“Hulyo 13–19. Alma 32–35: ‘Itanom Kini nga Pulong sa Inyong mga Kasingkasing,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Hulyo 13–19. Alma 32–35,” Dali, Sunod Kanako—Alang sa mga Indibidwal ug mga Pamilya: 2020
Hulyo 13–19
Alma 32–35
“Itanom Kini nga Pulong sa Inyong mga Kasingkasing”
Irekord ang espirituhanong mga impresyon nga imong nadawat samtang gitun-an nimo ang Alma 32–35. Unsa ang imong gibati nga nakapadasig nga buhaton tungod sa imong nakat-unan?
Irekord ang Imong mga Impresyon
Para sa mga Zoramite, ang pag-ampo usa lamang ka naandang buluhaton nga nagtumong ra sa kaugalingon, nga mahitabo lang kausa sa usa ka semana. Naglakip kini sa pagbarug sa dapit diin ang tanan makakita ug mobalik-balik pagsulti sa walay pulos nga mga pulong, nga nagadayeg sa kaugalingon. Tingali ang mas ngil-ad pa, kulang sa pagtuo kang Jesukristo ang mga Zoramite—gani gilimod nila ang Iyang pagkaanaa—ug milutos sa mga kabus (tan-awa sa Alma 31:9–25). Agig pagkumpara, si Alma ug si Amulek walay kahadlok nga mitudlo nga ang pag-ampo mas dako og mahimo sa unsay mahitabo sa atong kasingkasing kay sa atubangan sa publiko diha sa pulpito. Ug kon dili man kini moresulta og kalooy ngadto sa mga nanginahanglan, kini “makawang, ug dili … mapahimuslan” (Alma 34:28). Ang pinakaimportante, usa kini ka pagpadayag sa pagtuo kang Jesukristo, kinsa mitanyag og pagtubos pinaagi sa Iyang “walay kinutuban ug walay katapusan nga sakripisyo” (Alma 34:10). Ang ingon niana nga pagtuo, mipasabut si Alma, naggikan sa pagkamapainubsanon ug usa ka “pagtinguha sa pagtuo” (Alma 32:27). Anam-anam kining motubo, sama sa kahoy, ug nanginahanglan og padayon nga pag-alima. Samtang magbasa ka sa Alma 32–35, pwede nimong hunahunaon ang kaugalingon nimong pagtuo ug mga pag-ampo; nakasulay ka ba nga mihinay-hinay sa pagsulod diha nimo kining sama nga kinaiya sa mga Zoramite? Unsaon nimo sa pag-alima ang imong pagtuo kang Jesukristo aron mahimo kining “usa ka kahoy nga magtubo ngadto sa kinabuhi nga walay katapusan”? (Alma 32:41).
Mga Ideya alang sa Personal nga Pagtuon sa Kasulatan
Makapili ako nga magmapainubsanon.
Nakita ni Alma nga ang mga kabus nga Zoramite mapainubsanon ug “diha sa pagpangandam sa pagpamati sa pulong” (Alma 32:6). Samtang magbasa ka sa Alma 32:1–16, hunahunaa kon unsaon nimo sa pagpangandam sa pagpamati sa pulong sa Dios.
Unsa nga mga kasinatian ang nagpaubos kanimo? Unsay imong nahimo aron mahimong mas mapainubsanon? Kini nga mga bersikulo magtudlo kanimo unsaon pagpili ang pagpaubos kay sa mapugos sa pagpaubos. Sama pananglit, unsay kalainan tali sa pagkahimong “kabus sa mga butang nga kalibutanon” ug sa pagkahimong “kabus sa kasingkasing”? (bersikulo 3). Unsay ipasabut sa “[pagpaubos sa imong kaugalingon] tungod sa pulong”? (bersikulo 14).
Migamit ako og pagtuo kang Jesukristo pinaagi sa pagtanom ug pag-amuma sa Iyang pulong sulod sa akong kasingkasing.
Ngano kaha nga gihisgutan man ni Alma ang mahitungod sa pagtanom og binhi agig tubag sa mga pangutana sa mga Zoramite mahitungod sa pagsimba? Unsa nga binhi ang gihisgutan ni Alma? (tan-awa sa Alma 32:28; 33:22–23). Samtang magbasa ka sa Alma 32:17–43, timan-i ang mga pulong ug hugpong sa mga pulong nga makatabang aron masabtan nimo unsaon sa paggamit ang pagtuo kang Jesukristo ug sa Iyang pulong. Unsa ang imong nakat-unan mahitungod sa kon unsa ang pagtuo ug unsa ang dili? Dayon, samtang magbasa ka sa mga kapitulo 33–34, pangitaa ang mga tubag sa pangutana sa mga Zoramite “Unsaon [namo] sa pagtanom ang binhi?” (Alma 33:1).
Aniay laing paagi sa pagtuon sa Alma 32–34: Pagdrowing og mga litrato nga nagrepresentar sa managlahing gitas-on sa nagtubo nga binhi. Dayon butangi og ngalan ang litrato sa mga pulong gikan sa Alma 32:28–43 nga makatabang aron imong masabtan unsaon nimo sa pagtanom ug pag-amuma ang pulong diha sa imong kasingkasing.
Tan-awa usab sa Mateo 13:3–8, 18–23; Mga Hebreohanon 11; Neil L. Andersen, “Ang Pagtuo Dili pinaagi sa Sulagma, apan pinaagi sa Pagpili,” Liahona, Nob. 2015, 65–68; “Faith in Jesus Christ,” Gospel Topics, topics.ChurchofJesusChrist.org.
