“Mayo 11–17. Mosiah 18–24: ‘Kita Nakasulod ngadto sa Usa ka Pakigsaad uban Kaniya,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Mayo 11–17. Mosiah 18–24,” Dali, Sunod Kanako—Alang sa mga Indibidwal ug mga Pamilya: 2020
Minerva K. Teichert (1888–1976), Escape of King Limhi and His People, 1949‑1951, lana nga anaa sa masonite, 35 7/8 x 48 ka pulgada. Brigham Young University Museum sa Art, 1969.
Mayo 11–17
Mosiah 18–24
Kita Nakasulod sa usa ka Pakigsaad uban Kaniya
Si Presidente Thomas S. Monson mitudlo, “Samtang kita magbasa ug mamalandong sa mga kasulatan, masinati nato ang mga paghunghong sa Espiritu sa atong kalag.” (“Wala Kita Mag-inusara Liahona, Nob. 2013, 122).
Irekord ang Imong mga Impresyon
Ang sugilanon mahitungod ni Alma ug sa iyang katawhan diha sa Mosiah 18; 23–24 nagpakita unsay gipasabut sa “pag-ipon ngadto sa panon sa Dios” (Mosiah 18:8). Sa dihang gibunyagan sila, mihimo sila og pakigsaad uban sa Dios nga “mag-alagad kaniya ug maghupot sa iyang mga sugo” (Mosiah 18:10). Samtang personal kaayo kini nga pasalig, may kalabutan usab kini kon giunsa nila sa pagtagad ang usag usa. Oo, ang panaw balik ngadto sa Langitnong Amahan personal ug indibidwal, ug walay bisan usa ang makahimo sa pagtuman sa atong mga pakigsaad alang kanato, apan wala kana magpasabut nga kita nag-inusara. Nagkinahanglan kita sa usag usa. Isip mga miyembro sa Simbahan ni Kristo, nakigsaad kita sa pag-alagad sa Dios pinaagi sa pagtabang ug pag-alagad sa usag usa diha sa panaw, “sa pagtambayayong sa usag usa nga mga alantuson” (Mosiah 18:8–10). Ang katawhan ni Alma sigurado nga adunay mga alantuson nga gipas-an, pareho natong tanan. Ug ang usa ka paagi nga ang Ginoo motabang kanato nga “makadaug sa [atong] mga alantuson uban sa kasayon” (Mosiah 24:15) mao ang paghatag kanato og komunidad sa mga Santos kinsa misaad nga magbangutan uban nato ug sa paghupay kanato, sama nga kita misaad sa pagbuhat niini alang kanila.
Mga Ideya alang sa Personal nga Pagtuon sa Kasulatan
Ang bunyag naglakip sa usa ka pakigsaad sa pag-alagad sa Dios ug pagbarug nga usa ka saksi Kaniya.
Ang Mosiah 18:8–10 naglakip sa mga pagtulun-an ni Alma mahitungod sa pakigsaad sa bunyag, o sa saad nga atong gihimo ngadto sa Dios atol sa bunyag. Samtang magbasa ka niining mga bersikulo, pamalandungi ang mosunod nga mga pangutana:
-
Unsay imong nakat-unan gikan niini nga mga bersikulo mahitungod sa mga saad nga imong gihimo sa bunyag? Unsa ang gisaad sa Dios kanimo?
-
Sa unsang paagi nga ang pakigsaad sa pag-alagad sa Dios (tan-awa sa bersikulo 10) may kalabutan sa atong mga paningkamot sa pagpangalagad sa usag usa? (tan-awa sa mga bersikulo 8–9).
-
Unsay imong gibuhat aron matuman ang imong mga gisaad?
-
Sa unsang paagi nga ang pagtuman sa imong pakigsaad sa bunyag makatabang nimo nga “[ma]puno uban sa Espiritu”? (Mosiah 18:14). Sa unsang paagi nga ang Espiritu motabang nimo sa pagtuman sa imong pakigsaad?
Kon ako mohimo og mga pakigsaad sa Dios, makadawat ko sa Iyang mga panalangin.
Kini nga istorya nagpadayag usab sa eksaktong paagi sa bunyag. Unsay imong nakat-unan diha sa mga bersikulo 14–17 mahitungod kon unsaon sa pagpahigayon sa bunyag? Unsa pay imong nakat-unan mahitungod sa bunyag gikan diha sa Mateo 3:16; Mga Taga-Roma 6:3–5; 3 Nephi 11:21–28; ug Doktrina ug mga Pakigsaad 20:72–74?
Tan-awa usab sa Doktrina ug mga Pakigsaad 20:37, 77, 79.
Ang katawhan sa Dios kinahanglang magkahiusa.
Sama sa nadiskobrehan ni Alma ug sa iyang katawhan, ang pagsunod ni Jesukristo usahay nagpasabut sa pagbiya sa pamilyar nang pamaagi sa kinabuhi alang sa butang nga bag-o ug lahi. Apan ang katawhan ni Alma nakakuha og kalig-on gikan sa usag usa isip kabahin “sa simbahan ni Kristo” (Mosiah 18:17). Sa unsang paagi nga ang mga pagtulun-an diha sa Mosiah 18:17–30 nakapadasig kanimo nga mahimong mas maayo nga miyembro sa Simbahan? Unsay imong mahimo aron matabangan ang mga miyembro sa imong ward o branch nga “[m]abugkos diha sa pagkahiusa ug diha sa gugma”? (Mosiah 18:21).
