“Hulyo 6–12. Alma 30–31: ‘Ang Hiyas sa Pulong sa Dios,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Hulyo 6–12. Alma 30–31,” Dali, Sunod Kanako—Alang sa mga Indibidwal ug mga Pamilya: 2020
Ang Tanan nga mga Butang Nagpakita nga Adunay Dios (Alma ug Korihor), ni Walter Rane
Hulyo 6–12
Alma 30–31
“Ang Hiyas sa Pulong sa Dios”
Mipamatuod si Alma mahitungod sa “gamhanan nga sangputanan” sa pulong sa Dios (Alma 31:5). Samtang magbasa ka sa Alma 30–31, irekord ang imong mga impresyon samtang mobati ka sa gamhanan nga sangputanan sa pulong sa Dios diha kanimo.
Irekord ang Imong mga Impresyon
Ang mga istorya diha sa Alma 30–31 tin-aw nga naghulagway sa gahum sa mga pulong—sa dautan ug sa maayo. Ang “pag-ulog-ulog” ug “labihan ka lanog nga mga pulong” sa mini nga magtutudlo nga ginganlan og Korihor naghulga sa pagdala sa “daghan nga mga kalag ubos ngadto sa kalaglagan” (Alma 30:31, 47). Sa samang paagi, ang mga pagtulun-an sa usa ka supakan nga Nephite nga ginganlan og Zoram midala og usa ka pundok sa katawhan “sa dako nga mga kasaypanan” ug “mituis sa mga paagi sa Ginoo” (Alma 31:9, 11).
Sa pagkumpara, nagbaton si Alma og walay pagkapaling nga pagtuo nga ang pulong sa Dios adunay “labaw nga gamhanan nga sangputanan diha sa mga hunahuna sa mga katawhan kay sa espada, o sa bisan unsa pa” (Alma 31:5)—naglakip sa mga pulong ni Korihor ug ni Zoram. Ang mga pulong ni Alma nagpahayag og mahangturong kamatuoran ug nanawagan sa gahum sa langit sa pagpahilom ni Korihor (tan-awa sa Alma 30:39–50), ug gidapit nila ang panalangin sa langit niadtong mga miuban kaniya aron mabalik ang mga Zoramite sa kamatuoran (tan-awa sa Alma 31:31–38). Mga ehemplo kini nga bililhon alang sa mga sumusunod ni Kristo karon, dihang ang “hilabihan ka lanog nga mga pulong” ug “dako nga mga kasaypanan” naghatag na usab og gamhanang sangputanan diha sa mga hunahuna sa katawhan (Alma 30:31; 31:9). Apan makakaplag kita og kamatuoran pinaagi sa pagsalig, sama sa gihimo ni Alma, sa “hiyas sa pulong sa Dios” (Alma 31:5).
Mga Ideya alang sa Personal nga Pagtuon sa Kasulatan
Unsa ang usa ka anti-Kristo?
Sa Alma 30:6, si Korihor gitawag nga “Anti-Kristo.” Ang usa ka anti-Kristo mao ang tawo nga “magpakaaron-ingnon nga kaanib ni Kristo apan sa tinuod nahasupak kang Kristo (1 Juan 2:18–22; 4:3–6; 2 Juan 1:7). Sa mas lapad nga panabut si bisan kinsa kini o bisan unsa nga mahasupak [sayop nga pagsundog] sa tinuod nga ebanghelyo sa plano sa kaluwasan ug nga sa dayag o sa tinago misupak kang Kristo” (Giya ngadto sa mga Kasulatan, “Anti-Kristo”).
Unsa ang mga “nahasupak [sayop nga pagsundog] sa tinuod nga ebanghleyo” ang namatikdan nimo sa kalibutan karon? Sama pananglit, si Sister Julie B. Beck, kanhi Kinatibuk-ang Presidente sa Relief Society, mitudlo, “Bisan unsa nga doktrina o baruganan nga madungog sa atong kabatan-onan gikan sa kalibutan nga supak sa pamilya, usa usab ka antikristo” (“Pagtudlo sa Doktrina kabahin sa Pamilya,” Liahona, Mar. 2011, 15).
Si Korihor Nakig-atubang ni Alma, ni Robert T. Barrett
Ang Basahon ni Mormon makatabang kanako sa pagbatok sa impluwensya niadtong mosulay sa paglingla kanako.
Samtang magbasa ka sa Alma 30:6–31, ang mga pagtulun-an ni Korihor posibling pamilyar. Kana tungod kay, sama sa gitudlo ni Presidente Ezra Taft Benson nga, ang Basahon ni Mormon mopadayag ug makalig-on kanato batok “sa dautan nga mga plano, mga estratehiya, ug mga doktrina sa yawa sa atong panahon. Ang matang sa mga miapostasiya diha sa Basahon ni Mormon susama ra sa matang sa mga miapostasiya karon. Ang Dios, uban sa iyang walay kinutubang kahibalo, miumol pag-ayo sa Basahon ni Mormon aron kita makakita sa sayop ug mahibalo unsaon sa pagpakigbatok sa sayop nga mga konsepto sa edukasyon, sa politika, relihiyon, ug sa pilosopiya sa atong panahon” (Mga Pagtulun-an sa mga Presidente sa Simbahan: Ezra Taft Benson [2014], 158–59).
