Si Alma nga Batan-on Nagsangyaw, ni Gary L. Kapp

Mayo 25–31

Mosiah 29–Alma 4

“Sila Makanunayon ug Dili Matarug”

Ang mga bata nga imong gitudloan daghan og makat-unan sa imong klase, apan mas daghan sila og makat-unan kon mopalambo sila og batasan nga magtuon sa mga kasulatan sa panimalay. Hunahunaa kon unsaon nimo sa pagdasig ug pagsuporta ang pagkat-on sa ebanghelyo diha sa panimalay.

Irekord ang Imong mga Impresyon

Dapita ang Pagpaambit

Dapita ang mga bata sa paglingkod sa salog nga magporma og lingin, ug pagpaligid og bola ngadto sa usa kanila. Hangyoa kana nga bata sa pagpaambit og usa ka butang nga bag-o lang niyang nakat-unan mahitungod sa ebanghelyo diha sa panimalay o sa Primary. Dayon dapita ang bata sa pagpaligid sa bola ngadto sa laing bata. Balik-balika kini hangtud nga ang matag bata makabaton og kahigayunan sa pagpaambit og usa ka butang.

Itudlo ang Doktrina: Mas Gagmay nga mga Bata

Alma 1:2–9, 26–30

Isip miyembro sa Simbahan, kinahanglang mohigugma ug moserbisyo ko sa uban.

Mahimong dili kaayo nimo sultihan ang mga bata mahitungod sa mga pagtulun-an ni Nehor, apan makaayo kanila nga masayud nga moserbisyo kita sa Simbahan tungod kay nahigugma kita sa uban, dili tungod kay gusto nato nga mahimong adunahan o inila.

Posible nga mga Kalihokan

• Ipaambit sa mga bata, sa yano nga mga pulong, ang istorya ni Alma ug ni Nehor (tan-awa sa Alma 1; “Kapitulo 20: Si Alma ug si Nehor,” Mga Sugilanon sa Ang Basahon ni Mormon, 54–55 ). Ipasabut og maayo nga bisan og ang mga sumusunod ni Nehor dili maayo sa mga miyembro sa Simbahan, daghan sa mga miyembro sa Simbahan ang nagpabiling mabination ug mahigugmaon.

• Basaha ang Alma 1:30 ngadto sa mga bata, ug tabangi sila nga makasabut nga ang katawhan sa Simbahan mipaambit sa unsay anaa kanila ngadto sa mga tawo nga nagkinahanglan og tabang. Tabangi ang mga bata sa paghunahuna sa mga butang nga mahimo nilang mapaambit ug sa mga tawo nga mapaambitan nila niini. Dapita ang mga bata sa pagdrowing og mga hulagway sa ilang mga plano.

• Dungan nga manganta sa awit mahitungod sa gugma ug serbisyo, sama sa “Pagkamabination Magagikan Kanako” (Songbook sa mga Bata, 83), ug tabangi ang mga bata sa paghunahuna og mga aksyon nga mobagay sa kanta.

Alma 2:28–30

Ang Dios motubag sa akong mga pag-ampo.

Sa dihang si Alma ug ang mga Nephite mibati og “hilabihan nga kahadlok” (Alma 2:23), nag-ampo sila alang sa panabang ug nalig-on. Tabangi ang mga bata nga makakat-on gikan sa ilang ehemplo.

Posible nga mga Kalihokan

• Gamit ang mga hulagway sa outline niini nga semana sa Dali, Sunod Kanako—Alang sa mga Indibidwal ug mga Pamilya o sa “Kapitulo 21: Ang mga Amlicite” (Mga Sugilanon sa Ang Basahon ni Mormon, 56–57 ), sultihi ang mga bata kon giunsa sa mga Nephite pagkabaton og kalig-on aron mabuntog ang mga Amlicite. Pangutan-a ang mga bata mahitungod sa mga butang nga makahadlok o lisud alang kanila, ug pagpamatuod nga mahimo silang mag-ampo sa Langitnong Amahan aron matabangan kabahin niini nga mga butang.

