Anti-Nephi-Lehies Bury Their Weapons of War, ni Jody Livingston

Hunyo 29–Hulyo 5

Alma 23–29

Sila “Wala Gayud Mopahilayo”

Tun-i sa mainampoong paagi ang Alma 23–29, mangita og lamdag kon unsay gikinahanglan sa mga bata ug unsaon pagtabang nila.

Irekord ang Imong mga Impresyon

Dapita ang Pagpaambit

Pagdrowing og malipayon nga nawong diha sa usa ka piraso nga papel, ug tuguti ang matag bata nga mogunit niini. Samtang ilang gunitan ang papel, dapita sila sa pagngalan og usa ka butang nga ilang nakat-unan sa Basahon ni Mormon nga nakahatag nila og kalipay.

Itudlo ang Doktrina: Mas Gagmay nga mga Bata

Alma 24:6–24

Ako mapanalanginan kon tumanon nako ang akong mga saad.

Unsay imong nakat-unan sa imong pagtuon sa Alma 24:6–24 nga makatabang sa mga bata nga makasabut sa kamahinungdanon sa pagtuman sa usa ka matarung nga saad?

Posible nga mga Kalihokan

• Pagbasa og pipila ka mga bersikulo o hugpong sa mga pulong gikan sa Alma 24:6–24 aron tudloan ang mga bata bahin sa mga Anti-Nephi-Lehi, sa saad nga ilang gihimo, ug kon giunsa nila sa pagtuman ang saad. Mahimo usab nimong gamiton ang litrato diha sa outline niining semanaha sa Dali, Sunod Kanako—Alang sa mga Indibidwal ug mga Pamilya o “Kapitulo 26: Ang Katawhan ni Ammon” (Mga Istorya sa Basahon ni Mormon, 73–74, o ang katugbang nga video diha sa ChurchofJesusChrist.org).

• Ihulagway kon giunsa sa mga Anti-Nephi-Lehi pagtuman sa ilang saad pinaagi sa paglubong sa ilang mga hinagiban. Dapita ang mga bata sa pagdrowing og espada ug dayon magpakaaron ingnon nga nagkawot og lungag ug ilubong ang ilang espada. Tabangi ang mga bata sa paghunahuna og mga saad nga ilang gihimo. Nganong importante man ang pagtuman og mga saad? Ipasabut nga kon kita bunyagan, kita mihimo og mga saad ngadto sa Dios ug Siya mihimo og mga saad ngari kanato. Gitawag kini og mga pakigsaad. Ipamatuod nga panalanginan kita kon motuman kita sa atong mga saad ngadto sa Dios.

Alma 26; 29

Ang ebanghelyo nagdala kanako og kalipay, ug akong mapaambit kini nga kalipay ngadto sa uban.

Si Ammon, kinsa mitabang sa pagtudlo sa ebanghelyo ngadto sa mga Anti-Nephi-Lehi, nakadawat og hingpit nga kalipay gikan sa pagsangyaw sa ebanghelyo. Si Alma, kinsa usab mitudlo sa ebanghelyo sa mga katawhan, nakadawat niini nga samang kalipay. Kita makasinati og susama nga kalipay kon atong ipaambit ang atong mga pagpamatuod ngadto sa uban.

Posible nga mga Kalihokan

• Pagpili og pipila ka hugpong sa mga pulong gikan sa Alma 26 o 29 nga naghisgot bahin sa hingpit nga kalipay, ug basaha kini ngadto sa mga bata (tan-awa, sama pananglit sa, Alma 26:11, 13 o sa Alma 29:13–14). Dapita ang mga bata sa pagbarug matag higayon nga makadungog sila sa mga pulong “kalipay” o “pagmaya.” Tabangi ang mga bata sa pagsabut nga ang pagpaambit sa ebanghelyo nakapalipay ni Alma ug ni Ammon. Pagpaambit og kasinatian dihang ang pagpaambit sa ebanghelyo nakapalipay nimo.

• Dapita ang mga bata sa pagdrowing og mga hulagway sa mga butang nga nakapalipay nila. Dapita ang matag bata sa paghatag sa iyang drowing ngadto sa laing klasmeyt ug ipasabut kini. Itudlo nga kon ang usa ka butang makapalipay nato—sama sa ebanghelyo—ang atong kalipay motubo kon ato kining ipaambit.

