“Mayo 4–10. Mosiah 11–17: ‘Ang Kahayag … Nga Dili Gayud Mahimo Nga Mongitngit,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Mayo 4–10. Mosiah 11–17,” Dali, Sunod Kanako—Alang sa mga Indibidwal ug mga Pamilya: 2020
Si Abinadi sa Atubangan ni Haring Noah, ni Andrew Bosley
Mayo 4–10
Mosiah 11–17
“Ang Kahayag … Nga Dili Gayud Mahimo Nga Mongitngit”
Ang mga pulong ni Abinadi maoy nakaingon og dako nga kausaban bisan sa usa ka sakop sa korte ni Haring Noah (tan-awa sa Mosiah 17:2–4). Basaha ang Mosiah 11–17 uban sa pag-ampo sa imong kasingkasing nga ikaw makadawat og impresyon mahitungod sa unsa nga paagi ikaw mausab.
Irekord ang Imong mga Impresyon
Ang dagko nga kalayo magsugod sa usa lang ka pagkidlap. Si Abinadi mao lang ang usa ka tawo nga nagpamatuod batok sa gamhanang hari ug sa iyang korte. Ang iyang mga pulong gisalikway sa kasagaran, ug siya gisilotan sa kamatayon. Apan ang iyang pagpamatuod ni Jesukristo, kinsa mao ang “kahayag … nga dili gayud nga mahimo nga mongitngit” (Mosiah 16:9), mikidlap diha sa galamhan sa bata-ong pari nga si Alma. Ug kana nga kidlap sa pagkakabig sa hinay-hinay mitubo samtang si Alma midala og daghan pa ngadto sa paghinulsol ug hugot nga pagtuo kang Jesukristo. Ang dilaab nga nakapatay ni Abinadi sa katapusan napalong, apan ang kalayo sa hugot nga pagtuo nga nahimo sa iyang mga pulong nakahimo og malungtaron nga impluwensya diha sa mga Nephite—ug niadtong kinsa mobasa sa iyang mga pulong karon. Kadaghanan kanato dili gayud mag-atubang sa unsay gihimo ni Abinadi tungod sa atong mga pagpamatuod, apan kitang tanan adunay mga higayon nga ang pagsunod ni Jesukristo usa ka pagsulay sa atong kaisug ug hugot nga pagtuo. Tingali ang pagtuon sa pagpamatuod ni Abinadi makapadangilag usab sa pagpamatuod ug kaisug sa imong kasingkasing.
Mga Ideya alang sa Personal nga Pagtuon sa Kasulatan
Makabarug ako sa kamatuoran, bisan kon ako magbarug nga mag-inusara.
Hunahunaa kon unsa ka walay paglaum kini alang ni Abinadi sa pagsangyaw og paghinulsol ngadto sa katawhan nga ingon og dili gayud interesado nga mousab sa ilang dautan nga mga pamaagi. Ang iyang mensahe gisalikway kanunay. Apan wala mohunong si Abinadi.
Kanus-a ka mibati nga ikaw nagbarug nga nag-inusara sa pagpanalipod sa kamatuoran? Samtang magbasa ka sa Mosiah 11–13 ug 17, unsay imong makat-unan nga makatabang nimo nga makaandam kon ang Ginoo magkinahanglan nimo nga mobarug alang sa Iyang ebanghelyo? Unsa ang ubang mga baruganan ang imong nakat-unan gikan sa ehemplo ni Abinadi?
Kinahanglan nakong andamon ang akong kasingkasing aron makasabut sa mga pulong sa Dios.
Ang mga pari ni Haring Noah sinati sa pulong sa Dios—makakutlo sila og mga tudling sa kasulatan ug nangangkon nga nagtudlo sa mga sugo. Apan kadtong mga sugo “wala mahisulat sa [ilang] mga kasingkasing,” ug sila wala “mogamit sa [ilang] mga kasingkasing aron sa pagsabut” niini (Mosiah 13:11; 12:27). Isip resulta, ang ilang kinabuhi nagpabilin nga walay kausaban.
Samtang magbasa ka sa Mosiah 12:19–30, palandunga unsay gipasabut sa paggamit sa imong kasingkasing aron masabtan ang pulong sa Dios. Nakapadasig ba kini kanimo sa paghimo sa bisan unsa nga kausaban sa paagi sa imong pagkat-on sa ebanghelyo?
Ang Ginoo mopaluyo sa Iyang mga sulugoon sa Iyang buhat.
Sa laing bahin, ang kasinatian ni Abinadi makahatag og daghang mga ehemplo kon sa unsa nga paagi ang Ginoo mosuporta sa Iyang mga sulugoon—makita nimo ang pipila sa maong mga ehemplo sa Mosiah 13:1–9. Sa laing bahin, ang Ginoo mitugot usab nga gukuron si Abinadi, bilanggoon, ug mamartir tungod sa iyang pagpamatuod. Unsa ang imong nakit-an niini nga mga bersikulo nga nagpadayag nga si Abinadi misalig sa Ginoo? Sa unsa nga paagi nga ang ehemplo ni Abinadi nakaapekto sa paagi sa imong pagtan-aw sa imong mga katungdanan ug mga responsibilidad?
Si Jesukristo nag-antus alang kanako.
