All Things Denote There Is a God (Alma and Korihor), ni Walter Rane

Hulyo 6–12

Alma 30–31

“Ang Hiyas sa Pulong sa Dios”

Tun-i ang Alma 30–31 nga maghunahuna sa mga bata nga imong gitudloan. Samtang ikaw mamalandong sa ilang mga kalig-on ug mga panginahanglan, ang Espiritu Santo motabang kanimo nga masayud kon unsaon sa pagtudlo kanila.

Irekord ang Imong mga Impresyon

Dapita ang Pagpaambit

Dapita ang mga bata sa pagpaambit og mga tubag sa mga pangutana sama sa mosunod: Kanus-a man kita kinahanglang mag-ampo? Unsa man ang atong isulti kon kita mag-ampo? Aduna bay makapaambit kon unsay paagi sa pag-ampo sa mga Zoramite o unsay paagi ni Alma sa pag-ampo?

Itudlo ang Doktrina: Mas Gagmay nga mga Bata

Alma 30:44

Tanang butang nagpamatuod sa Dios.

Si Alma naghisgut sa mga butang nga anaa sa langit ug sa yuta aron sa pagpamatuod nga ang Dios buhi ug nagdumala sa tanang kalibutan. Unsang mga butanga ang imong matabang sa mga bata nga makita nila sa ilang palibut nga nagpamatuod kabahin sa Dios?

Posible nga mga Kalihokan

• Basaha ang Alma 30:44 ngadto sa mga bata, ug hangyoa sila sa pagpaminaw sa mga butang nga gisulti ni Alma nga makatabang kanato nga masayud nga ang Dios tinuod. Pagpakita og mga hulagway sa pipila niining mga butanga, ug hangyoa ang mga bata nga itudlo nila ang mga hulagway kon mabasahan nimo kini diha sa bersikulo. Dapita ang mga bata sa pagdrowing og mga hulagway sa mga butang nga makatabang kanila nga motuo sa Dios.

• Kon mahimo, paglakaw-lakaw sa gawas uban sa mga bata o hangyoa sila sa pagbarug atubangan sa bintana samtang basahon nimo ang Alma 30:44. Hangyoa sila nga itudlo sa ilang kamot ang mga butang nga ilang nakita nga makatabang nila nga masayud nga tinuod ang Dios. Ang mga kalihokan niini nga pahina makatabang usab.

• Hangyoa ang mga bata sa paglingkud nga mag-alirong ug manganta og kanta bahin sa mga linalang sa Dios, sama sa “Gihigugma Ako sa Langitnong Amahan” (Songbook sa mga Bata, 16). Samtang manganta ang mga bata, hangyoa sila sa pagpasa og usa ka butang sama sa bola. Kon ang musika mohunong na, hangyoa ang bata nga naggunit sa butang sa paghisgut og usa ka butang nga hinimo sa Langitnong Amahan nga siya mapasalamaton.

Alma 31:5

Ang pulong sa Dios gamhanan.

Kon ang mga bata maghunahuna og gahum, maghunahuna siguro sila og mga butang sama sa mga gamhanang mga bayani [superheroes], mga rayna, o mga hari. Matabangan nimo sila sa pagsabut nga ang pulong sa Dios mas gamhanan kay sa “bisan unsa pa” (Alma 31: 5).

Posible nga mga Kalihokan

• Pagdibuho og espada diha sa pisara. Basaha ang Alma 31:5 ngadto sa mga bata, ug dapita sila sa pagpaminaw sa unsay gisulti ni Alma nga mas gamhanan pa kay sa espada. Pagpaambit og kasinatian dihang ang pulong sa Dios adunay gamhanan nga impluwensya diha nimo.

• Panganta mog dungan og kanta mahitungod sa mga kasulatan, sama sa “Scripture Power” (music.ChurchofJesusChrist.org), ug hangyoa ang mga bata sa pagpaminaw kon giunsa ta pagtabang sa mga kasulatan. Balika pagsulti ang hugpong sa mga pulong nga “Ang pulong sa Dios mas gamhanan kay sa …” sa makadaghang higayon, ug hangyoa ang mga bata sa pagkompleto sa maong hugpong sa mga pulong.

