“Hunyo 15–21. Alma 13–16: ‘Sulod ngadto sa Kapahulayan sa Ginoo,’” Dali, Sunod Kanako—Alang sa Primary: Basahon ni Mormon 2020 (2020)
“Hunyo 15–21. Alma 13–16,” Dali, Sunod Kanako—Alang sa Primary: 2020
Paghulagway ni Alma ug Amulek nga giluwas gikan sa bilanggoan, ni Andrew Bosley
Hunyo 15–21
Alma 13–16
“Sulod ngadto sa Kapahulayan sa Ginoo”
Makauban nimo ang mga bata sa imong klase sulod lamang sa mubo nga panahon matag semana. Mapanalanginan nimo pag-ayo ang ilang mga kinabuhi kon imo silang madasig sa pagpadayon sa pagkat-on gikan sa Basahon ni Mormon sa gawas sa klase—ilabi na uban sa ilang mga pamilya.
Irekord ang Imong mga Impresyon
Dapita ang Pagpaambit
Hatagi ang mga bata og mga oportunidad sa pagpaambit sa unsay nahibaloan na nila mahitungod sa mga istorya diha sa Alma 13–16. Aron sa pagtabang kanila, pagpakita og mga hulagway nga sama niadtong anaa sa Dali, Sunod Kanako—Alang sa mga Indibidwal ug mga Pamilya o “Kapitulo 22: Ang Misyon ni Alma ngadto sa Ammonihah” (Mga Sugilanon sa Basahon ni Mormon, 58–63).
Itudlo ang Doktrina: Mas Gagmay nga mga Bata
Ang pagkapari [priesthood] motabang kanako sa pagduol kang Kristo.
Pamalandungi sa mainampoong paagi kon unsay gikinahanglan nga masabtan sa mga bata sa imong klase gikan sa unsay gitudlo ni Alma mahitungod sa pagkapari niini nga mga bersikulo.
Posible nga mga Kalihokan
-
Hangyoa ang mga bata nga isulti og balik uban kanimo ang yano nga kahulugan sa pagkapari, sama sa “ang pagkapari mao ang gahum sa Dios.”
-
Ablihi ang mga kasulatan ngadto sa Alma 13:2, ug sultihi ang mga bata nga ang Dios mitawag og mga naghupot sa pagkapari “nga niana ang mga katawhan … magpaabut ngadto sa iyang Anak.” Aron mahulagway kon unsaon kini sa pagbuhat sa mga naghupot sa pagkapari [priesthood holder], pagpakita og mga hulagway sa mga paagi nga moserbisyo ang mga naghupot sa pagkapari (tan-awa sa Libro sa mga Hulagway sa Ebanghelyo, nu. 38–41, 103–9), ug dayon pagpaambit og mga istorya mahitungod sa mga paagi nga miserbisyo si Jesus (tan-awa sa Mateo 26:26–28; Marcos 5:22–24, 35–43).
-
Adto sa Alma 13:6, ug ipasabut nga ang mga naghupot sa priesthood “[motudlo sa] mga sugo [sa Dios] ngadto sa mga katawhan.” Tabangi ang mga bata sa paghunahuna og mga naghupot sa pagkapari nga ilang nailhan. Sa unsang paagi sila motudlo sa mga sugo? Dapita ang mga bata sa pagdrowing og hulagway sa usa ka naghupot sa pagkapari nga ilang kaila nga nagtudlo sa mga sugo sa Dios ngadto sa laing tawo.
Ang mga ordinansa sa pagkapari makatabang kanato nga modangup kang Jesukristo alang sa katubsanan.
Ang Langitnong Amahan molig-on kanako sumala sa akong pagtuo.
Ang istorya ni Alma ug Amulek nga giluwas gikan sa bilanggoan makadasig sa mga bata sa pagdangup ngadto sa Ginoo kon magkinahanglan sila og tabang.
Posible nga mga Kalihokan
-
Ipakita ang mga hulagway ni Alma ug Amulek sa pahina sa kalihokan niini nga semana samtang imong isaysay ang istorya sa Alma 14:18–29. Mahimo usab nimong gamiton ang “Kapitulo 22: Ang Misyon ni Alma ngadto sa Ammonihah” (Mga Sugilanon sa Basahon ni Mormon, 58–63). Papuli-puliha ang mga bata sa paggamit sa mga hulagway aron sa pagsaysay sa istorya. Hatagi og gibug-aton nga si Alma ug Amulek gihatagan og kusog aron makaikyas sa bilanggoan “sumala sa [ilang] hugot nga pagtuo nga anaa kang Kristo” (Alma 14:26).