Hunahunaa ang paghimo og lista sa sayop nga mga doktrina nga gitudlo ni Korihor diha sa Alma 30:6–31. Unsa ang ubang mga sangputanan gumikan sa pagtuo niini nga mga pagtulun-an? Sama pananglit, unsa ang sangputanan gumikan sa pagtuo nga “kon ang usa ka tawo mamatay, mao na kana ang katapusan niana”? (Alma 30:18). Unsang sayop nga mga doktrina nga gitudlo ni Korihor ang susama sa sayop nga mga doktrina nga imong namatikdan sa kalibutan karon?
Ang pagbasa sa inter-aksyon tali ni Korihor ug ni Alma makatabang kanimo sa pag-andam alang sa mga sitwasyon kon ang uban mosulay sa paglingla kanimo. Tingali makatabang ang pagtuon sa Alma 30:29–60 aron masabtan kon sa unsang paagi nalingla si Korihor (tan-awa labi na ang mga bersikulo 52–53). Unsa ang imong makat-unan gikan sa tubag ni Alma sa mga gipangtudlo ni Korihor? (tan-awa sa Alma 30:31–35).
Ang pulong sa Dios dunay gahum sa pagtultol sa katawhan ngadto sa pagkamatarung.
Ang problema sa mga Zoramite nga maoy nagbulag gikan sa mga Nephite daw sa uban sama nga nagkinahanglan kini og usa ka politikal o militar nga sulbad (tan-awa sa Alma 31:1–4). Apan nakakat-on si Alma sa pagsalig “[sa] hiyas sa pulong sa Dios” (Alma 31:5). Unsay imong nakat-unan gikan sa Alma 31:5 mahitungod sa gahum sa pulong sa Dios? Sa unsang paagi nimo nakita nga ang pulong sa Dios mitultol sa pagdala sa “mga katawhan sa pagbuhat niana [nga] makiangayon”? (Alma 31:5). Hunahunaa kon unsaon nimo nga “masulayan” (ang paggamit o matestingan) ang pulong sa Dios sa pagtabang sa tawo nga imong gihigugma.
Aron mas masabtan ang pamaagi ni Alma sa pagtabang sa uban, pwede nimong ikumpara ang iyang mga kinaiya, mga pagbati, ug mga buhat ngadto sa mga Zoramite, sigun sa gihulagway diha sa Alma 31. Ang usa ka talaan [table] sama sa mosunod tingali makatabang. Unsa nga mga kalainan ang imong namatikdan? Unsay imong pagbati nga ikaw posible diayng mas mahisama kang Alma?
|
Mga Zoramite |
Alma |
|---|---|
Mga Zoramite Mituo nga kadtong dili sakop sa ilang grupo itambog sa impyerno (Alma 31:17). | Alma Mituo nga ang mga Zoramite iyang “mga kaigsoonan” ug ang ilang mga kalag “bililhon” (Alma 31:35). |
Mga Zoramite Gipahiluna ang ilang mga kasingkasing diha sa mga katigayunan (Alma 31:24, 28). | Alma Nagtinguha nga madala ang mga kalag ngadto kang Jesukristo (Alma 31:34). |
Mga Zoramite | Alma |
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan kauban sa imong pamilya, ang Espiritu makatabang kanimo nga makahibalo kon unsang mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga ideya.
Alma 30:44
Ikonsiderar ang dungan nga pagbasa ug paghisgot sa Alma 30:44 samtang maglakaw-lakaw kamo sa gawas o magtan-aw og mga litrato sa mga nilalang sa Dios. Ang mga sakop sa pamilya pweding mag-inambitay unsay ilang nakita nga nagpamatuod mahitungod sa Dios. Sa unsang paagi kining mga butanga—o ang uban natong mga kasinatian—makatabang kanato nga mahibalo nga ang Dios tinuod gayud?
Alma 30:56–60
Unsa man ang atong nakat-unan gikan sa Alma 30:56–60 mahitungod sa kon giunsa sa pagtratar sa yawa ang iyang mga sumusunod? Unsay atong mahimo aron mapanalipdan ang atong panimalay batok sa iyang impluwensya?
Alma 31:20-38
Human mabasa ang Alma 31:20–38 kauban sa imong pamilya, pwede nimong hisgutan ang mosunod nga mga pangutana: Sa unsang paagi ang pag-ampo ni Alma lahi kay sa pag-ampo sa mga Zoramite? Unsaon nato sa pagsunod ang ehemplo ni Alma diha sa atong personal ug mga pamilya nga pag-ampo?
Ang mas gagmayng bata pweding magbutang og bato ilawom sa ilang mga unlan aron sa pagtabang nga mahinumdom sila sa pag-ampo matag adlaw ug gabii. Pwede usab nilang kalingawan sa pag-adorno ang ilang bato.
Alma 31:23
Unsa man ang gihimo nato matag adlaw diha sa atong panimalay aron makakat-on ug makapamulong mahitungod sa Dios?
Alang sa dugang nga mga ideya sa pagtudlo sa mga bata, tan-awa ang latid [outline] karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Andama ang imong palibut. “Ang atong palibut makaapekto kaayo sa atong abilidad sa pagkat-on ug pagbati sa kamatuoran” (Pagtudlo sumala sa Pamaagi sa Manluluwas, 15). Paningkamuti ang pagpangita og dapit sa pagtuon sa mga kasulatan nga makadapit sa impluwensya sa Espiritu Santo. Ang makabayaw nga musika ug mga litrato makadapit usab sa Espiritu.
Ang Rameumptom, ni Del Parson