“Hulyo 27–Agosto 2. Alma 39–42: ‘Ang Mahinungdanon nga Plano sa Kalipay,’” Dali, Sunod Kanako—Alang sa mga Indibidwal ug mga Pamilya: Basahon ni Mormon 2020 (2020)
“Hulyo 27–Agosto 2. Alma 39-42,” Dali, Sunod Kanako—Alang sa mga Indibidwal ug mga Pamilya: 2020
Babaye, Nganong Nagahilak Ikaw? ni Mark R. Pugh
Hulyo 27–Agosto 2
Alma 39–42
“Ang Mahinungdanon nga Plano sa Kalipay”
Samtang magtuon ka sa Alma 39–42, ang Espiritu Santo makahatag kanimo og mga pagtulun-an mahitungod sa mga butang nga nanghitabo sa imong kinabuhi.
Irekord ang Imong mga Impresyon
Kon ang tawo nga atong gimahal nakahimo og grabing sayop, posibling lisud ang pagpangita’g paagi unsaon sa pagtabang. Ang usa ka bahin nga naghimo sa Alma 39–42 nga bililhon kaayo mao nga kini nagpadayag kon giunsa ni Alma—nga usa ka disipulo ni Kristo kinsa sa una dunay kaugalingong grabing mga sala nga angayang hinulsulan—sa pagdumala niana nga sitwasyon. Ang anak ni Alma nga si Corianton nakahimo og sala sa pakighilawas [sekswal nga sala], ug si Alma, nga sa kanunay, misalig sa gahum sa tinuod nga doktrina miawhag og paghinulsol (tan-awa sa Alma 4:19; 31:5). Niini nga mga kapitulo, naobserbahan nato ang kaisug ni Alma sa panghimaraot sa sala ug ang iyang kalumo ug gugma alang ni Corianton. Ug sa katapusan, atong makita ang pagsalig ni Alma nga ang Manluluwas “moanhi aron sa pagkuha sa [mga sala ug] pagpahayag sa malipayon nga mga balita sa kaluwasan” niadtong mga maghinulsol (Alma 39:15). Ang katinuod nga sa katapusan si Corianton mibalik sa buhat sa pagpangalagad (tan-awa sa Alma 49:30) makahatag kanato og paglaum alang sa kapasayloan ug katubsanan kon kita “[samukon]” (Alma 42:29) sa kaugalingon natong mga sala o sa mga sala sa tawo nga atong gimahal.
Mga Ideya alang sa Personal nga Pagtuon sa Kasulatan
Ang sekswal nga sala salawayon sa panan-aw sa Ginoo.
Aron isilsil diha sa iyang anak ang kaseryuso sa sekswal nga sala [pakighilawas], mitudlo si Alma “ nga kini nga mga butang salawayon diha sa panan-aw sa Ginoo” (Alma 39:5). Nganong ang kaputli importante man kanimo? Nganong importante man kini sa Ginoo? Ang mosunod nga pagpasabut gikan ni Elder Jeffrey R. Holland tingali makatabang:
“Klaro nga usa sa Iyang labing dako nga mga kabalaka kalabut sa mortalidad mao ang giunsa sa usa ka tawo pagsulod niini nga kalibutan ug kon unsaon sa tawo paggawas niini. Nagtakda Siya og higpit kaayo nga mga limitasyon niining mga butanga.
“… Ang tawhanong kasuod gitagana alang sa mga minyo nga magtiayon tungod kay mao kini ang katapusang simbolo sa kinatibuk-ang panaghiusa, ang kinatibuk-an ug kahiusahan nga gi-orden ug gihulagway sa Dios. … Ang kaminyoon gituyo isip hingpit nga panaghiusa sa usa ka lalaki ug babaye. … Pagkahiusa kini nga ingon niana kahingpit mao nga gigamit nato ang pulong nga silyo sa pagpahayag sa mahangturon nga saad niini” (“Personal Purity,” Ensign, Nob. 1998, 76).
Hunahunaa ang tambag nga gihatag ni Alma kang Corianton diha sa Alma 39:8-15. Sa unsang paagi nakatabang kanimo ang dugang nga pagsabut sa kaimportante sa balaod sa kaputli ug kon unsaon sa pagbuntog ang tintasyon? Ang mga pagtulun-an ni Alma nagpakita usab kon unsa ka matinguhaon ang Ginoo sa pagpasaylo kanato kon maghinulsol kita ug nga anaa ang paglaum para kanatong tanan. Samtang magbasa ka sa Alma 39–42 karong semanaha, pangitaa ang ebidensya sa kalooy sa Dios. Sa unsang paagi ang kalooy sa Dios mipanalangin kanimo?
Tan-awa usab sa “Sekswal nga Kaputli,” Alang sa Kalig-on sa Kabatan-onan, 35–37.
Ako mabanhaw ug mobarug atubangan sa Dios aron mahukman.
Dihang nabantayan ni Alma nga si Corianton dunay mga pangutana mahitungod sa Pagkabanhaw, iya siyang gitudloan kon unsay mahitabo human kita mamatay. Unsa nga mga kamatuoran ang gitudlo ni Alma diha sa mga kapitulo 40–41 nga tingali makatabang ni Corianton—ug kang bisan kinsa nga nakasala—aron makasabut? Pwede nimong han-ayon ang unsay imong nakat-unan pinaagi sa pagpangita sa mga hisgutanan nga gipamulong ni Alma (sama sa kalibutan sa espiritu, pagkabanhaw, ug pagpahiuli) ug dayon sa pagsulat kon unsay gitudlo ni Alma mahitungod sa matag usa. Sa unsang paagi ang paghinumdom niini nga mga kamatuoran makatabang kanimo kon mibati ka nga gitintal o nagpangita og kapasayloan?
