“Mayo 18–24. Mosiah 25–28: ‘Sila Gitawag og ang mga Katawhan sa Dios,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Mayo 18–24. Mosiah 25–28,” Dali, Sunod Kanako—Alang sa mga Indibidwal ug mga Pamilya: 2020
Pagkakabig ni Alma nga Batan-on, ni Gary L. Kapp
Mayo 18–24
Mosiah 25–28
“Sila Gitawag og ang mga Katawhan sa Dios”
Human “ang tingog sa Ginoo miabut ngadto ni [Alma],” gisulat niya ang mga butang nga gisulti kaniya sa Ginoo “nga siya unta makaangkon [niini]” (Mosiah 26:13, 33). Unsaon nimo sa pagsunod sa ehemplo ni Alma?
Irekord ang Imong mga Impresyon
Human sa dul-an tulo ka henerasyon nga nagpuyo sa lahi nga kayutaan, ang mga Nephite sa makausa nagkahiusa pag-usab. Ang katawhan ni Limhi, ang katawhan ni Alma, ug ang katawhan ni Mosiah—bisan ang katawhan sa Zarahemla, nga wala maggikan ni Nephi—karon ang tanan “nalakip uban sa mga Nephite” (Mosiah 25:13). Daghan kanila gusto usab nga mamiyembro sa Simbahan nga giestablisar ni Alma. Mao nga kadtong tanan nga “matinguhaon sa pagdala diha kanila sa ngalan ni Kristo” nabunyagan, “ug sila gitawag og ang mga katawhan sa Dios” (Mosiah 25:23–24). Human sa katuigan sa panagbangi ug pagkabihag, ingon og daw ang mga Nephite sa katapusan makatagamtam og panahon sa kalinaw.
Apan sa wala madugay, ang mga dili tumutuo nagsugod sa paglutos sa mga Santos. Ang labing makapasakit niini mao nga daghan niining dili tumutuo mga kaugalingong anak sa mga tumutuo—ang “bag-o nga kaliwatan” (Mosiah 26:1), lakip sa mga anak nga lalaki ni Mosiah ug sa usa ka anak nga lalaki ni Alma. Dayon usa ka milagro ang nahitabo, ug ang sugilanon niana nga milagro nakahatag og paglaum ngadto sa nagbangutan nga mga ginikanan sulod sa mga henerasyon. Apan ang istorya sa pagkakabig ni Alma dili lamang alang sa mga ginikanan sa badlungon nga mga anak. Ang tinuod nga pagkakabig usa ka milagro nga, sa usa ka paagi o sa lain, kinahanglang mahitabo kanatong tanan.
Mga Ideya alang sa Personal nga Pagtuon sa Kasulatan
Responsable ako sa akong kaugalingong pagtuo ug pagpamatuod.
Kadtong nakadungog sa wali ni Haring Benjamin nakasinati og katingalahan nga pagkakabig (tan-awa sa Mosiah 5:1–7), apan ang pagkakabig usa ka personal nga kasinatian nga dili ikapasa sama sa kabilin nga ipasa ngadto sa mga anak. Kitang tanan kinahanglan makasinati sa atong kaugalingong pagkakabig ngadto sa ebanghelyo ni Jesukristo. Samtang magbasa ka sa Mosiah 26:1–6 mahitungod sa “bag-o nga kaliwatan” kabahin sa dili tumutuo nga mga Nephite, timan-i ang mga sangputanan sa ilang pagkawalay pagtuo. Mahimo usab nimong hunahunaon ang mahitungod sa katawhan nga gusto nimong dad-on ngadto ni Kristo. Samtang dili nimo ikahatag kanila ang imong pagkakabig, ang Espiritu mohung-hong sa mga butang nga mahimo nimong buhaton sa pagtabang kanila nga makakaplag og pagtuo. Samtang magbasa ka sa Mosiah 25–28 mahitungod kon sa unsa nga paagi nga si Alma ug ubang mga miyembro sa Simbahan nakatabang sa bag-o nga kaliwatan, ang dugang nga mga hunahuna posibling moabut kanimo.
Tan-awa usab sa Doktrina ug mga Pakigsaad 68:25–29.
Ang matinud-anong mga sulugoon sa Dios nagtinguha sa pagbuhat sa Iyang kabubut-on.
Usahay maghunahuna kita nga ang usa ka lider sa Simbahan sama ni Alma kanunay nga nasayud sa saktong butang nga buhaton. Sa Mosiah 26 mabasa nato ang usa ka problema sa Simbahan nga sukad wala pa masugati ni Alma, ug “siya nahadlok nga siya makabuhat og sayop diha sa panan-aw sa Dios” (Mosiah 26:13). Unsay gihimo ni Alma niini nga sitwasyon? (tan-awa sa Mosiah 26:13–14, 33–34, 38–39). Unsa ang gisugyot sa kasinatian ni Alma mahitungod kon unsaon sa pagsulbad sa malisud nga mga problema sa imong pamilya o sa imong pag-alagad sa Simbahan?
Tingali makapaikag usab ang paglista sa mga kamatuoran nga gipadayag sa Dios ngadto ni Alma, nga makita sa Mosiah 26:15–32. Hibaloi nga ang pipila niini nga mga kamatuoran dili usa ka direktang tubag sa pangutana ni Alma. Unsa ang gisugyot niini nganha kanimo mahitungod sa pag-ampo ug pagdawat og personal nga pagpadayag?
