“Mayo 11–17. Mosiah 18–24: ‘Kami Misulod sa usa ka Pakigsaad uban Kaniya,’” Dali, Sunod Kanako—Alang sa Primary: Basahon ni Mormon 2020 (2020)
“Mayo 11–17. Mosiah 18–24,” Dali, Sunod Kanako—Alang sa Primary: 2020
Minerva K. Teichert (1888-1976), Ang Pag-ikyas ni Haring Limhi ug sa Iyang mga Katawhan, 1949-1951, lana diha sa masonite, 35 7/8 x 48 ka pulgada. Brigham Young University Museum of Art, 1969.
Mayo 11–17
Mosiah 18–24
Kami Misulod sa usa ka Pakigsaad uban Kaniya
Samtang imong basahon ang Mosiah 18–24, hunahunaa ang mga bata nga imong gitudloan. Ang Espiritu Santo makatabang kanimo sa pagtino og mga kamatuoran nga importante ngadto kanila.
Irekord ang Imong mga Impresyon
Dapita ang Pagpaambit
Pagpakita og hulagway sa usa ka tawo nga gibunyagan, ug dapita ang mga bata sa pagpaambit og usa ka butang nga ilang nahibaloan mahitungod sa bunyag. Mahimo silang mopaambit og usa ka butang nga ilang nakat-unan samtang nagbasa sa Mosiah 18–24 uban sa ilang mga pamilya, samtang nagtambong og usa ka bunyag, o sa laing sitwasyon.
Itudlo ang Doktrina: Mas Gagmay nga mga Bata
Sa panahon nga ako bunyagan, ako maghimo og pakigsaad uban sa Dios.
Usa sa labing importanting mga paagi sa pagtabang sa mga bata nga maandam alang sa bunyag mao ang pagtudlo kanila mahitungod sa pakigsaad nga ilang himoon sa panahon nga sila bunyagan.
Posible nga mga Kalihokan
-
Ribyuha ang istorya ni Alma ug sa iyang katawhan sa Katubigan sa Mormon gamit ang Mosiah 18:7–16 o “Kapitulo 15: Si Alma Nagtudlo ug Nagbunyag” (Mga Sugilanon sa Ang Basahon ni Mormon, 43–44 ). Ipakita ang hulagway diha sa outline niini nga semana sa Dali, Sunod Kanako—Alang sa mga Indibidwal ug mga Pamilya, ug pasultiha ang mga bata kanimo kon unsay ilang nahibaloan mahitungod sa istorya.
-
Gamit ang Mosiah 18:8–10 isip giya, tudloi ang mga bata sa imong kaugalingong mga pulong sa pipila ka mga butang nga isaad nilang buhaton sa panahon nga sila bunyagan. Sama pananglit, mosaad sila nga mosunod sa Langitnong Amahan ug ni Jesus pinaagi sa paghupay sa mga tawo nga naguol. Pagpaambit og istorya kon sa unsang paagi ikaw o ang tawo nga imong kaila mituman niini nga mga saad. (Tan-awa usab sa D&&P 20:77, 79; Carole M. Stephens, “Kita Adunay Dako nga Rason nga Malipay,” Liahona, Nob. 2013, 115–17.)
-
Ipasabut nga sa panahon nga kita bunyagan, ang Langitnong Amahan mohimo usab og mga saad ngari kanato. Ipaambit kini nga mga saad, sama sa gihulagway diha sa Mosiah 18:9–10.
Sa panahon nga ako mabunyagan, mamahimo akong miyembro sa Simbahan ni Jesukristo.
Tabangi ang mga bata nga makasabut unsay gipasabut nga mahimong mga miyembro sa Simbahan pinaagi sa bunyag ug kumpirmasyon.
Posible nga mga Kalihokan
-
Dapita ang usa ka tawo kinsa bag-o lang nabunyagan sa pagpaambit sa iyang kasinatian. Basaha ang Mosiah 18:17, ug ipasabut nga sa panahon nga kita mabunyagan kita mahimong mga miyembro sa Ang Simbahan ni Jesukristo sa mga Santos sa Ulahing mga Adlaw ug mosaad sa pagsunod ni Jesus.
