“Mayo 25–31. Mosiah 29–Alma 4: ‘Sila Makanunayon ug Dili Matarug,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Mayo 25–31. Mosiah 29–Alma 4,” Dali, Sunod Kanako—Alang sa mga Indibidwal ug mga Pamilya: 2020
Alma ang Batan-on Nagsangyaw, ni Gary L. Kapp
Mayo 25–31
Mosiah 29–Alma 4
“Sila Makanunayon ug Dili Matarug”
Ang pagbasa sa mga kasulatan nagdapit og pagpadayag. Hangpa ang mga mensahe nga gusto sa Ginoo nga ihatag kanimo.
Irekord ang Imong mga Impresyon
Ang pipila tingali nagtan-aw sa sugyot ni Haring Mosiah nga pulihan ang mga hari og pinili nga mga maghuhukom ingon nga maalamon nga politikanhong reporma. Apan ngadto sa mga Nephite, ilabi na niadtong kinsa nagpuyo ubos sa dautan nga Haring Noah, kini nga kausaban adunay espirituhanong pagkaimportante usab. Nakita nila kon sa unsa nga paagi nga ang dili matarung nga hari nakaingon sa “kadautan” ug “dako nga kalaglagan” sa iyang katawhan (Mosiah 29:17), ug sila “hilabihan ka mahingawaon” nga mahimong gawasnon gikan sa maong impluwensya. Kini nga kausaban makatugot nila nga mahimong responsable alang sa ilang kaugalingong pagkamatarung ug “pagtubag sa [ilang] kaugalingong mga sala” (Mosiah 29:38; tan-awa usab sa D&P 101:78).
Dayag lang, ang katapusan sa paghari sa mga hari wala magpasabut sa katapusan sa mga problema sa katilingban nga Nephite. Ang malimbungon nga mga tawo sama nila ni Nehor ug Amlici mipasiugda og mini nga mga ideya, ang dili mga tumutuo migukod sa mga Santos, ug daghang mga miyembro sa Simbahan nahimong mapagarbuhon ug mibiya. Apan “ang mapainubsanong mga sumusunod sa Dios” nagpabilin nga “makanunayon ug dili matarug” bisan unsa pay nahitabo sa ilang palibut (Alma 1:25). Ug tungod sa kausaban nga gipasiugdahan ni Mosiah, sila makahimo sa “paghatag sa ilang mga tingog” sa pag-impluwensya sa ilang katilingban alang sa kaayohan (Alma 2:6).
Mga Ideya alang sa Personal nga Pagtuon sa Kasulatan
Ako mahimong positibo nga impluwensya sa akong komunidad.
Mga lima lang ka tuig sa paghari sa mga maghuhukom, usa ka krisis ang miabut nga mosulay sa pamahayag ni Mosiah nga ang tingog sa katawhan sa kasagaran mopili unsay matarung (tan-awa sa Mosiah 29:26). Ang isyu naglakip sa relihiyoso nga kagawasan: usa ka tawo nga ginganlan og Amlici nagtinguha nga “mohikaw [sa katawhan] sa ilang mga katungod ug mga kahigayunan sa simbahan” (Alma 2:4). Nakamatikod ba ikaw sa relihiyoso nga mga katungod nga gihulga sa imong nasud o komunidad? Unsay imong makat-unan sa paagi nga gitubag sa mga Nephite niini nga hulga? (tan-awa sa Alma 2:1–7).
Adunay daghang mga isyu nga giatubang sa imong komunidad. Unsaon nimo, sama sa mga Nephite, pagsiguro nga ang imong tingog maapil “sa tingog sa katawhan”? Tingali ikaw nagpuyo sa usa ka dapit diin ang tingog sa katawhan adunay limitado nga impluwensya sa gobyerno; kon mao aduna bay laing mga paagi nga ikaw positibong makaimpluwensya sa imong komunidad?
Ako makaila ug makasalikway sa mini nga doktrina.
Bisan og si Nehor sa katapusan mikumpisal nga unsay iyang gitudlo bakak, ang iyang mga pagtulun-an nagpadayon sa pag-impluwensya sa mga Nephite sulod sa daghang katuigan (tan-awa sa Alma 1:15–16; 2:1–2; 14:14–18; 15:15; 21:4; 24:28). Ngano kaha nga ang mga tawo nakakita nga makadani ang mga pagtulun-an ni Nehor? Samtang magbasa ka sa Alma 1:2–4, tan-awa kon imo bang makit-an ang pagkabakak sa mga pagtulun-an ni Nehor; tingali makamatikod ka nga kini gitudlo dungan sa parsyal nga mga kamatuoran.
Si Gideon mibatok ni Nehor “uban sa mga pulong sa Dios” (Alma 1:7, 9). Makahunahuna ba ikaw og mga kasulatan nga misupak sa mga bakak ni Nehor? Ania ang pipila ka mga ehemplo, apan adunay daghan pa: Mateo 7:21–23; 2 Nephi 26:29–31; Mosiah 18:24–26; ug Helaman 12:25–26. Sa unsa nga paagi nga kini nga mga kasulatan makatabang nimo sa pagsupak sa mga bakak nga gitudlo karon?
