“Hunyo 1–7. Alma 5–7: ‘Kamo Nakasinati ba Niining Dako nga Kausaban diha sa Inyong mga Kasingkasing?’” Dali, Sunod Kanako—Alang sa Primary: Basahon ni Mormon 2020 (2020)
“Hunyo 1–7. “Kamo Nakasinati ba Niining Dako nga Kausaban sa Inyong mga Kasingkasing?,” Dali, Sunod Kanako—Alang sa Primary: 2020
Wala Kamo Kalimti, ni Jon McNaughton
Hunyo 1–7
Alma 5–7
“Kamo Nakasinati ba Niining Dako nga Kausaban diha sa Inyong mga Kasingkasing?”
Mainampoong ikonsiderar ang mga baruganan diha sa Alma 5–7 nga gibati nimo nga labing mahinungdanon ngadto sa mga bata nga imong gitudloan.
Irekord ang Imong mga Impresyon
Dapita ang Pagpaambit
Dapita ang mga bata sa pagpaambit kon unsa ang ilang nahinumduman nga nakat-unan mahitungod ni Alma nga Batan-on pipila lang ka semana ang milabay. Ipasabut nga human nakabig si Alma, gitudloan niya ang mga tawo og importanting mga butang mahitungod sa ebanghelyo. Sultihi ang mga bata sa pagpaambit sa ilang nahibaloan mahitungod sa mga butang nga iyang gitudlo.
Itudlo ang Doktrina: Mas Gagmay nga mga Bata
Makaangkon ko og akong kaugalingong pagpamatuod pinaagi sa Espiritu Santo.
Ang mga bata nga imong gitudloan makapalambo sa ilang kaugalingong lig-on nga mga pagpamatuod, bisan kon batan-on pa sila.
Posible nga mga Kalihokan
-
Paggamit og hulagway ni Alma nga Batan-on (tan-awa sa Libro sa mga Hulagway sa Ebanghelyo, nu. 77) sa pagribyu sa istorya sa anghel nga mibisita kaniya (tan-awa sa Mosiah 27). Dayon hangyoa ang mga bata sa paghulagway kon unsa ang pagpamatuod, ug tabangi sila kon gikinahanglan. Ipasabut nga si Alma naningkamot nga makaangkon og pagpamatuod human ang anghel mibisita kaniya. Basaha sa hinay ang Alma 5:46 sa pipila ka higayon, ug dapita ang mga bata sa pagpaminaw kon unsa ang gibuhat ni Alma ug giunsa niya pagkahibalo sa kamatuoran. (Tingali kinahanglan nimong ipasabut nga ang pagpuasa nagpasabut nga dili mokaon ug moinom.)
-
Pagpakita og mga hulagway sa mga butang nga hinay nga motubo ug nagkinahanglan og kanunay nga pag-atiman, sama sa usa ka tanom o gamay pa nga hayop. Hangyoa ang mga bata sa pagpaambit kon unsaon nato sa pag-atiman niini nga mga butang ug sa pagtabang kanila nga motubo. Pahinumdumi sila nga kinahanglan usab nga atimanon nato kanunay ang atong mga pagpamatuod.
-
Paggamit og walay sulod nga balloon aron morepresentar sa usa ka pagpamatuod ug tayhupi kini og hangin matag higayon nga mopaambit ka og usa ka butang nga makatabang sa paglambo sa mga pagpamatuod. Higti ang balloon ug ipasa kini sa palibut, samtang hangyoon ang mga bata sa pagpaambit og usa ka butang nga ilang mabuhat aron sa pagtabang nga mapalambo ang ilang mga pagpamatuod. Dapita ang mga bata sa pagdrowing sa ilang mga kaugalingon nga nagbuhat og mga butang nga makapalig-on sa ilang mga pagpamatuod.
Kon modawat kita sa ebanghelyo, susama kini sa pagsugod og bag-ong kinabuhi.
Gidala sa Manluluwas diha sa Iyang kaugalingon ang akong mga sala, mga kasakit, ug mga kalisdanan.
Ang mga kamatuoran diha sa Alma 7:10–13 makatabang sa mga bata nga masayud nga si Jesukristo nagpangga kanila ug makatabang kanila.
