“Hunyo 22–28. Alma 17–22: ‘Ako Mohimo og usa ka Himan Kaninyo,’” Dali, Sunod Kanako—Alang sa Primary: Basahon ni Mormon 2020 (2020)
“Hunyo 22–28. Alma 17–22,” Dali, Sunod Kanako—Alang sa Primary: 2020
Si Ammon ug si Haring Lamoni, ni Scott M. Snow
Hunyo 22–28
Alma 17–22
“Ako Mohimo og usa ka Himan Kaninyo”
Sama nga si Lamoni ug ang uban niini nga istorya adunay espirituhanong kasinatian nga makapausab sa kinabuhi , sa mga bata nga imong gitudloan mahimong makabaton ug espirituhanong mga kasinatian sa mga kasulatan nga moimpluwensya sa ilang mga kinabuhi sa mga katuigan nga moabut. Timan-i kini samtang mamalandong ka unsaon nimo sila sa pagtudlo.
Irekord ang Imong mga Impresyon
Dapita ang Pagpaambit
Ipakita ang hulagway nga naglarawan og usa ka panghitabo diha sa Alma 17–22 (tan-awa ang outline niini nga semana sa Dali, Sunod Kanako—Alang sa mga Indibidwal ug mga Pamilya). Hangyoa ang mga bata sa pagsulti kanimo unsa ang ilang nakita diha sa hulagway.
Itudlo ang Doktrina: Mas Gagmay nga mga Bata
Mopakigbahin ko sa ebanghelyo sa ubang mga tawo.
Sa unsang paagi ang ehemplo sa mga anak nga lalaki ni Mosiah makadasig sa imong klase sa pagpaambit sa ilang mga pagpamatuod sa uban?
Posible nga mga Kalihokan
-
Tabangi ang mga bata sa pag-aksyon sa istorya ni Ammon diha sa Alma 17–19. Mahimo nimong gamiton ang “Kapitulo 23: Si Ammon: Usa ka Bantugan nga Sulugoon” (Mga Sugilanon sa Ang Basahon ni Mormon, 64–68). Kon sa imong hunahuna malingaw ang mga bata niini, pagdala og yano nga mga sinina ug mga butang. Sultihi ang mga bata unsay imong nakat-unan gikan sa istorya, ug dapita sila sa pagbuhat usab niini.
-
Pagpakita og usa ka instrumento o himan, ug sultihi ang mga bata kon unsa ang gamit niini. Unsa pa nga mga himan ang nahibaloan sa mga bata? Dapita sila nga magpakaaron-ingnon nga naggamit og himan. Ipasabut nga sama nga mogamit kita og mga instrumento o mga himan aron mahimo ang mga butang, ang Langitnong Amahan makagamit kanato sa paghimo sa Iyang buhat. Basaha ang Alma 17:11, ug ipasabut nga si Ammon ug ang iyang mga igsoong lalaki mao ang mga instrumento sa Langitnong Amahan sa pagtabang sa mga Lamanite nga makakat-on sa ebanghelyo.
-
Dapita ang mga bata nga modagan sa gibarugan ug magpakaaron-ingnon nga manuktok og mga pultahan samtang imong isaysay ang istorya ni Abish nga miadto sa kabalayan aron sultihan ang mga tawo mahitungod sa gahum sa Dios (tan-awa sa Alma 19:16–34). Tabangi ang mga bata sa paghunahuna og mga paagi nga mahimo silang sama kang Abish ug makapaambit sa ebanghelyo ngadto sa uban.
-
Dapita ang mga bata sa pagdrowing og hulagway sa ilang kaugalingon nga nagpaambit sa ebanghelyo ngadto sa usa ka tawo. Tabangi sila sa paghunahuna og piho nga mga butang nga mahimo nilang mapaambit. Manganta og dungan sa usa ka kanta mahitungod sa pagpaambit sa ebanghelyo, sama sa “Gusto Ko Karon nga Mamisyonaryo” (Songbook sa mga Bata, 90). Hatagi sila og oportunidad sa pagpaambit sa ilang mga pagbati mahitungod sa mga butang nga gitudlo ni Ammon.
Makatabang ko sa uban nga moduol kang Kristo pinaagi sa pagpakita sa akong gugma alang kanila.
