Paghulagway ni Joshua Dennis

Hulyo 20–26

Alma 36–38

“Mohangad ngadto sa Dios ug Magpakabuhi”

“Samtang imong mabati ang kalipay nga naggikan sa pagsabut sa ebanghelyo, gusto ka nga mogamit sa unsay imong nakat-unan” (Isangyaw ang Akong Ebanghelyo [2004], 21). Irekord ang imong mga hunahuna ug mga impresyon kon unsaon nimo sa paggamit ang mga kamatuoran nga imong gikat-unan.

Irekord ang Imong mga Impresyon

Dihang nakita ni Alma ang mga pagkadautan sa iyang palibut, gibati niya ang hilabihan nga “kasubo,” “kalisdanan,” ug “tumang kaguol sa kalag” (Alma 8:14). Ang “pagkadautan taliwala niini nga mga katawhan,” misulti siya bahin sa mga Zoramite, “nagsakit sa akong kalag” (Alma 31:30). Mibati siya sa susamang butang human nauli gikan sa iyang misyon ngadto sa mga Zoramite—iyang naobserbahan nga “ang mga kasingkasing sa katawhan misugod sa pagkatig-a, ug nga sila misugod sa pagkasilo tungod sa pagkahigpit sa pulong,” ug naghimo kini nga ang iyang kasingkasing “hilabihan ka masulub-on” (Alma 35:15). Unsay gihimo ni Alma mahitungod sa unsay iyang nakita ug gibati? Wala dayon siya mawad-i sa kadasig o mibati og kanegatibo mahitungod sa kahimtang sa kalibutan. Hinoon, “siya misugo nga ang iyang anak nga mga lalaki kinahanglan magkapundok” ug gitudloan sila “mahitungod sa mga butang kabahin ngadto sa pagkamatarung” (Alma 35:16). Iya silang gitudloan nga “walay lain nga paagi o mga pamaagi diin ang tawo maluwas, diha lamang ug pinaagi ni Kristo. … Tan-awa, siya mao ang pulong sa kamatuoran ug pagkamatarung” (Alma 38:9).

Mga Ideya alang sa Personal nga Pagtuon sa Kasulatan

Alma 36

Mahimo akong matawo diha sa Dios kon magmapainubsanon ako ug maghinulsol.

Diyutay ra ang adunay mga kasinatian nga sama ka mahinuklugon sa pagkakabig ni Alma. Apan adunay mga baruganan diha sa iyang kasinatian nga pweding makat-unan natong tanan ug magamit, tungod kay ang tanan kinahanglang “[m]atawo sa Dios” (Alma 36:23). Samtang magbasa ka sa Alma 36, pangita og mga baruganan nga imong magamit. Sama pananglit, unsa kaha ang pagbati sa tawo nga natawo sa Dios mahitungod sa sala? mahitungod ni Jesukristo? Mahimo usab nimong matan-aw ang mga kausaban nga imong gidahuman nga makita diha sa mga gituohan ug gipangbuhat sa mga tawo nga natawo sa Dios.

Tan-awa usab sa Mosiah 5:7; 27:25–26; Alma 5:14; 22:15; Helaman 3:35; “Conversion,” Gospel Topics, topics.ChurchofJesusChrist.org.

Alma 36

Si Jesukristo mihimo sa pag-ula alang sa mga sala sa kalibutan.

Posibling mabantayan nimo ang pipila ka pabalik-balik sa istorya ni Alma mahitungod sa iyang pagkakabig dinhi niini nga kapitulo. Kana tungod kay ang Alma 36 usa ka talagsaong ehemplo sa balaknong mga pulong sa Hebreohanon nga gitawag og chiasmus, diin ang mga pulong o mga ideya gipresentar pinaagi sa usa ka pihong pagkahan-ay, nga maghatud ngadto sa pinakaideya, ug dayon ibalik nga pinabali ang pagkahan-ay. Diha sa Alma 36, ang ideya nga naa sa bersikulo 3 gibalik diha sa bersikulo 27, ang ideya nga naa sa bersikulo 5 gibalik diha sa bersikulo 26, ug sa uban pa. Ang pinakaideya mao ang pinakaimportanting mensahe sa chiasmus. Sutaa kon makit-an ba nimo ang pinakaideya diha sa mga bersikulo 17–18. Tan-awa kon sa unsang paagi ang “[p]aghinuktok niini nga panumduman” nakaapekto kang Alma ug nakausab sa iyang kinabuhi. Sa unsang paagi kini nga kamatuoran nakaapekto kanimo? Unsa pang uban nga gibalik-balik nga mga ideya ang makita nimo niini nga tudling?

Sa unsang paagi kini nga istorya mahitungod sa paghinulsol ug pagpasaylo midasig kanimo sa pagsunod sa ehemplo ni Alma ug mobalik sa Manluluwas?

Alang sa dugang nga impormasyon mahitungod sa chiasmus, tan-awa ang Book of Mormon Student Manual [Manwal alang sa Estudyante sa Basahon ni Mormon (manwal sa Church Educational System [2009], 232–33).

Alma 37

Ang mga kasulatan gipreserba “alang sa usa ka maalamon nga katuyoan.”

