“Mayo 18–24. Mosiah 25–28: ‘Sila Gitawag og ang mga Katawhan sa Dios,’” Dali, Sunod Kanako—Alang sa Primary: Basahon ni Mormon 2020 (2020)
“Mayo 18–24. Mosiah 25–28,” Dali, Sunod Kanako—Alang sa Primary: 2020
Pagkakabig ni Alma nga Batan-on, ni Gary L. Kapp
Mayo 18–24
Mosiah 25–28
“Sila Gitawag og ang mga Katawhan sa Dios”
Ang Langitnong Amahan nasayud kon unsay gikinahanglang makat-unan sa mga bata sa imong klase ug unsaon sa pagkab-ut niini. Pagtinguha sa Iyang giya samtang imong basahon ang Mosiah 25–28 ug ribyuha kini nga outline.
Irekord ang Imong mga Impresyon
Dapita ang Pagpaambit
Ipakita ang hulagway sa outline niini nga semana diha sa Dali, Sunod Kanako—Alang sa mga Indibidwal ug mga Pamilya, ug hangyoa ang mga bata sa paglarawan kon unsay nahitabo diha sa hulagway. Kon ang mga bata pamilyar sa istorya ni Alma nga Batan-on ug sa mga anak nga lalaki ni Mosiah, tuguti sila sa pagpaambit sa unsay ilang nahibaloan.
Itudlo ang Doktrina: Mas Gagmay nga mga Bata
Ang Manluluwas gusto nga mopasaylo ko.
Ang Ginoo mitudlo ni Alma nga walay pagpugong Siyang mopasaylo niadtong maghinulsol. Kinahanglan kitang mosunod sa Iyang ehemplo pinaagi sa pagpasaylo niadtong nakasala kanato.
Posible nga mga Kalihokan
-
Basaha ngadto sa mga bata kini nga mga pulong gikan sa Mosiah 26:31: “Kamo usab mopasaylo sa usag usa.” Papraktisa ang mga bata sa pagsulti og “Gipasaylo ko ikaw” sa pipila ka higayon, ug susiha kon nasayud ba sila unsay gipasabut sa pagpasaylo. Pagpaambit og kasinatian gikan sa imong kinabuhi sa dihang mipasaylo ka og usa ka tawo o ang usa ka tawo mipasaylo kanimo.
-
Tabangi ang mga bata sa pagdrama-drama nga nagpasaylo sa usag usa. Hangyoa ang usa ka bata nga magpakaaron-ingnon nga duna siyay nahimo nga nakapasakit o nakapasilo sa laing bata. Unsay masulti o mahimo sa laing bata aron makapakita og pagpasaylo?
-
Dapita ang mga bata sa pagdrowing og masulub-on nga nawong sa usa ka bahin sa papel ug malipayon nga nawong sa pikas bahin. Hangyoa sila sa pagpataas sa masulub-on nga nawong samtang maghisgot sila og kasinatian sa dihang ang usa ka igsoon o higala nakahasol kanila. Hangyoa sila sa pagpataas sa malipayon nga nawong samtang mosulti sila kon sa unsang paagi nila napasaylo o pasayloon kanang tawhana.
Ang ebanghelyo motabang sa mga tawo nga mag-usab ug mahimong mas sama ni Jesus.
Ang pagkakabig ni Alma nga Batan-on ug sa mga anak nga lalaki ni Mosiah nagpakita nga tungod ni Jesukristo ug sa Iyang ebanghelyo, si bisan kinsa mahimong mag-usab ug mahimong mas sama kang Jesus.
Posible nga mga Kalihokan
-
Isaysay sa daklit ang pagkakabig ni Alma nga Batan-on ug sa mga anak nga lalaki ni Mosiah, sama sa gihulagway diha sa Mosiah 27:8–37. Alang sa tabang, tan-awa ang “Kapitulo 18: Si Alma nga Batan-on Naghinulsol” (Mga Sugilanon sa Basahon ni Mormon, 49–52). Dayon isaysay pag-usab ang istorya nga tugutan ang mga bata sa pagpaambit sa mga detalye nga ilang mahinumduman. Ipa-aksyon kanila ang istorya, ug tabangi sila nga makakita sa kalainan kon sama sa unsa si Alma ug ang mga anak nga lalaki ni Mosiah sa wala pa sila naghinulsol ug pagkahuman sa paghinulsol.