Alma 31:8–35

Ang Langitnong Amahan motubag sa akong mga pag-ampo.

Si Alma naguol sa dihang nakita niya kon giunsa pag-ampo sa mga Zoramite (tan-awa sa Alma 31:24)—wala sila motuo ni Jesukristo ug kanunay silang nag-ampo sa samang mga pag-ampo sa usa ka dapit diin ang tanan makakita kanila (Alma 31:13–14). Apan ang pag-ampo ni Alma mapaubsanon ug nagpakita og hugot nga pagtuo ni Kristo.

Posible nga mga Kalihokan

• I-summarize sa daklit ang istorya bahin ni Alma ug sa mga Zoramite alang sa mga bata gamit ang mga bersikulo gikan sa Alma 31:8–35. Mahimo usab nimong gamiton ang “Kapitulo 28: Ang mga Zoramite ug ang Rameumptom” (Mga Sugilanon sa Ang Basahon ni Mormon, 78–80, o ang katugbang nga video diha sa ChurchofJesusChrist.org). Ipasabut ang kalainan tali sa pag-ampo sa mga Zoramite ug sa pag-ampo ni Alma. Dapita ang mga bata sa paghunahuna nga nakahimamat sila og usa sa mga bata nga Zoramite. Unsa may ilang isulti aron sa pagtudlo kaniya unsaon pag-ampo?

• Tabangi ang mga bata sa pagtino sa mga butang nga gisulti sa mga Zoramite sa ilang pag-ampo (tan-awa sa Alma 31:15–18) samtang magtabang sila nimo sa paghimo og Rameumptom nga tore gamit ang mga bloke o mga bato. Ipasabut nga kinahanglang dili ingon ani kita mag-ampo. Pangutan-a ang mga bata unsaon nato pag-ampo, ug ipakuha nila ang usa ka bloke o bato alang sa matag butang nga ilang isulti.

Itudlo ang Doktrina: Mas Dagko nga mga Bata

Alma 30

Ang Basahon ni Mormon nagpasidaan kanako batok sa sayop nga mga pagtulun-an.

Ang mga sayop nga mga pagtulun-an ni Korihor gihulagway diha sa Basahon ni Mormon aron sa pagtabang kanato nga makaila ug mosalikway sa samang mga pagtulun-an sa atong panahon.

Posible nga mga Kalihokan

• Pagpakita og mga butang (sama sa kwarta o pagkaon) ug mga dulaan nga kapareha niining mga butanga. Asa man kaha ang pilion sa mga bata? Tabangi ang mga bata sa pagpangita diha sa Alma 30:12–18 sa mga bakak o sayop nga mga pagtulun-an nga gitudlo ni Korihor bahin sa Dios.

• Tabangi ang mga bata sa pag-ila sa mga bakak nga gitudlo ni Korihor ug isulat kini sa mga piraso nga papel aron ibutang diha sa pisara (tan-awa sa Alma 30:12–18, 24). Hangyoa ang mga bata sa pagsiksik diha sa Alma 30:32–35, mangita sa mga paagi nga si Alma mitubag sa mga bakak ni Korihor. Pangutan-a ang mga bata sa unsang paagi nila mahibaloan nga ang mga butang nga gitudlo ni Alma tinuod.

  

  Korihor Confronts Alma, ni Robert T. Barrett

Alma 31:5

Ang pulong sa Dios mas gamhanan kay sa bisan unsa nga butang.

Kanus-a nimo mabati ang gahum sa pulong sa Dios? Hunahunaa kon sa unsang paagi ang imong mga kasinatian makadasig sa mga bata nga imong gitudloan.

