“Hunyo 29–Hulyo 5. Alma 23–29: Sila ‘Wala Gayud Mobiya,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Hunyo 29–Hulyo 5. Alma 23–29,” Dali, Sunod Kanako—Alang sa mga Indibidwal ug mga Pamilya: 2020
Ang mga Anti-Nephi-Lehi nga Naglubong sa Ilang mga Hinagiban sa Gubat, ni Jody Livingston
Hunyo 29–Hulyo 5
Alma 23–29
Sila “Wala Gayud Mobiya”
Samtang magtuon ka sa Alma 23–29, unsang mga mensahe ang nakita nimo nga para sa imong kaugalingon ug sa imong pamilya? Unsay imong ikapaambit diha sa imong mga klase sa Simbahan?
Irekord ang Imong mga Impresyon
Usahay kamo maghunahuna ba kon ang tawo mausab ba gayud? Tingali nabalaka ka kon mabuntog ba kaha nimo ang dili maayong mga pagpili nga imong gihimo o ang dili maayong mga batasan nga imong napalambo, o basin duna kay susamang mga kabalaka mahitungod sa imong mga minahal. Kon mao, ang sugilanon mahitungod sa mga Anti-Nephi-Lehi makatabang kanimo. Kining mga tawhana ang gikayugtang mga kaaway sa mga Nephite. Dihang si Ammon ug ang iyang mga kaigsoonan mihukom nga mosangyaw sa ebanghelyo ngadto kanila, ang mga Nephite “nangatawa [kanila] sa pagbugal-bugal.” Ang pagpatay sa mga Lamanite daw maoy pinakamakatarunganong sulbad kay sa pagkabig kanila. (Tan-awa sa Alma 26:23–25.)
Apan ang mga Lamanite nausab—pinaagi sa makakabig nga gahum sa Ginoo. Kaniadto nailhan sila nga “magahi ug usa ka mabangis nga mga katawhan” (Alma 17:14), sila “nailhan tungod sa ilang kasibut ngadto sa Dios” (Alma 27:27). Gani, sila “wala gayud mobiya” (Alma 23:6).
Tingali duna kay sayop nga mga tradisyon nga angayang talikdan o “mga hinagiban sa … pagsukol” nga dili na angayang gamiton (Alma 23:7). O tingali nagkinahanglan ka lang og gamay pa nga kadasig sa imong pagpamatuod ug mas gamayng kalagmitan sa pagbiya [pagpahilayo]. Bisan unsa nga kausaban ang imong gikihananglan, ang Alma 23–29 makahatag kanimo og paglaum nga, pinaagi sa makatubos nga gahum ni Jesukristo, ang malungtaron nga kausaban posible.
Mga Ideya alang sa Personal nga Pagtuon sa Kasulatan
Kon ang mga anak sa Dios modawat sa ebanghelyo, dagkong mga panalangin ang mosunod.
Dihang gideklarar sa hari sa mga Lamanite nga ang pulong sa Dios kinahanglang “walay babag” tali sa iyang katawhan (tan-awa sa Alma 23:1–5), giablihan niya ang pultahan sa dagkong mga panalangin alang kanila. Samtang magbasa ka sa Alma 23–29, pangitaa kini nga mga panalangin. Unsaon nimo sa pagsiguro nga ang pulong sa Dios “walay babag” sa imong kinabuhi o sa imong pamilya?
Ang akong pagkakabig ngadto kang Jesukristo ug sa Iyang ebanghelyo miusab sa akong kinabuhi.
Ang mga Lamanite nga gibisitahan ni Ammon ug sa iyang mga igsoon daw walay kalagmitan alang sa pagkakabig—natanggong sila sa mga tradisyon sa ilang mga amahan ug sa kaugalingon nilang mga pagkadautan. Sa gihapon daghan kanila ang midawat sa ebanghelyo ni Jesukristo ug mihimo og mahinungdanong mga kausaban sa ilang kinabuhi. Isip simbolo sa kaugalingon nilang pagkakabig, kini nga mga Lamanite mingalan sa ilang kaugalingon og mga Anti-Nephi-Lehi. (Ang ipasabut sa “anti” niini nga sitwasyon dili sama sa “anti” diha sa “anti-Kristo.”)
Ang pagpamalandong sa pagkakabig niini nga mga Lamanite tingali makadasig kanimo sa pagpamalandong sa kaugalingon nimong pagkakabig “ngadto sa Ginoo” (Alma 23:6). Ang usa ka paagi sa pagtuon niini nga mga kapitulo mao ang pag-ila kon sa unsang paagi ang pagkakabig sa mga Anti-Nephi-Lehi miusab sa ilang kinabuhi. Ang mosunod nga mga bersikulo maoy maghimo nimo nga makasugod.
Samtang pamalandungan nimo ang mga kausaban diha sa mga Anti-Nephi-Lehi, hunahunaa kon sa unsang paagi ang kaugalingon nimong pagkakabig ngadto kang Kristo nag-usab kanimo. Unsa ang imong gibati nga kinahanglan pa nimong usabon aron ang ebanghelyo adunay mas dakong gahum sa imong kinabuhi?
Ang Dios maloloy-on.