-
Tabangi ang mga bata sa paghunahuna kon unsa kaha ang gibati ni Alma ug Amulek samtang anaa sa bilanggoan, ug dapita sila sa pag-aksyon niini nga mga pagbati (tan-awa ang bersikulo 22). Ipasabut nga si Alma nangayo og tabang sa Ginoo (tan-awa sa bersikulo 26). Ipamatuod nga ang Dios molig-on kanato kon mag-ampo kita uban sa pagtuo.
-
Gamita ang pahina sa kalihokan niini nga semana aron sa pagtudlo sa mga bata mahitungod sa pipila ka mga paagi nga lig-onon sa Dios kadtong adunay pagtuo. Samtang ang mga bata nagkolor sa pahina sa kalihokan, paghisgot og higayon sa diha nga ang Dios mihatag kanimo og kalig-on.
Mapanalanginan ko kon mosunod ko sa propeta.
Si Zoram, ang labaw nga kapitan sa kasundalohan sa mga Nephite, nasayud nga usa ka propeta si Alma ug nangayo sa iyang giya. Tungod niini, si Zoram nagmalampuson.
Posible nga mga Kalihokan
-
Ipaambit sa imong kaugalingong mga pulong ang istorya diha sa Alma 16:1–8. Hatagig gibug-aton nga tungod kay si Zoram ug ang kasundalohan sa mga Nephite misunod sa propeta nga si Alma, ang mga Nephite nakahimo sa pagluwas sa ilang mga higala kinsa gitanggong isip mga binilanggo sa mga Lamanite. Pagpaambit og kasinatian sa dihang napanalanginan ka tungod kay misunod ka sa propeta.
-
Pagpakita og hulagway sa Presidente sa Simbahan, ug pagpaambit og pipila ka butang nga gitudlo niya nga atong buhaton. Tabangi ang mga bata sa paghunahuna og mga paagi nga makasunod sila ni Jesus pinaagi sa pagbuhat sa unsay gitudlo sa Iyang propeta kanato.
-
Pagpakita og mga hulagway sa mga propeta (tan-awa sa Libro sa mga Hulagway sa Ebanghelyo, nu. 6–9, 14, 18, 26–27) samtang imong kantahon uban sa mga bata ang usa ka kanta mahitungod sa mga propeta, sama sa “Sunda ang Propeta” (Songbook sa mga Bata, 58–59). Hatagi og gibug-aton ang mga hugpong sa pulong diha sa kanta nga nagtudlo nganong kinahanglan kitang mosunod sa propeta.
Itudlo ang Doktrina: Mas Dagko nga mga Bata
Ang pagkapari [priesthood] motabang kanako sa pagduol kang Kristo.
Samtang imong basahon ang Alma 13:1–19, unsay imong nakita nga makapalambo sa imong ligdong nga pagtahud sa pagkapari? Unsay imong gibati nga angayng ipaambit sa mga bata nga imong gitudloan? Ang mosunod nga mga ideya malagmit makatabang.
Posible nga mga Kalihokan
-
Basaha uban sa mga bata ang Alma 13:10 ug 13, nga mangita sa mga kinaiya nga angayng batunan sa usa ka naghupot sa priesthood. Hangyoa sila sa paghunahuna og mga tawo nga ilang nailhan nga maayo nga mga ehemplo niini nga mga kinaiya.
-
Tabangi ang mga bata sa paghimo og lista sa mga ordinansa nga atong madawat pinaagi sa pagkapari (tan-awa sa “Ordinansa, Mga” sa Matinud-anon sa Tinuhoan, 116–17). Hangyoa ang usa ka bata sa pagbasa sa Alma 13:16. Sa unsang paagi kini nga mga ordinansa makatabang kanato nga “molantaw ngadto [kang Jesukristo] alang sa kapasayloan sa [atong] mga sala”?