• Hatagi ang usa ka bata og kopya sa Basahon ni Mormon, ug papraktisa siya sa pagpakigbahin niini sa laing sakop sa klase. Dapita ang mga bata sa pagpasabut kon unsay ilang gibati mahitungod sa Basahon ni Mormon. Ngano nga ato mang ipakigbahin ang Basahon ni Mormon sa uban?

Alma 27:20–30

Ako makatabang sa akong mga higala sa pagsunod sa ebanghelyo.

Ang mga Nephite mipanalipod sa mga Anti-Nephi-Lehi gikan sa ilang mga kaaway ug mitabang kanila sa pagtuman sa mga pakigsaad nga ilang gihimo uban sa Ginoo.

Posible nga mga Kalihokan

• I-asoy sa mga bata ang istorya sa Mga Anti-Nephi-Lehi nga nagsaad nga dili na gayud makig-away (tan-awa sa Alma 27:20–30). Ipasabut nga tungod sa saad sa mga Anti-Nephi-Lehi, sila dili na makapanalipod sa ilang mga kaugalingon gikan sa ilang mga kaaway. Basaha ang Alma 27:23, ug ipasabut nga ang ilang mga higala nga kauban sa mga Nephite mipili sa pagpanalipud sa mga Anti-Nephi-Lehi aron sila makatuman sa ilang saad. Unsaon nato pagtabang sa atong mga higala sa pagtuman sa ilang mga saad? Pagsulti mahitungod sa usa ka higayon diin ang usa ka higala mitabang kanimo sa pagtuman sa imong mga saad ngadto sa Dios.

• Pag role-play uban sa mga bata sa mga sitwasyon diin sila makahimo, sa mabinationg paagi, sa pagtabang sa uban sa pagpili sa matarung. Sama pananglit, unsay atong ikatambag ngadto sa usa ka higala nga gustong mamakak o magminaldito?

Itudlo ang Doktrina: Mas Dagko nga mga Bata

Alma 24

Ang mga pakigsaad mao ang mga saad nga akong gihimo ngadto sa Dios ug Iyang gihimo ngari kanako.

Ang mga Anti-Nephi-Lehi milubong sa ilang mga hinagiban ug misaad nga dili na gayud mopatay pag usab. Sa samang paagi, ang mga bata nga imong gitudloan makatuman sa ilang mga pakigsaad.

Posible nga mga Kalihokan

• Hatagi ang tanang mga bata og gagmay nga mga bato, ug dapita sila sa pagsulat sa pulong nga pakigsaad diha sa ilang bato. Ipasabut nga ang pakigsaad usa ka saad tali sa Langitnong Amahan ug sa Iyang mga anak. Sa unsang paagi ang atong mga pakigsaad makahimo natong kusgan o “lig-on” sama sa usa ka bato? (Alma 24:19). Dungan nga magbasa sa Alma 24:16–25 aron makat-on kon unsa nga pakigsaad ang gihimo sa mga katawhan ni Ammon ug giunsa nila sa pagtahud ang ilang pakigsaad. Dapita ang mga bata sa pagdala sa mga bato sa balay isip pahinumdom sa pagtuman sa ilang mga pakigsaad.

• Basaha uban sa mga bata ang Alma 24:16–19, ug hisguti unsay gipakita sa mga Anti-Neph-Lehi ngadto sa Dios nga sila naghinulsol. Unsa may ilang gipakigsaad nga dili buhaton? Ipasabut nga ang mga pakigsaad nga atong gihimo mao ang “usa ka pagpamatuod ngadto sa Dios” nga gusto kita nga mosunod sa mga kasugoan sa Dios (bersikulo 18). Unsa nga mga pakigsaad ang gihimo sa mga bata?

• Dapita ang mga bata sa pagdrowing og mga hulagway sa mga hinagiban sa mga Anti-Nephi-Lehi. Dayon dapita sila sa pagsulat, sa likod sa mga hinagiban, og usa ka butang nga gibati nila nga kinahanglang usbon aron makasunod ni Jesukristo sa mas hingpit nga paagi. Sugoa sila sa pagpakaaron-ingnon nga naglubong sila sa ilang mga hinagiban ug mohimo og plano sa pagbuhat sa unsay ilang gisulat.