Ang gugma ug pagserbisyo ni Ammon nakahumok sa mga kasingkasing ni Haring Lamoni ug sa iyang amahan. Unsa ang makat-unan sa mga bata gikan niini nga mga istorya?
Posible nga mga Kalihokan
-
I-summarize ang Alma 17:21–25 alang sa mga bata, nga maghatag og igong pagpasabut nga si Ammon gusto nga moserbisyo ni Lamoni. Dapita ang mga bata sa pagpaambit og mga kasinatian sa dihang miserbisyo sila og usa ka tawo. Pahinumdumi ang mga bata nga ang mahinungdanong pagserbisyo ni Ammon nakatabang ni Haring Lamoni nga gustong magkat-on sa ebanghelyo (tan-awa sa Alma 18:15–23). Dapita ang mga bata sa paghunahuna og usa ka tawo nga ilang maserbisyuhan karon, ug hisguti kon unsaon nila sa pagserbisyo kanang tawhana.
-
Sultihi ang mga bata sa istorya diha sa Alma 20:8–27. Mahimo nimong gamiton ang “Kapitulo 24: Si Ammon Nakatagbo sa Amahan ni Haring Lamoni” (Mga Sugilanon sa Ang Basahon ni Mormon, 69–70). Hangyoa ang mga bata sa paghunahuna og lain-laing mga aksyon nga ilang mabuhat sa matag higayon nga imong hisgutan si Ammon, Lamoni, o ang amahan ni Lamoni. Ipasabut nga usa ka rason nga nausab ang kasingkasing sa amahan ni Lamoni tungod kadto kay gihigugma pag-ayo ni Ammon si Lamoni. Dapita ang mga bata sa pagdrowing og hulagway sa usa ka butang nga ilang mahimo aron makapakita og gugma alang sa usa ka tawo.
Itudlo ang Doktrina: Mas Dagko nga mga Bata
Ang akong pagpamatuod motubo kon mobasa ko sa kasulatan, mag-ampo, ug magpuasa.
Ang mga anak nga lalaki ni Mosiah nahimong lig-on sa ebanghelyo ug nahimong gamhanan nga mga misyonaryo tungod kay makugihon silang nagtuon sa mga kasulatan, nag-ampo, ug nagpuasa. Kining samang mga butang makatabang usab sa mga bata nga imong gitudloan.
Posible nga mga Kalihokan
-
Pagdala sa klase og mga butang nga nagrepresentar sa mga kasulatan, pag-ampo, ug pagpuasa, sama sa usa ka hugpong sa mga kasulatan, usa ka hulagway sa tawo nga nag-ampo, ug usa ka hulagway sa pagkaon, ug ipasabut kon unsa ang girepresentar sa matag butang. Basaha ang Alma 17:1–4, ug pangutan-a ang mga bata kon sa unsang paagi kining mga butanga nakatabang sa mga anak nga lalaki ni Mosiah. Sa unsang paagi ang pagbasa sa mga kasulatan, pag-ampo, ug pagpuasa makatabang kanato nga mas mopaduol sa Langitnong Amahan?
-
Gamita ang indeks sa mga hilisgutan sa Songbook sa mga Bata aron matabangan ang mga bata sa pagpangita og mga kanta mahitungod sa pagtuon sa kasulatan ug pag-ampo. Kantaha og dungan ang pipila niini nga mga kanta, ug tabangi ang mga bata sa pagtino kon unsa ang gitudlo sa mga kanta kon sa unsang paagi kining mga butanga mopanalangin kanato.
Makatabang ko sa uban nga moduol kang Kristo pinaagi sa pagpakita sa akong gugma alang kanila.
Ang tinguha ni Ammon nga mahimong sulugoon ni Lamoni sa katapusan miresulta sa oportunidad nga matudloan si Lamoni sa dihang ang iyang kasingkasing bukas ug andam na nga modawat sa ebanghelyo.
Posible nga mga Kalihokan
-
Tabangi ang mga bata sa pagbasa sa mga bersikulo gikan sa Alma 17:21–39 nga nagsaysay sa istorya sa pagserbisyo ni Ammon kang Haring Lamoni. Dapita sila sa pagdrowing og mga hulagway sa mga tawo o mga panghitabo diha sa istorya ug dayon sa pagsaysay sa istorya sa ilang kaugalingong mga pulong. Tabangi ang mga bata nga makakita kon sa unsang paagi ang pagserbisyo ni Ammon nakaimpluwensya sa hari (tan-awa sa Alma 18:9–23). Unsay atong makat-unan gikan niini nga istorya kon unsaon sa pagtabang sa uban aron gustong makat-on pa mahitungod sa ebanghelyo?