-
Pangutan-a ang mga bata kon nahibalo ba sila sa unsang paagi nakuha sa Melchizedek nga Pagkapari ang ngalan niini. Tabangi sila sa pagpangita sa tubag diha sa Alma 13:14–19 ug Doktrina ug mga Pakigsaad 107:1–4. Unsa ang atong makat-unan gikan ni Melchizedek kon unsaon sa paggamit ang pagkapari?
Ang Langitnong Amahan molig-on kanako sumala sa akong pagtuo.
Si Alma ug Amulek nabilanggo sulod sa daghang mga adlaw sa wala pa sila gipalingkawas sa Ginoo. Kini nga istorya makatabang sa mga bata nga makat-on nga ang ilang mga pagsulay tingali walay dali o sayon nga mga solusyon, apan ang Ginoo molig-on kanila “sumala sa [ilang] hugot nga pagtuo” (Alma 14:26).
Posible nga mga Kalihokan
-
Pagsulat og mga pangutana diha sa pisara aron sa pagtabang sa mga bata sa pagpangita og mga detalye gikan sa Alma 14:18–29, sama sa Unsa ang gibuhat sa mga maghuhukom ngadto ni Alma ug Amulek diha sa bilanggoan? o Giunsa nila pagpakita ang ilang hugot nga pagtuo kang Jesukristo? Hatagi ang matag bata og usa ka bersikulo o duha aron basahon, nga mangita sa mga tubag sa mga pangutana.
-
Dapita ang mga bata sa pagdrowing og mga hulagway sa mga panghitabo gikan sa Alma 14:18–29, ug dayon ipagamit nila ang ilang mga hulagway aron sa pagsaysay sa istorya. Sa unsang paagi kita mamahimong sama kang Alma ug Amulek?
-
Pagpaambit og kasinatian diin mipakita ka og pagtuo sa Ginoo ug mihatag Siya kanimo og kalig-on sa pagbuntog o paglahutay sa usa ka pagsulay. Awhaga ang mga bata sa pagpaambit og susama nila nga mga kasinatian.
Ang ebanghelyo makausab og mga kasingkasing.
Aktibong gisupak ni Zeezrom si Alma ug Amulek sa sinugdanan, apan ang iyang kasingkasing natandog sa ilang mga pagpamatuod ug midasig kaniya sa paghinulsol. Samtang imong tun-an kini nga mga bersikulo, ikonsiderar kon sa unsang paagi ang kasinatian ni Zeezrom makadasig sa mga bata nga imong gitudloan.
Posible nga mga Kalihokan
-
Ribyuha uban sa mga bata ang ilang nakat-unan sa miaging semana kalabut ni Zeezrom. Basaha og dungan ang Alma 15:3–12 aron madiskubrehan kon sa unsang paagi siya nausab.
-
Dapita ang mga bata sa paghanduraw nga nahimamat nila si Zeezrom sa wala pa siya maghinulsol. Unsa ang ilang isulti aron matabangan siya nga motuo sa ebanghelyo? Mahimo nilang itandi ang unsay ilang isulti ngadto sa unsay gitudlo ni Alma ug Amulek kang Zeezrom (tan-awa sa Alma 11:40–46; 15:6–11). Nganong ang pagkahibalo niini nga mga kamatuoran makatabang sa usa ka tawo nga gustong mag-usab?
Awhaga ang Pagkat-on diha sa Panimalay
Dapita ang mga bata sa paghunahuna og usa ka butang nga ilang mabuhat karong semanaha aron sa pagpakita sa ilang pagtuo sa Ginoo. Awhaga sila sa pagpaambit sa ilang mga plano ug mga kasinatian ngadto sa ilang mga pamilya.
Pagpalambo sa Atong Pagtudlo
Pagkat-on sa pag-ila og pagpadayag. “Ang pagpadayag sa kasagaran moabut ‘pagtulun-an human sa usa ka pagtulun-an’ (2 Nephi 28:30), dili nga kausahon ra. … Samtang mamalandong ka kon sa unsang paagi ang mga baruganan sa ebanghelyo nga imong gitudlo mopanalangin sa mga sakop sa imong klase, ang mga ideya ug mga impresyon moabut sa kada adlaw sa imong kinabuhi—samtang mopadulong ka sa trabaho, magbuhat sa mga buluhaton sa balay, o makig-istorya sa pamilya ug mga higala” (Pagtudlo sumala sa Pamaagi sa Manluluwas, 12).