ang Espiritu.

Joseph Smith uban ni Moroni

Panan-awon ni Joseph Smith, ni Clark Kelley Price