ImaheSi Ammon nagluwas sa mga karnero sa hariMinerva K. Teichert (1888–1976), Si Ammon Nagluwas sa mga Karnero sa Hari, 1935–1945, lana diha sa masonite, 35 x 48 ka pulgada. Brigham Young University Museum of Art
-
Basaha ang Alma 22:1–3, ug hangyoa ang mga bata sa pagpaminaw kon sa unsang paagi ang maayo nga ehemplo ni Ammon nakaapekto sa amahan ni Haring Lamoni. Dapita sila sa paghunahuna og tawo nga ilang kaila kinsa kinahanglang mahibalo mahitungod sa ebanghelyo. Isugyot ngadto sa mga bata nga ang ilang gugma ug maayong ehemplo malagmit makatabang niining tawhana nga makakita unsa ka mahinungdanon ang ebanghelyo. Tabangi ang mga bata sa paghunahuna og mga paagi nga mahimo silang maayo nga mga ehemplo ug makapakita og gugma ngadto sa mga tawo nga ilang nahunahunaan.
-
Dapita ang full-time nga mga misyonaryo o bag-ong miuli nga misyonaryo sa pagpaambit sa istorya ni Ammon diha sa Alma 17–18. Hangyoa sila sa pagpaambit sa unsay ilang nakat-unan mahitungod sa misyonaryo nga buhat gikan ni Ammon ug sa unsang paagi ang pagserbisyo nakaapekto sa ilang mga paningkamot. Paghisgot sa mga bata og mga paagi nga makasunod sila sa ehemplo ni Ammon.
-
Isip usa ka klase, pagsulat diha sa pisara og lista sa mga butang nga mabuhat sa mga bata aron sa pagserbisyo sa mga sakop sa ilang pamilya. Sa unsang paagi ang paghimo niini nga mga buhat sa pagserbisyo mopanalangin sa tibuok pamilya?
Mopakigbahin ko sa ebanghelyo sa ubang mga tawo.
Unsaon nimo paggamit ang mga istorya niini nga mga bersikulo sa pagdasig sa mga bata nga mahimong mga misyonaryo nga sama ni Ammon ug ni Abish?
Posible nga mga Kalihokan
-
Pagpakita og mga hulagway nga nagrepresentar sa pipila sa mga kamatuoran nga gipaambit ni Ammon kang Haring Lamoni nga makita diha sa Alma 18:24–40 (tan-awa ang pahina sa kalihokan niini nga semana). Dapita ang mga bata nga magpakaaron-ingnon nga mga misyonaryo ug mopaambit sa unsay ilang nahibaloan mahitungod niini nga mga kamatuoran ngadto sa usag usa.
-
Basaha ang istorya ni Abish uban sa mga bata (tan-awa sa Alma 19:16–20, 28–29). Dapita ang mga bata nga magpuli-puli sa pagpakaaron-ingnon nga sama kang Abish pinaagi sa pagpanuktok sa pultahan sa klasehanan ug magpamatuod sa unsay nahitabo diha sa Alma 19:1–17. Unsaon nato nga mamahimong sama kang Abish ug mopamatuod sa mga kamatuoran nga atong nahibaloan?
Awhaga ang Pagkat-on diha sa Panimalay
Dapita ang mga bata nga mainampoong mohimo og tumong uban sa ilang pamilya sa pagpaambit sa ebanghelyo ngadto sa usa ka tawo.
Pagpalambo sa Atong Pagtudlo
I-follow up ang mga pagdapit sa paglihok. Kon imong dapiton ang mga bata sa pagbuhat sa unsay ilang nakat-unan, i-follow up kana nga pagdapit panahon sa sunod nga klase. Nagpakita kini sa mga bata nga nagpakabana ka kon sa unsang paagi ang ebanghelyo nagpanalangin sa ilang mga kinabuhi. Samtang mopaambit sila sa ilang mga kasinatian, malig-on sila ug motabang sa usag usa sa pagpuyo sa ebanghelyo (tan-awa ang Pagtudlo sumala sa Pamaagi sa Manluluwas, 35).