Posible nga mga Kalihokan
-
Pakit-a ang mga bata og hulagway ni Jesus. Ipasabut nga Siya nasayud kon sama sa unsa ang masakitan, masubo, o mahadlok. Basaha ang pipila ka mga pulong sa Alma 7:11–13 nga naghulagway kon unsa ang giantus sa Manluluwas, ug ipasabut ang mga pulong nga tingali dili masabtan sa mga bata. Ipasabut nga si Jesus makatabang ug makahupay kanato kon kita maguol. Ipaambit kon sa unsang paagi ang Manluluwas mitabang ug mihupay kanimo.
-
Hangyoa ang mga bata sa pagpaambit og mga kasinatian sa dihang nasakit sila o nasakitan o adunay laing problema nga nakapaguol kanila. Ipaambit ang imong pagpamatuod nga ang Manluluwas miantus usab niadto nga mga butang ug nasayud kon unsaon sa pagtabang kanato.
Ang dalan pabalik ngadto sa Langitnong Amahan ug ni Jesukristo tul-id.
Unsaon nimo paggamit ang paghulagway ni Alma sa dalan pabalik ngadto sa Langitnong Amahan aron matabangan ang mga bata nga makat-on sa paghimo og maayo nga mga pagpili?
Posible nga mga Kalihokan
-
Basaha ang Alma 7:19 ngadto sa mga bata, ug ipasabut nga kon kita mohimo og maayong mga pagpili, anaa kita sa dalan pabalik ngadto sa Langitnong Amahan. Hatagi ang mga bata og nakahan-ay nga mga kapilian o mga aksyon (sama sa pagkadili mabination ngadto sa mga sakop sa pamilya o sa pagserbisyo kanila). Hangyoa sila sa pagsulti kanimo kon ang matag pagpili maayo ba ug mogiya pabalik sa Dios o kon kini dautan ba ug mogiya palayo Kaniya.
-
Basaha ang Alma 7:20 ug tabangi ang mga bata nga makasabut sa mga pulong niini nga mga bersikulo nga naghulagway sa dalan balik sa Dios. Pagdrowing diha sa pisara og usa ka tul-id nga dalan gikan kanato padulong sa Langitnong Amahan. Dayon pagdrowing og hiwi nga dalan nga naglakip og mga agianan nga walay lutsanan nga mopalayo sa Dios. Dapita ang mga bata sa pagsubay sa duha ka dalan gamit ang ilang mga tudlo. Hain nga dalan ang mas maayo? Tabangi sila sa paghunahuna og maayo nga mga pagpili nga makatabang kanila nga magpabilin sa tul-id nga dalan.
Itudlo ang Doktrina: Mas Dagko nga mga Bata
Alma 5:12–14, 27–28, 57; 7:14–24
Kinahanglang matawo ako pag-usab ug dayon mosunod sa dalan pabalik sa Dios.
Unsaon nimo pagtabang ang mga bata nga makasabut kon unsa ang kahulugan sa pagkatawo pag-usab?
Posible nga mga Kalihokan
-
Pakit-a ang mga bata og hulagway sa usa ka masuso, ug dapita sila sa paghisgut kon sama sa unsa ang masuso sa pagkahimugso niini. Dapita ang usa ka bata sa pagbasa sa Alma 5:14. Aron matabangan ang mga bata nga makasabut kon unsay kahulugan sa “espirituhanon nga paagi natawo … sa Dios,” hangyoa sila sa paghunahuna kon unsa si Alma nga Batan-on sa wala pa siya makabig. Sama sa unsa man siya human siya makabig? (Tan-awa ang Mosiah 27:23–32 ug Alma 36:12–24.) Ipasabut nga kon kita adunay hugot nga pagtuo kang Jesukristo ug mosunod sa Iyang ebanghelyo, susama kini sa pagsugod og bag-ong kinabuhi, sama sa usa ka masuso.
