“Hunyo 1–7. Alma 5–7: ‘Kamo Nakasinati ba Niining Dako nga Kausaban diha sa Inyong mga Kasingkasing?’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Hunyo 1–7. Alma 5–7,” Dali, Sunod Kanako—Alang sa mga Indibidwal ug mga Pamilya: 2020
Wala Kamo Kalimti, ni Jon McNaughton
Hunyo 1–7
Alma 5–7
“Kamo Nakasinati ba Niining Dako nga Kausaban diha sa Inyong mga Kasingkasing?”
Ang Alma 5–7 makatabang kanimo sa pagpamalandong sa imong padayon nga pagkakabig diha kang Jesukristo. Samtang magbasa ka, irekord unsay gitudlo sa Espiritu kanimo.
Irekord ang Imong mga Impresyon
Si Alma walay nahibaloan mahitungod sa makaluwas sa kinabuhi karon nga mga pag-opera sa pag-ilis og kasingkasing, nga pulihan ang nadaot o masakitong kasingkasing og usa ka maayong kasingkasing. Apan nahibalo siya mahitungod sa mas milagrusong “kausaban sa kasingkasing” (Alma 5:26)—diin sa usa ang Manluluwas mihatag kanato og pagkabag-o sa espirituhanong kinabuhi, sama sa “pagkatawo pag-usab” (tan-awa sa Alma 5:14, 49). Nakita ni Alma nga kining kausaban sa kasingkasing mao gayud ang gikinahanglan sa daghan nga mga Nephite. Ang uban mga dato ug ang uban pobre, ang uban garbuso ug ang uban mapainubsanon, ang uban tigpanglutos ug ang uban gisakit pinaagi sa pagpanglutos (tan-awa sa Alma 4:6–15). Apan silang tanan kinahanglan nga moduol ngadto kang Jesukristo aron mamaayo—sama sa gikinahanglan natong tanan. Nagtinguha man kita sa pagbuntog sa garbo o sa paglahutay sa mga kasakit, ang mensahe ni Alma pareha ra gihapon: “Duol ug ayaw kahadlok” (Alma 7:15). Tuguti nga ang Manluluwas mousab sa tig-a, makasasala, o nasamdang kasingkasing ngadto sa usa ka mapainubsanon, putli, ug bag-o.
Mga Ideya alang sa Personal nga Pagtuon sa Kasulatan
Kinahanglan akong makasinati—ug magpadayon sa pagbati—og dako nga kausaban sa kasingkasing.
Ang makapahinuklog nga mga pangutana ni Alma ngadto sa mga tawo sa Zarahemla, nga makita diha sa Alma 5:14–33, makatabang nimo sa pagsiksik sa imong kaugalingong kalag ug pagsabut sa unsay ipasabut sa pagsinati og “dako nga kausaban sa kasingkasing” sa imong tibuok kinabuhi. Si Presidente M. Russell Ballard mipasabut sa bili niini nga mga pangutana: “Kinahanglan akong kanunay nga mangutana sa akong kaugalingon, ‘Kumusta na man ko?’ Sama kini sa pagbaton og personal, pribado nga interbyu sa inyong kaugalingon. … Isip giya alang nako atol niining pribado, personal nga pagribyu, gusto nakong basahon ug pamalandungon ang makapahinuklog nga mga pulong nga makita diha sa ikalimang kapitulo sa Alma” (“Mobalik ug Modawat,” Liahona, Mayo 2017, 64).
Ikonsiderar ang pagbasa sa mga pangutana ni Alma nga sama og nag-interbyu ka sa imong kaugalingon ug nagsusi sa imong kasingkasing. Mahimo nimong irekord ang imong mga tubag sa mga pangutana. Unsay gibati nimong nakadasig nga buhaton isip resulta sa imong interbyu?
Tan-awa usab sa Dale G. Renlund, “Pagpatunhay sa Dako og Kausaban nga Kasingkasing, Liahona, Nob. 2009, 97–99.
Ang matag disipulo ni Kristo kinahanglang makasinati og “kausaban sa kasingkasing.”
Makaangkon ako ug kaugalingon nakong pagsaksi sa Manluluwas ug sa Iyang ebanghelyo pinaagi sa Espiritu Santo.
Si Alma mihatag og makaimpluwensya nga pagpamatuod bahin sa Manluluwas ug sa Iyang ebanghelyo, ug gipasabut usab niya kon giunsa niya sa pag-angkon niana nga pagpamatuod. Samtang nagpamatuod siya, wala niya hisguti ang iyang kasinatian mahitungod sa pagkakita ug pagkadungog og usa ka anghel (tan-awa sa Mosiah 27:10–17) apan mihulagway sa kantidad nga iyang gibayad aron mahibalo sa kamatuoran alang sa iyang kaugalingon. Unsay imong nakat-unan gikan sa Alma 5:44–51 kon sa unsang paagi nahibaloan ni Alma ang kamatuoran? Unsaon nimo sa pagsunod ang iyang ehemplo sa imong mga paningkamot nga makaangkon o makapalig-on sa imong pagpamatuod? Unsay imong nakat-unan mahitungod sa Manluluwas gikan sa mga pagtulun-an ni Alma diha sa Alma 5:33–35, 48–50, ug 57–60?
Ang makugihon nga pagtuman makatabang nako nga magpabilin sa “dalan nga padulong sa gingharian sa Dios.”