Nahunahuna ba nimo ang usa ka milagro ug panalangin sa pagkaadunay mga kasulatan karon? Ang Dios “mitugyan [kanato] uban niini nga mga butang, diin mga sagrado” (Alma 37:14). Samtang magbasa ka sa Alma 37, pangitaa ang mga panalangin nga moabut tungod sa pagkaadunay mga kasulatan. Sa unsang paagi nasinati nimo kini nga mga panalangin? Sa unsang paagi magamit nato ang mga kasulatan sa pagtabang nga “[i]kapakita ang gahum sa [Dios] ngadto sa umaabut nga mga kaliwatan”? (Alma 37:18).

Diha sa Alma 37:38–47, gikumpara ni Alma “ang pulong ni Kristo” ngadto sa Liahona. Samtang pamalandungan nimo kini nga pagkumpara, hunahunaa ang mga paagi nga nasinati nimo ang milagro ug gahum sa mga pagtulun-an ni Kristo “sa matag adlaw” (Alma 37:40).

Tan-awa usab sa D. Todd Christofferson, “Ang Panalangin sa Kasulatan,” Liahona, Mayo 2010, 32–35.

Ang mga kasulatan nagtudlo kanato kon unsaon sa pagsunod sa Dios.

Alma 37:6–7

“Pinaagi sa gagmay ug yano nga mga butang ang mga dagko nga butang ipahinabo.”

Usahay mobati kita nga daw ang atong mga problema dako kaayo ug komplikado nga ang mga solusyon kinahanglan usab nga dako ug komplikado. Hinoon sa pagkakaron ug unya, gipili sa Ginoo ang paggamit og “gagmay ug yano nga mga butang” (Alma 37:6) aron matuman ang Iyang buhat ug mapanalanginan ang kinabuhi sa Iyang mga anak. Samtang magbasa ka sa Alma 37:6–7, pamalandungi ug irekord ang mga paagi diin nakita nimo nga miepekto kini nga baruganan sa imong kinabuhi. Unsa ang ubang pipila ka gagmay ug yanong mga butang ang gigamit sa Ginoo sa pagpanalangin kanimo ug pagtuman sa Iyang buluhaton?

Tan-awa usab sa Alma 37:41–46; Dallin H. Oaks, “Gagmay ug Yano nga mga Butang,” Liahona, Mayo 2018, 89–92.

Mga Ideya alang sa Pamilya nga Pagtuon sa Kasulatan ug Family Home Evening

Samtang magbasa ka sa mga kasulatan kauban sa imong pamilya, ang Espiritu makatabang kanimo nga makahibalo kon unsang mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga ideya.

Alma 36:5–26

Bisan og dili ordinaryo ang kasinatian ni Alma, ang iyang pagkakabig naghulagway sa pipila ka mga baruganan nga magamit natong tanan. Dapita ang matag sakop sa pamilya sa pagpili og usa ka bersikulo gikan sa Alma 36:5–26 nga nagtudlo mahitungod sa “[pagkatawo diha] sa Dios.” Unsa ang atong makat-unan gikan niining mga bersikulo? Tingali ang mga sakop sa pamilya makapaambit kon sa unsang paagi nila nagamit ang mga baruganan nga gihulagway ni Alma.

Alma 36:18–21, 24

Unsaon nato sa paggamit niini nga mga bersikulo aron matabangan ang usa ka tawo sa pagkakita nga ang paghinulsol usa ka makalipay, dili makalilisang nga kasinatian? Sa unsang paagi ang paghinulsol makadasig kanato sa pagpaambit sa ebanghelyo ngadto sa uban?

Alma 37:6–7, 38–46

Unsa ang pipila ka “gagmay ug yano nga mga butang” (Alma 37:6) nga nagpahitabo og dagkong mga butang sa atong kinabuhi? Sa unsang mga paagi ang pulong ni Kristo susama sa Liahona? Unsaon nato sa pagtabang ang usag usa nga makatuon sa mga kasulatan sa mas makugihon nga paagi?

Alma 37:35

Ngano nga maalamon ang pagkat-on sa pagtuman sa mga sugo samtang anaa kita “sa [atong] kabatan-on”?

Alma 38:12

Ang imo bang pamilya nahibalo unsa ang pangpugong [bridle]? Tingali pwede kang mopakita kanila og usa ka litrato niini ug hisguti kon sa unsang paagi gigamit kini sa pagkontrolar sa usa ka hayop. Unsay gipasabut sa “[pagpugong sa atong] mga mainit nga pagbati”? Sa unsang paagi ang pagpugong sa atong mga mainit nga mga pagbati makatabang aron kita “mapuno sa paghigugma”?

Alang sa dugang nga mga ideya sa pagtudlo sa mga bata, tan-awa kini nga latid [outline] karong semanaha diha sa Dali, Sunod Kanako—Alang sa Primary.

Pagpalambo sa Personal nga Pagtuon

Irekord ang mga impresyon. Kon imong irekord ang espirituhanong mga impresyon, imong gipakita sa Ginoo nga imong gihatagan og bili ang Iyang direksyon, ug Siya mopanalangin kanimo og mas kanunay nga pagpadayag. Samtang magtuon ka, isulat ang imong mga hunahuna. (Tan-awa sa Pagtudlo sumala sa Pamaagi sa Manluluwas, 12, 31.)

Anghel nga Mipakita kang Alma ug sa mga Anak ni Mosiah, ni Clark Kelley Price