Samtang ang mga sala nga kinahanglang buntugon ni Ammon ug sa mga Anti-Nephi-Lehi malagmit nga magkalahi sa bisan unsa diha sa imong kinabuhi, tanan kita nagasalig sa kalooy sa Dios. Unsay imong nakita diha sa Alma 24:7–19 ug sa 26:17–22 nga nakatabang kanimo nga makasabut sa Iyang kalooy? Samtang magbasa ka, tingali maghunahuna ka niining mga butanga: sa mga paagi diin gidapit ka sa paghinulsol, sa imong mga kasinatian bahin sa paghinulsol, giunsa nimo sa pagpaningkamot nga dili na makasala pag-usab, ug sa mga panalangin nga miabut kanimo tungod sa paghinulsol. Dihang gibasa nimo ang mga bersikulo sa ingon niini nga paagi, unsay imong nakat-unan mahitungod sa kamaloloy-on sa Dios sa imong kinabuhi?
Ang Pagserbisyo sa Ginoo magdala og kalipay.
Bisan sa managlahi nilang mga kasinatian, si Ammon ug si Alma mipahayag og susamang mga pagbati mahitungod sa misyonaryong mga paghago. Ikonsiderar ang pagbasa sa Alma 26 ug 29 ug sa pagkumpara niini. Unsa nga mga pagkasusama ang imong namatikdan? Unsa nga mga pulong ug hugpong sa mga pulong ang gibalik-balik? Unsay imong makat-unan gikan ni Ammon ug ni Alma mahitungod sa pagpangita og tinuod nga kalipay bisan sa imong mga hagit? (Sa pagribyu sa mga hagit nga giatubang ni Alma, tan-awa ang mga ulohan sa kapitulo alang sa Alma 5–16. Sa pagribyu sa mga hagit nga giatubang ni Ammon ug sa iyang mga kaigsoonan, tan-awa ang mga ulohan sa kapitulo alang sa Alma 17–28.)
Unsa ang mga binugkos ug mga kamalig?
Atol sa pag-ani, ang lugas sa kasagaran pundukon ngadto sa mga binugkos nga gitawag og mga binugkos ug ibutang sa mga balay tipiganan, nga usahay tawagon og mga kamalig. Si Elder David A. Bednar mipaambit og usa ka hubad sa simbolismo diha sa Alma 26:5: “Ang mga binugkos dinhi niining pasumbingay nagrepresentar sa bag-ong nabunyagan nga mga miyembro sa Simbahan. Ang mga kamalig mao ang balaang mga templo” (“Madungganon nga Paghupot og usa ka Pangalan ug Katungdanan,” Liahona, Mayo 2009, 97). Ikonsiderar unsa nga pagkumpara diha sa Alma 26:5–7 ang nagtudlo kanimo mahitungod sa kaimportante sa mga pakigsaad sa templo.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan kauban sa imong pamilya, ang Espiritu makatabang kanimo nga makahibalo kon unsang mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga ideya.
Alma 24:6–19
Ngano nga ang mga Anti-Nephi-Lehi milubong sa ilang mga hinagiban “ilawom sa yuta”? (Alma 24:16). Tingali ang mga sakop sa pamilya malingaw sa pagsulat diha sa mga papel sa mga butang nga gusto nilang buntugon o biyaan. Dayon makakalot sila og lungag ug ilubong ang mga papel.
Alma 24:7–12
Ang pagtuon niini nga mga bersikulo makatabang sa imong pamilya nga makasabut sa nindot kaayong gasa sa paghinulsol. Unsay gihimo sa mga Anti-Nephi Lehi aron makahinulsol sa ilang mga sala? Sa unsang paagi ang Ginoo mitabang kanila nga makahinulsol? Unsay atong makat-unan gikan niini nga ehemplo?
Alma 24:20–27
Unsay atong nakita nga nagpamatuod sa kamatuoran sa pamahayag ni Mormon: “Sa ingon kita makaamgo nga ang Ginoo molihok sa daghan nga mga paagi alang sa kaluwasan sa iyang mga katawhan”? (Alma 24:27).
Alma 26:2
Sa unsang paagi matubag sa imong pamilya ang mga pangutana ni Ammon diha sa Alma 26:2? Tingali pwede kang maghimo og lista sa ilang mga tubag diha sa lapad nga papel ug ibitay kini sa dapit diin ang tanan makakita niini. Awhaga ang mga sakop sa pamilya sa pagdugang niini samtang maghunahuna sila sa ubang mga panalangin sa Dios nga “siya mitugyan ngari kanato.”
Alma 29:9
Sa unsang paagi si Ammon ug Alma mga instrumento sa mga kamot sa Dios? Ikonsiderar ang pagpangita sa mga himan o mga instrumento diha sa imong balay ug sa paghisgot kon sa unsang paagi ang matag usa makatabang sa imong pamilya. Sa unsang paagi kini makatabang nga masabtan unsaon nga ang matag usa kanato mahimong “himan diha sa mga kamot sa Dios”?
Alang sa dugang nga mga ideya sa pagtudlo sa mga bata, tan-awa ang latid [outline] karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Gamita ang nagkadaiyang klase. Ang paglahi-lahi sa imong pamaagi sa pamilya nga pagtuon sa kasulatan makatabang sa mga sakop sa pamilya aron magpabiling interesado ug maapil. Sama pananglit, human ang usa ka sakop sa pamilya makabasa og bersikulo, pwede siyang mohangyo og laing sakop sa pamilya sa pagsulti og usab gamit ang kaugalingon nilang mga pulong sa bag-o lang nga gibasa.
Paghulagway sa mga Anti-Nephi-Lehi nga naglubong sa ilang mga hinagiban pinaagi ni Dan Burr