Ang katawhan sa Gideon wala mag-antus sa samang kalisud sa katawhan sa Zarahemla, mao nga ang Espiritu mitabang ni Alma nga makasabut sa ilang mga panginahanglan ug mitudlo kanila sa lahi nga paagi (tan-awa sa Alma 7:17, 26). Tingali makamatikod ka og pipila ka kalainan tali sa mga mensahe ni Alma sa Zarahemla (tan-awa sa Alma 5) ug sa Gideon. Sama pananglit, nasabtan ni Alma nga ang katawhan sa Gideon anaa “sa dalan nga padulong sa gingharian sa Dios” (Alma 7:19). Sa kinatibuk-an niyang wali kanila, gitudloan sila ni Alma og daghan nga butang kon unsaon sa pagpabilin niana nga dalan (tan-awa sa Alma 7). Unsa nga tambag ang iyang gihatag kanila? Unsa ang mahimo nimong gamiton sa imong kinabuhi karon?
Giangkon sa Manluluwas diha sa Iyang Kaugalingon ang akong mga sala, mga pag-antus, ug mga kasakitan.
Nakasulay ka na bang mibati nga walay bisan usa nga nakasabut sa imong mga giantus o mga hagit? Kon mao, ang mga kamatuoran nga gitudlo sa Alma 7:7–16 makatabang. Si Elder David A. Bednar mipamatuod: “Ang Anak sa Dios hingpit nga nakahibalo ug nakasabut, kay Iyang nabati ug napas-an ang atong indibidwal nga mga alantuson. Ug tungod sa Iyang walay katapusan ug mahangturong sakripisyo (tan-awa sa Alma 34:14), Siya adunay hingpit nga pagsabut ug makalugway ngari kanato sa Iyang bukton sa kalooy.” (““Makadaug sa Ilang mga Alantuson uban sa Kasayon,” Liahona, Mayo 2014, 90).
Samtang magbasa ka sa Alma 7:7–16, pamalandungi unsay ikatabang niini nga mga bersikulo kanato aron masabtan ang mahitungod sa mga katuyoan sa pagsakripisyo sa Manluluwas. Unsaon nato sa paggamit ang Iyang gahum sa atong kinabuhi? Ikonsiderar ang pagrekord sa imong mga hunahuna.
Tan-awa usab sa Isaias 53:3–5.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang ipasabut og maayo ug hisgutan aron matubag ang mga panginahanglan sa imong pamilya. Ania ang pipila ka mga ideya.
Alma 5:6–13
Ngano nga gusto ni Alma nga ang iyang katawhan mahinumdom sa kamanggiloy-on sa Ginoo ngadto sa ilang mga katigulangan? Unsa nga mga istorya gikan sa imong family history ang nagtudlo kanimo mahitungod sa Iyang kamanggiloy-on? Tingali mahimo nimong bisitahan ang familysearch.org/myfamily sa pagrekord niini nga mga istorya.
Alma 5:14–33
Ang mga sakop sa imong pamilya tingali nakahibalo unsay bation sa nakapangandam—o wala makapangandam—alang sa kamping, sa usa ka eksamin sa eskwelahan, o sa usa ka interbyu sa trabaho. Unsang bag-o nga mga kasinatian ang ilang ikapaambit aron mahulagway ang kaimportante sa pagkaandam? Mahimo nimong dapiton ang mga sakop sa pamilya sa pagribyu sa Alma 5:14–33 ug pagpangita sa mga pangutana nga gihangyo ni Alma nga andamon sa iyang katawhan sa pagsugat sa Dios. Tingali ang matag sakop sa pamilya makapili og usa ka pangutana ug mopaambit kon sa unsang paagi kini makatabang kanato sa pagpangandam sa pagsugat sa Dios. Ang imong pamilya mahimo usab nga mag-display sa pipila ka mga gipangutana ni Alma diha libut sa imong panimalay aron mapamalandungan sa pamilya.
Alma 6:4–6
Unsa ang pipila ka mga rason nga kita nagpundok isip mga Santos? Unsay atong himoon aron ang atong panahon sa simbahan mas makatabang sa atong kaugalingon ug sa uban?
Alma 7:9–16
Unsa man ang atong nakat-unan niini nga mga bersikulo nga makatabang nato nga “[dili mahadlok]” (Alma 7:15) kon kita magkinahanglan nga maghinulsol ug mag-usab? Unsay gitudlo niini nga mga bersikulo kanato mahitungod sa pagduol ngadto sa Manluluwas kon kita nagkinahanglan og tabang? Unsa ang ubang butang nga atong nahimo aron makadawat sa Iyang tabang? Sa unsang paagi Siya mitabang kanato?
Alma 7:23
Kinsay atong nailhan nga usa ka maayong ehemplo sa usa o sa daghang mga hiyas nga nalista niini nga bersikulo? Nganong importante ang pagpalambo niini nga mga hiyas?
Alang sa dugang nga mga ideya sa pagtudlo sa mga bata, tan-awa sa latid [outline] karong semanaha sa Dali, Sunod Kanako—Alang sa Primary.
Pagpalambo sa Atong Pagtudlo
Pangutan-a og mga pangutana nga makadapit sa mga sakop sa pamilya sa paglihok. Ikonsiderar ang mga pangutana nga nag-aghat sa mga sakop sa imong pamilya sa pagpamalandong kon sa unsang paagi mas hingpit nilang masunod ang ebanghelyo. “Sa kasagaran dili kini mga pangutana nga pagahisgutan; alang lamang sa personal nga pagpamalandong” (Pagtudlo sumala sa Pamaagi sa Manluluwas, 31).
Atong Manlalaban, ni Jay Bryant Ward