“Hulyo 20–26. Alma 36–38: ‘Mohangad ngadto sa Dios ug Magpakabuhi,’” Dali, Sunod Kanako—Alang sa Primary: Basahon ni Mormon 2020 (2020)
“Hulyo 20–26. Alma 36–38,” Dali, Sunod Kanako—Alang sa Primary: 2020
Paghulagway ni Joshua Dennis
Hulyo 20–26
Alma 36–38
“Mohangad ngadto sa Dios ug Magpakabuhi”
Samtang imong tun-an sa mainampoong paagi ang Alma 36–38, mahimong moabut kanimo ang mga impresyon mahitungod sa mga bata nga imong gitudloan. Irekord kini nga mga impresyon; basin makahatag kini og mga ideya alang sa mga kalihokan sa pagkat-on.
Irekord ang Imong mga Impresyon
Dapita ang Pagpaambit
Dapita ang mga bata sa pagpaambit og usa ka butang nga gitudlo kanila sa ilang mga ginikanan. Pangutan-a sila kon nakahibalo ba sila kon unsay gitudlo ni Alma sa iyang mga anak nga lalaki.
Itudlo ang Doktrina: Mas Gagmay nga mga Bata
Ang paghinulsol naghatag kanako og hingpit nga kalipay.
Ang pagtudlo sa mga bata mahitungod sa hingpit nga kalipay sa paghinulsol samtang bata pa sila makadasig kanila sa paghinulsol samtang magdako sila.
Posible nga mga Kalihokan
-
Basaha ang Alma 36:20 ngadto sa mga bata, ug hangyoa sila sa pagpaminaw kon unsa ang gibati ni Alma. Dapita sila sa paghingalan og pipila ka mga butang nga nakahatag kanila og hingpit nga kalipay. Pagpakita og hulagway sa Manluluwas, ug ipasabut nga si Alma mibati og hingpit nga kalipay tungod kay si Jesukristo mipasaylo sa iyang mga sala.
-
Hatagi ang matag bata og usa ka piraso nga papel nga adunay hulagway sa malipayon nga nawong sa usa ka bahin ug usa ka magul-anon nga nawong sa pikas nga bahin. Hangyoa sila sa pagpaminaw samtang imong basahon ang Alma 36:6 ug sa pagpili asa nga nawong ang ilang ipataas. Ipasabut nga si Alma naghinulsol ug mibati og hingpit nga kalipay tungod kay si Jesukristo mipasaylo kaniya sa paghimo og dili maayo nga mga pagpili. Hangyoa ang mga bata sa pagpaminaw samtang imong basahon ang Alma 36:24 mahitungod sa mga maayo nga mga pagpili nga iyang gihimo sa kaulahian ug sa pagpataas sa eksakto nga nawong.
-
Kantaha og dungan ang usa ka kanta mahitungod ni Jesukristo, sama sa “Mipadala sa Bugtong Anak” (Songbook sa mga Bata, 20). Pagpamatuod nga si Jesus mianhi sa kalibutan aron pagluwas kanato gikan sa sala ug hatagan kita og hingpit nga kalipay.
“Pinaagi sa gagmay ug yano nga mga butang ang mga dagko nga butang ipahinabo.”
Unsaon nimo pagtudlo ang mga bata sa pag-ila nga ang Ginoo mogamit sa gagmay ug yano nga mga butang aron sa patuman sa Iyang buhat?
Posible nga mga Kalihokan
-
Basaha ang Alma 37:6–7, ug dapita ang mga bata sa paghupo sa matag higayon nga basahon nimo ang pulong nga “gagmay.” Pakitaa sila og pipila ka gagmay nga mga butang nga makapahinabo og dagkong mga butang o makapalihok og dagkong mga butang, sama sa bateriya o yawe sa sakyanan. Unsa ang dagko nga mga butang nga mahitabo o mapalihok tungod niining gagmay nga mga butang? Tabangi ang mga bata sa paghunahuna og ubang gagmay o yano nga mga butang nga gusto sa Dios nga atong buhaton. Unsa ang dagko nga mga butang ang mahitabo tungod niining gagmay o yano nga mga sugo?