• Pagpaambit og kasinatian sa dihang ang Dios mitabang kanimo human ka nag-ampo ngadto Kaniya. Dapita ang mga bata sa pagpaambit sa ilang mga kasinatian kalabut sa pag-ampo.

Alma 4:19

Ang akong pagpamatuod makalig-on sa uban.

Kasagaran ang “lunsay nga pagpamatuod” (Alma 4:19) sa usa ka bata mahimong adunay kusog nga impluwensya sa uban. Unsaon nimo pagtabang ang mga bata nga makakita og mga paagi sa pagpaambit sa ilang mga pagpamatuod?

Posible nga mga Kalihokan

• Ablihi ang mga kasulatan ngadto sa Alma 4:19, ug ipasabut nga sa dihang nakita ni Alma unsa ka dautan ang mga tawo, nakahukom siya nga ang labing maayong paagi sa pagtabang kanila mao ang paghatag og “lunsay nga pagpamatuod” ngadto kanila. Gamita ang pahina sa kalihokan niini nga semana aron sa pagtudlo sa mga bata kon unsa ang pagpamatuod ug unsa ang nalakip niini. Awhaga sila sa pagpaambit sa ilang mga pagpamatuod.

• Pagbubu og limpyo nga tubig ngadto sa usa ka sihag [clear] nga baso, ug ipasabut nga ang tubig susama sa atong mga pagpamatuod tungod kay makahimo kita sa pagpaambit niini sa uban. Ibubu ang tubig sa baso ngadto sa gamay nga tasa alang sa matag bata, ug sultihi ang mga bata nga kon mopaambit kita sa atong mga pagpamatuod, makatabang kita sa uban nga makabaton usab og mas lig-on nga mga pagpamatuod.

• Kon ganahan ang mga bata, papraktisa sila sa paghatag sa ilang mga pagpamatuod. Pagsugyot og pipila ka mga paagi nga mapakita nila nga nasayud sila nga ang ebanghelyo tinuod, lakip ang pinaagi sa ilang mga binuhatan.

Itudlo ang Doktrina: Mas Dagko nga mga Bata

Alma 1:2–9

Makakat-on ako sa pag-ila sa sayop nga mga pagtulun-an.

Dunay panahon sa atong kinabuhi nga moatubang kita og mga tawo nga sama ni Nehor—kadtong mosulay sa paglingla kanato gamit ang mga mensahe nga nindot paminawon apan bakak ug makadaut. Ang pagpaambit sa istorya diha sa Alma 1:2–9 makatabang sa mga bata nga makapangandam sa ingon nga mga kasinatian sa ilang kinabuhi.

Posible nga mga Kalihokan

• Tabangi ang mga bata sa pagbasa sa Alma 1:2–4 aron sa pagribyu sa pipila ka mga butang nga gitudlo ni Nehor, usa ka mini nga magtutudlo. Tabangi sila sa paghimo og husto o sayop nga eksamin gamit ang mga pamahayag gikan niini nga mga bersikulo. Nganong itipon man usahay ni Satanas ang mga kamatuoran ngadto sa mga bakak? Tabangi ang mga bata nga makahunahuna og pipila ka mga ehemplo.

• Human dungan nga maribyu ang Alma 1:2–9 hangyoa ang matag bata sa pagbasa sa usa sa mosunod nga mga kasulatan: Mateo 7:21–23; 2 Nephi 26:29–31; Mosiah 18:24–26; ug Helaman 12:23–26. Sa unsang paagi kini nga mga kasulatan mipakita nga bakak ang mga pagtulun-an ni Nehor? Unsaon nato paggamit ang mga kasulatan aron sa paglig-on sa atong kaugalingong mga pagpamatuod sa ebanghelyo?

Alma 1:26–30; 4:6–13

Isip miyembro sa Simbahan, kinahanglang mohigugma ug moserbisyo ko sa uban.

Usahay mabination ug manggihatagon ang mga miyembro sa Simbahan sa panahon ni Alma, ug usahay ngil-ad ug mapahitas-on. Tabangi ang mga bata nga imong gitudloan nga makakat-on gikan sa ilang mga kasinatian.