Makapangita ako og mga tubag sa akong mga pangutana pinaagi sa pagtuo.
Usahay magtuo kita nga ang mga propeta nakahibalo sa tubag sa matag pangutana sa ebanghelyo. Apan timan-i nga sa tibuok kapitulo 40, si Alma dunay daghang pangutana nga wala matubag mahitungod sa kinabuhi human sa kamatayon. Unsay iyang gihimo aron makakita og mga tubag? Unsay iyang gihimo dihang wala siyay mga tubag? Ikonsiderar kon sa unsang paagi ang ehemplo ni Alma makatabang kanimo diha sa imong mga pangutana bahin sa ebanghelyo.
Ang pag-ampo usa ka paagi nga makit-an nato ang mga tubag sa mga pangutana sa ebanghelyo.
Ang Pag-ula ni Jesukristo naghimong posible sa plano sa katubsanan.
Nagtuo si Corianton nga ang silot sa mga sala dili makiangayon [patas] (tan-awa sa Alma 42:1). Apan mitudlo si Alma nga adunay paagi sa paglingkawas gikan sa “kahimtang sa pagkauyamot” nga resulta sa atong sala: paghinulsol ug pagtuo diha sa Pag-ula ni Jesukristo, nga usa ka maloloy-on ug makiangayon (tan-awa sa Alma 42:15). Samtang magbasa ka sa Alma 42, pangitaa kon sa unsang paagi ang Pag-ula sa Manluluwas naghimong posible nga ikaw makadawat og kalooy nga walay “[pag]hikaw sa kaangayan” (bersikulo 25). Unsa nga mga kamatuoran ang imong nakit-an niini nga kapitulo nga nakatabang kanimo nga mobati sa Iyang kalooy?
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan kauban sa imong pamilya, ang Espiritu makatabang kanimo nga makahibalo kon unsang mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga ideya.
Alma 39:1–9
Ang imong pamilya ba nakabenipisyo gikan sa usa ka diskusyon mahitungod sa balaod sa kaputli? Kon mao, ikonsiderar ang paggamit sa mosunod nga mga kapanguhaan sigon sa panginahanglan sa imong pamilya: Alma 39:1–9; “Sekswal nga Kaputli,” Alang sa Kalig-on sa mga Kabatan-onan, 35–37; “Chastity [Kaputli],” Gospel Topics, topics.ChurchofJesusChrist.org; overcomingpornography.org; ug sa mga video nga “What Should I Do When I See Pornography ?” ug “I Choose to Be Pure ” (ChurchofJesusChrist.org). Hunahunaa unsaon nimo sa pagtabang ang imong pamilya nga makasabut sa mga panalangin sa kaputli ug sa pagkasuod diha sa kaminyoon (sama pananglit, tan-awa ang video nga “How to Talk to Your Kids about Intimacy” diha sa ChurchofJesusChrist.org).
Alma 39:9–15
Unsay atong nakat-unan gikan niini nga mga bersikulo kon unsaon sa paglikay sa sala?
Alma 42:4
Pwede kang magdula og usa ka dula diin ang mga pinirasong papel nga gisulatan sa mga kinaiya nga sama kang Kristo o mga baruganan sa ebanghelyo nga gisulat diha niini ikatag libut sa kwarto. Makita nimo kon pila ka piraso sa papel ang mapundok sa mga sakop sa pamilya sa piho nga gidugayon sa oras, dayon hisguti kon sa unsang paagi ang mga butang nga nasulat diha sa mga papel makatabang kanato nga mas mahisama sa Dios. Sa unsang paagi ang “panahon [oras] nga gihatag” kanato dinhi sa yuta susama sa panahon nga gigahin niini nga dula? Unsaon nato sa paggamit ang atong “panahon sa pagsulay” dinhi sa yuta aron mas mahisama sa Manluluwas?
Alma 42:12–15, 22–24
Tingali pwede nimong ihulagway ang relasyon tali sa kaangayan ug sa kalooy pinaagi sa paggamit og usa ka drowing sa yano nga timbangan sa paghisgot sa mga pangutana nga susama niini: Unsay mahitabo sa timbangan kon makasala kita? Unsa ang gipangayo sa kaangayan aron mabalanse ang timbangan? Sa unsang paagi nakab-ot sa Manluluwas ang gipangayo sa kaangayan ug mahimong posible ang kalooy?
Alang sa dugang nga mga ideya sa pagtudlo sa mga bata, tan-awa sa latid [outline] karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
Tutuki ang mga baruganan nga mopanalangin sa imong pamilya. Samtang mainampoon kang magtuon sa pulong sa Dios, pangutan-a ang imong kaugalingon, “Unsay akong nakita dinhi nga mahimong makahuluganon kaayo ngadto sa akong pamilya?” Pangitaa ang direksyon sa Espiritu samtang ikaw mamalandong unsaon sa pagtabang ang imong pamilya nga makadiskobre niini nga mga kamatuoran.
Kini ang Akong Anak nga Lalaki, pinaagi ni Elspeth Caitlin Young