Makasimba ako sa Dios pinaagi sa pag-ampo, bisan kanus-a ug bisan asa.
Ang tambag ni Alma ug ni Amulek mahitungod sa pagsimba ug pag-ampo gituyo aron makorihian ang tataw nga mga sayop nga panabut sa mga Zoramite (tan-awa sa Alma 31:13–23). Apan ang mga kamatuoran nga ilang gitudlo makatabang ni bisan kinsa kanato mahitungod sa pagsabut sa pag-ampo ug sa mas maayong pagsimba. Tingali pwede kang maghimo og lista sa mga kamatuoran mahitungod sa pag-ampo nga imong nakita diha sa Alma 33:2–11 ug sa 34:17–29. Sa tupad niana nga lista, paghimo og lista sa posibling mga sayop nga panabut mahitungod sa pag-ampo nga gikorihian niini nga mga kamatuoran (tan-awa sa Alma 31:12–23). Sa unsang paagi ang mga butang nga imong nakat-unan gikan niini nga mga bersikulo nakaapekto sa pamaagi sa imong pag-ampo ug pagsimba?
Kinsa si Zenos ug Zenock?
Si Zenos ug Zenock mao ang mga propeta nga nagpamatuod kang Jesukristo atol sa kapanahunan sa Daang Tugon, apan ang ilang mga pagtulun-an wala diha sa Daang Tugon. Ang mga Nephite adunay mabasang mga pagtulun-an niini nga mga propeta, tingali tungod kay nalakip kini sa mga bronse nga mga palid nga nakuha ni Nephi gikan ni Laban. Gihisgutan usab sila diha sa 1 Nephi 19:10–12; Jacob 5:1; ug Helaman 8:19–20.
“Kini nga kinabuhi mao ang panahon … sa pagpangandam sa pagsugat sa Dios.”
Samtang magbasa ka sa Alma 34:30–41, hunahunaa kon unsaon kaha nimo sa “pagpauswag [sa imong] panahon samtang ania pa niini nga kinabuhi” (bersikulo 33). Sa unsang paagi ang paghinulsol ug pagpailub makatabang nimo sa pagpangandam sa pagsugat sa Dios? Duna bay mga kausaban nga imong gikinahanglan nga buhaton sa butang nga gilangay nimo sa pagbuhat? Siguroa nga lihukon nimo ang espiritwal nga mga impresyon nga imong nadawat.
Tan-awa usab sa Alma 12:24; Larry R. Lawrence, “Unsa Pa May Akong Kulang?” Liahona, Nob. 2015, 33–35.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan kauban sa imong pamilya, ang Espiritu makatabang kanimo nga makahibalo kon unsang mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga ideya.
Alma 32:9–11; 33:2–11; 34:38–39
Unsa kaha kon kita tugutan nga mosimba ug mag-ampo lamang sa adlaw nga Dominggo? Samtang dungan ninyong basahon kini nga mga bersikulo, ang mga sakop sa pamilya pweding maghisgot kon sa unsang paagi sila makasimba matag adlaw ug nganong magmapasalamaton sila nga makahimo niini.
Alma 32:28–43
Litrato sa kahoy nga kauban niini nga latid [outline]; pwede nimong gamiton kini sa paghulagway sa mga pulong ni Alma dinhi niini nga mga bersikulo. O kaha ang imong pamilya manglakaw aron mangita og mga tanom nga managlahi ang paagi sa pagtubo ug mobasa sa mga bersikulo gikan sa Alma 32 nga nagkumpara sa nagtubo nga tanom ngadto sa atong pagtuo. Pwede nga ang matag sakop sa pamilya magtanom og liso ug maghisgot kon unsay atong gikinahanglan aron matabangan kini nga motubo. Sa moabut nga mga semana pwede nimong susihon ang imong mga liso ug magpahinumdumay ang matag usa sa panginahanglan nga ipadayon ang pag-alima sa atong mga pagpamatuod kang Jesukristo.
Alma 33:2–11; 34:17–29
Unsa ang gisugyot niini nga mga bersikulo kon unsaon nato sa pagpalambo ang atong indibidwal ug pamilya nga pag-ampo?
Alma 34:31
Unsa nga mga kasinatian ang nagpakita kanato nga kon kita maghinulsol, “diha dayon” magsugod ang atong pagsinati sa mga panalangin sa plano sa katubsanan?
Alma 34:33–35
Nahibalo ba ang imong pamilya unsay ipasabut sa paglangay [procrastination]? Tingali dunay makapaambit og mga ehemplo mahitungod sa paglangay ug sa mga negatibong sangputanan niini. Unsay buot ipasabut sa “paglangay sa adlaw sa [atong] paghinulsol”?
Alang sa dugang nga mga ideya sa pagtudlo sa mga bata, tan-awa ang latid [outline] karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Pagdrowing og mga litrato. Pwede nimong padrowingon ang mga sakop sa pamilya samtang magkat-on sila gikan sa mga kasulatan. Sama pananglit, posibling malingaw sila sa pagdrowing og usa ka binhi nga nagtubo ngadto sa usa ka kahoy samtang magtuon sila sa Alma 32.
“Ug tungod sa inyong kakugi ug sa inyong hugot nga pagtuo ug sa inyong pailub uban ang pulong sa pag-alima niini, … tan-awa, dili madugay kamo mopu-pu sa bunga niini, diin bililhon kaayo” (Alma 32:42).