Paghulagway kang Nephi diha sa tore nga tanaman pinaagi ni Jerry Thompson

Agosto 24–30

Helaman 7–12

“Paghinumdom sa Ginoo”

Si Nephi, Lehi, ug ang uban dunay “daghang pagpadayag matag adlaw” (Helaman 11:23). Ang kanunay nga pagpadayag dili lang para sa mga propeta—anaa usab kini diha nimo. Ang pagrekord sa imong mga impresyon makatabang nga ikaw mas kanunayng makadawat og pagpadayag.

Irekord ang Imong mga Impresyon

Ang amahan ni Nephi, nga si Helaman, miawhag sa iyang mga anak nga lalaki nga “hinumdumi, hinumdumi”: gusto siya nga mahinumdom sila sa ilang mga katigulangan, mahinumdom sa mga pulong sa mga propeta, ug labaw sa tanan sa paghinudom sa “atong Manunubos nga mao si Kristo” (tan-awa sa Helaman 5:5–14). Klaro nga si Nephi nahinumdom, kay kini man gihapon ang mensahe nga iyang gipamahayag mga tuig human niadto nga “walay kaluya” (Helaman 10:4) ngadto sa katawhan. “Sa unsa nga paagi nga kamo nahikalimot sa inyong Dios?” (Helaman 7:20), nangutana siya. Ang tanang paningkamot ni Nephi—pagsangyaw, pag-ampo, paghimo og mga milagro, ug pagpangaliyupo sa Dios alang sa usa ka gutom—mao ang mga paningkamot sa pagtabang sa katawhan nga mobalik sa Dios ug sa paghinumdom Kaniya. Sa daghang paagi, ang paghikalimot sa Dios usa ka dakong suliran gani labaw pa kay sa wala pagkaila Kaniya, ug sayon ra ang paghikalimot Kaniya kon ang atong mga hunahuna mabalda “sa mga kawang nga butang dinhi sa kalibutan” ug nasalipdan sa sala (Helaman 7:21; tan-awa usab sa Helaman 12:2). Apan, sigon sa makita sa pagpangalagad ni Nephi, dili gayud ulahi ang paghinumdom ug “[pag]balik … ngadto sa Ginoo nga inyong Dios” (Helaman 7:17).

Mga Ideya alang sa Personal nga Pagtuon sa Kasulatan

Helaman 7–11

Ang mga propeta mopadayag sa kabubut-on sa Dios.

Dunay daghang propeta nga gihulagway sa tibuok Basahon ni Mormon, apan ang Helaman 7–11 maoy usa ka maayo gayud nga dapit sa pagkat-on kon unsa ang propeta, unsay iyang gihimo, ug kon sa unsang paagi nato dawaton ang iyang mga pulong. Samtang magbasa ka niini nga mga kapitulo, tan-awa og maayo ang mga gibuhat, gihunahuna, ug mga pagpakigsulti ni Nephi sa Ginoo. Sa unsang paagi ang pangalagad ni Nephi makatabang kanimo aron mas masabtan ang tahas sa mga propeta sa atong panahon? Aniay pipila ka mga ehemplo. Unsa pay lain nimong nakit-an?

Helaman 7:17–22:Ang mga propeta mosangyaw sa paghinulsol ug mopasidaan sa mga sangputanan sa sala.

Helaman 7:29; 9:21–36:Ang mga propeta mahibalo pinaagi sa pagpadayag gikan sa Dios kon unsay gikinahanglan nga mabatian sa katawhan.

Helaman 10:7:Ang mga propeta gihatagan sa gahum sa pagsilyo dinhi sa yuta ug sa langit (tan-awa usab sa Mateo 16:19; D&P 132:46).

Helaman 10:4–7, 11–12:

Sa unsang paagi kini nga mga bersikulo makaapekto kon unsay imong gibati mahitungod sa buhi nga propeta? Unsa man ang Iyang gitudlo bag-o lang? Unsay imong gihimo aron makapaminaw ug makasunod sa iyang mga direksyon?

Helaman 9–10

Ang mga timailhan ug mga milagro makatabang apan dili igo nga makamugna og pagtuo nga mohangtud.

Kon ang mga timailhan igo na nga makausab sa kasingkasing sa usa ka tawo, niana ang tanang Nephite nakabig na unta pinaagi sa talagsaong mga timailhan nga gihatag ni Nephi diha sa Helaman 9. Apan hinoon, nahitabo ang “panagbahin diha sa mga katawhan” (Helaman 10:1) tungod kay daghan kanila “mipadayon sa pagpatig-a sa ilang mga kasingkasing” (Helaman 10:15). Sa kasagaran sa unsang paagi mosanong ang mga dautan sa mga timailhan ug sa mga milagro? (tan-awa sa Helaman 10:12–15; tan-awa usab sa 3 Nephi 2:1–2). Unsa ang peligro kon ang mga timailhan maoy himoong pundasyon sa usa ka pagpamatuod? (tan-awa sa “Timailhan,” Giya ngadto sa mga Kasulatan.

Helaman 10:2–4

Ang pagpamalandong magdapit og pagpadayag.

Kon nakasulay ka nga mobati nga gisakit, nabalaka, o nalibug, tingali makakat-on ka og importanting leksyon gikan sa ehemplo ni Nephi Helaman 10:2–4. Unsay iyang gihimo dihang gibati niya ang “hilabihan nga kasubo”? (bersikulo 3).

