duha ka libo nga batan-ong manggugubat

Duha ka Libo nga Batan-ong Manggugubat, pinaagi ni Arnold Friberg

Agosto 10–16

Alma 53–63

“Napanalipdan pinaagi sa Iyang Kahibulongan nga Gahum”

Ang mga istorya diha sa Alma 53–63 makatabang kanimo nga makita ang mga sangputanan sa pagsunod sa mga kamatuoran o pagsalikway niini. Samtang magbasa ka sa Alma 53–63, irekord ang mga pag-aghat ug pamalandungi ang mga paagi unsaon nimo sa pagsunod ang mga kamatuoran nga imong nakat-unan.

Irekord ang Imong mga Impresyon

Kon ikumpara sa mga sundalong Lamanite, ang “gamay nga kasundalohan” ni Helaman (Alma 56:33) nga may 2,000 ka batan-ong Nephite walay purohang molampos. Gawas sa ilang pagkadiyutay, ang mga sundalo ni Helaman “tanan … mga batan-on kaayo,” ug “sila sukad wala pa [makipag-away]” (Alma 56:46–47). Sa ubang mga paagi, ang ilang sitwasyon posibling pamilyar kanato kinsa usahay mobati nga mas daghan pa ug naglisud sa atong pagpakiggubat batok ni Satanas ug sa mga pwersa sa dautan dinhi sa kalibutan.

Apan ang sundalo ni Helaman dunay pipila ka mga bintaha batok sa mga Lamanite nga wala magkinahanglan og gidaghanon o kahanas sa militar. Si Helaman ang ilang gipili, usa ka propeta, nga mangulo kanila (Alma 53:19); “sila gitudloan sa ilang mga inahan, nga kon sila dili magduha-duha, ang Dios moluwas kanila” (Alma 56:47); ug aduna silay “hilabihan ka hugot nga pagtuo diha niana diin sila gitudloan.” Isip resulta, gipanalipdan sila pinaagi “sa milagroso nga gahum sa Dios” (Alma 57:26). Bisan og silang tanan nasamaran sa gubat, “walay usa ka kalag kanila kinsa namatay” (Alma 57:25). Mao nga kon ang kinabuhi mopaantos man sa matag usa kanato og espiritwal nga mga samad, makabaton kita og kaisug—ang mensahe sa mga sundalo ni Helaman mao nga “adunay makiangayon nga Dios, ug si kinsa ang dili magduha-duha, [mapanalipdan] pinaagi sa iyang kahibulongan nga gahum.” (Alma 57:26).

icon sa personal nga pagtuon

Mga Ideya alang sa Personal nga Pagtuon sa Kasulatan

Alma 53:10–22; 56:43–48, 55–56; 57:20–27; 58:39–40

Kon ako mogamit og pagtuo sa Dios, Siya mopanalangin kanako pinaagi sa Iyang katingalahang gahum.

Ang milagrusong mga sugilanon sama sa mga kadaugan sa batan-ong mga manggugubat ni Helaman tingali lisud sabton kay daw lisud kining tuohan. Apan ang usa ka rason nganong anaa sa mga kasulatan kana nga mga sugilanon mao ang pagpakita kanato nga kon aduna kitay pagtuo, ang Dios mohimo og mga milagro sa atong kinabuhi. Samtang magbasa ka mahitungod sa batan-ong mga manggugubat diha sa mosunod nga mga bersikulo, pangita og mga timailhan kon giunsa nila sa paggamit ang ilang pagtuo sa Dios, unsay naghimong hilabihan kalig-on sa ilang pagtuo, ug unsay naghimong posible sa milagro: Alma 53:10–22; 56:43–48, 55–56; 57:20–27; ug 58:39–40. Ang mosunod nga talaan [table] nagsugyot og usa ka paagi diin imong marekord unsay imong nakit-an.

Mga kinaiya sa mga manggugubat ni Helaman:
Unsay gitudlo diha kanila:
Unsay ilang gihimo:
Mga panalangin nga ilang nadawat:

Human sa pagtuon niini nga mga bersikulo, unsa man ang imong gibati nga nakapadasig nga buhaton aron magamit ang imong pagtuo?

Gihisgutan ni Helaman ang tahas sa mga inahan sa pagpalig-on sa pagtuo sa batan-ong mga manggugubat (tan-awa sa Alma 56:47–48; 57:20–27). Unsay mga tahas sa mga sakop sa pamilya ug sa uban sa pagpalig-on sa imong pagtuo? Unsay imong mahimo aron malig-on ang pagtuo sa imong pamilya ug mga higala?

mga batan-ong manggugubat kauban sa ilang inahan

Wala Sila Magduhaduha, ni Joseph Brickey

Alma 58:1–12, 31–37; 61

Makapili ra ko nga mohunahuna sa pinamakaayo mahitungod sa uban ug dili masilo.

Si Helaman ug si Pahoran parehong dunay maayong mga rason nga masilo. Si Helaman wala makadawat og igong suporta alang sa iyang mga sundalo, ug si Pahoran napasanginlan ni Moroni sa wala paghatag niana nga suporta (tan-awa sa Alma 58:4–9, 31–32; 60). Unsay imong nahunahuna mahitungod sa ilang mga reaksyon diha sa Alma 58:1–12, 31–37 ug sa Alma 61? Unsaon nimo sa pagsunod ang ilang ehemplo sa susama nga mga sitwasyon?