-
Tabangi ang mga bata nga gamiton ang pahina sa kalihokan niini nga semana aron sa pagsaysay sa istorya ni Alma ug sa mga anak nga lalaki ni Mosiah. Basaha ang Mosiah 27:24, ug tabangi ang mga bata nga makasabut nga si Alma ug ang mga anak nga lalaki ni Mosiah nausab tungod kay naghinulsol sila sa ilang mga sala ug midawat sa ebanghelyo ni Jesukristo.
ImaheSi Alma nga Batan-on nga gidala ngadto sa balay sa iyang amahanNagmaya ang Iyang Amahan, ni Walter Rane
Ako makahimo sa pagpakigbahin sa ebanghelyo.
Human sa ilang pagkakabig, ang mga anak nga lalaki ni Mosiah nagmatinguhaon sa pagpaambit sa ebanghelyo ngadto sa tanan, lakip sa ilang mga kaaway, ang mga Lamanite.
Posible nga mga Kalihokan
-
Gamita ang Mosiah 28:1–8 sa pagsulti sa mga bata mahitungod sa mga anak nga lalaki ni Mosiah nga nakahukom sa pagsangyaw sa ebanghelyo ngadto sa mga Lamanite. Alang sa tabang, tan-awa ang “Kapitulo 19: Ang mga Anak nga Lalaki ni Mosiah Nahimong mga Misyonaryo” (Mga Sugilanon sa Basahon ni Mormon, 53). Nganong gusto man nilang mopaambit sa ebanghelyo? (tan-awa ang bersikulo 3).
-
Tabangi ang matag bata sa paghunahuna og usa ka tawo kinsa kinahanglang dugang pa nga masayud mahitungod sa ebanghelyo. Tabangi ang mga bata sa pagplano sa unsay ilang isulti ngadto sa mga tawo nga ilang nahunahunaan.
-
Kantaha og dungan ang usa ka kanta mahitungod sa ebanghelyo, sama sa “Gusto Ko Karon nga Mamisyonaryo” (Songbook sa mga Bata, 90). Hisguti ang mga pulong diha sa kanta nga nagsugyot kon sa unsang paagi kita makapaambit sa ebanghelyo ngadto sa uban.
Itudlo ang Doktrina: Mas Dagko nga mga Bata
Mosiah 26:22–23, 29–30; 27:8–37
Ang Dios mopasaylo sa walay pagpugong niadtong maghinulsol.
Kon adunay naghunahuna sa imong klase kon tinud-anay ba gayud siyang mapasaylo, ang mga pulong sa Dios ngadto ni Alma nga Tigulang makatabang.
Posible nga mga Kalihokan
-
Hangyoa ang mga bata nga magpakaaron-ingnon nga nakigsulti sila ngadto sa tawo nga naghunahuna nga dili gayud siya mapasaylo sa Dios. Dapita sila sa pagribyu sa mga pulong sa Dios ngadto ni Alma nga tigulang diha sa Mosiah 26:22–23, 29–30. Unsay ilang nakit-an nga makatabang nianang tawhana?
-
Sa dili pa magklase, hangyoa ang usa sa mga bata sa pagbasa mahitungod sa pagkakabig ni Alma nga Batan-on, nga makita sa Mosiah 27:8–37, ug motambong nga andam nga mosaysay sa istorya diha sa klase nga daw siya mismo si Alma nga Batan-on. (Kon gikinahanglan, isugyot nga mangayo siya og tabang sa usa ka ginikanan.) Samtang isaysay sa bata ang istorya, pangutana og sama sa “Unsay imong gibati dihang … ?” o “Unsay sunod nga nahitabo?”
-
Dapita ang mga bata sa paghimo og lista sa mga pulong gikan sa Mosiah 27:8–10 nga naghulagway kon sama sa unsa si Alma ug ang mga anak nga lalaki ni Mosiah sa wala pa sila makabig. Dayon hangyoa sila sa paghimo og laing lista gikan sa Mosiah 27:32–37 nga naghulagway kon sama sa unsa sila human makabig. Sumala sa mga bersikulo 24–29, unsa ang hinungdan niining dako nga kausaban ni Alma?