-
Pakit-a ang mga bata og mga hulagway nga nagrepresentar sa mga butang nga gihulagway diha sa Mosiah 18:17–28. Sama pananglit, ang hulagway nga Pag-orden ngadto sa Priesthood (Libro sa mga Hulagway sa Ebanghelyo, nu. 106) mahimong magrepresentar sa bersikulo 18, ug ang hulagway nga Pagbayad sa Ikapulo (Libro sa mga Hulagway sa Ebanghelyo, nu. 113) mahimong magrepresentar sa mga bersikulo 27–28. Ipalarawan sa mga bata ang unsay ilang nakita diha sa mga hulagway, ug gamita ang mga hulagway ug mga bersikulo aron sa pagtabang kanila nga makakita kon unsay gipasabut nga mahimong miyembro sa Simbahan.
Mohimo kita og pakigsaad ngadto sa Dios sa panahon nga kita bunyagan.
Ang Dios makahimo sa akong mga palas-anon nga magaan.
Kanus-a gihimo sa Dios nga magaan ang imong mga palas-anon? Paghunahuna og mga paagi nga mapaambit nimo ang imong mga kasinatian ug pagpamatuod ngadto sa mga bata.
Posible nga mga Kalihokan
-
Tabangi ang mga bata sa paghunahuna og sayon nga mga aksyon nga ilang mahimo samtang imong isulti unsa ang nahitabo sa katawhan ni Alma diha sa Mosiah 24:8–17. Hisguti nga tungod kay si Alma mipili sa pagsunod sa mga pagtulun-an ni Abinadi mahitungod ni Jesus, siya ug ang iyang mga katawhan gitratar og dili maayo, apan wala gayud sila mohunong sa pagtuo kang Jesus.
-
Basaha ang Mosiah 24:14–15 ngadto sa mga bata. Pun-a ang usa ka bag sa bug-at nga mga butang (nga nagrepresentar sa mga palas-anon), ug dapita ang usa ka bata sa paggunit sa bag. Ipasabut nga kon kita naguol, nasakit, o adunay ubang mga problema, mabati kini nga daw nagdala og bug-at nga butang. Dapita ang mga bata nga magpuli-puli sa pagtabang sa bata sa pagdala sa bag aron mahimo kining gaan. Ipasabut nga ang Langitnong Amahan makahimo sa atong mga palas-anon nga mas gaan kon magtinguha kita sa Iyang tabang pinaagi sa pag-ampo, pagserbisyo sa uban, ug uban pa.
Itudlo ang Doktrina: Mas Dagko nga mga Bata
Sa panahon nga ako bunyagan, ako maghimo og pakigsaad uban sa Dios.
Unsaon nimo pagtabang ang mga bata nga imong gitudloan nga makasabut sa pakigsaad nga atong buhaton sa bunyag?
Posible nga mga Kalihokan
-
Hatagi ang matag bata og usa ka piraso sa papel. Dungan nga magbasa saa Mosiah 18:8–10, ug dapita ang mga bata sa pagsulat o pagdrowing diha sa usa ka bahin sa ilang papel sa mga saad nga atong gihimo sa bunyag ug, sa pikas nga bahin, ang mga panalangin nga gisaad kanato sa Langitnong Amahan. Ipaambit kanila diha sa klase ang unsay ilang makit-an. Samtang mopaambit sila, pangutana og sama niini: Unsaon nato sa “pagbangutan uban niadto nga nagbangutan”? Unsay ipasabut nga mahimong saksi sa Dios “diha sa tanan nga mga dapit”? (bersikulo 9). Unsay atong mahimo aron sa pagtuman sa atong mga pakigsaad?
-
Dapita ang mga bata nga nabunyagan na sa pagpaambit kon unsay ilang mahinumduman mahitungod sa ilang kasinatian. Unsa ang nakahimo nianang adlawa nga espesyal? Unsa ang ilang gibati? Ipasabut nga matag Dominggo gibag-o nila ang ilang pakigsaad sa bunyag kon moambit sila sa sakrament. Tabangi ang mga bata sa pagtandi sa pakigsaad sa bunyag nga gihulagway diha sa Mosiah 18:8–10 ngadto sa mga pag-ampo sa sakrament (tan-awa sa D&P 20:77, 79). Unsaon nato paghimo sa sakrament nga usa ka espesyal, matinahurong panahon, sama sa panahon sa atong bunyag?