Laing paagi sa paghimo sa imong pagtuon sa Alma 1 mao ang pagtandi ni Nehor ug sa iyang mga sumusunod (mga bersikulo 3–9, 16–20) uban “sa mga katawhan sa Dios” (mga bersikulo 25–30; tan-awa usab sa 2 Nephi 26:29–31). Unsaon nimo nga mas mahisama sa katawhan sa Dios? Nakamatikod ba ikaw sa bisan unsa nga “pagpanapi sa pari” sa imong kaugalingon nga pag-alagad?
Ang tinuod nga mga disipulo ni Jesukristo dili mopahimutang sa ilang mga kasingkasing diha sa mga katigayunan.
Mga Kapitulo 1 ug 4 sa Alma kining duha naghulagway sa mga panahon sa dihang ang Simbahan miuswag, apan ang mga miyembro sa Simbahan mitubag niana nga pag-uswag sa lahi nga paagi sa matag sitwasyon. Unsa man ang mga kalainan nga imong namatikdan? Base sa unsay imong nakita, unsaon nimo sa paghulagway ang kinaiya sa “mapainubsanon nga mga sumusunod sa Dios” (Alma 4:15) bahin sa mga katigayunan ug kauswagan? Unsay imong gibati nga nadasig nga usbon sa imong kaugalingong kinaiya?
Ang “pulong sa Dios” ug ang “putli ga pagpamatuod” makausab og mga kasingkasing.
Unsay nakaingon nga si Alma “hilabihan nga pagkaguol” (Alma 4:15) sa Alma 4? Ang uban tingali moingon nga ang katungdanan sa labaw nga maghuhukom makapahimutang unta ni Alma sa labing maayong posisyon sa pagsulbad sa mga problema nga iyang nakita sa iyang katawhan. Apan si Alma mibati nga adunay mas maayong paagi. Unsay nakapadani nimo mahitungod sa iyang paagi sa pagtabang sa iyang katawhan? Ang imong pagtuon mahimong makadasig og mga hunahuna mahitungod kon unsaon nimo sa matarung nga paagi nga makaimpluwensya niadtong anaa sa imong palibut; kon mao, buhata kadto nga mga hunahuna.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka ideya.
Alma 1:19–25
Ang imong pamilya tingali makabenepisyo sa pag-ila sa lain-laing mga paagi sa pagtubag sa mga miyembro sa Simbahan sa pagpanggukod niini nga mga bersikulo. Tingali makabansay ka og mga paagi sa pagtubag sa tukma kon ang uban moataki sa atong mga pagtuo. Ang video sa ChurchofJesusChrist.org/religious-freedom/examples tingali makatabang.
Alma 3:4
Unsa nga mensahe ang gusto sa mga Amlicite nga isulti sa dihang sila “nagbutang [og] timaan sa ilang mga kaugalingon”? (tan-awa sa Alma 3:4, 13). Unsa nga mga mensahe ang atong gipadala—sa tinuyo o sa dili tinuyo nga paagi—uban sa atong panagway? Tingali usa kini ka maayong panahon sa pagribyu “Sinina ug Panagway” sa Alang sa Kalig-on sa Kabatan-onan (2011), 6–8.
Alma 4:2–3
Unsa nga mga butang o mga kasinatian ang “na[kapa]higmata [kanato] sa usa ka panumduman sa [atong] katungdanan” ngadto sa Dios? (Alma 4:3). Tingali epektibo ang pagpakigbahin niini nga mga bersikulo human makamata ang imong pamilya inig ka buntag. Dayon mahimo nimong hisgutan sa unsa nga paagi nga ang mga hagit sa pagmata sa pisikal nga paagi makatabang nato nga makasabut sa mga hagit sa pagmata sa espirituhanong paagi.
Alma 4:10–11
Sa unsa nga paagi nga kita makalikay nga mahimong usa ka “babag niadtong kinsa dili sakop sa simbahan”? (Alma 4:10). Tingali mapuslanon usab ang paghisgot mahitungod kon unsaon nato pagsiguro sa aksyon sa uban, ilabi na sa isig ka miyembro sa Simbahan, nga dili mahimong mga babag alang sa atong espirituhanong kalamboan.
Alma 4:19
Aron matabangan ang imong pamilya nga makasabut sa gahum sa pagpamatuod, mahimo nimong hangyoon sila sa paghunahuna sa usa ka panahon sa dihang nakadungog sa pagpamatuod sa usa ka tawo nga nakaapekto kanila pag-ayo. Ngano kaha nga si Alma mipili sa paggamit sa pagpamatuod ug sa pulong sa Dios sa pagtandog sa mga kasingkasing sa katawhan? (tan-awa usab sa Alma 31:5). Ngano nga kini mas epektibo kay sa ubang mga paagi nga tingali gigamit sa mga tawo sa pagdani sa uban nga mag-usab? Aduna bay mga tawo kansang pagtuo nga atong malig-on pinaagi sa pagpakigbahin sa atong mga pagpamatuod uban kanila?
Alang sa dugang nga mga ideya sa pagtudlo sa mga bata, tan-awa kini nga latid [outline] karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Ipahisama ang mga kasulatan nganha sa imong kaugalingon. Ikonsiderar sa unsa nga paagi nga ang mga istorya ug mga pagtulun-an sa mga kasulatan magamit sa imong kinabuhi. Sama pananglit, mahimong makakita ka og kapareha tali sa kalibutan karon ug ang mga problema sa katilingban nga giatubang sa mga Nephite sa Alma 1–4.
Alma ug Amlici, ni Scott M. Snow