Aron mapasaylo, kinahanglan gayud akong mopasaylo.
Tabangi ang mga bata nga makakita sa koneksyon tali sa pagpasaylo nga ilang ihatag ngadto sa uban ug sa pagpasaylo nga gilauman nila alang sa ilang kaugalingon.
Posible nga mga Kalihokan
-
Dapita ang mga bata sa pagbasa sa Mosiah 26:29–31 ug sa pag-ihap kon kapila makita ang pulong nga “mopasaylo”. Unsa ang gitudlo niini nga mga bersikulo kanato mahitungod sa pagpasaylo sa uban? Sa unsang paagi nga ang pagpasaylo makatabang sa tawo nga nakahimo og sayop ug sa tawo nga mipasaylo?
-
Hangyoa ang usa ka bata sa pagdrowing og taytayan diha sa pisara, ug ipaambit kini nga pamahayag nga gikutlo ni Presidente Thomas S. Monson : “Siya nga dili makapasaylo sa uban miputol sa taytayan nga kinahanglan gayud niyang agian kon gusto niyang makaabut sa langit, kay ang tanan adunay panginahanglan sa pagpasaylo” (George Herbert, gikutlo diha sa “Hidden Wedges,” Ensign, Mayo 2002, 19). Papasa ang usa ka bahin sa taytayan, ug hangyoa ang mga bata nga motabang kanimo sa pagtukod og balik niini, anam-anam kada piraso, samtang mopaambit sila og mga paagi nga makapasaylo sila sa uban. Dapita sila sa paghunahuna og tawo nga kinahanglan nilang pasayloon.
Mahimo akong mag-ampo ug magpuasa aron ang Dios mopanalangin niadtong akong gimahal.
Ikonsiderar kon unsaon nimo pagtabang ang mga bata nga makasabut nga ang pagpuasa makapalig-on sa ilang pagtuo samtang mag-ampo sila alang sa mga tawo nga ilang gimahal.
Posible nga mga Kalihokan
-
Basaha og dungan ang Mosiah 27:8–24, ug hangyoa ang mga bata sa pagtino kon unsay gibuhat ni Alma ug sa iyang katawhan aron sa pagtabang ni Alma nga Batan-on. Pagpaambit og kasinatian diin ikaw nagpuasa ug nag-ampo alang sa usa ka tawo, ug awhaga ang mga bata sa pagpaambit sa ilang kaugalingong mga kasinatian.
-
Dapita ang mga bata sa paghunahuna og tawo nga ilang kaila kinsa nagkinahanglan sa tabang sa Dios diha sa iyang kinabuhi. Ipamatuod nga ang mga bata mahimong mag-ampo ug magpuasa uban sa pagtuo aron ang Dios mopanalangin niining tawhana. Dapita ang mga bata sa pag-ampo alang sa tawo nga ilang nahunahunaan ug, kon makahimo sila, sa pagpuasa usab alang kanila.
Awhaga ang Pagkat-on diha sa Panimalay
Hangyoa ang mga bata sa pagpili og usa ka butang nga ilang nakat-unan gikan sa kasinatian ni Alma nga Batan-on ug sa mga anak nga lalaki ni Mosiah nga gusto nilang ipaambit sa ilang mga pamilya.
Pagpalambo sa Atong Pagtudlo
Suportahi ang mga ginikanan. “Ang mga ginikanan maoy labing importanting mga magtutudlo sa ebanghelyo alang sa ilang mga anak—anaa kanila ang labing dako nga responsibilidad ug ang labing dako nga gahum sa pag-impluwensya sa ilang mga anak (tan-awa sa Deuteronomio 6:6–7). Samtang magtudlo ka sa mga bata diha sa simbahan, pagmainampuon nga motinguha og mga paagi sa pagsuporta sa ilang mga ginikanan” (Pagtudlo sumala sa Pamaagi sa Manluluwas, 25).