Tan-awa usab sa Henry B. Eyring, “Ang Atong mga Kasingkasing Nabugkos diha sa Panaghiusa,Ensign o Liahona, Nob. 2008, 68–71.
Ang mga pulong sa mga propeta pagatumanon.
Si Abinadi mihimo og pipila ka pihong mga panagna mahitungod sa unsay mahitabo ni Haring Noah ug sa iyang katawhan kon sila magdumili sa paghinulsol. Hinoon, pipila niini nga mga panagna ingon og dili katuohan (tan-awa sa Mosiah 12:1–8, 14–15), ilabi na sukad ang mga Nephite nagmalampuson sa pagpanalipod sa ilang kaugalingon batok sa mga Lamanite sulod sa dul-an 50 ka tuig (tan-awa sa Mosiah 9:16–18; 11:19). Apan ang tanang mga pulong sa mga propeta matuman—sa atong panahon sama sa panahon ni Abinadi.
Unsay imong nakita sa Mosiah 19–20 nga nakapaaghat ni Gideon sa pagpahayag nga ang mga panagna ni Abinadi natuman? (tan-awa sa Mosiah 20:21). Sa unsang paagi nga kini nga istorya makapalig-on sa imong pagtuo diha sa mga pagpasidaan ug tambag sa mga propeta sa Dios ug sa imong pasalig sa pagsunod sa ilang mga pulong? Kanus-a ka nakakita nga ang mga pulong sa propeta natuman sa atong panahon?
Ang Dios makapagaan sa atong mga alantuson.
Ang katawhan ni Limhi ug ang katawhan ni Alma nangahimong ulipon, bisan sa managlahing mga rason ug sa managlahing sirkumstansya. Unsay imong makat-unan pinaagi sa pagtandi sa mga istorya sa katawhan ni Limhi sa Mosiah 19–22 ug sa katawhan ni Alma sa Mosiah 18; 23–24? Mahimo nimong timan-an kon giunsa niini nga mga pundok sa pagsanong ang pagkabihag o kon sa unsang paagi nga ang matag usa sa katapusan naluwas. Samtang buhaton nimo kini, pangitaa ang mga mensahe nga magamit sa imong kinabuhi. Sama pananglit, unsay imong nakat-unan gikan niini nga mga istorya nga makatabang nimo sa pagpas-an sa imong mga alantuson?
Ako makasalig sa Ginoo.
Bisan og naghinulsol sila sa ilang mga sala, si Alma ug ang iyang katawhan nakakita gihapon sa ilang mga kaugalingon nga anaa sa pagkaulipon. Ang ilang kasinatian nagpakita nga ang pagsalig sa Ginoo ug pagsunod sa atong mga pakigsaad dili kanunay makapugong sa mga kalisud, apan kini makatabang nato sa pagbuntog niini. Samtang magbasa ka sa Mosiah 23:21–24 ug 24:8–17, timan-i ang mga pulong nga makatabang nimo nga makat-on sa pagsalig sa Dios, bisan pa sa imong mga sirkumstansya.
Tan-awa usab sa Thomas S. Monson, “Ikaw Dili Ko Kawangon, ni Biyaan Ko Ikaw,” Liahona, Nob. 2013, 85–87.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang ipasabut og maayo ug hisgutan aron matubag ang mga panginahanglan sa imong pamilya. Ania ang pipila ka mga ideya.
Mosiah 18:1–4
Adunay panultihon nga maihap kuno nimo ang liso sa usa ka mansanas, apan dili nimo maihap ang mga mansanas nga naggikan sa usa ka liso. Usa lamang ka tawo ang nadani sa pagpamatuod ni Abinadi, apan kanang usa ka tawo—si Alma—miimpluwensya og mga henerasyon sa mga Nephite. Tingali pwede kang mogamit og usa ka bunga nga dunay mga liso sa pagpatin-aw niini nga baruganan. Sa unsang paagi magamit kini sa atong pamilya? Unsay atong mahimo aron atong mapaambit ang atong mga pagpamatuod ngadto sa uban?
Mosiah 18:8–10
Unsay atong makat-unan mahitungod sa atong pakigsaad sa bunyag gikan niini nga mga bersikulo? (tan-awa usab sa D&P 20:73, 77–79). Unsay atong gihimo sa pag-andam o pagtuman sa atong pakigsaad sa bunyag?
Mosiah 18:30
Unsang mga dapit ang adunay espesyal nga kahulugan ngari kanato tungod sa espirituhanong mga kasinatian nga atong nasinati didto?
Mosiah 21:11–16; 24:10–15
Unsay atong makat-unan pinaagi sa pagtandi sa pagkabihag sa katawhan ni Alma ug sa katawhan ni Limhi?
Mosiah 21:15; 24:11–15
Unsay gitudlo niini nga mga bersikulo kanato mahitungod sa pipila ka paagi nga ang Ginoo motubag og mga pag-ampo?
Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.
Pagpalambo sa Personal nga Pagtuon
Pangita og oras nga maayo para nimo. Kasagaran sayon ra kaayo ang pagkat-on kon magtuon ka sa mga kasulatan nga dili mabalda. Pangita og oras nga maayo para nimo, ug buhata ang labing maayo nga padayon kang makatuon nianang orasa sa matag adlaw.
Ang Katubigan sa Mormon, ni Jorge Cocco