Posible nga mga Kalihokan

• Tabangi ang mga bata sa pagbasa sa Alma 4:6–13, ug ipasabut ang mga pulong nga sama sa “pagkamabiay-biayon,” “pagpanggukod,” ug “[pagtamay]” (paggamit og diksyonaryo kon gikinahanglan). Unsa ang atong bation kon ang mga tawo motratar kanato niini nga mga paagi? Dapita ang mga bata sa pagpangita og mga pulong sa Alma 1:26–30 nga naghulagway kon sa unsang paagi gusto sa Langitnong Amahan nga motratar kita sa usag usa.

• Hangyoa ang mga bata sa pagbasa sa Alma 1:27, 30 ug paghimo og lista sa mga matang sa tawo nga natabangan sa mga miyembro sa Simbahan. Dapita ang mga bata sa paghunahuna og mga tawo diha sa ilang kasilinganan o mga eskwelahan kinsa tingali “nagkinahanglan” (Alma 1:30) sa ilang gugma ug tabang. Aron mapalig-on kini nga baruganan, kantaha og dungan ang awit mahitungod sa pagkamabination, sama sa “Mouban Ko Nimo” (Songbook sa mga Bata, 78–79).

Alma 4:8–20

Ang akong pagpamatuod makalig-on sa uban.

Gibiyaan ni Alma ang iyang katungdanan isip labaw nga maghuhukom aron makagahin siya og mas dakong panahon sa pagpaambit sa iyang pagpamatuod ug sa pagtabang sa mga tawo nga maghinulsol. Ang iyang ehemplo lagmit makadasig sa mga bata nga mas kanunay nga mopaambit sa ilang mga pagpamatuod.

Posible nga mga Kalihokan

• Basaha ang Alma 4:8–12, 15 uban sa mga bata, ug hangyoa sila sa pag-ila sa mga problema nga nahitabo diha sa Simbahan, sumala sa gihulagway niini nga mga bersikulo. Dapita ang mga bata sa pagsugyot og pipila ka butang nga mahimong buhaton ni Alma aron sa pagsulbad niini nga mga problema. Tabangi sila sa pagpangita, diha sa Alma 4:16–20, kon unsa ang desisyon ni Alma nga buhaton. Nganong gamhanan man kaayo ang pagpamatuod?

• Aron matabangan ang mga bata nga makasabut unsa ang pagpamatuod ug unsa ang nalakip niini, kantaha ang usa ka awit mahitungod sa hilisgutan o gamita ang pahina sa kalihokan niini nga semana. Hangyoa ang mga bata sa pagpaambit sa unsay ilang nahibaloan mahitungod sa mga pagpamatuod gikan niini nga mga kapanguhaan.

Awhaga ang Pagkat-on diha sa Panimalay

Tabangi ang mga bata nga makahunahuna og tawo nga mahimo nilang mapaambitan sa ilang mga pagpamatuod sunod semana. Awhaga sila sa pagsulat og plano nga magtabang kanila sa pagkab-ot sa ilang tumong.

Pagpalambo sa Atong Pagtudlo

Pangutana og mga pangutana nga makadapit og pagpamatuod. “Ang pagpangutana og mga pangutana nga makaawhag sa mga tigkat-on sa pagpamatuod kabahin sa mga baruganan nga gitudlo mahimong usa ka gamhanan nga paagi sa pagdapit sa Espiritu” (Pagtudlo sumala sa Pamaagi sa Manluluwas, 32). Aron sa pagdapit sa mga bata sa paghatag og pagpamatuod, pangutana og mga pangutana nga makaaghat kanila sa paghunahuna ug sa pagpaambit sa unsay ilang gibati mahitungod sa Manluluwas o sa Iyang ebanghelyo. Mahimo ka usab nga mangutana mahitungod sa ilang mga kasinatian kalabut sa pag-ampo, pagserbisyo, mga ordinansa sama sa bunyag, o sa pagbati sa impluwensya sa Espiritu Santo.