Posible nga mga Kalihokan

• Dapita ang mga bata sa paghunahuna og butang o tawo nga gamhanan, o pagpakita og mga hulagway sa pipila ka gamhanan nga mga butang. Unsay nakahimo niining mga butanga nga gamhanan? Basaha og dungan ang Alma 31:5, ug pangutan-a ang mga bata kon unsa sa ilang hunahuna ang kahulugan niini nga bersikulo. Sa unsang paagi nga ang pulong sa Dios mas gamhanan kay sa espada? Unsa may mahimo niini nga gahum?

• Pagkontak daan og pipila ka mga bata, ug hangyoa sila sa paghunahuna og kasinatian nga ipaambit sa klase bahin sa mga kasulatan o usa ka pakigpulong sa usa ka lider sa Simbahan nga nakatabang nila sa pagbuhat og butang nga maayo. Ngano nga ang pulong sa Dios nakadasig man nila sa pagbuhat og maayo nga mga butang?

• Kantaha ang usa ka awit uban sa mga bata mahitungod sa pulong sa Dios, sama sa “Pagsiksik, Pamalandong, ug Pag-ampo” o “Sunda ang Propeta” (Songbook sa mga Bata, 66, 58). Mahimo usab nilang kantahon ang “Scripture Power” (music.ChurchofJesusChrist.org).

Alma 31:8–35

Mahimo akong magmapainubsanon.

Bisan sa tanang mga kasaypanan nga nahimo sa mga Zoramite, ang ilang garbo ingon og maoy nakapasubo ni Alma. Mahimong usa kini ka kahigayunan sa pagtudlo sa mga bata sa kamahinungdanon sa pagpaubos.

Posible nga mga Kalihokan

• Tabangi ang mga bata nga makasabut sa kalainan tali sa garbo ug pagkamapainubsanon (tan-awa sa “Garbo” ug “Mapainubsanon, Pagkamapainubsanon” diha sa Giya sa mga Kasulatan). Hangyoa ang mga bata sa pagpuli-puli og basa sa Alma 31:24–28. O magbasa og dungan sa “Kapitulo 28: Ang mga Zoramite ug ang Rameumptom” (Mga Sugilanon sa Ang Basahon ni Mormon, 78–90). Samtang magbasa sila, ipapaniid nila giunsa pagpakita sa mga Zoramite nga sila mapagarbuhon. Sa unsang paagi gipakita ni Alma nga siya mapainubsanon? (see Alma 31:30–33).

• Bahina ang mga bata ngadto sa mga grupo, ug hangyoa ang matag grupo sa pagdesider og tubag sa mga pangutana nga sama niini: Diin gipahiluna sa mga Zoramite and ilang mga kasingkasing? (tan-awa sa Alma 31:24, 28). Unsa ang ubang kalibutanong mga butang diin ang mga katawhan nagpahiluna sa ilang mga kasingkasing karon? Ngano kaha nga nagtuo man ang mga tawo nga mas maayo sila kay sa uban? Kon ang matag grupo magpaambit og tubag, padrowinga sila og usa ka bahin sa tore sa Rameumptom diha sa pisara. Dayon hangyoa sila sa pagpapas sa mga bahin sa tore sa matag higayon nga makahunahuna sila og pamaagi sa pagpakita og kamapainubsanon.

Awhaga ang Pagkat-on diha sa Panimalay

Dapita ang mga bata sa pagtudlo sa ilang mga pamilya og usa ka butang nga ilang nakat-unan bahin sa gahum sa pulong sa Dios karon.

Pagpalambo sa Atong Pagtudlo

Tabangi ang mga bata sa pagkat-on gikan sa mga kasulatan. Ang gagmayng mga bata tingali dili pa kaayo makabasa, apan mahimo gihapon nimo silang ilakip diha sa pagkat-on gikan sa mga kasulatan. Sama pananglit, mahimo ka nga mobasa og usa ka tudling ug dapiton sila sa pagbarug o sa pagpataas sa ilang kamot kon makadungog sila og piho nga pulong o hugpong sa mga pulong. Dayon tabangi sila nga makasabut sa pulong o hugpong sa mga pulong. (Tan-awa sa Pagtudlo Sumala sa Pamaagi sa Manluluwas, 20–21.)