-
Pagpakita og usa ka hulagway o duha ba sa gagmay nga mga butang nga mag-anam og kahimong dagku nga mga butang, sama sa usa ka dahon sa sagbut ug umahan, o usa ka tolo sa ulan ug linaw. Ipamatuod nga bisan ang gagmay, yano nga mga buhat makahimo og dakong kalainan sa atong mga kinabuhi ug sa kinabuhi sa uban. Awhaga ang mga bata sa paghisgut bahin sa pipila ka mga yano, maayo nga mga butang nga ilang gihimo kada adlaw, o ipakigbahin ang imong kaugalingong mga ehemplo. Dapita ang mga bata sa pagpili og usa ka yano, maayo nga butang nga mahimo nilang buhaton karon nga semana ug padrowinga sila og hulagway sa ilang kaugalingon nga naghimo niini nga butang. Dapita ang mga bata sa pagdala sa mga drowing sa ilang panimalay ug ipakita kini sa ilang mga pamilya.
Ang mga kasulatan makatabang kanato kada adlaw.
Bisan kon daghan ang gagmayng mga bata nga dili makabasa, ikaw makatabang kanila sa pag-angkon og pagpamatuod mahitungod sa gahum sa mga kasulatan sa paggiya sa ilang inadlaw-adlaw nga kinabuhi.
Posible nga mga Kalihokan
-
Ipakita ang usa ka litrato sa Liahona (sama sa Libro sa mga Hulagway sa Ebanghelyo, nu. 68), o dapita ang mga bata sa pagdrowing niini samtang mopakigbahin sila sa unsay ilang nahinumduman bahin niini (tan-awa sa 1 Nephi 16:10, 28–29). Iisa ang mga kasulatan, ug hangyoa ang mga bata sa pagpakigbahin kon sa unsang paagi nga ang mga kasulatan nahisama sa Liahona. Gamita ang Alma 37:38–47 ug ang pahina sa mga kalihokan karong semanaha aron idugang niini nga diskusyon.
-
Dungan nga mangangta og usa ka kanta bahin sa pagtuon sa kasulatan, sama sa “Pagsiksik, Pamalandong, ug Pag-ampo” o “As I Search the Holy Scriptures [Samtang Tun-an Ko ang Balaang mga Kasulatan]” (Songbook sa mga Bata, 66; Hymns, no. 277). Unsa nga mga panalangin sa pagtuon sa kasulatan ang gihisgutan niini nga kanta?
Imahebabaye nga nagbasa sa mga kasulatanAng mga kasulatan nagtudlo kanato unsaon pagsunod sa Dios.
Itudlo ang Doktrina: Mas Dagko nga mga Bata
Mahimo kong “matawo sa Dios” kon akong sundon si Jesus ug maghinulsol sa akong mga sala.
“Ang pagkakabig … mao ang usa ka kausaban sa atong pagkatawo. Hilabihan kini ka mahinungdanon nga kausaban nga ang Ginoo ug ang Iyang mga propeta nagpasabut niini isip usa ka pagkatawo pag-usab” (“Pagkakabig,” Mga Hilisgutan sa Ebanghelyo, topics.ChurchofJesusChrist.org).
Posible nga mga Kalihokan
-
Ribyuha uban sa mga bata ang istorya sa pagkakabig ni Alma ang Batan-on diha sa Alma 36:6–21. Isulat sa mga piraso sa papel ang mga pulong ug hugpong sa mga pulong gikan niini nga mga bersikulo nga naghisgut kon unsay gibati ni Alma, ug isulat kini diha sa pisara. Hangyoa ang mga bata sa pagbahig sa mga piraso sa papel ngadto sa duha ka pundok: ang mga butang nga gibati ni Alma sa wala pa siya makahinumdom kon unsay gitudlo sa iyang amahan ngadto kaniya mahitungod sa Manluluwas ug ang mga butang nga iyang gibati human siya mahinumdom. Basaha og dungan ang Alma 36:17–20, ug ipamatuod ngadto sa mga bata nga si Jesukristo mopasaylo kanato kon kita maghinulsol.