Si Elder David A. Bednar mitudlo: “Sa laing paagi ug panahon, adunay tawo niini nga Simbahan nga mohimo o mosulti og dili maayo. Ang ingon niana nga panghitabo mahitabo gayud sa matag usa kanato—ug mahitabo kini dili lang kay kausa lamang. … Kamo ug ako dili makapugong sa intensyon o batasan sa ubang mga tawo. Apan, kita ang modeterminar kon unsaon nato paglihok. Palihug hinumdumi nga kamo ug ako mga tinugyanan nga gihatagan og moral nga kabubut-on, ug makapili kita nga dili masilo” (“Ug Walay Makapasilo Kanila,” Liahona, Nob. 2006, 91).

Tan-awa usab sa Mga Proverbio 16:32; Moroni 7:45; David A. Bednar, “Maaghup ug Mapaubsanon sa Kasingkasing,” Liahona, Mayo 2018, 30–33.

icon sa pagtuon sa pamilya

Mga Ideya alang sa Pamilya nga Pagtuon sa Kasulatan ug Family Home Evening

Samtang magbasa ka sa mga kasulatan kauban sa imong pamilya, ang Espiritu makatabang kanimo nga makahibalo kon unsang mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga ideya.

Alma 53:10–17

Ang mga Anti-Nephi-Lehi nakigsaad nga dili na gayud mopaagas pa og dugo. Unsa nga mga pakigsaad ang atong gihimo uban sa Dios? Unsa may atong nabasa diha sa Alma 53:10–17 nga nagdasig kanato aron mahimo kitang mas matinud-anon sa atong mga pakigsaad?

Alma 53:20–21

Sa unsang paagi kita mas mahisama sa batan-ong mga manggugubat ni Helaman? Tingali makatabang ang paghisgot unsay ipasabut sa pipila ka mga pulong niini nga mga bersikulo; sama pananglit, unsay ipasabut sa pagka-“walay kahadlok … [tungod] sa pagkakusgan ug pagkaabtik”? Unsay ipasabut “sa paglakaw nga matarung sa atubangan sa [Dios]”?

Alma 58:9–11, 33, 37

Sa mga panahon sa dakong panginahanglan, miduol ba kita sa Langitnong Amahan, sama sa gihimo sa mga sundalong Nephite? Giunsa Niya sa pagtubag ang ilang mga pag-ampo? Giunsa Niya sa pagtubag ang atong mga pag-ampo?

Alma 61:2, 9, 19

Unsay atong nakat-unan gikan ni Pahoran kon unsaon sa pagsanong kon napasanginlan kita?

Alma 62:39–41

Aniay leksyon nga gamitan og butang [object lesson] nga makatabang sa imong pamilya nga makasabut nga pwede ra kitang mopili nga mahimong “tig-a” o “[mahumok]” pinaagi sa atong mga pagsulay: Pagbutang og dili luto nga patatas ug dili luto nga itlog diha sa kaldero nga may nagbukal nga tubig. Ang patatas ug ang itlog nagrepresentar kanato, ug ang tubig nagrepresentar sa mga pagsulay nga atong giatubang. Samtang gipabukalan ang patatas ug ang itlog, mahino nimong hisgutan ang mahitungod sa pipila ka pagsulay nga giatubang sa imong pamilya. Unsa ang pipila ka lain-laing paagi sa pagsanong sa mga pagsulay nga susama niini? Sumala sa Alma 62:41, sa unsang paagi ang atong mga pagsanong sa mga pagsulay makaapekto kanato? Human ang patatas ug ang itlog eksakto na ang pagkaluto, hiwaa ang patatas ug buaka ang itlog aron makita nga ang susama nga “pagsulay” mopahumok sa patatas ug mopagahi sa itlog. Unsay pweding buhaton sa pamilya aron masiguro nga ang atong mga pagsulay maghimo natong mapaubsanon ug magdala kanato paduol sa Dios?

Alang sa dugang nga mga ideya sa pagtudlo sa mga bata, tan-awa ang latid [outline] niini nga semana diha sa Dali, Sunod Kanako—Alang sa Primary.

Pagpalambo sa Atong Pagtudlo

Tuguti ang mga bata nga mopadayag sa ilang pagkamamugnaon. “Kon imong dapiton ang [imong] mga anak sa pagmugna og usa ka butang nga may kalabutan sa usa ka baruganan sa ebanghelyo, imo silang gitabangan nga mas makasabut sa baruganan, ug imo silang gihatagan og usa ka mahikap nga pahinumdom sa unsay ilang nakat-unan. … Tugoti sila sa paghimo, pagdrowing, pagkolor, pagsulat, ug pagmugna” (Pagtudlo sumala sa Pamaagi sa Manluluwas, 25).

duha ka libo nga batan-ong manggugubat

Tinuod Kini, Sir, Ang Tanan Anaa ug Gisubay, pinaagi ni Clark Kelley Price