Ang tanang mga lalaki ug babaye kinahanglang matawo pag-usab.
Klaro nga si Alma nga Batan-on nanginahanglan og espirituhanong pagkatawo pag-usab, kay siya ug ang anak nga mga lalaki ni Mosiah “mao ang labing dautan sa mga makasasala,” kinsa milibut “sa paglaglag sa simbahan sa Dios” (Mosiah 28:4; 27:10). Apan sa wala madugay human sa iyang pagkakabig, si Alma mipamatuod nga ang pagkakabig anaa—ug mahinungdanon—alang sa tanan: “Ayaw pagkahibulong,” miingon siya, “nga ang tanan nga katawhan … kinahanglan matawo pag-usab” (Mosiah 27:25). Kana, dayag lang, naglakip kanimo.
Samtang magbasa ka mahitungod sa kasinatian ni Alma, nga makita sa Mosiah 27:8–37, mahimong sulayan nimo ang pagbutang sa imong kaugalingon sa iyang lugar. Wala ka mosulay sa paglaglag sa Simbahan, apan sigurado nga makahunahuna ka og mga butang mahitungod sa imong kaugalingon nga nagkinahanglan og kausaban. Kinsa, sama sa amahan ni Alma, ang nagsuporta kanimo ug nag-ampo alang kanimo “uban ang hugot nga pagtuo”? Unsa nga mga kasinatian ang nakatabang “sa pagdani [kanimo] sa gahum ug pagtugot sa Dios”? (Mosiah 27:14). Unsa nga “mahinungdanong mga butang” ang gibuhat sa Ginoo alang kanimo ug sa imong pamilya nga angay nimong “mahinumduman”? (Mosiah 27:16). Unsay imong nakat-unan gikan sa mga pulong ug sa mga gibuhat ni Alma nga Batan-on mahitungod kon unsay gipasabut sa pagkatawo pag-usab? Ang mga pangutana nga sama niini tingali makatabang kanimo sa pagtimbang-timbang sa imong pag-uswag sa proseso sa pagkatawo pag-usab.
Tan-awa usab sa Mosiah 5:6–9; Alma 36; “Pagkakabig”.
Nagmaya ang Iyang Amahan, ni Walter Rane
Ang Dios naminaw sa akong mga pag-ampo ug motubag niini sumala sa Iyang kabubut-on.
Tingali may nailhan ka nga usa ka ginikanan nga anaa sa samang sitwasyon ni Alma nga Tigulang, kansang anak nga lalaki o anak nga babaye nakahimo og makadaut nga mga pagpili. O tingali ikaw kana nga ginikanan. Unsay imong nakita sa Mosiah 27:14, 19–24 nga naghatag kanimo og paglaum? Sa unsa kaha nga paagi nga kining mga bersikulo makaimpluwensya sa imong mga pag-ampo alang sa uban?
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang ipasabut og maayo ug hisgutan aron matubag ang mga panginahanglan sa imong pamilya. Ania ang pipila ka mga ideya.
Mosiah 25:5–11
Unsa ang gibati sa katawhan ni Mosiah human nga iyang gibasa ngadto kanila ang mga rekord ni Zeniff ug sa katawhan ni Alma? Ang imo bang pamilya naghimo og bisan unsang mga rekord nga imong mabasa? Tingali makadugang ka sa imong mga rekord o makasugod sa paghimo sa imong kaugalingon. Unsay imong ilakip nga tingali makatabang sa imong pamilya (lakip sa umaabut nga mga kaliwatan) nga “napuno uban sa hilabihan ka dako nga hingpit nga kalipay” ug makat-on mahitungod “sa diha-diha nga kaayo sa Dios”? (Mosiah 25:8, 10).
Mosiah 25:16
Nganong importante man alang sa katawhan ni Limhi nga mahinumdom nga giluwas sila sa Ginoo gikan sa pagkabihag? Unsay nahimo sa Ginoo kanato nga kinahanglan natong hinumduman?
Mosiah 26:29–31; 27:35
Sumala niini nga mga bersikulo, unsay angay buhaton sa usa ka tawo aron makadawat og kapasayloan?
Mosiah 27:21–24
Samtang magbasa ka niini nga mga bersikulo, ikonsiderar ang usa ka tawo sa imong pamilya nga imong iampo ug ipuasa.
Mosiah 27–28
Aron matabangan ang imong pamilya nga mohunahuna sa mga sugilanon niini nga mga kapitulo, pwede nimo silang dapiton sa pagdrowing og mga litrato sa mga tawo nga naapil ug gamiton ang mga litrato sa pagsugilon og usab sa istorya. O tingali malingaw sila nga magdrama; unsaon kaha nila sa paghulagway ang kausaban nga nasinati ni Alma ug sa mga anak nga lalaki ni Mosiah?
Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.
Pagpalambo sa Atong Pagtudlo
Gamita ang art. “Ang Libro sa mga Hulagway sa Ebanghelyo ug ang LDS Media Library sa ChurchofJesusChrist.org naglangkob og daghang mga imahe ug mga video nga makatabang [sa imong pamilya] sa paghunahuna sa mga konsepto o mga panghitabo” (Pagtudlo sumala sa Pamaagi sa Manluluwas, 22).
Paghulagway sa usa ka anghel nga nagpakita ngadto ni Alma nga Batan-on pinaagi ni Kevin Keele