Si Haring Noah ug ang iyang mga pari nagtuo nga ang kaluwasan miabut pinaagi sa balaod ni Moises. Si Abinadi gusto nga masayud sila nga ang kaluwasan moabut pinaagi sa Mesiyas, nga si Jesukristo. Sa Mosiah 14–15, tan-awa ang mga pulong nga naghulagway sa Manluluwas ug unsay Iyang giantus alang kaninyo. Unsa nga bersikulo ang makatabang sa pagpalambo sa imong gugma ug pasalamat ngadto Kaniya?
Sa unsa nga paagi nga si Jesukristo Amahan ug Anak?
Kini nga mga tudling usahay makalibug tungod kay ingon og nga si Abinadi nagtudlo nga ang Langitnong Amahan ug si Jesukristo usa ra ka Tawo, apan nasayud kita nga sila managlahi nga mga Binuhat. Unsay gipasabut ni Abinadi? Gitudlo niya ang Dios nga Anak—si Jehova—mao ang mahimong Manunubos (tan-awa sa Mosiah 15:1), nagpuyo diha sa unod, nahimong kabahin sa tawo ug kabahin sa Dios (mga bersikulo 2–3). Hingpit Niyang gitugyan ang Iyang Kaugalingon ngadto sa kabubut-on sa Dios ang Amahan (mga bersikulo 5–9). Tungod niini, si Jesukristo mao ang Anak sa Dios ug ang hingpit nga yutan-ong nagrepresentar sa Dios nga Amahan (tan-awa sa Juan 14:6–10).
Si Abinadi nagpadayon sa pagpasabut nga si Jesukristo mao usab ang Amahan sa pagsabut nga kon kita modawat sa Iyang katubsanan, kita mahimo nga “iyang binhi” (Mosiah 15:11–12). Sa laing pagkasulti, kita mahimong matawo pag-usab sa espirituhanong paagi pinaagi Kaniya (tan-awa sa Mosiah 5:7).
Tan-awa usab sa Juan 5:25–27; 8:28–29; 17:20–23.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka ideya.
Mosiah 11–13; 17
Sila si Abinadi ug Alma mao ang makadasig nga mga ehemplo sa pagpabilin nga maunungon sa kamatuoran, bisan kon ang pagbuhat sa ingon dili popular. Ang mga sakop sa imong pamilya mahimong mag-atubang og sosyal nga pagpamugos sa pagsupak sa ilang mga sumbanan. Unsay ilang makat-unan gikan nila ni Abinadi ug Alma mahitungod sa pagbarug alang sa kamatuoran? Ang artwork nga anaa niini nga outline makatabang sa imong pamilya sa paghunahuna sa istorya. Human makatuon niini nga mga kapitulo, ikonsiderar ang pagdrama sa mga talan-awon sa tinuod nga kinabuhi aron ang mga sakop sa imong pamilya makapraktis sa pagtubag sa pagpamugos sa pagsupak sa ilang mga sumbanan. O mahimo kang mopakigbahin sa usag usa sa mga kasinatian nga imong nasinati sa pagbarug alang sa kamatuoran.
Mosiah 12:33–37; 13:11–24
Unsa ang buot ipasabut nga ang mga sugo sa Dios “nahisulat diha sa [atong] mga kasingkasing”? (Mosiah 13:11). Tingali ikaw makasulat og pipila ka ideya (o makadrowing og mga litrato sa imong mga ideya) sa dako nga papel nga porma og kasingkasing. Ngano nga ang mga sugo bililhon kanato? Unsaon nato nga makasulat niini sa atong mga kasingkasing?
Ang pagtuon sa mga kasulatan makatabang nato sa pagsulat sa mga sugo diha sa atong mga kasingkasing.
Mosiah 14
Niini nga kapitulo imong makita ang pipila ka pulong nga naghulagway ni Jesukristo. Tingali ang imong pamilya makalista niini sa higayon nga makit-an nimo kini. Unsay bation sa mga sakop sa pamilya mahitungod sa Manluluwas samtang magtuon kita niini nga mga pulong?
Mosiah 15:26–27; 16:1–13
Kini nga mga bersikulo naghulagway unsay mahitabo sa mga anak sa Dios kon si Jesus “wala pa moanhi sa kalibutan” (Mosiah 16:6) o kon sila dili mosunod Kaniya. Unsa ang maayo nga mga butang nga nahitabo tungod kay Siya mianhi ug miula alang kanato?
Alang sa dugang nga mga ideya sa pagtudlo sa mga bata, tan-awa kini nga latid [outline] karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Paggamit og mga istorya ug mga ehemplo sa pagtudlo sa mga baruganan sa ebanghelyo. Ang Manluluwas sa kasagaran nagtudlo sa mga baruganan sa ebanghelyo pinaagi sa paggamit sa mga istorya ug mga sambingay. Hunahunaa ang mga ehemplo ug mga istorya gikan sa imong kaugalingong kinabuhi nga makapahimo sa baruganan sa ebanghelyo nga makapainteresado sa imong pamilya (tan-awa sa Pagtudlo sumala sa Pamaagi sa Manluluwas, 22).
Ang Iyang Nawong Mihayag uban sa Tumang Kasanag, ni Jeremy Winborg