Alma 24:7–10; 26:23–34; 27:27–30

Tungod kay ang Langitnong Amahan maloloy-on, makahinulsol kita ug mag-usab.

Bag-ohay lang ang mga bata nagkat-on mahitungod kang Alma, Ammon, ug sa mga Anti-Nephi-Lehi. Unsaon nimo paggamit niini nga mga istorya sa paghulagway nga ang Langitnong Amahan manggiloy-on niadtong sinsero nga maghinulsol?

Posible nga mga Kalihokan

• Isulat ang Sa wala pa ug Pagkahuman diha sa pisara. Hangyoa ang ubang mga bata sa pagbasa sa mosunod nga mga bersikulo aron mahibalo kon unsang klaseha sa pagkatawo ang mga Lamanite sa wala pa sila matudloi ni Ammon ug sa iyang mga igsoong lalaki: Alma 17:14–15; 26:23–24. Hangyoa ang ubang mga bata sa pagbasa sa mosunod nga mga bersikulo aron mahibalo kon sa unsang paagi nga nausab ang mga Lamanite: Alma 26:31–34; 27:27–30. Dapita ang mga bata sa paglista ubos sa mga ulohan sa unsay ilang nahibaloan. Dayon dapita sila sa pagdiskobre, diha sa Alma 24:7-10, kon giunsa niini nga mga Lamanite nga nakahimo sa pag-usab sa hingpit. Ipaambit ang imong pagpamatuod sa gahum sa Dios sa pagpasaylo kanato ug sa pagtabang kanato sa paghinulsol ug pag-usab.

• Dapita ang mga bata nga dungan nga magbasa sa Alma 26:21-22, mangita sa mga panalangin nga moabut niadtong maghinulsol. Dapita ang mga bata sa paghulagway sa uban niini nga mga panalangin sa kaugalinon nilang mga pulong.

Alma 26; 29

Ang ebanghelyo nagdala kanako og kalipay, ug akong mapaambit kini nga kalipay ngadto sa uban.

Kini nga mga kapitulo puno sa mga ehemplo sa kalipay nga moabut pinaagi sa pagsunod ug pagpaambit sa ebanghelyo. Sa unsang paagi nimo magamit ang Alma 26 ug 29 aron sa pagdasig sa mga bata sa pagtinguha niini nga kalipay?

Posible nga mga Kalihokan

• Tabangi ang mga bata sa pagpangita sa mga pulong “kalipay” ug “pagmaya” diha sa Alma 26 ug 29. Dungan nga magbasa sa ubang mga bersikulo nga ilang nakit-an, ug hisguti unsay gitudlo niini nga mga bersikulo bahin sa kalipay. Unsay nakahatag og kalipay ni Ammon ug ni Alma? Pagpaambit og kasinatian diin gibati nimo ang kalipay pinaagi sa pagsunod o pagpaambit sa ebanghelyo, o dapita ang mga bata sa pagpaambit sa ilang kaugalingong mga kasinatian.

• Pagdapit og duha ka bata nga mag-inatubangay ug tan-awa kon kinsay unang makapahiyum sa usa kanila. Unsa ang pipila ka mga pamaagi nga kita makasabwag og kalipay ngadto sa uban? Sa unsang paagi ang pagpaambit sa ebanghelyo makasabwag og kalipay? Tabangi ang mga bata sa paghunahuna og mga paagi nga makapaambit sila sa kalipay sa ebanghelyo ngadto sa ilang mga higala ug mga pamilya.

Awhaga ang Pagkat-on diha sa Panimalay

Dapita ang mga bata sa pagtuman sa ilang mga saad sama sa gihimo sa mga Anti-Nephi-Lehi.

Pagpalambo sa Atong Pagtudlo

Magkat-on og usa ka kasulatan. Pagpili og usa ka hugpong sa mga pulong o mubong tudling sa kasulatan nga sa imong hunahuna makatabang sa mga bata sa imong klase, ug tabangi sila sa pagsag-ulo niini. Ang biswal nga mga gamit [visual aids] ug ang sinyales sa kamot [hand gestures] makatabang usab.