-
Basaha og dungan ang Alma 7:19, ug ipasabut nga human kita matawo pag-usab, kinahanglan kitang mosunod “sa dalan nga padulong sa gingharian sa Dios.” Pagtago og mga papel libut sa kwarto nga gisulatan sa mosunod nga mga pakisayran sa kasulatan: Alma 5:12–13, 27–28, 57; 7:14–16, 23–24. Dapita ang mga bata sa pagpangita sa mga papel, sa pagbasa sa mga kasulatan, ug sa pagpaambit sa unsay gitudlo sa matag kasulatan nga kinahanglan natong buhaton aron makabalik sa presensya sa Dios.
Makaangkon ko og akong kaugalingong pagpamatuod pinaagi sa Espiritu Santo.
Si Alma gibisitahan sa usa ka anghel, apan ang iyang pagpamatuod “gihimo nga mabutyag [kaniya] pinaagi sa Balaang Espiritu” (Alma 5:46).
Posible nga mga Kalihokan
-
Basaha uban sa mga bata ang Alma 5:44–46. Unsa ang gibuhat ni Alma aron makaangkon og iyang kaugalingong pagpamatuod sa ebanghelyo? Hatagi ang matag bata og piraso sa papel ug dapita sila sa paghimo og plano sa pagbuhat og usa ka butang karong semanaha sa paglig-on sa ilang mga pagpamatuod.
-
Ipasa ang usa ka salamin ug patan-awa ang mga bata sa ilang mga nawong diha sa salamin samtang imong basahon ang Alma 5:14. Unsa ang gipasabut sa pagbaton sa hitsura sa Manluluwas diha sa atong panagway? Pagpaambit og mga higayon sa dihang ang usa ka tawo misulti o mibuhat og usa ka butang nga nakapahinumdom nimo sa Manluluwas, ug hangyoa ang mga bata sa pagbuhat usab niini.
Gidala sa Manluluwas diha sa Iyang kaugalingon ang akong mga sala, mga kasakit, ug mga kalisdanan.
Samtang magtuon ka sa Alma 7, pamalandungi kon unsaon nimo paglig-on ang pagtuo sa mga bata diha ni Jesukristo aron modangup sila Kaniya sa panahon sa ilang mga pagsulay.
Posible nga mga Kalihokan
-
Dapita ang mga bata sa pagbasa sa Alma 7:11–13, nga mangita sa mga butang nga giantus ni Jesukristo. Tingali andam silang mopaambit og mga kasinatian sa dihang mibati sila og sakit, balatian, o kalisdanan. Sumala niini nga mga bersikulo, nganong andam man ang Manluluwas nga moantus niining tanan? (Ipasabut nga ang “pagtabang” mao ang “pag-abag.”)
-
Sultihi ang mga bata mahitungod sa usa ka sakit, samad, o uban pa nimong kasakit, ug pangutana kon mibati ba sila og susama niini. Dungan nga magbasa sa Alma 7:11–13, ug ipasabut kon unsa ang giantus ni Jesus alang kanato. Tabangi ang mga bata sa paghunahuna og mga sitwasyon sa dihang ang Manluluwas misinati niini nga mga butang, sama niadtong gitintal Siya (tan-awa sa Mateo 4:1–11) o sa dihang nag-antus Siya sa Getsemani. Sa unsang paagi makatabang ang pagkahibalo nga nakasabut si Jesus sa atong mga kalisdanan? Ipaambit ang imong pagpamatuod sa gahum ni Jesus sa paghupay, pagtabang, ug pag-ayo kanato.
Awhaga ang Pagkat-on diha sa Panimalay
Dapita ang mga bata sa pagbutang og hulagway ni Jesus sa usa ka dapit diin kanunay nila kining makita aron sa pagpahinumdom kanila sa unsay ilang nakat-unan mahitungod Kaniya karon.
Pagpalambo sa Atong Pagtudlo
Paglambo isip usa ka magtutudlo nga sama kang Kristo. Isip usa ka magtutudlo, importante nga mamalandong og mga paagi nga mahimo nimong mapalambo ang imong abilidad sa pagtabang sa mga bata nga mapalig-on ang ilang pagtuo sa Langitnong Amahan ug ni Jesukristo. Ikonsiderar ang paggamit sa mga pangutana sa personal nga pagtimbang-timbang diha sa pahina 37 sa Pagtudlo sumala sa Pamaagi sa Manluluwas.