Si Presidente Henry B. Eyring mitudlo, “Kon kita mamalandong, atong gidapit ang pagpadayag pinaagi sa Espiritu. Ang pagpamalandong, alang kanako, mao ang paghunahuna ug pag-ampo nga akong buhaton human sa mainampingon nga pagbasa ug pagtuon sa mga kasulatan” (“Pagserbisyo uban sa Espiritu,” Liahona, Nob. 2010, 60). Sa unsang paagi kaha ikaw makamugna og usa ka kinaiya sa pagpamalandong? Aron mabasa ang mahitungod sa usa ka paagi nga makanunay ang pagpamalandong sa pulong sa Dios, tan-awa ang mensahe ni Brother Devin G. Durrant “Ang Akong Kasingkasing Namalandong Kanila sa Kanunay” (Liahona, Nob. 2015, 112–15).

Tan-awa usab sa Mga Proverbio 4:26; Lucas 2:19; 1 Nephi 11:1; 2 Nephi 4:15–16; 3 Nephi 17:3; Moroni 10:3; D&P 88:62.

Helaman 12

Gusto sa Ginoo nga ako mahinumdom Kaniya.

Diha sa Helaman 12, si Mormon, kinsa nagpamubo sa rekord, mi-summarize og pipila ka mga leksyon nga atong makat-unan gikan sa sugilanon ni Nephi diha sa nangagi nga mga kapitulo. Ikonsiderar ang paggamit niini nga summary isip oportunidad aron masusi ang kaugalingon nimong kasingkasing. Pwede gani nga maghimo ka og lista sa mga butang nga giingon ni Mormon nga maoy hinungdan nga ang katawhan nakalimot sa Ginoo. Unsay nakatabang nimo sa paghinumdom Kaniya? Unsa nga mga kausaban diin nadasig ka nga mohimo basi sa unsay imong nakat-unan?

Mga Ideya alang sa Pamilya nga Pagtuon sa Kasulatan ug Family Home Evening

Samtang magbasa ka sa mga kasulatan kauban sa imong pamilya, ang Espiritu makatabang kanimo nga makahibalo kon unsang mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga ideya.

Helaman 7–9

Unsa nga mga pagkaparehas ang atong makita tali sa mga butang nga gibuhat ni Nephi ug sa unsay gipangbuhat sa mga propeta karon? Unsa may gitudlo sa atong propeta karon? Tingali pwede nimong gamiton ang pipila ka bag-ong tambag nga gihatag sa propeta ug hisgutan diha sa pamilya ang mga paagi nga mas masunod kini.

Helaman 10:4–5, 11–12

Giunsa ni Nephi sa pagpakita nga nagtinguha siya sa kabubut-on sa Ginoo kay sa iyang kaugalingon? Unsaon nato sa pagsunod ang iyang ehemplo? Unsa ang ubang mga paagi nga ang atong pamilya mas magtinguha sa kabubut-on sa Ginoo?

Helaman 11:1–16

Unsa may gitinguha ni Nephi ug unsa may iyang gihimo mahitungod niini? Unsa may atong nakat-unan mahitungod sa pag-ampo gikan sa ehemplo ni Nephi?

Helaman 11:17–23

Unsa may atong nakat-unan mahitungod sa igsoon ni Nephi nga si Lehi, diha sa Helaman 11:17–23? Kinsa man ang atong nailhan nga nagpakabuhing matarung nga wala makadawat og daghang pasidungog?

Helaman 12:1–6

Makahunahuna ka ba og usa ka leksyon nga gamitan og butang nga ikapakita nga imong magamit aron sa pagtabang sa imong pamilya nga makasabut unsa ang ipasabut sa “pagkadili makanunayon”? Sama pananglit, pwede kang magdapit og usa ka sakop sa pamilya nga mosulay sa pagbalanse og usa ka butang diha sa iyang ulo. Pwede dayon nimong dapiton ang mga sakop sa pamilya nga mangita diha sa Helaman 12:1–6 sa mga rason nganong ang mga tawo dili makanunayon sa pagsunod sa Ginoo. Sa unsang paagi kita magpabiling makanunayon sa espiritwal nga paagi?

Alang sa dugang nga mga ideya sa pagtudlo sa mga bata, tan-awa sa latid [outline] karong semanaha diha sa Dali, Sunod Kanako—Alang sa Primary.

Pagpalambo sa Atong Pagtudlo

Ribyu. Aniay usa ka ideya sa pagtabang sa mga sakop sa pamilya aron mahinumdom sa mga kasulatan nga ilang nakat-unan: Pagpili og bersikulo nga sa imong tan-aw makahuluganon, ug i-display kini diha sa imong balay diin ang mga sakop sa pamilya kanunay nga makakita niini. Dapita ang ubang mga sakop sa pamilya nga magpuli-puli sa pagpili og kasulatan nga i-display, ug hisgutan kini kon magpundok na ang pamilya, sama sa pagpangaon o sa pamilya nga pag-ampo.

© Ang Basahon ni Mormon alang sa mga Batan-ong Tigbasa, Seantum—Ang Mamumuno Nahibaloan, ni Briana Shawcroft; dili pakopyahan