-
Isulat ang Natawo sa Dios ug ang mosunod nga mga pakisayran diha sa pisara: 1 Juan 4:7; Mosiah 5:7; 27:25–26; Alma 5:14; 22:15. Tabangi ang mga bata sa pagbasa sa mga bersikulo ug sa pagpangita og mga hugpong sa mga pulong nga naghulagway kon unsay ipasabut sa matawo sa Dios. Unsay buhaton sa usa ka tawo human siya matawo sa Dios? Unsaon nato sa pagpakita nga kita natawo na sa Dios?
“Pinaagi sa gagmay ug yano nga mga butang ang mga dagko nga butang ipahinabo.”
Tabangi ang mga bata nga imong gitudloan nga sila makakita nga ang pagbasa sa mga kasulatan bisan sa mubo lang nga panahon matag adlaw makahatag kanila og dagko nga mga panalangin.
Posible nga mga Kalihokan
-
Pagdrowing o pagpakita og usa ka balde. Pila ka tolo sa tubig ang gikinahanglan aron mapuno ang balde? Tabangi ang mga bata sa pagsabut nga daghang gagmay nga mga tolo ang gikinahanglan aron mapuno ang balde. Sa unsang paagi kini may kalabutan sa Alma 37:6–7? Sa unsang paagi nga ang pagbasa sa mga kasulatan sama ra sa pagdugang og ginagmay nga tolo sa tubig ngadto sa balde?
-
Dapita ang mga bata sa pagpangita diha sa Alma 37:6–9 alang sa mga panalangin nga moabut gikan sa “mga rekord,” o mga kasulatan. Isip usa ka klase, paghimo og lista sa unsay ilang nakit-an. Sa unsang paagi nga ang pagbasa sa mga kasulatan nakapanalangin sa atong mga kinabuhi? Ipakigbahin ang imong pagpamatuod mahitungod sa mga kasulatan, ug awhaga ang mga bata sa pagbuhat sa ingon.
-
Pagpakita og usa ka litrato sa Liahona (sama sa Libro sa mga Hulagway sa Ebanghelyo, nu. 68), ug hangyoa ang mga bata sa pagribyu kon unsay ilang nahinumduman mahitungod sa Liahona gikan sa 1 Nephi 16:10, 28. Tabangi ang mga bata sa pagbasa sa Alma 37:38–42. Sa unsang paagi nakatabang ang Liahona? Sa unsang paagi kini susama sa paagi nga makatabang ang mga kasulatan? Basaha og dungan ang mga bersikulo 43–47 aron pagtabang nga matubag kini nga pangutana. Dapita ang mga bata sa pagkompleto sa pahina sa kalihokan isip kabahin niini nga kalihokan.
Awhaga ang Pagkat-on diha sa Panimalay
Awhaga ang mga bata sa pagpakigbahin og usa ka rason nga sila mapasalamaton sa mga kasulatan ug dapiton ang mga sakop sa ilang mga pamilya sa pagbuhat sa ingon.
Pagpalambo sa Atong Pagtudlo
Tabangi ang mga bata nga mahimong mas maayo nga mga tigkat-on. Ang imong katuyoan sa pagtudlo sa mga bata dili lamang ang pagpaambit sa kamatuoran ngadto kanila. Kinahanglan usab nga imo silang tabangan nga mahimong makabarug pinaagi sa kinaugalingon nga paningkamot nga mga tigpangita sa kamatuoran. Sama pananglit, imbis nga yano lang nga sultihan ang mga bata sa mga kamatuoran nga makita diha sa istorya sa pagkakabig ni Alma, ikaw makaplano usab og mga kalihokan diin nianang panahona sila makadiskobre og mga kamatuoran niana nga istorya sa ilang kaugalingon.