-
Hangyoa ang usa ka bag-ong kinabig sa pagpaambit kon giunsa niya pagkakat-on mahitungod sa Simbahan ug unsa ang gibati nga nabunyagan. Tuguti nga mangutana ang mga bata, sama sa unsa ang nakatabang nianang tawhana nga gustong mohimo sa mga saad diha sa Mosiah 18:7–16.
Sakop ako sa Ang Simbahan ni Jesukristo sa mga Santos sa Ulahing mga Adlaw.
Unsaon nimo pagdasig ang mga bata nga magpasalamat sa mga panalangin sa pagkahimong mga miyembro sa Simbahan?
Posible nga mga Kalihokan
-
Dapita ang mga bata sa pagbasa sa Mosiah 18:17–28, nga mangita sa mga pagtulun-an sa Simbahan ni Kristo sa panahon ni Alma nga sama sa atong panahon. Isulat ang ilang mga tubag diha sa mga bloke o mga tasa, ug ipagamit kini sa mga bata sa paghimo og estraktura nga nagrepresentar sa Simbahan ni Jesukristo.
-
Kantaha uban sa mga bata o basaha ang mga pulong sa “Ang Simbahan ni Jesukristo” (Songbook sa mga Bata, 48), ug hangyoa ang mga bata sa pagpaminaw sa mga butang nga gisaad natong buhaton isip mga miyembro sa Simbahan. Tabangi sila sa paghunahuna og mga paagi nga makatuman sila niini nga mga saad.
Mosiah 21:1–5, 13–16; 22:1–11; 24:8–22
Ang Dios makahimo sa akong mga palas-anon nga magaan.
Ang istorya sa katawhan ni Alma makapakita sa mga bata nga usahay ang Dios motabang pinaagi sa paglig-on kanato aron makalahutay sa atong mga pagsulay imbis nga kuhaon kini. Unsaon nimo sa pagtabang kanila nga makakat-on gikan niini nga istorya?
Posible nga mga Kalihokan
-
Tabangi ang mga bata sa pag-ila sa importanting mga panghitabo gikan sa mga istorya sa katawhan ni Limhi diha sa Mosiah 21:1–5, 13–16; ug 22:1–11 ug sa katawhan ni Alma diha sa Mosiah 24:8–22. Dayon hangyoa ang matag bata sa pagdrowing sa usa niini nga mga panghitabo. Dapita ang mga bata sa pagbutang sa ilang mga drowing sa husto nga pagkahan-ay aron sa pagsaysay sa istorya. Samtang ila kining buhaton, hatagi og gibug-aton nga ang Dios mitabang sa mga tawo nga madaug ang ilang mga palas-anon.
-
Dapita ang mga bata sa pagbasa sa Mosiah 21:14–15 ug 24:13–14. Sa unsang paagi mitubag ang Ginoo sa mga pag-ampo sa katawhan ni Limhi ug sa katawhan ni Alma? Hangyoa ang mga bata sa pagpaambit og mga higayon sa dihang nag-ampo sila og panabang alang sa usa ka pagsulay ug ang Langitnong Amahan mitabang kanila, o ipaambit ang imong kaugalingong kasinatian.
Awhaga ang Pagkat-on diha sa Panimalay
Dapita ang mga bata sa pagpasabut ngadto sa laing tawo unsa ang ilang isaad o gisaad nga buhaton isip kabahin sa ilang pakigsaad sa bunyag.
Pagpalambo sa Atong Pagtudlo
Obserbari ang mga bata. Kon daw dili mahimutang ang mga bata, panahon na siguro nga mosulay og laing kalihokan o mohimo og mubo, matinahuron nga paglakaw. Sa laing bahin, kon miapil sila ug nagkat-on, ayaw pugsa sa pagpadayon aron lamang makahisgot og mas daghang materyal sa leksyon.